Благословен еси, Христе Боже наш, / Иже премудры ловцы явлей, / низпослав им Духа Святаго, и теми уловлей вселенную, / Человеколюбче, слава Тебе.
Егда снизшед языки слия, / разделяше языки Вышний; / егда же огненныя языки раздаяше, / в соединение вся призва; / и согласно славим Всесвятаго Духа.
Ангели на небеси светлыми лики Духу Святому немолчно славу воспевают, яко Источнику жизни и Свету невещественному. С ними же и мы прославляем Тя, Душе непостижимый, за вся явныя и тайныя милости Твоя, и смиренно просим блаженнаго осенения Твоего:
Прииди, Свете истинный и Радосте духовная.
Прииди, росоносный Облаче и Красото неизреченная.
Прииди и приими, яко курение благовонное, хвалу нашу.
Прииди и даждь нам вкусити радость излияния Твоего.
Прииди и возвесели ны обилием даров Твоих.
Прииди, вечное Солнце незаходимое, и обитель в нас сотвори.
Прииди, Утешителю, Душе Святый, и вселися в ны!
Видом огненных язык, во свете и дыхании бурном и радостотворном, сниде Дух Святый на Апостолы. Темже пламенем Его объяты бывше рыбари, мир весь в Церковь Христову призваша, беды на суше и на водах радостно терпяще, лютых смертей не убояшася, и во всю землю изыде вещание богокрасныя песни их: Аллилуиа!
Чаше дождеродная и огнеточивая, излившаяся на Апостолы в горнице Сионстей, Тебе поем, Тебе благословим, Тебе благодарим, Боже Душе Святый:
Прииди, Освятителю и Хранителю Церкви.
Прииди и даждь едино сердце и едину душу верным Твоим.
Прииди и воспламени наше хладное и безплодное благочестие.
Прииди и разжени огустевающий над землею мрак безбожия и нечестия.
Прииди и веди всех на путь праведныя жизни.
Прииди и настави нас на всяку истину.
Прииди, Мудросте непостижимая и имиже веси судьбами спаси нас.
Прииди, Утешителю, Душе Святый, и вселися в ны!
Тайна глубочайшая! Боже Душе непостижиме, со Отцем и Словом Создателю всех! Ты украсил еси горния чины Ангелов во храме неприступнаго света! Ты воззвал еси к бытию лики огненных светил с великолепием славы. Ты, плоть и дух в чудное единство согласуя, сотворил еси род человеческий. Темже всякое дыхание поет Тебе хвалу: Аллилуиа!
Альфа и Омега, Начало и Конец, Ты Душе вечный, необъятною силою парения над водами, и страшным кругообстоянием оживотворил еси всех и вся: от живоноснаго дыхания Твоего из безвидныя бездны возсияла есть неизреченная красота первозданнаго мира. Сего ради взываем Ти:
Прииди к нам, Премудрый Художниче мира.
Прииди, Великий и в малом цветке, и в небесной звезде.
Прииди, Многообразие неизреченное и Красото вечная.
Прииди и озари мрачный хаос души моея.
Прииди и яви нас новою тварию во Христе.
Прииди, Утешителю, Душе Святый, и вселися в ны!
Непостижимый и Всеблагий Душе, освещения Источниче! Ты одеял еси Пречистую Деву Марию в светозарный и неприступный свет Твоего Божества, соделав Ю, Матерь Бога Слова, Царицу Ангелов, спасением людей. Силою премирною Ты осеняеши пророки и Апостолы; Ты возносиши их до третьего небесе; Ты уязвляеши их сердца красотою небесною, влагая в их речи пламенное стремление, влекущее людей к Богу; Ты обращаеши последних грешников, и они, полные горячаго восторга поют: Аллилуиа!
Святым Духом всяка душа живится, Его силою возстановятся к общению воскресения вся создания в последний час нынешняго века и в первый будущаго. Тогда воздвигни нас, Утешителю Благий, из гробов наших не к осуждению, но к богосветлому блаженству со всеми святыми, близкими и сродными нам!
Прииди же и избави нас от смерти духовныя.
Прииди и пред кончиною нашею насыти нас Телом и Кровию Спаса Христа.
Прииди и даждь нам успение тихое с чистою совестию.
Прииди и сотвори светлым наше пробуждение от смертнаго сна.
Прииди и сподоби нас узрети с радостию утро вечности.
Прииди и сотвори ны сыны нетления.
Прииди и, яко солнце, просвети тогда безсмертная телеса наша.
Прииди, Утешителю, Душе Святый, и вселися в ны!
Услышав глас Твой: «Аще кто жаждет, да грядет ко Мне и да пиет», - молим Тя, Сыне Божий, утоли нашу жажду духовныя жизни, даждь нам воду живую, излей нам струю благодати от срасленнаго Ти Духа Святаго, да не возжаждем во веки, с умилением поюще: Аллилуиа!
Нетленный и Несотворенный, вечный и щедрый Душе, праведных Хранителю и грешных очищение. свободи нас от всяких нечистых дел, да не погаснет в нас сияние благодатнаго света Твоего, вопиющих Ти:
Прииди, Всеблагий, и даждь нам умиление и источник слез.
Прииди и научи нас покланятися Тебе духом и истиною.
Прииди, Истино высочайшая, и уясни сомнения скуднаго разума.
Прииди, Жизнь нестареемая, и приими нас с краткостию века земнаго.
Прииди, Свете Вечный, и разсеются призраки и страхи.
Прииди, вечно иная Сила, и освежи изнемогших чад Твоих.
Прииди, Безконечная Радость, и забудутся невзгоды временныя.
Прииди, Утешителю, Душе Святый, и вселися в ны!
Ликуй, дщерь света, святая мати Сион! Украшайся, великая невесто, небеси подобная, светлоблистающая вселенская Церковь Христова! На Тебе почивает Дух Святый, немощная врачуя, оскудевающая восполняя, мертвыя оживляя и к вечной жизни приводя всех, достойно и праведно зовущих: Аллилуиа!
«В мире скорбни будете», - рече Господь. Где обрящем отраду, и кто утешит нас? Душе Утешителю, Ты утоли наша печали! Ходатайствуй о нас воздыханиями неизреченными и облегчи сердца молящихся Тебе:
Прииди, сладкая Прохлада труждающихся и обремененных.
Прииди, Собеседниче узников и Опора гонимых.
Прииди, ущедри изнуренных нищетою и гладом.
Прииди и уврачуй страсти наших душ и телес.
Прииди и посети всех жаждущих Твоего озарения.
Прииди и осмысли наша скорби надеждою вечныя радости.
Прииди, Утешителю, Душе Святый, и вселися в ны!
«На Святаго Духа хулившему, не простится ни в сем веце, ни в будущем», - рече Господь. Слышавше сие страшное изречение, трепещем, да не осудимся с непослушными Тебе и богоборными. Не даждь уклонятися, Душе Святый, сердцам нашим в словеса лукавствия, обрати от расколов, ересей и безбожия всех заблуждших, и всех с Церковью первенцев Твоих сподоби во веки веков воспевати: Аллилуиа!
Егда отступи Дух Святый от Саула, тогда страх и уныние постиже его, и тьма отчаяния низверже его в преисподнюю. Тако и аз, в день уныния и ожесточения моего, разумею, яко удален есмь от Твоего света. Но дай мне неослабно звати Тя, души моея Ограду, дондеже свет Твой озарит мя малодушнаго:
Прииди убо, и не отвержи мене за роптание и нетерпение мое.
Прииди и умиротвори лютую бурю смятения и раздражения.
Прииди и успокой озлобленных житейскими невзгодами.
Прииди и смягчи сердца в день ожесточения и гнева.
Прииди и сокруши козни смущения и устрашения духов тьмы.
Прииди и вдохни в ны дух сокрушен, да терпением спасем души наша.
Прииди, Утешителю, Душе Святый, и вселися в ны!
Спаси ны, Отче Небесный! Мы убоги, и немощны, и слепы, и наги духовно! Даруй нам злато Твое, огнем очищенное, покрый нас от срама одеждою белою, исцели помазанием Твоим очи наша, благодать Животворящаго Твоего Духа да снидет в нечистые сосуды душ наших, и возродит нас поющих: Аллилуиа!
Яко Вавилонская башня разрушится счастие земное: жалки все начинания человеческия. Благо мне, яко смирил мя еси, яко открыл еси мне в согрешениих и падениих моих всю слабость и ничтожество мое. Без Тебе не можем творити ничесоже, но благодатию Твоею уповаем спастися:
Прииди убо, единый мудрый Строителю жизни.
Прииди и уясни нам непостижимыя пути Твоя.
Прииди, яко молния, и освети конец нашего земнаго бытия.
Прииди и благослови всякое благое начинание наше.
Прииди и буди Помощник в добрых делах.
Прииди и озари ум наш в час недоумений.
Прииди, даруя дух покаяния, да отвратятся тем грядущия на мир скорби.
Прииди, Утешителю, Душе Святый, и вселися в ны!
Тако возлюби Бог мир, яко и Сына Своего Единороднаго дал есть, Иже от Духа Святаго и Марии Девы вочеловечився, на кресте простре зиждительныя Свои руце, Кровию же Своею весь мир от греха и смерти искупи! Темже вся тварь, свободы славы чад Божиих чая, Отцу возлюбившему, Сыну искупившему и Духу освящающему поет: Аллилуиа!
Дух Животворящий, яко голубь сошедший на Христа на Иордане, и на мне опочил есть при купели крещения, но помрачися действие доброты Его от тьмы грехопадений моих. Темже, яко путник заблуждшийся в лесу нощию, ожидает зари, тако и аз жажду лучей Твоих, Блаже, да не погибну до конца:
Прииди убо к запечатленному страшным именем Твоим.
Прииди и облегчи совесть мучимую, нещадно палимую.
Прииди и обнови во мне омраченный Твой образ.
Прииди и разсей греховныя видения.
Прииди и научи сострадати чуждему горю.
Прииди и подвигни мя любити всякое создание Твое.
Прииди и воздаждь ми радость спасения Твоего.
Прииди, Утешителю, Душе Святый, и вселися в ны!
Дух Святый возраждает в жизнь вечную, Дух Святый вдохновляет мучеников, освящает священников, венчает праведников, хлеб и вино совершает Телом и Кровию Божественными. О, глубино богатства и премудрости Божия! Даруй нам венец Твоих даров - всепрощающую вечную любовь, скорбящую за врагов, хотящую всем спастися, да озареннии ею, яко чада света, поем: Аллилуиа!
Кто ны разлучит от любве Божия: скорбь ли, или теснота, или гонение, или глад, или нагота, или беда, или меч? Аще и всего лишимся на земли - имамы наследие неувядаемо на небеси. Но даруй нам, Господи, любити Тя не словом или языком, а истинным делом и подвигом всея жизни:
Прииди же, Душе Всесильный, и умножи нам всепобеждающую веру.
Прииди и даждь нам дерзновение молитвенное.
Прииди и согрей сердца наша, да не охладеет любовь наша в сердце за преумножение беззаконий.
Прииди и не даждь нам отпасть во дни гонений и осмеяния веры.
Прииди и сохрани нас от непосильных искушений и соблазнов.
Прииди и оживи сердца наша кроплением росы Твоея.
Прииди, уврачуй, освяти и возстави нас, Блаже, Твоею благодатию.
Прииди, Утешителю, Душе Святый, и вселися в ны!
Тако глаголет Господь: «Излию от Духа Моего на всяку плоть, и прорекут сынове ваша и дщери ваша, и юноши ваши видения узрят, и старцы ваши сония увидят». Душе всежеланный, даждь токмо едину от крупиц с трапезы избранных сынов утешения Твоего и нам, умильно зовущим: Аллилуиа!
Аще и на краткое мгновение, яко блистание молнии, Ты возсияваеши в тайне души, но незабвенно есть светолитие откровения Твоего, от негоже страшным и боголепным изменением преображается бренное естество. Сподоби убо, Утешителю Благий, и нас еще в земнем житии чистым сердцем узрети Тя, вопиющих Ти:
Прииди, светоподательная Молния вечности.
Прииди и озари нас невечерним сиянием.
Прииди, Сокровище смиренномудрия и веселие кротких.
Прииди, Вода живая, и прохлади нас среди зноя страстей.
Прииди, ибо вдали от Тебе нет радости и покоя.
Прииди, яко с Тобою всюду Небесное Царство.
Прииди и напечатлей в душе солнцевидный лик Твой.
Прииди, Утешителю, Душе Святый, и вселися в ны!
Благодати реко неистощимая, Душе Святый, грехов разрешителю! Приими моления наша о всем мире, о верующих, и неверующих, и о сынах противления: и всех приведи к вечному Царствию Святыя Троицы; да упразднится Тобою и последний враг - смерть, и мир, возрожденный очистительным огнем, воспоет новую песнь безсмертия: Аллилуиа!
Зрю духом град Божий - Иерусалим Небесный, яко невеста украшенный, солнцевидный, торжествующий. Слышу ликования праведных на трапезе Господней, и гласы Ангелов и пресветлаго Господа посреде избранных Своих - и отбеже болезнь, и печаль и воздыхание. Царю Небесный, Душе Святый, седмерицею даров Твоих сподоби и нас причастниками быти сия вечныя радости, в Бозе зовущих Ти сице:
Прииди, Блаже, и возбуди в нас жажду загробнаго бытия.
Прииди и затепли в душе чаяние жизни будущаго века.
Прииди и открый нам радости грядущаго Царствия.
Прииди и даждь нам снегосветлую ризу чистоты.
Прииди и исполни нас блистанием Божества.
Прииди и возми нас на брак Агнчий.
Прииди и сподоби в вечной славе Твоей царствовати.
Прииди, Утешителю, Душе Святый, и вселися в ны!
О, светоносная пучино спасающей любве, Душе Животворящий! Согрей дыханием наития Твоего оледеневший в беззакониих род человеческий, силою непостижимых судеб Твоих ускори погибель зла, и яви вечное торжество Божественныя правды. Да будет Бог всяческая и во всех, и всяко колено небесных, и земных, и преисподних да воспоет: Аллилуиа!
Душе Святый! Всю вселенную собою наполняяй, и всем жизнь подаваяй, от скверных же человек удаляяйся, смиренно молю Тя: не гнушайся нечистоты души моея, но прииди и вселися в мя, и очисти мя от всякия греховныя скверны. Да помощию Твоею прочее время живота моего поживу в покаянии и творении дел благих, и тако прославлю Тя со Отцем и Сыном во веки веков. Аминь.
По благословению
митрополита Херсонского и Таврического Иоанна