КАНОН

ПРЕД БОЖЕСТВЕННОЙ СЛУЖБОЙ

СВЯТЕЙШИЯ ЕВХАРИСТИИ

АРХИЕРЕЕМ ИЛИ ИЕРЕЕМ ЧТОМЫЙ

Глас 6

Песнь 1

Ирмос: Се́ченое сече́тся море Чермно́е, волнопита́емая же изсуша́ется глубина́, та́яжде купно безору́жным бывши проходи́ма и всеору́жным гроб. Песнь же богокрасная воспевашеся: славно прославися Христос, Бог наш.

Сердце чисто созижди во мне, Боже, и дух прав обнови во утробе моей.

Благодатию Своею призвавый мя, недостойнаго, и сподобивый лику служителей Твоих сопричте́ну быти, ныне очисти мя, да, воздохну́в от се́рдца, милостей Твоих причастник явлюся и воспою: славно прославися Христос, Бог наш.

Не отвержи мене от лица Твоего и Духа Твоего Святаго не отыми от мене.

Лицы Ангельстии со страхом предстоят Престолу Твоему и, крила́ми огневи́дными закрыва́ющеся, трепе́щут святыни Твоея; аз же, грешный, како дерзну ру́це свои простре́ти и вместообра́зных косну́тися и воспети Ти: славно прославися Христос, Бог наш.

Слава: Агнче Божий, грех мира взе́мый и мене ради на Кресте ру́це распростры́й, очисти мои ру́це и устне́, да неосужденно сподоблюся безкровное священнодействие совершити и воспети Ти: славно прославися Христос, Бог наш.

И ныне: Глаголом силы Своея Содержа́й вселенную всю во утробу Твою сни́де, Всепетая; Сего умоли, Владычице, да неосужденно предстану святейшей трапе́зе и Ве́чери Его Тайныя причастник явлюся и ку́пно с лики святых воспою: славно прославися Христос, Бог наш.

Песнь 3

Ирмос: Господь, Сый, всех и Зижди́тель Бог, созда́нное, Безстра́стный, обнища́в, Себе соедини́, и Пасха, за яже хотя́ше умрети, Сам, Сый, Себе предпожре́: ядите, - вопия́, - Тело Мое и верою утвердитеся.

Сердце чисто созижди во мне, Боже, и дух прав обнови во утробе моей.

Огнеообра́зная Божественнаго Духа благодать священнодействи́тели апостолы яви, очищающи и освящающи избра́нныя ученики; то́южде очисти,  освяти и просвети мя, да неосужденно предстану святей трапе́зе и, прии́м Чашу, возопию́ с любовию: ядите Тело Бога моего и верою утвердитеся.

Не отвержи мене от лица Твоего и Духа Твоего Святаго не отыми от мене.

Силою свыше облеки́й апостолы, ныне мя, недостойнаго, во всеору́жие благодати Твоея облецы́, Господи, да очище́н, просвеще́н и освяще́н неосужденно приступити дерзну́ службе сей всетаи́нственней:                   ядите, - вопия́, - Тело Бога моего и верою утвердитеся.

Слава: Лише́ннаго правды всякия и паче всех недостойнаго приими́ мя, Боже, и не отрини мене от о́трок Твоих, но сподоби до последняго издыха́ния Ти служити и воспоминание творити смерти Твоея и Воскресение проповедати: ядите, - вопия́, - Тело Бога моего и верою утвердитеся.

И ныне: Очисти мя, Спасе, Пречистыя Матере Твоея молитвами, и Тоя́ хода́тайством сподоби неосужденно предстати святей Твоей трапе́зе и священнодействовати Тайны Твоя и всем верным Твоим сия препода́ти: ядите, - вопия́, - Тело Бога моего и верою утвердитеся.

Песнь 4

Ирмос: Провидев пророк тайну Твою неизрече́нную, Христе, провозгласи́: положил еси твердую любовь крепости, Отче Щедрый: Единороднаго бо Сына, Благи́й, очищение в мир послал еси.

Сердце чисто созижди во мне, Боже, и дух прав обнови во утробе моей.

Воспоминая вся, яже о нас бывшая от домострои́тельства Твоего нам явле́нная, и грядущая бла́га верою созерца́я, Твоя от Твоих Ти принести дерзаю и на великия милости Твоя уповаю, Единороднаго бо Тя, Сына, Благи́й очищение в мир послал еси.

Не отвержи мене от лица Твоего и Духа Твоего Святаго не отыми от мене.

Егда прии́м хлеб на Ве́чери, в соли́ле ру́ку омочил еси ку́пно со предателем, го́ресть во грехе пребывания сим зна́менуя, егоже части мя избави и от грех моих очисти, да сподоблюся без осуждения Ти службу вознести́, Единороднаго бо Тя, Сына, Благи́й очищение в мир послал есть.

Слава: Небеса приклонил еси и к человеком низше́л еси, да горе́ возведе́ши древле в тление низпа́дшее естество земнородных. Сего ради нам даровал еси Тело Твое Пребожественное и Кровь Твою Всечестну́ю, да их прича́шщеся, живота наследие нетленнаго обрету́, Единороднаго бо Тя, Сына, Благи́й очищение в мир послал есть.

И ныне: Но́зе умыл еси на Ве́чери благовестником, путь добре́йший всем смирения показу́я; темже покаянием омый скверну гордыни моея молитв ради Пречистыя Твоея Матере, Единороднаго бо Тя, Сына, Благи́й очищение в мир послал есть.

Песнь 5

Ирмос: Союзом любве связу́еми апостоли, влады́чествующему всеми себе Христу возло́жше, кра́сны ноги очища́ху, благовеству́юще всем мир.

Сердце чисто созижди во мне, Боже, и дух прав обнови во утробе моей.

Архиерею И́стиннейший и Агнче Всенепорочный, принося́й  и приноси́мый, прие́мляй и раздава́емый, удовли́ мя силою Святаго Твоего Духа предстати святей Твоей трапе́зе и священнодействовати Святое и Пречистое Тело и Честну́ю Кровь, благовеству́я всем мир.

Не отвержи мене от лица Твоего и Духа Твоего Святаго не отыми от мене.

Господи и Творче и Царю́ Безсмертный, не служение прия́ти прише́дый, но да послу́жиши всем во спасение, приими́ жертву хваления и службу безкровную и ми́лостьми Твоими посети Церковь Твою, освящающую и благословляющую и благовеству́ющую всем мир.

Слава: Освящения источник прии́м живоносная ре́бра Твоя, воду нетления и Кровь Божественную источающий, припа́даю Ти и зову: очисти мя, Спасе, и укрепи Тайнами Твоими Святыми, да без осуждения даже до последняго моего издыхания сподоблюся Ти службу совершати, поя́ и благословя́ и благовеству́я всем мир.

И ныне: Благообра́зный Иосиф со страхом Тело Пречистое Сына Твоего иногда плащаницею обвил есть, разум недоуме́нный верою укрепляя; аз же како дерзну́ ру́ку простре́ти и коснутися мене ради на Кресте Закла́ннаго, и Воскресением ада державу Попра́вшаго, и всем концем вселенныя Благовеству́ющаго мир.

Песнь 6

Ирмос: Бездна последняя грехов обы́де мя, и, волнения не ктому́ терпя́, яко Иона Владыце, вопию Ти: от тли мя возведи.

Сердце чисто созижди во мне, Боже, и дух прав обнови во утробе моей.

Ле́стию древнею ура́нена Адама пра́отца исцелил еси я́звами Твоими, Господи, темже и мя исцели от страсте́й душевре́дных причащением Пречистых Твоих Таин и от тли неве́дения мя возведи.

Не отвержи мене от лица Твоего и Духа Твоего Святаго не отыми от мене.

А́велевы да́ры, Но́евы жертвы и Авраа́мова всепло́дия прия́вый, приими́ ныне во благости Твоей службу сию от руки́ мене, грешнаго, и возниспосли́ благодать Всесвятаго Духа, да возмогу́ от се́рдца Ти хвалы и прошения приноси́ти, моля́щеся: от тли, Боже, мя возведи.

Слава: Горе́ имея сердце, благодарю Тя, Господи Боже мой, и покланя́юся державе Твоей, и да́ры о своих гресех и о людски́х неве́дениих дерзаю Ти возноси́ти, моля́ся: от тли, Боже, мя возведи.

И ныне: От всех родо́в избра́нная, Царице Дево Богородице, от Тебе Рожде́ннаго моли, да избавит мя от рабства греховнаго и, Тайнами Своими мя освящая, от тли душевре́дныя возведе́т.

Кондак, глас 2

Хлеб, Христе, взяти не пре́зри мя, Тело Твое, и Божественную Твою ныне Кровь, Пречистых, Владыко, и Страшных Твоих Таин причаститися окаяннаго, да не будет ми в суд, да будет же ми в живот вечный и безсмертный.

Икос

Архиерею И́стиннейший, власть имеяй от века по чину Мелхиседе́кову, не прише́дый да Ти послу́жат, но да Сам послу́жиши миру, и на жертвеннице Крестнем о наших гресех жертву живоже́ртвенную совершиши, и Кровию Своею обнови́ши всю тварь. Темже Ти, Единому Благо́му и Многомилостивому, приступити дерзаю и Тайны Твоя Божественныя прияти тщу́ся и во смирении зову: да не будет ми в суд и во осуждение, но в живот вечный и безсмертный.

Песнь 7

Ирмос: Отроцы в Вавилоне пе́щнаго пламене не убояшася, но, посреде пламене вве́ржени, ороша́еми пояху: благословен еси, Господи, Боже отец наших.

Сердце чисто созижди во мне, Боже, и дух прав обнови во утробе моей.

Служителя Новаго Завета и слугу Святых Твоих Таин благоволи мя явити, Господи, да без осуждения возмогу ру́це своя воздева́ти и о людех Твоих хода́тайство приноси́ти и даже до скончания века воспевати: благословен еси, Господи, Боже отец наших.

Не отвержи мене от лица Твоего и Духа Твоего Святаго не отыми от мене.

Лукавство совести очисти, Всеблаги́й Владыко Господи, и благодатию Твоею освяти мя, да, сподо́бльшеся служити без порока святому Твоему жертвеннику, обря́щу мзду верных строителей в день страшный воздаяния Твоего праведнаго, поя́: благословен еси, Господи, Боже отец наших.

Слава: Отроки древле не опали́ огнь всеразже́нный пе́щный, аз же, многогрешный, дерзаю невещественнаго Огня коснутися, и Угль всенепорочный дла́ньми своими подъяти, и со благоговением вкусити Пищи ангельския, во умилении зовя́: благословен еси, Господи, Боже отец наших.

И ныне: Всякаго избави мя искушения, Владычице Дево, да очище́нным умом и сердцем просвеще́нным дерзну ко святей службе приступити, вопия́: благословен еси, Господи, Боже отец наших.

Песнь 8

Ирмос: За законы оте́ческия блаженнии в Вавилоне юноши, предбе́дствующе, царю́ющого оплева́ша повеление безумное и, совоку́плени, имже не свари́шася огне́м, Держа́вствующему достойную воспеваху песнь: Господа пойте, дела, и превозноси́те во вся веки.

Сердце чисто созижди во мне, Боже, и дух прав обнови во утробе моей.

Егда прии́деши на землю со славою, не посрами мене от ча́яния моего, Боже мой, яко аще Ти Единому согрешаю, но и Тебе Единому служу́, не и́мам простре́ти ру́це мои к богу чужде́му; темже, на милость Твою уповая, молю́ся: сподоби мя Тя присно пети и превозноси́ти во вся веки.

Не отвержи мене от лица Твоего и Духа Твоего Святаго не отыми от мене.

Не́мощи своя исповедую и грехи моя повергаю пред Тобою, Господи: исцели, помилуй, ущедри раба Твоего, и избави мя от всякия стра́сти душевре́дныя, и сподоби мя, да Тя присно пою́ и превозношу́ во вся веки.

Слава: Иса́ия уста очисти, угль прии́м от Серафима возже́нный, Ты же, Господи, все естество мое очисти У́глем Пречистых Таин Твоих, да без осуждения присно зову: Господа пойте, дела, и превозноси́те во вся веки.

И ныне: Естество  человеческое обожи́ во утробу Твою пречистую снизше́дый Христос, Бог наш, и обновил есть обветша́вшее Тайнами Святых Тела и Крови Своея; темже, ру́це простира́я и прие́мля Святая, во умилении пою: Господа пойте, дела, и превозносите во вся веки.

Песнь 9

Ирмос: Ве́чери Влады́чня и Безсмертныя Трапе́зы на горнем месте высокими умы́, вернии, прии́дите, насладимся, возше́дша Слова, от Слова научившеся, Егоже величаем.

Сердце чисто созижди во мне, Боже, и дух прав обнови во утробе моей.

Та́инственныя и всесла́вныя Твоея Ве́чери причастника днесь приими́ мя, Слове Божий, и сподоби мя и́стее Тебе, Света невечерняго и радостнаго, причащатися в незаходимей славе Царствия Твоего, да ку́пно со всеми святыми Тя величаю.

Не отвержи мене от лица Твоего и Духа Твоего Святаго не отыми от мене.

Воспоминающе вся, яже о мне бывшая, славлю, пою, благосло́влю Тя, Господи Боже мой, и во умилении дерзаю ру́це своя простре́ти и прияти Тайны Пренебесныя, пред нимиже Ангели благоговейно покланя́ются: Свят, Свят, Свят, - непрестанно зовуще и песненноле́пно Тя величающе.

Воздаждь ми радость спасения Твоего и Духом Владычним утверди мя.

Освяти мя, Господи, благодатию Твоею и насыти мя Пищи Небесныя, Хлебе Живо́тный, да николи́же ины́я добро́ты возжелаю, разве Тебе, Единаго Всеблага́го и Многомилостиваго, Егоже величаю.

Слава: Радуяся и трепе́ща приступаю ныне святей Твоей службе, и предстати дерзаю трапе́зе всесвятей, на нейже зрю Божестеннаго Агнца, от века предъизбра́ннаго, и мене ради закла́ннаго, и Своею Кровию мир от тли изба́вльшаго, и Себе Сама́го в пищу и питие́ мне предло́жшагося, Егоже величаю.

И ныне: У́зы разреши, Господи, страстей моих греховных безстра́стными Страстьми́ Твоими, и причастием Святых Твоих Таин всего обнови, освяти и просвети мя, недостойнаго служителя Твоего, да неосужденно сподоблюся и́стее Тебе причащатися в невече́рнем дни Царствия Твоего, поя́, воспевая и величая Тя во веки.

 

Составитель: протоиерей Андрей Николаиди