О блаженная мати Домнико, / заступнице и покровительнице наша! / Ты от младых ногтей твоих/ страх Божий имела еси в сердце твоем, / духовныя очи твои к Горнему Иерусалиму устремляющи / и помышляющи выну о будущих, / яже и получила еси, преподобная; / темже ныне молися / даровати нам мир и велию милость.

О блаженная мати Домнико, / тя ходатаицу и молитвенницу/ благоприятну имамы к Богу, / ты бо молиши за вся православныя люди, / яко да избавимся от бед и скорбей / и от всякаго навета вражия; / тем прославляем твою святую память / и восхваляем тя, зовуще: / не престай молящися о душах наших.

О блаженная мати, / кто не подивится житию и чудесем твоим, и не восхвалит тя, / яко и по святем твоем преставлении / силою Божиею многая чудеса от честных мощей твоих источаеши, / яже подают исцеления приходящим к ним с верою. / Сего ради возопиим, зовуще: / радуйся, преподобная мати Домнико, / великаго дара от Христа сподобившаяся / и ныне пребывающая во Царствии Небеснем/ с лики преподобных, / моли спастися душам нашим.

Блаженная Домнико богомудрая, / чистая душа твоя, правоверным смыслом сияющи / и облистающи добродетелей светлостьми, / озаряет верных исполнение, / бесовскую тьму отгоняющи; / темже яко причастницу тя невечерния благодати / ублажаем благочестно вси, досточудная.

Имея душу милостивну, / чист помысл и сердце бодро, / веру неблазненну / и любовь воистину нелицемерну, / от земли преставилася еси к Небесным / и с лики праведных водворяешися; / темже тя почитаем священными песньми / и благочестно вси славим, / Домнико досточудная.

 

Воздержанием житие твое украсившая / и уды умертвившая, / победила еси вражия прилоги, блаженная; / темже  славим  и торжествуем святую память твою, / просяще обрести молитвами твоими  мир/ и велию милость.

 

Кто Тебе не ублажит, Пресвятая Дево? / Кто ли не воспоет Твоего Пречистаго Рождества? / Безлетно бо от Отца возсиявый Сын Единородный, / Тойже от Тебе, Чистыя, пройде, / неизреченно воплощся: / естеством Бог Сый, / и естеством быв Человек нас ради; / не во двою лицу разделяемый, / но во двою естеству / неслитно познаваемый. / Того моли, Чистая Всеблаженная, / помиловатися душам нашим.

Праведных души в руце Божией, и не прикоснется их мука. Непщевани быша во очию безумных умрети, и вменися озлобление исход их. И еже от нас шествие - сокрушение, они же суть в мире. Ибо пред лицем человеческим аще и муку приимут, упование их безсмертия исполнено. И вмале наказани бывше, великими благодетельствовани будут, яко Бог искуси я и обрете их достойны Себе. Яко злато в горниле искуси их и яко всеплодие жертвенное прият я. И во время посещения их возсияют и, яко искры по стеблию потекут. Судят языком и обладают людьми, и воцарится Господь в них во веки. Надеющийся Нань разумеют истину, и вернии в любви пребудут Ему; яко благодать и милость в преподобных Его и посещение во избранных Его.

 

Премудрости Соломоновы чтение (глава 4):

Праведник аще постигнет скончатися, в покои будет. Старость бо честна не многолетна, ниже в числе лет исчитается. Седина же есть мудрость человеком, и возраст старости житие нескверное. Благоугоден Богови быв, возлюблен бысть, и живый посреде грешник преставлен бысть. Восхищен бысть, да не злоба изменит разума его, или лесть прельстит душу его. Рачение бо злобы помрачает добрая, и парение похоти пременяет ум незлобив. Скончався вмале, исполни лета долга. Угодна бо бе Господеви душа его, сего ради потщася от среды лукавствия. Людие же видевше и не разумевше, ниже положше в помышлении таковое, яко благодать и милость в преподобных Его и посещение во избранных Его.

 

Свыше звана бывше, / а не от человек звание приим, / оставила еси труды земледелания твоего, / блаженная Домнико, / и на ниву многотрудную человеческих сердец / в годину богоборчества потекла еси усердне, / яко в вертограды Господа твоего, / во еже делати тыя и хранити / и многоплодны показати Владыце их, / да вера православная возсияет / в сердцах ищущих Господа.

Никтоже чести сам себе приемлет, / но званный от Бога, / темже и ты, святая мати Домнико, / не собою, ниже похотением людским, / но призванием Божественным на делание твое многотрудное изшла еси, / ни на почести, ниже пиры, или телеси усладу, / но на поприще суроваго и терноноснаго жития, / на немже радость едина тя среташе, / яже веселит Христа исповедати не убоявшихся.

 

Возсия днесь священное твое торжество, / солнца светлейши, / сущия во тьме души озаряющее / и мрак бесовский всегда отгоняющее, / досточудная мати Домнико.

 

Теплое заступление сущим в бедах / и Помощницу нашу, / Еюже от тли избавихомся, / Богородицу, вернии, всеусердно ублажаем.

 

Звана бысть свыше от овчих стад, святая Домнико, / якоже иногда псалмопевец Давид / гордыню безбожных филистимлян низпроврещи / и народ от Голиафовых хулений заступити / и, яко овцы, упасти и оградити. / Такожде и ты на брань постом укрепилася еси, / во еже камением веры безбожных гордыню сокрушати / и мечем и посохом поучения и молитвы / волки хищныя невходны во ограду сотворити, / в нейже и ны молитвами твоими, / блаженная Домнико, сохрани.

Стих: Честна пред Господем / смерть преподобных Его.

Достойне хвалима еси на земли, / богоблаженная Домнико, / яко и по кончине твоей / усердно к тебе прибегающия / от недуг свобождаеши, / темже непрестанно моли /спастися душам нашим.

Стих: Праведницы во веки живут / и в Господе мзда их.

Ангельское житие на земли явила еси, / Домнико блаженная, / источниче умиления,/ милости течение, / елеем трудов твоих просвещая православныя люди; / темже моли Человеколюбца от бед избавити / любовию чтущих всечестную память твою.

 

Воздержанием житие твое украсивши / и плоть духу покоривши, / победила еси вражия прилоги, / во смирении же и пощении / Бога взыскавши, богоблаженная.

 

Богородице, Ты еси Лоза истинная, / возрастившая нам Плод Живота, / Тебе молимся: молися, Владычице, / со святыми апостолы, / помиловати души наша.

 

От юности желанием Божественныя любве разжигаема, / суету житейскую отринула еси, / смирением крайним и молитвою непрестанною / мудрость Христову стяжала еси /и в годину лютую явилася еси наставница ищущим спасения,/ темже предстоя ныне Господеви в лице святых, / поминай молящихся тебе, / Домнико, мати блаженная.

 

 

Мужески подвиги воздержанием претерпевши, низложила еси многокозненнаго, и в терпении житие поживши, преподобная Домнико, ныне прешла еси к Богу, молящися о всех священное твое совершающих торжество.

 

Всенепорочная Мати, возсияй ми покаяния лучу, и разори мрак безмерных моих зол, и лукавыя отжени, Дево, помыслы сердца моего.

 

Плоть распяла еси со страстьми и все любление ко Христу имела еси, Домнико, Жениху твоему нетленному, сего ради прияла еси венец и Ангельским ликом сочислилася еси, блаженная, молящися Тому прилежно о чтущих тя.

 

Труждает мя буря греховная и возмущение безместных помышлений; умилосердися, Всенепорочная, и руку ми помощи, яко Милостива, простри, да, спасаемь, величаю Тя.

 

Ублажаем тя, / святая блаженная мати Домнико, / и чтим святую память твою, / ты бо молиши о нас / Христа Бога нашего.

Псалом избранный:

Терпя, потерпех Господа, и внят ми, и услыша молитву мою.

Постави на камени нозе мои и исправи стопы моя.

Се удалихся, бегая, и водворися в пустыни.

Уподобихся неясыти пустынней.

Бдех и бых, яко птица, особящаяся на зде.

 

Избранная от Бога блаженная мати, ко пристанищу жизни наставляема, без волнения жития бурю претекла еси, со Ангелы песнословящи Избавителя, и ныне моли непрестанно о нас, яко да благодать и милость Христос дарует нам, празднующим любовию святую память твою.

 

Радуйся, Ангелом радость мира приемшая; радуйся, рождшая Творца Твоего и Господа; радуйся, сподобльшаяся быти Мати Божия.

Прокимен, глас 4: Праведницы во веки живут, / и в Господе мзда их.

Стих: Надеющиися Нань разумеют истину, и вернии в любви пребудут Ему.

Всякое дыхание: Евангелие от Матфея, зачало 104.

 

По 50-м псалме стихира, глас 6:

Житие твое, яко солнце, / сердца верных озари / и многая к познанию истины приведе, / темже и нас Светом невечерним просвети, / мати блаженная Домнико, / всечестную твою память почитающих.

 

Ирмос: Яко по суху, пешешествовав Израиль / по бездне стопами, / гонителя фараона видя потопляема, / Богу победную песнь  поим, вопияше.

Припев: Святая блаженная мати Домнико, моли Бога о нас.

Просвети ми ум и озари чувства моя, согрешений мрак души моея отгнав, Христе Боже, да чистою совестию возмогу песнь составити и возвеличити угодницу Твою, блаженную матерь нашу богомудрую Домнику.

Небесный Отец благоизволи тя прославити в Царствии славы со Ангелы и святыми Своими, идеже во Свете невечернем и присносущнем предстоиши Ему, ты бо свято и праведно на земли поживши, подвигом юродства Христа прославила еси и ныне молишися о всех чтущих святую память твою.

Дивное и преславное чудо явися на тебе, преподобная мати, ангельски бо на земли пожила еси и, веру адамантову имея, победила еси немощь плотскую и прияла еси от Бога венец нетленный.

Богородичен: Великому милосердию Агнца Твоего причастники сотвори нас, Богородице, в день великаго и славнаго Суда Его, егда второе на землю приидет со славою страшною.

 

Ирмос: Несть свят, якоже Ты, Господи Боже мой, / вознесый рог верных Твоих, Блаже, / и утвердивый нас на камени / исповедания Твоего.

Небесная возлюбивши, вся красная мира сего оставила еси, преподобная, и во обитель всельшися, неленостными трудами постничества Богу угодила еси, Егоже моли спастися душам нашим.

Христа, нас ради волею до зрака рабия смирившагося, возлюбила еси, блаженная, бдением и молитвами душевныя страсти умертвив, на гору безстрастия востекла еси, Домнико богомудрая.

Мрак житейских заблуждений и житейския гордости светлостию святых молитв, Домнико блаженная, прожени, да помощию твоею грехов оставление приимше, милость у Христа Бога обрящем.

Богородичен: Преблагословенная Богородице, многая скорби в земней жизни Твоей претерпевшая, помози нам крест земнаго жития в терпении, благодарении и радовании до конца понести.

 

Любит милость и истину Господь, и ты, блаженная мати Домнико, подобяся Тому, буди милостивая ходатаица о спасении нашем, да тебе ради и мы, обретше благодать, не отпадем вечныя славы, яко память твою святую песньми ныне величаем.

 

Спаси нас, Мати Спаса нашего, содержимых глубиною согрешений, и всякия вражия исхити злобы, да Твое, спасаеми, величаем заступление.

 

Ирмос: Христос моя сила, Бог и Господь, / честная Церковь / боголепно поет, взывающи, / от смысла чиста о Господе празднующи.

Христолюбивых людей в вере и благочестии наставляла еси, мати святая, непрестанныя молитвы о спасении их возносила еси Вседержителю, темже молим тя: молитвами твоими и нас достойными наследниками Царствия Небеснаго соделай.

Подвиги твоя духовныя под видом юродства скрыла еси, Домнико богомудрая, и, аки крин Небесный, процвела еси в земли Херсонстей смиренномудрием, терпением скорбей и молитвами, яже непрестанно Господеви возносила еси; сия же боголюбивыя добродетели испроси и нам, творящим ныне святую память твою.

Подвигов твоих великих и славных ради, прияла еси венец нетленный от Христа Спаса нашего, и ныне с преподобных и блаженных лики на Небесех присно радуешися; поминай убо и нас, святая мати наша Домнико, да молитвами твоими сподобимся и мы улучити Царствие Небесное.

Богородичен: Заступнице скорбящих, Надеждо ненадеющихся, Богородице Всепетая, моли прилежно избавится нам от бед и скорбей.

 

Ирмос: Божиим светом Твоим, Блаже, / утренюющих Ти души любовию озари, молюся, / Тя ведети, Слове Божий, истиннаго Бога, / от мрака греховнаго взывающа.

О святая мати наша, преподобная Домнико, предстояще Престолу Божию, нас, долу сущих, от всякия находящия на ны напасти сохрани, вся раздоры и брани умири, да прочее время живота нашего во всяком благочестии и чистоте поживем, твоими молитвами ограждаеми.

Исцеления подаеши всем с верою к тебе притекающим, Домнико святая, темже ныне молим тя мы, грешнии: печаль нашу на радость преложи и от всякия напасти и скорби святыми твоими молитвами нас избави.

Во узах темничных и иных злостраданиях сущим отраду и вспоможение святыми твоими молитвами даруеши и к покаянию всех нас призываеши.

Богородичен: К Тебе припадающе, Царице Небесная, и верою покланяющеся, славословим Тя: радуйся, Богоблаженная Дево, покрове и ограждение наше, Помощнице в бедах сущим, спаси ны, помощи не имущия, на Тя бо упование возлагаем.

 

Ирмос: Житейское море, / воздвизаемое зря напастей бурею, / к тихому пристанищу Твоему притек, вопию Ти: / возведи от тли живот мой, Многомилостиве.

Разум богопросвещенный стяжавши, Домнико блаженная, егда дела благая творила еси в житии твоем и егда подвиг юродства Христа ради подъяла еси, и ныне душа твоя во благих водворяется, прияла бо еси от Бога нетленный венец.

Добродетелию преукрашенная и благодатию Божественною освященная, праведная мати наша Домнико, предстоиши во славе Небесней и молишися за ны, подаеши нам путей спасительных разумение, и недужныя силою Христовою исцеляеши, и подвизаеши нас за вся Творца нашего благодарити.

Родителей, чад не имущих, и жен плодоносящих отрада и вспоможение еси, мати Домнико, поелику присно молитвы твоя возносиши Милосердному Спасителю нашему.

Богородичен: Мати Божия Милосердная, милости Твоея двери отверзи нам, озари нас светом Божественныя благодати Твоея и от мысленных волков соблюди нас невредимых, в вере Христовой нерушимо сподобивши нас благоугождати Сыну Твоему и Богу и прияти от Него конец благий.

 

Силою укрепляема Всемогущаго Бога, / в немощнем естестве подвиги многотрудныя явила еси / и долу влекущия страсти / чистотою и бдением непрестанным умертвила еси, / сего ради Христос Бог тя прослави дивными чудесы, / мати блаженная Домнико, / Емуже прилежно молися / подати нам мир и велию милость.

 

Ангельскому поревновав житию, всю себе отрешила еси мирскаго сплетения, к подвигом же постническим мужески вооружившися, опасно путем Божиих заповедей шествовала еси, блаженная; темже и мы, верно чтущии священную твою память, молим тя: Христу прилежно молися подати нам мир и велию милость.

 

Ирмос: Росодательну убо пещь содела Ангел /преподобным отроком, / халдеи же опаляющее веление Божие /мучителя увеща вопити: / благословен еси, / Боже отец наших.

Евангельским словесем внемлюще, крест свой на рамена восприяла еси и Христу последовала еси, преподобная мати наша Домнико, непрестанно Тому взывающе: благословен еси, Боже отец наших.

Вся искушения от мира, плоти и диавола находящия низложивши, востекла еси в чертоги Отца нашего Небеснаго, богоблаженная Домнико, идеже предстательствуеши о нас, заступления Твоего просящих, и подвизаеши купно с Тобою взывати: благословен еси, Боже отец наших.

Кадилу, елею и миру благоуханному молитвы твоя подобны, восходят бо сия ко Престолу Вседержителя Бога и милость Его преклоняют к нам, сердца же наша умягчают и врачуют и подвизают взывати: благословен еси, Боже отец наших.

Богородичен: Милостию Твоею весь мир обогащаеши и души просвещаеши, Едина Всепетая, темже воспеваем Ти: Христа Бога нашего Мати, благословенна еси.

 

Ирмос: Из пламене преподобным росу источил еси / и праведнаго жертву водою попалил еси: / вся бо твориши, Христе, токмо еже хотети, / Тя превозносим во вся веки.

В законе Божием часто поучающися и в заповедех Господних безпорочно ходяще, дом Духа Святаго была еси, блаженная Домнико, темже и по смерти твоей не отлучи тя Господь от лика праведных, с нимиже ныне Богу поеши: превозносимый отцев Боже, благословен еси.

Кротостию ко всем землю кротких наследовала еси, милосердием и любовию ко ближним помилование от Бога получила еси, чистотою и целомудрием Бога зрети сподобилася еси, Емуже ныне со всеми святыми поеши: превозносимый отцев Боже, благословен еси.

Яко светило сияющее уготовала еси кроткую душу твою, преподобная мати Домнико, темже по смерти твоей многая исцеления недужным, от винопития и иных болезней душевных и телесных подаеши всем с верою имя твое призывающим и нелицемерно Творцу воспевающим: превозносимый отцев Боже, благословен еси.

Богородичен: Господа нашего и Бога Мати Безневестная, дерзновение имущи к Нему, заступи и сохрани нас Твоим ходатайством, яко да воспеваем: превозносимый отцев Боже, благословен еси.

 

Ирмос: Бога человеком невозможно видети, / на Негоже не смеют чини Ангелъстии взирати; / Тобою же, Всечистая, явися человеком / Слово воплощенно, / Егоже величающе, / с Небесными вои  Тя ублажаем.

Разум имела еси в души, и смирение, и Божественную кротость, и веру несумненну, и любовь к Богу, всенощными мольбами приближающеся Ему, и тамо сущими светлостьми ублажаема, озаряема и просвещаема.

Отошла еси в селения праведных и духом предстоиши Присносущному Свету, призри убо на ны, живущия в селениих многомятежнаго мира сего, и пособствуй сущим во бранех, угоднице Христова, яко песньми тя величаем.

Моления о нас ко Владыце Христу не престай приносити, святая Домнико, яко мати чадолюбивая, вспомоществуя верным в подвизе спасения, яко сосуд благодати Божия избранный.

Богородичен: Ты еси Ангелов радосте, Ты еси праведников доброто, Ты еси верных надеждо, Ты еси соблюдение наше, Ты еси мост, к жизни нестареющей приводяй всех верою и любовию Тя, Богородице, величающих.

 

Якоже солнце светоносно возсия ныне, блаженная мати, память твоя, вся верныя веселящи, иже молитвенно взывают ти: молися прилежно спастися нам.

 

Преблагословенна еси, Богородице Дево, Мати Неизреченнаго Света, Тя величаем и предстательства о нас пред Сыном Твоим всеусердно просим, Тя бо едину надежду имамы.

 

Празднует Церковь твое преставление / и благознаменитый день твоего торжества: / житие бо на земли благочестно пожив, / Домнико преславная, / плод сторичествующий Владыце твоему принесла еси, / и от Него сподобилася еси славы неизреченныя, / и ныне молишися о спасении душ наших.

Класы спелыя руце твои пожинаша, / егда землю, от неяже яко всяк человек изыде, возделоваше, / и се яко клас златый/ душа твоя восхищена бысть в житницу Христову, / и ныне просим тя, мати блаженная Домнико: / молися о благоденствии нашем на земли / и вечнем спасении на Небесех.

В подвизех твоих молитвенных / привлекала еси многия души ко спасению, / сего ради Христос знаменьми и чудесы преславными / истинно тя украси, / мати блаженная Домнико, / моли о душах наших. 

Целомудрием и благоверием, / яко багряницею многоценною, одеялася еси, Домнико, / правдою же и кротостию, / яко Божественным венцем, украсилася еси, / со страждущими Христа ради / царствовати возжелела еси, / и ныне Царю Сил предстоиши, / Иисусу Всемилостивому / и Спасу душ наших.

 

Избави молитвами твоими, / мати Домнико, чада твоя / от всякия лютости противоборца / и Царствия Божия ны доведи, / молящияся тебе тепле, / да возможем ловления лукаваго избегнути / и конечнаго осуждения, предстательством твоим.

 

Еже содеяхом злая, / не помяни нам, Благая сущи, / егда душа наша разлучатися будет настоящаго сего жития, / не возгнушатися молим Тя нашего недостоинства, / аще и много согрешаем вси, / буди нам Мати и Заступница.

 

Прокимен, глас 4: Дивен Бог во святых Своих, / Бог Израилев.

Стих: В церквах благословите Бога, Господа от источник Израилевых.

Апостол к Галатом, зачало 208. Аллилуиа, глас 1: Терпя потерпех Господа, и внят ми.

Стих: И услыша молитву мою.

Евангелие от Луки, зачало 33.

Причастен праздника и святыя: В память вечную будет праведник, / от слуха зла не убоится.

 

Молитва

О достоблаженная мати Домнико, ты ныне душею на Небеси пред Престолом Божиим предстоиши, телом же на земли почиваеши и данною ти свыше благодатию различная чудеса источаеши! Темже взирающе на святый твой образ (и предстояще раце честных мощей твоих), радуемся о преславнем скончании жительства твоего и чтим святую память твою.  Ты же, предстоя Престолу Божию, услыши нас, грешных, молящихся тебе,  приими молитву нашу и принеси ю ко Милостивому и Человеколюбивому Спасителю нашему. Испроси нам у Христа Бога мирное и безмятежное житие, здравие душевное и телесное, земли благоплодие и во всем всякое изобилие и благоденствие, да сподобимся предстательством твоим, аще и недостойнии есмы, видети благая на земли живых, славяще Единаго во святых Своих славимаго Бога, Отца и Сына и Святаго Духа, ныне и во веки веков. Аминь.

 

По благословению

митрополита Херсонского и Таврического Иоанна