Слез твоих теченьми пустыни безплодное возделал еси, и иже из глубины воздыханьми во сто трудов уплодоносил еси, и был еси светильник вселенней, сияя чудесы, Савво, отче наш, моли Христа Бога спастися душам нашим.

Яко от младенства Богу жертва непорочная принеслся еси добродетелию, Савво блаженне, садоделатель быв благочестия; темже был еси преподобных удобрение, гражданин же пустынный достохвален. Темже зовем ти: радуйся, Савво пребогате.

 

Избранный чудотворче и предивный угодниче Христов, преподобне отче Савво, миру православному светильниче и теплый о нас пред Богом молитвенниче! Величаем прославльшаго тя Господа, восхваляюще любовию равноангельное житие твое. Ты же, яко имеяй велие дерзновение ко Господу, от всяких нас бед свободи, да с радостию зовем ти:  Радуйся, пресветлая монахов похвало, Савво преподобне.

 

Икос 1

Ангелов Творец и всея твари Содетель избра тя от младенства, преподобне, прославити трисиятельное имя Его: ты бо, осмилетен сый, вся красная мира тленнаго презрев, во обитель святую притекл еси, идеже яко Ангел земный богоугодно подвизался еси. Темже и вселися в тя благодать Пресвятаго Духа, Егоже действом светло украшаяся, ангелоподобное житие показал еси. Мы же, зряще велия исправления твоя, с любовию вопием тебе сице:

Радуйся, родителей благочестивых благословенный плоде.

Радуйся, Каппадокийския страны святое украшение. 

Радуйся, Палестинския земли и града Иерусалима светильниче.

Радуйся, во Иорданстей пустыни со Ангелы вселивыйся. 

Радуйся, яко от младенства Христа возлюбил еси.

Радуйся, яко жертву живую себе Господеви принесл еси. 

Радуйся, Евангелия Христова усердный последователю.

Радуйся, заповедей Господних верный блюстителю. 

Радуйся, яко от юности игу Христову себе поработил еси.

Радуйся, яко красоту тленную и мирскую сладость ни во чтоже вменил еси. 

Радуйся, Божия разума исполненный.

Радуйся, благодатию Духа Святаго приосененный. 

Радуйся, пресветлая монахов похвало, Савво преподобне.

Видев Всеведец Господь благое души твоея произволение, еже работати Ему усердно вся дни живота твоего, еще во юности прослави тя Божественною Своею силою: любве бо ради братския в разжженную пещь вступив, и одежды твоя неопаленны сохранив, благодатию Божиею неврежден от огня пребыл еси. Сего ради прославляюще Царя славы Христа, прославляющаго святыя Своя, вопием Ему: Аллилуиа.

 

Икос 2

Разум просвещен от Бога имея, преподобне отче Савво, диавольския искушения присно разумевал еси: егда бо прелестник рода человеческаго искуси тя взяти плод древа прежде старческаго благословения, абие помянул еси прародители, иже снедию древа в раи прельстишася. Темже поверг плод на землю; ногами сей попрал еси, заповедав себе до смерти не вкусити плода сего, главу древняго змия сокрушая. Сего ради приими от нас похвалы сия:

Радуйся, от юности постническое житие показавый.

Радуйся, на высоту добродетелей возшедый. 

Радуйся, монашескаго жития и устава истовое правило.

Радуйся, ревностный исполнителю отеческих преданий. 

Радуйся, яко любве ради брата в пещный пламень вшел еси.

Радуйся, яко силою благодати Христовы от огня неопален изшел еси. 

Радуйся, всецелое послушание Господу Богу совершивый.

Радуйся, главу древняго запинателя сокрушивый. 

Радуйся, на высоту безстрастия возшедый.

Радуйся, козни демонския до конца победивый. 

Радуйся, благое иго Христово на рамена твоя восприявый.

Радуйся, закона Божия от всея души взыскавый. 

Радуйся, пресветлая монахов похвало, Савво преподобне.

 

Кондак 3

Сила Вышняго, просвещающая всякаго человека, грядущаго в мир, и показующая пути правыя, настави тя, преподобне отче Савво, достигнути святаго града Иерусалима, идеже поклонился еси Живоносному Гробу Воскресшаго Христа и, со слезами облобызав, благодарственно воспел еси Ему песнь: Аллилуиа.

 

Икос 3

Имея велию ревность о подвизе монашескаго равноангельнаго жития, преподобне, потщался еси идти во Иорданскую пустыню, идеже наставника себе обрет великаго Евфимия, и того житию достойно поревновав, святому Крестителю Христову Иоанну в подвизех твоих уподобился еси. Мы же, дивящеся богатству добродетелей твоих, усердно вопием ти: 

Радуйся, житию безплотных поревновавый.

Радуйся, подвигом древних святых отец достойно подражавый. 

Радуйся, пустыни Иорданския благодатное прозябение.

Радуйся, святаго жития благоухание. 

Радуйся, благодати Христовы сосуде избранный.

Радуйся, пустынное житие паче всего возлюбивый. 

Радуйся, страстей терния усердно исторгавый.

Радуйся, во юном возрасте мудростию Христовою просвещенный. 

Радуйся, чистоты душевныя и телесныя усердный ревнителю.

Радуйся, умнаго трезвения неусыпный хранителю. 

Радуйся, лествицею добродетелей к Небесным обителем возшедый.

Радуйся, яко финикс в пустыни процветый. 

Радуйся, пресветлая монахов похвало, Савво преподобне.

Бурю внутрь помыслов и страстей волны безбедно прешед, преподобне отче Савво, обрел еси тихое пристанище - Христа, Емуже неленостно во мнозе долготерпении поработал еси; отнюдуже Божественною благодатию Христовою восходя от силы в силу, от деяния к боговидению, Небеснаго Сиона достигл еси, идеже со Ангелы поеши Троице Святей песнь: Аллилуиа.

 

Икос 4

Слышаще дивная твоя наставления, яже не точию в словесех, но и в подвизех твоих являл еси, прихождаху к тебе издалеча жаждущии спасения, подражати добродетелем твоим хотящее. Ты же, преподобне отче, мудро назидая и к Небесному Царствию управляя всех верою притекающих к тебе, светильник Православия соделался еси. Сего ради с любовию вопием ти:

Радуйся, наставниче монахов Богомудрый.

Радуйся, овец Христовых добрый пастырю. 

Радуйся, ко спасению верный путеводителю.

Радуйся, постников дивный учителю. 

Радуйся, крепкое падающих возведение.

Радуйся, правостоящих утверждение. 

Радуйся, Евангелия Христова усердный послушателю.

Радуйся, иноческаго жития добрый наставниче. 

Радуйся, яко огнем молитвы стрелы вражия попалил еси.

Радуйся, яко еще во плоти сый, райскую сладость предвкусил еси. 

Радуйся, пустынный жителю и в телеси Ангеле.

Радуйся, вселенныя светильниче.

Радуйся, пресветлая монахов похвало, Савво преподобне.

 

Кондак 5

Боготечней звезде уподобился еси, блаженне Савво, смирением возвышаемый и в Горняя чертоги востекий, научая всех Горняя мудрствовати, а не земная, от страстей отрешатися, со Христом жити и от сердца воспевати Ему: Аллилуиа.

 

Икос 5

Видевше тя ученицы твои наставника премудра и знамением Небесныя благодати сияюща, дивляхуся, тщащеся твоему житию подражати: яко бо луча светлаго Солнца Правды, просветися житие твое. Сего ради слышиши от всех похвальная пения таковая:

Радуйся, восточная звездо златозарнейшая.

Радуйся, Ангелов собеседниче. 

Радуйся, постников похвало.

Радуйся, безмолвствующих славо. 

Радуйся, учителю смирения и целомудрия.

Радуйся, образе кротости и послушания. 

Радуйся, яко во глубины нищеты духовныя приникл еси.

Радуйся, яко на высоту добродетелей возшел еси.

Радуйся, яко путь к животу вечному обрел еси.

Радуйся, яко исправлении твоими Безплотныя удивил еси. 

Радуйся, множество душ уневестивый Христу.

Радуйся, купно с ними пребываяй в радости Господа твоего.

Радуйся, пресветлая монахов похвало, Савво преподобне.

Проповедник и исполнитель Евангельских словес, еже не скрывати себе сокровищ на земли, явился еси, преподобне отче Савво. Сего ради и чада твоя духовная наставлял еси, еже Единаго Господа искати во вся дни жизни своея, всем сердцем Тому прилеплятися и непрестанно пети Ему: Аллилуиа.

 

Икос 6

Возсия свет Божественный, в нощи молящуся тебе, преподобне, показуя столпом огненным пещеру нерукотворенну, юже храм соделал еси и тамо, великую лавру устроив, богоугодныя подвиги и молитвенныя труды показал еси. Мы же, величию благодати Вышняго, на тебе почившия, дивящеся, умиленно взываем:

Радуйся, яко видения пренебеснаго света сподобился еси. 

Радуйся, яко благоволением Божиим великую лавру устроил еси и в ню множество иноков собрал еси. 

Радуйся, духовныя овцы к Горнему Царствию добре управивый.

Радуйся, многая чудеса благодатию Святаго Духа сотворивый. 

Радуйся, ленивыя подвигнувый ревностными подвиги твоего жития христолюбиваго.

Радуйся, печальных скорое утешение. 

Радуйся, Евангелия Христова богомудрый учителю.

Радуйся, провозвестниче путей Господних. 

Радуйся, вся во уметы вменивый, да Христа приобрящеши.

Радуйся, Христу невозвратно последовавый. 

Радуйся, благий и верный рабе Христов.

Радуйся, добрый делателю винограда Христова.

Радуйся, пресветлая монахов похвало, Савво преподобне.

Хотя верен быти до конца Иисусу Христу, Сыну Божию, вземшему грехи мира, кротость, незлобие, смирение в сердце твоем добре насадил еси, богоносе отче Савво, и всякия скорби, укорения и досаждения радостно претерпел еси, ведая, яко многими скорбьми подобает внити в Царствие Небесное. Сего ради, несением креста Христова и терпением скорбей, еще на земли душу твою во обитель Пресвятыя Троицы устроил еси, Ейже ныне предстоиши со Ангелы и вопиеши ангельскую песнь: Аллилуиа.

Дивный воистину победоносец показался еси на страсти плотския, богоблаженне, вся бо разжженныя стрелы лукаваго постом, бдением и слезными молитвами угасил еси. Темже вопием тебе сицевая:

Радуйся, крест Христов на рамена твоя восприемый.

Радуйся, крестом сим, яко лествицею, на Небо возшедый. 

Радуйся, терпения и незлобия рачителю.

Радуйся, иноков добре подвизающихся молитвенный пред Богом предстателю. 

Радуйся, веры православныя мощный защитниче.

Радуйся, Небеснаго Царствия наследниче. 

Радуйся, благодатию Божиею приосененный.

Радуйся, яко образ страстей Христовых в сердце твоем предписал еси. 

Радуйся, светом трисолнечным Святыя Троицы озаренный.

Радуйся, яко душевныма очима присно Господа созерцал еси. 

Радуйся, яко благодатию Божиею вся провидел еси.

Радуйся, благодатными чудесы житие твое озаривый.

Радуйся, пресветлая монахов похвало, Савво преподобне.

Странника и пришельца помышлял еси в себе быти в мире сем, преблаженне отче Савво; темже грядущаго града Иерусалима Небеснаго взыскуя, вся помышления твоя к Небеси непрестанно возносил еси, и, яко в тимпане, во умерщвленнем телеси, сладце воспевал еси победную песнь Христу Богу: Аллилуиа.

Весь облеклся еси во оружия Божия, преподобне: темже возмогл еси всю силу диаволю низложити. Помози убо и нам, преблаженне отче, молитвами твоими избыти сетей вражиих, да благодарственно зовем тебе сице:

Радуйся, столпе непреклонный терпения. 

Радуйся, ревнителю от мира удаления. 

Радуйся, яко державно плотския страсти низложил еси.

Радуйся, яко плоть твою духови покорил еси. 

Радуйся, яко во бденных молитвах неослабно пребывал еси.

Радуйся, яко умерщвлением плоти безстрастие стяжал еси. 

Радуйся, яко всякое наслаждение земное возненавидел еси.

Радуйся, яко тесным и прискорбным путем ходил еси. 

Радуйся, яко язвы Господа Иисуса Христа на теле твоем носил еси.

Радуйся, яко силою Креста Господня демонския козни сокрушил еси. 

Радуйся, вышних идеже Христос седе одесную Отца присно искавый.

Радуйся, мысленным оком к невечернему свету Христу непрестанно взиравый. 

Радуйся, пресветлая монахов похвало, Савво преподобне.

Всякое естество Ангельское прослави тя и Церковь восхвали, преподобне отче Савво: ты бо царя неправомудрствующа и Севировы ересеначальники, противящияся Православней Церкви, небоязненно обличил еси и, все духовное воинство Православия совокупив, ересь в конец низложил еси, нас же всех во правоверии утвердив, научил еси единогласно воспевати Триединому Богу: Аллилуиа.

 

Икос 9

Ветия многовещанныя недоумеют достойно восхвалити тя, преблаженне, паче бо естества человеческаго подвизался еси во вся дни живота твоего. Темже чудесы Христос Бог тебе обогати, яко и зверие дивии повиновахуся и служаху тебе, во дни же глада молитвою твоею небо дождь даде на землю суху. Сего ради, любовию подвизаемии, вопием тебе таковая:

Радуйся, Церкве Православныя похвало.

Радуйся, еретиков и всех противников правоверия обличителю. 

Радуйся, яко людей увещати о истине Православия потщался еси.

Радуйся, за истину Православия многия труды и подвиги подъемый. 

Радуйся, православныя веры светило и утверждение.

Радуйся, пророком, апостолом и святителем сопричтенный. 

Радуйся, царей православных покрове и защищение.

Радуйся, христиан правоверных молитвенное ограждение.

Радуйся, еретических учений разорителю.

Радуйся, православных догматов уяснителю. 

Радуйся, всем подвизающимся о Православии помощниче.

Радуйся, пастырей Православныя Церкве споспешниче. 

Радуйся, пресветлая монахов похвало, Савво преподобне.

Спасти хотя множество людей твоим попечением, Премилосердый Господь достойна тя наставника избра, преблаженне отче Савво: мнози бо тобою на путь спасения наставлени быша, и многи обители твоим тщанием устроишася, в нихже научал еси немолчно воспевати Единому Богу: Аллилуиа.

Стена твердая и крепкое ограждение православных явился еси, преподобне, ходатайством бо твоим мир Церкви Божией даровася. Темже молим тя, преблаженне: буди помощник во всех скорбех и напастех и нам, к заступлению твоему прибегающим, да со умилением вопием ти сице:

Радуйся, пустынниче, мирскую суету возненавидевый и Единаго Бога искавый.

Радуйся, алтаря Господня служителю благоговейный. 

Радуйся, со всяким тщанием Господу благоугождавый.

Радуйся, пламенную любовь ко Христу явивый. 

Радуйся, многия обители созидавый.

Радуйся, множество чад духовных внутрь собравый.

Радуйся, во оскудениих и лишениих на Бога уповавый.

Радуйся, верою и упованием изобилие плодов земных приемый. 

Радуйся, тезоименитыя тебе обители страже неусыпный.

Радуйся, в бедах, напастех и скорбех помощниче неотступный.

Радуйся, иноков ко спасению добрый путеводителю.

Радуйся, многомощный молитвенниче о душах наших. 

Радуйся, пресветлая монахов похвало, Савво преподобне.

Пение хвалебное приносим тебе, преподобне отче Савво, и с любовию припадающе ко изображению честнаго лика твоего, восхваляем ангелоподобное житие твое. Ты же, предстоя Престолу Пресвятыя Троицы, не престай моляся о нас, ублажающих тя, да сподобимся Небеснаго селения достигнути и гласом радования воспети Богу ангельскую песнь: Аллилуиа.

Светозарный светильник Божия благодати был еси, преблаженне, сего ради в смертнем успении твоем душа твоя, яко солнце сияющая, вознесена бысть святыми Ангелы в Небесныя обители. Мы же, поминающе твою блаженную кончину и на Небеси прославление, радостно вопием ти: 

Радуйся, угодниче Божий, течение твоея жизни благочестно скончавый.

Радуйся, веру, надежду и любовь до конца сохранивый. 

Радуйся, яко Царство и славу вечную наследовал еси.

Радуйся, яко по трудех жития земнаго в Небесных селениих водворился еси. 

Радуйся, нетленным венцем славы Небесныя от руки Вседержителя увенчанный.

Радуйся, блаженство райское со всеми святыми восприемый. 

Радуйся, Ангеле земный и человече Небесный.

Радуйся, на нНебеси и на земли от Господа прославленный. 

Радуйся, живоносный источниче, благодать исцеления изливаяй.

Радуйся, одержимых недуги благодатию Божиею исцеляяй. 

Радуйся, яко с высоты Небесныя на нас и обитель твою призираеши.

Радуйся, яко всех нас от напастей сохраняеши. 

Радуйся, пресветлая монахов похвало, Савво преподобне.

Благодать и велие твое дерзновение пред Богом ведуще, богоносне отче Савво, усердно вопием тебе: не престай моляся тепле ко Господу, да сохранит святую Церковь Свою непозыблему от неверия, ересей и раскола, да избавит нас от бед и лютых обстояний и приведет в Царствие Свое Небесное, яко да поем со благодарением тобою благодеющему нам дивному во святых Богу: Аллилуиа.

Поюще прославльшаго тя Господа и ублажающе тя, преблаженне отче, прилежно молимся тебе, еже сподобитися и нам ходатайством твоим неосужденно предстати Страшному Судищу Христову, да с радостию и любовию воспоминающе твое молитвенное о нас пред Богом предстательство, благохвально зовем тебе сице:

Радуйся, пречестное селение Пресвятыя Троицы.

Радуйся, избранное Святаго Духа жилище. 

Радуйся, сияние незаходимаго Солнца.

Радуйся, лучами подвигов твоих монашеское житие озаряяй. 

Радуйся, достойный Ангелов собеседниче.

Радуйся, мучеников и преподобных на Небеси сожителю. 

Радуйся, яко мзда твоя многа на Небеси.

Радуйся, Церкви Православныя украшение.

Радуйся, в бедах сущим скорое вспоможение. 

Радуйся, теплый пред Господем о нас молитвенниче.

Радуйся, присный иноков помощниче и заступниче.

Радуйся, пресветлая монахов похвало, Савво преподобне.

О великий и дивный угодниче Христов, преподобне отче Савво! Приими милостивно сие малое моление, от усердия нашего в похвалу тебе приносимое, и твоим молитвенным предстательством у Престола Царя Небеснаго испроси нам, еже избавитися в жизни сей от всех бед и напастей, в смертнем же успении нашем благую часть спасения и наследие вечных благ получити, яко да сподобимся с тобою и со всеми святыми в радости вечней во веки воспевати Христу Богу, Спасителю нашему: Аллилуиа.

(Этот кондак читается трижды, затем икос 1 и кондак 1).

О предивный и всехвальный угодниче Божий, преподобне отче Савво! Днесь (во святем храме твоем) благоговейно предстояще пред святою иконою твоею и радостно совершающе пресветлую память твою, ублажаем тя, заступника нашего. Почитающе же твое велие дерзновение пред Господем, смиренно молим тя, преблаженне: приими милостивно от нас хвалебное пение сие, от любве и усердия тебе приносимое, и, яко имеяй велие дерзновение ко Господу, потщися богоприятным твоим ходатайством испросити у Царя царствующих и Господа господствующих, яко да пробавит великия и богатыя милости Своя на нас, грешных, да подаст нам дух правыя веры, дух ведения и любве, дух мира и радости о Дусе Святе, да избавит от бед и напастей, да низпослет вся полезная ко спасению душ наших. Всем же православным христианом да низпослет мир, тишину, безмятежие, усердие ко исполнению заповедей Его, изобилие плодов земных, и да избавит всю  страну нашу от глада, труса, потопа, огня, меча, нашествия иноплеменных и междоусобныя брани, смертоносныя язвы и от всякаго зла. Ей, угодниче Божий! Не презри молений наших, но услыши нас, молящихся тебе, и под кровом заступления твоего сохрани нас (и обитель твою) ненаветны от враг видимых и невидимых, да сподобимся скончати житие наше в покаянии и восприимем вечная благая во Царствии Христа Бога нашего, идеже восхвалим с тобою и всеми святыми достопоклоняемое имя Пресвятыя Троицы, Отца и Сына и Святаго Духа, во веки веков. Аминь.

 

ЖИТИЕ

Преподобный Савва Освященный родился в V веке, в Каппадокии в благочестивой христианской семье Иоанна и Софии. Его отец был военачальником. Уехав по делам службы в Александрию, он взял с собой жену, а пятилетнего сына оставил на попечение дяди. Когда мальчику шел восьмой год, он поступил в находившийся поблизости монастырь святой Флавианы. Одаренный ребенок скоро научился читать и хорошо изучил Священное Писание. Напрасно родители уговаривали святого Савву вернуться в мир и вступить в брак.

В 17 лет он принял монашеский постриг и так преуспел в посте и молитвах, что был удостоен дара чудотворений. Проведя десять лет в обители Флавианы, преподобный отправился в Иерусалим, а оттуда в обитель преподобного Евфимия Великого. Но преподобный Евфимий (память 20 января) направил святого Савву к авве Феоктисту, настоятелю близлежащего монастыря со строгим общежительным уставом. В той обители пробыл преподобный Савва послушником до 30-летнего возраста.

После смерти старца Феоктиста, его преемник благословил преподобного Савву затвориться в пещере: лишь в субботу святой покидал затвор и приходил в обитель, участвовал в Богослужении и принимал пищу. Через некоторое время преподобному разрешили совсем не оставлять затвора, и святой Савва подвизался в пещере в течение 5 лет.

Преподобный Евфимий внимательно следил за жизнью юного инока и, видя, как он духовно возрос, стал брать его с собой в пустыню Рув (у Мертвого моря). Они выходили 14 января и пребывали в ней до Недели Ваий. Преподобный Евфимий называл святого Савву отроком-старцем и заботливо воспитывал его в высших иноческих добродетелях.

Когда преподобный Евфимий отошел ко Господу (+ 473), святой Савва ушел из Лавры и поселился в пещере близ обители преподобного Герасима Иорданского (+ 475; память 4 марта) Через несколько лет к преподобному Савве стали собираться ученики - все, кто хотел иноческой жизни. Так возникла Великая Лавра. По указанию свыше (через огненный столп) иноки устроили в пещере церковь.

Преподобный Савва основал еще несколько обителей. Многие чудеса были явлены по молитвам преподобного Саввы: среди Лавры забил источник, во время засухи пролился обильный дождь, происходили исцеления больных и бесноватых. Преподобный Савва написал первый устав церковных служб, так называемый "Иерусалимский", принятый всеми Палестинскими монастырями. Святой мирно преставился к Богу в 532 году.

В VII в. мощи прп. Саввы были перенесены в Константинополь. Оттуда, в XIII в., крестоносцы перевезли их на Запад. До 1965 г. они находились в Венеции. По просьбе Иерусалимского Патриарха в 1965 г. мощи прп. Саввы были возвращены Иерусалимской Церкви. 26 октября в Лавре св. Саввы празднуется как день возвращения мощей в обитель.