День памяти:
8 / 21 июля
Тропарь, гл.4
Страсти плотски́я умертви́вши постом и молитвою, нетленный венец от Христа восприяла еси, блаженная Сунниво, и, яко а́гница чистая, на земли́ непорочно поживши, на Небеси с лики дев ликуеши; темже молим тя: молися ко Господу спастися душа́м нашим.
Кондак, гл.3
Яко до́блестная подвижница и христолюбивая дева явилася еси, Сунниво, не устрашилася еси ярости нечестивых, но, любовию ко Христу укрепляема, претерпела многия скорби истины ради. Сего ради взываем ти: радуйся, невесто Христова, Сунниво славная.
Кондак 1
Избра́нной деве и земли́ Норвежския просветительнице, дивней подвижнице и предстательнице усердней, похвалы приносим святей Сунниве. Ты же, угоднице Христова, яко имущая дерзновение ко Господу, от всяких бед и скорбей свободи нас, зовущих ти: Радуйся, Сунниво, невесто Христова и земли́ Норвежския молитвеннице.
Икос 1
Ангел во плоти явилася еси, святая Сунниво, от мла́да возлюбивши девство и чистоту, мирскую славу и богатство отвергла еси и Господу усердно послужила еси. Сего ради воспеваем ти таковы́я похвалы:
Радуйся, благородная о́трасль, от христианских царей взрасти́вшаяся.
Радуйся, царское достоинство любве ради ко Христу оставившая.
Радуйся, чистоты сосуде и страстей победительнице.
Радуйся, идолослужение посрамившая и истину явившая.
Радуйся, пустыню в пристанище трудов своих претворившая.
Радуйся, отечество земное оставившая, да Небесное Царство наследуеши.
Радуйся, мрак неверия молитвами твоими разгнавшая.
Радуйся, северныя стра́ны светом веры просветившая.
Радуйся, Сунниво, невесто Христова и земли́ Норвежския молитвеннице.
Кондак 2
Видевше идольскую тьму в стране Норвежстей, возгореся сердце твое пламенем любви Христовы, блаженная, и устремилася еси со спутники твоими в страну сию, да та́мо послу́жиши Господеви, поя Ему: Аллилуия.
Икос 2
Разумом Божественным от юности просвещаема была еси, Сунниво, и Дух Святый наставляше тя на всякое доброе дело; сего ради, отложивше мудрование мира сего, избрала еси путь тесный и скорбный. Темже воспеваем ти си́це:
Радуйся, премудрости Божественныя испо́лненная.
Радуйся, светом истины ду́ши многих озарившая.
Радуйся, нечестие языческое возненавидевшая.
Радуйся, подвигом веры сердце свое укрепившая.
Радуйся, Христа паче родителей и сродников возлюбившая.
Радуйся, яко любве ради ко Господу странствовала еси.
Радуйся, яко путь страдания избрала еси.
Радуйся, яко добрым водительством многих ко спасению наставила еси.
Радуйся, Сунниво, невесто Христова и земли́ Норвежския молитвеннице.
Кондак 3
Силою Божиею ограждаема, богомудрая Сунниво, не устрашилася еси безбожных во́ев, ни страха изгнания, ни смерти, но непоколебимо уповати на Господа научала еси сподвижников твоих, воспевающих Ему победную песнь: Аллилуия.
Икос 3
Иму́ще крепость духа и веру нелицемерну, понесла́ еси крест изгнания и страдания, Сунниво, и сподвижники, с тобою бышия, укрепляла еси словом и подвигом добрым. Темже восхвалям тя си́це:
Радуйся, светильниче надежды и терпения.
Радуйся, наставнице и путеводительнице ко спасению.
Радуйся, венец от Христа прияти вожделе́вшая.
Радуйся, в терпении древним мученицам подобная.
Радуйся, яко не возроптала еси в ско́рбех изгнания.
Радуйся, яко претерпела еси страдания с радостию.
Радуйся, Господу усердно молившаяся.
Радуйся, немощны́я духом укреплявшая.
Радуйся, Сунниво, невесто Христова и земли́ Норвежския молитвеннице.
Кондак 4
Буря гнева язычников воста́ на тя, страстотерпице святая Сунниво, воевода бо нечестивый повеле убити тя и сподвижников твоих. Ты же, не устрашившися, веру истинную исповедала еси даже до смерти, взывающи Богу: Аллилуия.
Икос 4
Слышавше вернии о страда́льчестей кончине твоей, пла́кахуся, яко светильник их угасе́ во тьме; но ты, Сунниво, яко жертва богоугодная, предстала еси пред Господем с ликом девственным. Темже возсылаем ти похвалы сия:
Радуйся, яко страдания твоя бысть благословением земли́ Норвежския.
Радуйся, яко не устрашилася еси прещения вражия.
Радуйся, за Христа жизнь свою положившая.
Радуйся, нетленный венец от Него восприявшая.
Радуйся, с верными во страдании до конца пребывшая.
Радуйся, молитвою твоею их укреплявшая.
Радуйся, ликованием Ангелов на Небесех сре́тенная.
Радуйся, смертию твоею тьму языческую победившая.
Радуйся, Сунниво, невесто Христова и земли́ Норвежския молитвеннице.
Кондак 5
Богоугодное житие твое, Сунниво, яко светильник неугасимый озаряет и доныне пределы Скандинавския, взыскующих истины приводя ко Христу, Емуже вопием: Аллилуия.
Икос 5
Видим тя, святая Сунниво, яко звезду светозарную, возсиявшую в темней стране неверия: ты бо молитвами твоими озаряеши ду́ши светом Христовым. Сего ради славим тя славосло́вии си́ми:
Радуйся, светильниче Евангельскаго света.
Радуйся, озаряющая сердца́ верных.
Радуйся, звездо духовная, над Норвегией возсиявшая.
Радуйся, сто́лпе нерушимый православныя веры.
Радуйся, путь в Царство Небесное нам показу́ющая.
Радуйся, чудес множество по смерти совершившая.
Радуйся, радости источниче сущим в печали.
Радуйся, покровительнице вдов, сирот и гонимых.
Радуйся, Сунниво, невесто Христова и земли́ Норвежския молитвеннице.
Кондак 6
Проповедница веры истинныя, яко апостол во стране северней явилася еси, Сунниво, страданием же твоим Церковь Христова утверждается, поюще вку́пе с тобою: Аллилуия.
Икос 6
Возсияла еси светом добродетелей и духом кротости, святая Сунниво, и отечество земное любве ради Божией оставивши, возлюбила еси житие подвижническое. Сего ради воспеваем ти:
Радуйся, яко возлюбила еси Христа паче всякаго бла́га земнаго.
Радуйся, богатства мира сего ни во чтоже вмени́вшая.
Радуйся, яко благовестием спасла еси многия ду́ши.
Радуйся, яко во смирении и любви прослави тя Господь.
Радуйся, сосуде избра́нный Духа Святаго.
Радуйся, звездо тихая, ко Христу веду́щая.
Радуйся, светом добрых дел путь наш озаряющая.
Радуйся, пред Господем за верных усердная хода́таице.
Радуйся, Сунниво, невесто Христова и земли́ Норвежския молитвеннице.
Кондак 7
Хотя спасти душу свою, подвижнице предивная, крест свой безропотно до конца понесла еси, Христа Спасителя непрестанно в помощь призывающи, да пребываеши во славе Его на Небесех, воспевающи ангельскую песнь: Аллилуия.
Икос 7
Новую дивную жизнь явила еси миру, Сунниво: житие целомудренное, дерзновение молитвенное, в покое Господнем пребывание, в пещере уединение сокровенное, Единому же Богу ве́домое. Темже ублажаем тя:
Радуйся, яко пустыню вместо царскаго чертога избрала еси.
Радуйся, яко уединением душу свою к Богу вознесла еси.
Радуйся, крепости и мужества образе совершенный.
Радуйся, Духа Святаго жилище.
Радуйся, свете жизни непорочныя.
Радуйся, всех к покаянию приводя́щая.
Радуйся, юных во благочестии наставнице.
Радуйся, за народ свой хода́таице непрестанная.
Радуйся, Сунниво, невесто Христова и земли́ Норвежския молитвеннице.
Кондак 8
Странница и отшельница на земли́ бывши, стяжала еси отечество на Небесех, яко Ангел во плоти пожи́вши, и ныне воспеваеши со всеми святыми: Аллилуия.
Икос 8
Всякое естество удивися терпению твоему и любви: ты бо дева юная су́щи, мужескую крепость явила еси, и за имя Христово вся претерпела еси. Темже возносим ти пение сие:
Радуйся, дево чистая и подвижнице дивная.
Радуйся, образе целомудрия и кротости.
Радуйся, светильниче, во тьме язычестей возсиявый.
Радуйся, носительнице мира и благодати.
Радуйся, чистоты сердечныя хранительнице.
Радуйся, совершенства христианскаго наставнице.
Радуйся, яко чудотворениями прослави тя Господь.
Радуйся, яко ты еси покров, над народом северным воздвигнутый.
Радуйся, Сунниво, невесто Христова и земли́ Норежския молитвеннице.
Кондак 9
Вси Ангели удивишася подвигу твоему, Сунниво, яко плоть немощну́ю духом крепким победила еси, и в пещере душу свою Христу предала еси, поюще Ему со умилением: Аллилуия.
Икос 9
Вети́и многовеща́ннии не могут довле́юще восхвалити тя, святая Сунниво, яко ты, от рода благороднаго бывши, в нищете и смирении пожила еси, и венец от Христа прияла еси. Темже славим тя си́це:
Радуйся, царскаго рода цвете духовный.
Радуйся, нищету Христа ради добровольно приемшая.
Радуйся, терпением и кротостию возсиявшая.
Радуйся, венец правды на главу свою от Бога приявшая.
Радуйся, дивная наставнице праведных дев.
Радуйся, источниче мира и тишины.
Радуйся, образ святаго жития являющая.
Радуйся, лучу света Небеснаго, над Норвегией сияющий.
Радуйся, Сунниво, невесто Христова и земли́ Норежския молитвеннице.
Кондак 10
Спасти хотя́ ду́ши, во тьме идолослужения погибающия, воздвиже тя Господь, преславная Сунниво, во стране Норвежстей, яко светильник светозарный, да всем житием твоим являеши истину, взывая: Аллилуия.
Икос 10
Стена еси христианом, святая Сунниво, помощница в скорбех и заступница в бедах. Сего ради молим тя: не остави нас, притекающих под твое покровительство и зовущих ти:
Радуйся, утверждение веры в стране Норвежстей.
Радуйся, милосердая мати си́рым и убогим.
Радуйся, чудес струя́ неизсякаемая.
Радуйся, в болезнех и печалех утешение.
Радуйся, во искушениих помощнице теплая.
Радуйся, о страждущих хода́таице неусыпная.
Радуйся, надеждо всех к тебе притекающих.
Радуйся, о́строва Селья и всея страны́ покровительнице.
Радуйся, Сунниво, невесто Христова и земли́ Норвежския молитвеннице.
Кондак 11
Песнь хвалебную приносим ти, святая Сунниво, с любовию взирающе на житие твое; ты же, молися ко Господу, да и мы научи́мся достойно воспевати Ему: Аллилуия.
Икос 11
Светоно́сная бысть кончина твоя, всехвальная Сунниво, во славе венча́нная от Царя Небеснаго; мы же сие ве́дуще, и исцеления и милости от тебе приемлюще, благодарственно взываем:
Радуйся, яко смертию твоею жизнь вечную обрела еси.
Радуйся, яко страдания твоя быша источником благодати.
Радуйся, яко Господь место подвигов твоих чудесы прослави.
Радуйся, яко во гробе не скрыся свет добродетелей твоих.
Радуйся, яко на место подвига твоего доныне притекают людие.
Радуйся, яко от Бога прославлена еси на Небеси и на земли́.
Радуйся, надеждо кающихся грешников.
Радуйся, ко Христу приведшая многих.
Радуйся, Сунниво, невесто Христова и земли́ Норвежския молитвеннице.
Кондак 12
Благодати и благих дел исполнена, течение земное страдальчески скончала еси, Сунниво, и ныне пред Престолом Царя Славы с лики мудрых дев предстоящи, вопиеши Ему ангельскую песнь: Аллилуия.
Икос 12
Воспевающе подвиги твоя страдальческия и святое житие твое, величаем тя, Сунниво блаженная, ты же, не престай молитися о нас, грешных, взывающих ти:
Радуйся, сосуде избра́нный любви Божия.
Радуйся, столпе твердый посреде мира мятежнаго.
Радуйся, дивную силу Божию в немощи телесней явившая.
Радуйся, верным даро́в духовных подательнице.
Радуйся, украси́вшая землю Норвежскую светом Христовым.
Радуйся, наставившая народ сей на путь правды.
Радуйся, яко днесь прославляема еси по всей земли́.
Радуйся, яко к тебе притекают страждущии и обремене́ннии.
Радуйся, Сунниво, невесто Христова и земли́ Норвежския молитвеннице.
Кондак 13
О святая угоднице Божия Сунниво, приими́ малое сие моление наше и молися ко Господу за ны, да спасет ду́ши наша, да сподобимся с тобою воспевати дивному во святых Своих Богу: Аллилуия.
( Этот кондак читается трижды, затем икос 1 и кондак 1)
Молитва
О святая угоднице Христова Сунниво, скорая помощнице в ско́рбех и ну́ждах притекающих к тебе, не презри прошения наша, с верою тебе приноси́мыя. Моли Господа, да простит нам вся согрешения, да утвердит нас в вере православней, да дарует мир стране нашей и свет благочестия всем живущим в ней, да укрепит юныя в чистоте и правде, старцы - в терпении, всех же - в любви к Богу и ближнему. За Церковь Святую заступись, да сохранит ю Господь в единении, от всякия вражды, ересе́й и расколов. О страстоте́рпице дивная и предстательнице усердная, не престай молитися за нас ко Христу Богу, да сподобимся вку́пе с тобою в Царствии Небеснем славити Единаго в Троице Бога, Отца и Сына и Святаго Духа, ныне и присно и во веки веков. Аминь.
ЖИТИЕ
Святая Суннива родилась в X веке, и была ирландской принцессой. По преданию, будучи юной девушкой, Суннива бежала, когда король-язычник, намеревавшийся взять ее в жены, вторгся в ее королевство. Она вместе со своим братом святым Альбаном и несколькими спутниками сели в маленькую лодку без весел, полностью вверив свою судьбу Промыслу Божию.
Наконец, они приплыли на остров Селья у побережья Норвегии, и там поселились в пещере, где подвизались по-монашески. Но враг рода человеческого настроил против них местных язычников. Они пожаловались на пустынников королю Хакону, обвинивши их в краже овец. Правитель двинулся к месту подвигов подвижников со своей дружиной. Увидев их приближение и опасаясь, что язычники могут над ней надругаться и взять в плен, Суннива со своими сподвижниками, находясь в пещере, стала горячо молиться, чтобы Бог помог ей сохранить целомудрие. В ту же минуту своды пещеры обрушились и завалили вход, а души страдальцев вознеслись в Царство Небесное.
Но, как и в случае со святыми отроками Ефесскими, святость этих мучеников не могла быть скрыта навечно. Многие видели таинственный неземной свет над пещерой, в которой они были погребены. Это видение со временем привлекло такое внимание, что в 996 году король Олаф Трюггвасон лично решил приехать и разобраться. Там, в присутствии святителя Зигфрида, были обретены совершенно нетленные честные мощи Суннивы.
На острове Селья, недалеко от места упокоения святой Суннивы, был построен монастырь. Во второй половине XII века ее чудотворные мощи, прославившиеся многими чудесами исцеления, были перенесены в Берген и положены в кафедральном соборе Христа Спасителя. Там святая Суннива продолжила обильно изливать благодатную помощь. Дважды своими молитвами она спасала город от подступавших опустошительных пожаров. Так святая дева Суннива навсегда стала почитаться покровительницей этого города, и доныне остается одной из самых любимых святых в Норвегии.
В наши дни на остров Селья до сих пор совершаются массовые паломничества. Верующие посещают руины монастыря святой Суннивы, кафедрального собора, и ее пещеру.
По благословению
митрополита Херсонского и Таврического Иоанна