Православный календарь
Рекомендуем посетить
Музыковский Покровский мужской монастырь Херсонской епархии
УПЦ

НОВАЯ ИНФОРМАЦИЯ

Расписание богослужений в Свято-Духовском кафедральном соборе на ОКТЯБРЬ

 

Ночные литургии в ОКТЯБРЕ:

в ночь с 7 на 8 четверга на пятницу)

с 29 на 30 (заупокойная) пятницы на субботу)

 

До 16 октября в Свято-Духовском кафедральном соборе Херсона пребывает

ПОЧАЕВСКАЯ ИКОНА БОЖИЕЙ МАТЕРИ.

Ежедневно в 12.00 совершается молебен с акафистом   
 

Акафист мученице ЦАРИЦЕ АЛЕКСАНДРЕ РИМСКОЙ

День памяти:

6 мая (н. ст.)

 

Тропарь, глас 4

Ца́рства земна́го сла́ву презре́вши, Еди́наго Христа, нас ра́ди распя́таго, возлюби́ла еси́ и, Того му́жественне испове́дающи, венце́м му́ченическим увенча́лася еси́, всеблаже́нная цари́це Алекса́ндро, те́мже и ны́не Престо́лу Царя́ сла́вы на Небесе́х предстоя́щи, моли́ся о спасе́нии душ на́ших.

Кондак, глас 2

Храм твой всечестны́й я́ко цельбу́ душе́вную обре́тше вси ве́рнии, велегла́сно вопие́м ти: му́ченице Алекса́ндро великоимени́тая, Христа́ Бо́га моли́ непреста́нно о всех нас.

Кондак 1

Избра́нная страстоте́рпице и усердная молитвеннице о душа́х наших, святая царице Александро, похвальная воспева́ем ти, память твою благогове́йно почита́юще; ты же, яко име́яй дерзновение ко Господу, от всяких нас бед сохраняй, да зовем ти: Радуйся, мученице славная, царице Александро.

 

Икос 1

Ангелов и человеков Творец и Создатель, времена́ и ле́та во Своей власти положи́вый и вся ко спасению устроя́яй, призва́ тя, царице Александро, к подвигу страда́льческому. Темже, сла́вяще Божие о тебе промышле́ние, зовем ти таковая:

Радуйся, всею душе́ю истину Христову восприя́вшая.

Радуйся, от царства земна́го в Царствие Небесное преше́дшая.

Радуйся, во объя́тия О́тча с любовию Отцем Небесным восприя́тая.

Радуйся, к со́нму мучеников добропобе́дных сопричте́нная.

Радуйся, мученице славная, царице Александро.

 

Кондак 2

Видя лютое гонение на христиа́ны нечести́ваго императора Диоклетиа́на, не убоялася еси, всехвальная Александро, гнева царскаго и мучи́тельства, но мужественно Христа испове́дала еси, поя Тому: Аллилуия.

 

Икос 2

Разум ко спасению и тайн Божиих разуме́ние даде́ тебе Царь Небесный, святая царице Александро, ты бо зря́щи дерзнове́ние великомученика Георгия, твердым умом испове́давшаго Еди́наго премудрости Наставника и смы́сла Подателя Бога, и сама узре́ла еси свет истиннаго богопозна́ния, житие свое вве́рив в ру́це Подвигополо́жника всех и Господа. Сего ради, похваля́я любому́дрие твое, зовем си́це:

Радуйся, подвиг святаго Георгия в сердце своем запечатле́вшая.

Радуйся, грядущих мучений не устраши́вшаяся.

Радуйся, безумное и́дольское нече́стие пред всеми обличившая.

Радуйся, от руки́ Вседержителя венца Небеснаго сподо́бльшаяся.

Радуйся, мученице славная, царице Александро.

 

Кондак 3

Сила Вышняго осени тя и благодать Духа Святаго напо́лни сердце твое, мученице всехвальная Александро, егда зре́ла еси страдания великомученика Георгия, егоже не поколеба́ша ни раны, ни преще́ния безумнаго мучителя, иже, яко а́спид глухи́й, затыка́ше ушеса́ своя, не желая слышати  о Христе Иисусе, Емуже ты ныне с вино́вником спасения твоего Георгием во Царствии Небеснем предстоя́, вы́ну пое́ши: Аллилуия.

 

Икос 3

Име́я ве́лие попечение о души́ своей, святая царице Александро, славу су́етную и почести земны́я презре́ла еси и стезе́ю, веду́щею в жизнь вечную, потекла еси; сего ради вопием ти:

Радуйся, страдания за Христа до́блестно претерпевшая.

Радуйся, смерти теле́сныя не устраши́вшаяся.

Радуйся, полк му́ченический на Небеси возвеселившая.

Радуйся, люди от тьмы нече́стия ко истине Христовой обратившая.

Радуйся, мученице славная, царице Александро.

 

Кондак 4

Бурею зло́бных помышлений одержи́м, нечестивый император Диоклетиа́н вернаго воина своего Георгия страшным мукам предати повеле́ и тя, царице Александро, пред всеми Истиннаго Бога испове́давшую, на смерть осуди́, не ве́дуще пети: Аллилуия.

 

Икос 4

Слыша словеса́ святаго Георгия, блаженная Александро, Христа яко Воплоще́нную Истину пред всеми премудро испове́дала еси, глаголя: "Боже Гео́ргиев, помози́ ми, яко Ты Един всеси́лен". Сего ради прими́ от нас, недостойных, похвалы́ сия́:

Радуйся, дерзнове́нно безумное заблуждение гонителя обличившая.

Радуйся, яко щито́м веры разже́нныя стре́лы лука́ваго угаси́вшая.

Радуйся, царем земны́м за истину на смерть осужде́ннная.

Радуйся, Царем Небесным с любовию восприя́тая.

Радуйся, мученице славная, царице Александро.

 

Кондак 5

Боготе́чней звезде подо́бна яви́ Господь святаго Победоносца Георгия, да вси взира́ющии на непоколеби́мую веру его, вку́пе с тобою, всеблаженная царице Александро, воспоют: Аллилуия.

 

Икос 5

Видеша чудеса Божия, по молитвам великомученика Георгия соверша́емыя, обрела́ еси веру истинную, царице Александро, до са́мыя смерти верность твою Христу свиде́тельствуя. Сего ради приими́ от нас похвалы́ сия́:

Радуйся, порфи́ру царскую на ри́зу му́ченическую премени́вшая.

Радуйся, Царю царей во служе́ние восприя́тая.

Радуйся, на Небеси венцем ца́рственным, нетле́нным, увенча́нная.

Радуйся, пред Престолом Божиим о нас моля́щаяся.

Радуйся, мученице славная, царице Александро.

 

Кондак 6

Проповедницы милости Божия к лю́дем бы́ша вси слышавшии словеса́ твоя, богомудрая Александро, ты бо возвеща́ла еси о Христе, Иже Един всеси́лен, во е́же спасти всякаго человека, в покаянии к Нему притека́ющаго и вопиющаго: Аллилуия.

 

Икос 6

Возсия́ в сердце твоем свет Христов, царице Александро, егда́ прилепи́лася еси душе́ю к Истинному Богу, святым Георгием пропове́данному. Сего ради, ублажая мудрость твою, вопием:

Радуйся, пре́лести и́дольския тьму обли́чившая.

Радуйся, Христа, Истиннаго Бога, познавшая.

Радуйся, светом благочестивыя веры просвети́вшаяся.

Радуйся, любве́ ради Христовы подвиг страда́льческий совершившая.

Радуйся, мученице славная, царице Александро.

 

Кондак 7

Хотя от ны́нешняго века сего прейти́ в нетленное Царство Христово, мученице святая Александро, не убоя́лася еси, ниже́ смути́лася еси духом, но на страдания, яко на бра́чный пир, мужественно потекла́ еси, поя́ Создателю всех Богу: Аллилуия.

 

Икос 7

Новую тя показа́ славную страстоте́рпицу и молитвенницу о лю́дех Христос Бог наш, царице Александро, ты бо венец страда́льческий восприя́вши, мо́лишися непрестанно о нас, грешных, притекающих к тебе и вопиющих ти похвальная сия:

Радуйся, от язы́ческого нече́стия ко Христу обратившаяся.

Радуйся, сердца́ верных тем возвеселившая.

Радуйся, яко тобою вера Христова возвышается.

Радуйся, яко тобою имя Божие прославляется.

Радуйся, мученице славная, царице Александро.

 

Кондак 8

Странно и ди́вно бысть неверующим видети, ка́ко ради будущих Небесных благ, славу, честь, богатство и саму жизнь земную ни во что же вмени́в, смерть му́ченическую восприя́ла еси, царице Александро, вопиющи Христу, Спасителю всех: Аллилуия.

 

Икос 8

Всем сердцем твоим и всею душею в го́рняя устреми́лася еси, всехвальная царице Александро, но и ни́жних ника́коже оставила еси, моля́щи Христа Бога о чтущих святую память твою; сего ради слы́шиши от нас сия́:

Радуйся, от всея души́ твоея́ и разуме́ния Господа возлюбившая.

Радуйся, от благ жите́йских сердце твое отврати́вшая.

Радуйся, яко благ нетле́нных в Царствии Небеснем ныне наслажда́ешися.

Радуйся, и нам, ме́ньшим бра́тиям твоим, благ сих сподо́битися умоля́еши.

Радуйся, мученице славная, царице Александро.

 

Кондак 9

Все естество́ Ангельское удиви́ся, блаженная царице Александро, ка́ко ты, царствия земна́го отреши́вшись, Царствие Божие преславно насле́довала еси и, славу земну́ю премудро оттря́сши, славу Небесную восприя́ла еси, иде́же ныне Христу пое́ши: Аллилуия.

 

Икос 9

Вети́я многовеща́нныя, яко ры́бы безгла́сныя, зрим о тебе, святая царице Александро, недоуме́ют бо, ка́ко по достоя́нию восхвалити подвиги твоя, мученице Христова; мы же, дивя́ся силе Божией, в страда́ниих тя укрепи́вшей, вопием ти:

Радуйся, зло́бы мучителя не устраши́вшаяся.

Радуйся, от и́дольскаго нече́стия сердца́ многих отвратившая.

Радуйся, неверных богому́дренное обличение.

Радуйся, рода христианскаго возвыше́ние.

Радуйся, мученице славная, царице Александро.

 

Кондак 10

Спасти хотя люди, во тьме идолослуже́ния погибающия, яви́ тя Преблаги́й Господь, святая мученице Александро, образ веры и терпения: кто бо не умили́тся, ви́дя твое мужество и страдания. Темже, ве́лию к нам милость Божию сла́вяще, вопием: Аллилуия.

 

Икос 10

Стена́ еси всем человеком, к заступлению твоему притека́ющим, страстоте́рпице Христова Александро; сего ради и нас, твоея́ по́мощи прося́щих, не остави твоим ко Господу хода́тайством, вопиющих ти такова́я:

Радуйся, за ны пред Престолом Божиим моля́щаяся.

Радуйся, от Бога милости нам непрестанно прося́щая.

Радуйся, христиан непосты́дное прибе́жище.

Радуйся, Церкви Христовы честна́я похвало́.

Радуйся, мученице славная, царице Александро.

 

Кондак 11

Пение умиленное приносим ти, мученице Александро, яко скорой помощнице в ну́ждах и печа́лех; темже нело́жно прославляется тобою Бог, ди́вный во святых Своих, зовущих непрестанно: Аллилуия.

 

Икос 11

Светозарную свещу́, просвещающую ду́ши наша верою, зрим тя, царице Александро, пред Престолом Божиим предстоя́щую; сего ради твоим блиста́нием озаря́еми, зовем таковая:

Радуйся, светом истины Христовы ра́зум просвещающая.

Радуйся, путь к Царствию Небесному указу́ющая.

Радуйся, не тле́ннаго, земна́го, но Небеснаго искати вразумля́ющая.

Радуйся, во истине Христовой начало и конец всех смы́слов полагающая.

Радуйся, мученице славная, царице Александро.

 

Кондак 12

Благодать и ве́лие твое дерзновение пред Богом ве́дуще, святая царице Александро, пред иконою твоею припа́дающе, просим: моли́ся о нас, недостойных и грешных, да помилует Господь рабы Своя, вопиющия Ему: Аллилуия.

 

Икос 12

Поюще твоя подвиги, мученице Христова Александро, чтим святую память твою и в честь твоих победоно́сных страданий похвальная воспису́ем ти сия́:

Радуйся, царице мудрая, служи́тельнице всех Царя.

Радуйся, защитнице всех верных от враг видимых и невидимых.

Радуйся, е́юже вера утвержда́ется.

Радуйся, е́юже нече́стие низлага́ется.

Радуйся, мученице славная, царице Александро.

 

Кондак 13

О святая мученице царице Александро, прими́ сие приноси́мое тебе моление и не возгнуша́йся не́мощей, грехов и малоду́шия нашего, но хода́тайством твоим избави нас от всякия беды́ и напа́сти, а наипа́че бу́дущия вечныя му́ки избавитися нам Господа умоли́, да вку́пе с тобою и всеми святыми во веки пое́м Ему: Аллилуия.

 

(Этот кондак читается трижды, затем икос 1 и кондак 1)

 

Молитва

Це́ркве Святы́я украше́ние и му́чениц сла́во, пресла́вная цари́це Алекса́ндро! К тебе́ во умиле́нии серде́ц на́ших припа́даем и твоего́ заступле́ния у Го́спода о нас мо́лим. Аще бо му́жеству твоему́ не поревнова́хом и безбоя́зненнаго испове́дания твоего́ не приобщи́хомся, па́че же мно́гими прегреше́ньми гнев Бо́жий привлеко́хом, но не хо́щем во гресе́х на́ших умре́ти, и на твой по́двиг взира́юще, па́ки на одоле́ние страсте́й на́ших ополча́емся. Сие́ же ве́дуще, я́ко кроме́ благода́тныя по́мощи ничто́же благо́е сотвори́ти возмо́жем, ту́ю по́мощь нам от Го́спода пода́ти тя про́сим. Ты бо, страстоте́рпице свята́я, ве́лие ко Влады́це дерзнове́ние стяжа́ла еси, я́ко просла́вившая Его́ в чистоте́ души́ твоея́ и в телеси́ твое́м страда́льчестем, отрекла́ся еси сла́вы и че́сти ми́ра сего́, возлюби́вши духо́вное бога́тство и похвалу́ Христо́вы. Те́мже от того́ бога́тства и на́шей нищете́ духо́вная пода́ждь дарова́ния и от безме́рных прегреше́ний жизнь на́шу соблюди́, мир и безмяте́жие нам испроси́, от ну́жды и уны́ния нас предста́тельством твои́м огради́, друг ко дру́гу нас в послуша́нии и братолю́бии наста́ви и ко Го́споду о́чи серде́ц на́ших всегда́ возводи́, во е́же сла́вити нам Отца́ и Сы́на и Свята́го Ду́ха держа́ву, и твое́ те́плое предста́тельство, во ве́ки веко́в. Ами́нь.

 

ЖИТИЕ

Мученица царица Александра пострадала в 303 году в Никомидии, вместе с великомучеником Георгием Победоносцем, по приговору императора Диоклетиана.

Можно предположить, что она была вдовой одного из императоров, предшественников Диоклетиана (с 270 по 284 годы в империи сменилось 15 правителей).

Царица Александра уверовала во Христа, став свидетельницей чудесного исцеления Ангелом великомученика Георгия от страшных ран, полученных им от лезвий ножей и гвоздей на колесе для пыток. Она пожелала тут же исповедовать Христа, но проконсул Магненций удержал ее от этого. Затем царица Александра стала свидетельницей того, как великомученик Георгий, зарытый по плечи на три дня в яме с негашеной известью, вышел из нее живым и невредимым.

Когда царица Александра узнала, что силой крестного знамения великомученик Георгий разбил все статуи богов в храме Аполлона, она явилась в суд и открыто исповедала Христа, высмеяв языческих богов и обличив императора в нечестии. После этого поступка Диоклетиан повелел казнить великомученика Георгия, а вместе с ним и царица Александра с радостью последовала на казнь, но по пути изнемогла, присела на камень у дороги и умерла. По другой версии, ей, так же, как и великомученику Георгию, отсекли голову.

Память мученицы царицы Александры совершается вместе с памятью великомученика Георгия Победоносца - 23 апреля (6 мая по новому стилю). Греческие же Церкви совершают память святой Александры в день ее кончины - 21 апреля.

По благословению

митрополита Херсонского и Таврического Иоанна

Опубликована: 02.08.2021