Православный календарь
Рекомендуем посетить
Музыковский Покровский мужской монастырь Херсонской епархии
УПЦ

НОВАЯ ИНФОРМАЦИЯ

Расписание богослужений в Свято-Духовском кафедральном соборе на ОКТЯБРЬ

 

Ночные литургии в ОКТЯБРЕ:

в ночь с 7 на 8 четверга на пятницу)

с 29 на 30 (заупокойная) пятницы на субботу)

 

До 16 октября в Свято-Духовском кафедральном соборе Херсона пребывает

ПОЧАЕВСКАЯ ИКОНА БОЖИЕЙ МАТЕРИ.

Ежедневно в 12.00 совершается молебен с акафистом   
 

Акафист мученице ВАЛЕРИИ МЕДИОЛАНСКОЙ

 

День памяти:

11 мая (н.ст.)

 

Тропарь, глас 4

Агница Твоя, Иисусе, Валерия зовет велиим гласом: Тебе, Женише мой, люблю, и, Тебе ищущи, страдальчествую, и сраспинаюся и спогребаюся крещению Твоему, и стражду Тебе ради, яко да царствую в Тебе, и умираю за Тя, да и живу с Тобою, но яко жертву непорочную приими мя, с любовию пожершуюся Тебе; тоя молитвами, яко Милостив, спаси души наша.

 

Кондак, глас 4

Победила еси мучителей гордыню и ранами не устрашенна пребыла еси, мученице преславная Валерие, поспешающую имущи благодать Спасову, Егоже моли непрестанно о всех нас.

 

Кондак 1

Избранная Богом для исповедания истинныя веры, всехвальная Валерие, благодарственная пения приносим ти; ты же, яко имущая дерзновение ко Господу, вспомоществуй нам на пути спасения, да с любовию зовем ти: Радуйся, святая Валерие, жен христианских похвало и украшение.

 

Икос 1

Ангели на Небеси зело возрадовахуся, благочестивая Валерие, видя добродетельное житие твое, еже провождала еси с подружием твоим Виталием, чада ваша вере в Истиннаго Бога научающи. Мы же, таково́му благоразумию твоему умиляяся, зовем ти:

Радуйся, Богом из тьмы нечестия в благодатный свет призванная.

Радуйся, от юности добродетельным житием украшенная.

Радуйся, всем сердцем Господа Иисуса возлюбившая.

Радуйся, кровию твоею одежды своя украсившая.

Радуйся, исповедническим подвигом житие свое скончавшая на земли.

Радуйся, ныне со Христом в чертозе Его пребывающая на Небеси.

Радуйся, святая Валерие, жен христианских похвало и украшение.

 

Кондак 2

Видя Сердцеведец Господь чистоту души твоея, славная Валерие, светом Небесным тя просвети, да будеши светильником всесветлым во мраце греховнем пребывающим, научая пети их с тобою: Аллилуиа.

 

Икос 2

Разум богопросвещен имея, достохвальная Валерие, познала еси тщетность многобожия и во Едином Христе душу свою упокоила еси. Научи и нас всецело Богу угождати, да зовем ти таковая:

Радуйся, Духа Святаго чистое селение.

Радуйся, Церкве Православныя преславное украшение.

Радуйся, во святем Крещении духом обновленная.

Радуйся, в ризу спасения одеянная.

Радуйся, ветхаго человека совлекшаяся и в новаго облекшаяся.

Радуйся, светом христианскаго благочестия просветившаяся.

Радуйся, святая Валерие, жен христианских похвало и украшение.

 

Кондак 3

Силою Христовою свыше укрепленный, муж твой Виталий, благоверная Валерие, тяжкия страдания от нечестивых претерпев, во обители Небесныя вселися с пением победным: Аллилуиа.

 

Икос 3

Имущи сердце, скорбию исполнено, последовала еси во град Равенну, страдалице святая, да упокоиши тело мужа твоего. Мы же в сем пути с тобою незримо пребывая и тебе духовно состарадая, песнь приносим таковую:

Радуйся, во угождении Богови и ближним пожившая.

Радуйся, верность мужу своему до конца сохранившая.

Радуйся, дом свой в любви и согласии содержавшая.

Радуйся, жизнь вечную во Христе стяжавшая.

Радуйся, яко ныне на Небесех достойно утешаешися.

Радуйся, яко лицезрения Божия выну наслаждаешися.

Радуйся, святая Валерие, жен христианских похвало и украшение.

 

Кондак 4

Бурю печали душевныя претерпела еси, святая Валерие, егда равеннстии христиане воспретиша ти взяти святыя мощи мужа твоего Виталия, да будет Небесным заступником граду их, о немже они воспевают Богу: Аллилуиа.

 

Икос 4

Имея выну пред очами своими Господа, волю Его неленостно исполняла еси, богомудрая жено; научи и нас всецело упование свое на Бога возлагати, вопиющих ти благохваления сия:

Радуйся, утешение благое в сердца наша низпосылающая.

Радуйся, упование на милосердие Божие в нас вселяющая.

Радуйся, яко истинам Христовы веры нас научаеши.

Радуйся, яко прегрешения наша зрети нам помогаеши.

Радуйся, на пути спасения нас укрепляющая.

Радуйся, от бед и напастей нас ограждающая.

Радуйся, святая Валерие, жен христианских похвало и украшение.

 

Кондак 5

Боготечней звезде уподобилася еси, преславная Валерие, просвещающи языческое нечестие людей, жертвы ложному богу Сильвану приносивших и тебе от сих вкусити предложивших; ты же скверными брашнами возгнушалася еси, Богу, в Троице славимому, воспевая: Аллилуиа.

 

Икос 5

Видя презрение твое к богам ложным, мученице преславная, нечестивии идолопоклонницы в ярость приидоша и палицами тя избиша, еле живу тя оставивши. Таковому мужеству твоему в женстем немощнем телеси удивляяся, восхваляем страдания твоя:

Радуйся, мучительскую дерзость посрамившая.

Радуйся, яко солнце посреде беззаконных просиявшая.

Радуйся, страстем Христовым приобщившаяся.

Радуйся, в страданиих, яко злато в горниле, очистившаяся.

Радуйся, яко и по кончине твоей исцелений струи источаеши.

Радуйся, яко силою духовною разжжение страстей уставляеши.

Радуйся, святая Валерие, жен христианских похвало и украшение.

 

Кондак 6

Проповедницею истинныя веры явилася еси, всечестная Валерие, не токмо людем града Медиолана, но и всем в благочестии и богоугождении жити хотящим, да в дусе и истине воспевают Всещедрому Богу: Аллилуиа.

 

Икос 6

Возсияла еси, яко звезда лучезарная, блаженная Валерие, лик благочестивых жен на Небеси восполняя; нас же, почитающих святую память твою, не остави своим ходатайством пред Венцедателем Богом, да и мы причастницы славы вечныя будем, вопиющия ти таковая:

Радуйся, все упование свое на Господа возложившая.

Радуйся, страданиями твоими к Богу приблизившаяся.

Радуйся, плоти своея за Христа не пощадившая.

Радуйся, Его ради вся красная мира сего презревшая.

Радуйся, о нашем спасении ко Господу верная молитвеннице.

Радуйся, страждущим и изнемогающим усердная помощнице.

Радуйся, святая Валерие, жен христианских похвало и украшение.

 

Кондак 7

Хотяй всем спастися Жизнеподатель Господь, настави тя, мученице славная, чадом своим последнее поучение в истинней вере преподати, и по триех днех душу твою во обители Своя блаженныя с миром всели. Мы же, таковое попечение Божие о тебе восхваляя, со умилением поем: Аллилуиа.

 

Икос 7

Новых страдальцев за веру Христову яви Вседержитель Господь – блаженных чад твоих Гервасия и Протасия, иже, все имение свое нищим роздавше и во уединении Богови неленостно поработавше, от нечестивых смерть мученическую прияша. Мы же, таковым добрым плодам жития твоего земнаго умиляяся, вопием ти сице:

Радуйся, яко тобою дивен Бог во святых Своих является.

Радуйся, яко тобою имя Христово по всей земли прославляется.

Радуйся, жен христианских нескончаемое радование.

Радуйся, матерей благочестивых преизящная похвало.

Радуйся, с мужем твоим, мучеником Виталием, у Престола Всевышняго предстоящая.

Радуйся, со чады своими, мученики Гервасием и Протасием, в блаженстве вечнем на Небесех веселящаяся.

Радуйся, святая Валерие, жен христианских похвало и украшение.

 

Кондак 8

Странствование твое на земли преславно скончавше, всехвальная Валерие, Отечества Небеснаго достигла еси; ныне же вечных благ наслаждаяся, поминай пред Богом и нас, земнородных, надеющихся на милосердие Его и поющих: Аллилуиа.

 

Икос 8

Всю себе Всемогущему Богу предав, настави и нас, страстотерпице святая, Сладчайшему Господу нашему неленостно служити и с ближними нашими в мире и любви пребывати, да со умилением зовем ти таковая:

Радуйся, яко благочестием твоим Ангелы возвеселила еси.

Радуйся, яко елеем чистоты душу свою украсила еси.

Радуйся, почитающих память твою милостию своею покрывающая.

Радуйся, в скорбех и печалех души наша утешающая.

Радуйся, семействам благочестивым благодатную помощь подающая.

Радуйся, путь неуклонный к жизни вечней нам указующая.

Радуйся, святая Валерие, жен христианских похвало и украшение.

 

Кондак 9

Всеми христианскими добродетельми украшенная, Валерие богомудрая, Господеви твоему на земли послужила еси, и высоты равноангельныя достигши, ныне со всеми небожители в радости неизреченней поеши Подателю вечных благ: Аллилуиа.

 

Икос 9

Ветии многовещаннии не возмогут по достоянию восхвалити тя, достоблаженная Валерие; мы же, воспоминая страдания твоя, претерпенныя за возлюбленнаго тобою Христа, ублажаем тя пении сими:

Радуйся, угождати Истинному Богови вожделевшая.

Радуйся, любовию Христовою сердце свое уязвившая.

Радуйся, яко благолепие Царства Небеснаго видети сподобилася еси.

Радуйся, яко к Источнику вечных благ достойно приближилася еси.

Радуйся, Царем славы венцем нетленным увенчанная.

Радуйся, со всеми святыми на Небеси возвеличенная.

Радуйся, святая Валерие, жен христианских похвало и украшение.

 

Кондак 10

Спастися всем хотящим помогай своим предстательством пред Богом, святая Валерие, наипаче же испроси Его просветити омраченныя страстьми сердца наша, да просветленными духовными очами узрим славу Божию и воспоем Ему: Аллилуиа.

 

Икос 10

Стеною молитв твоих от всяких бед нас защити, мученице непобедимая, буди нам покров и ограждение от всех враг видимых и невидимых, верою творящим всечестную память твою и поющим:

Радуйся, верным христианом крепкое заступление.

Радуйся, в скорбех унывающим надежное укрепление.

Радуйся, от уз греховных разрешитися кающимся грешником помогающая.

Радуйся, от язв душевных и телесных всех молящихся тебе исцеляющая.

Радуйся, яко немощныя силы наша к доброделанию подкрепляеши.

Радуйся, яко малодушныя во бранех со страстьми воодушевляеши.

Радуйся, святая Валерие, жен христианских похвало и украшение.

 

Кондак 11

Пение хвалебное приносим ти, богоименитая Валерие, память твою светло празднующе, и Милосердному Господу, даровавшему нам тебе благую заступницу и теплую молитвенницу, благодарение возносим, поюще: Аллилуиа.

 

Икос 11

Светозарною свещею была еси во страдании твоем, всеславная мученице Валерие, озаряющею светом истинныя веры сердца неведущих Бога, да Его обрящут и познают, яко Той есть Господь наш. Мы же, поминая подвиги твоя, воспеваем таковая:

Радуйся, венцем благодати Зиждителем украшенная.

Радуйся, божественнаго веселия плод богатно приявшая.

Радуйся, сладостей райских достойно сподобльшаяся.

Радуйся, благами неизреченными присно наслаждающаяся.

Радуйся, образ благочестиваго жития нам собою являющая.

Радуйся, Христу верными быти даже до смерти нас научающая.

Радуйся, святая Валерие, жен христианских похвало и украшение.

 

Кондак 12

Благодать свыше испроси нам, прехвальная Валерие, да, ею покрываемии, возможем во всем Всещедрому Богу благоугождати, паче всего Его любити и достойно воспевати: Аллилуиа.

 

Икос 12

Поюще Бога, дивнаго во святых Своих, ублажаем тя, мученице Христова, и почитая страдания твоя, славим мужество твое и долготерпение и молим тя: простри нам с Небесе скорую помощь твою, вопиющим ти таковая:

Радуйся, даров Божиих неиждиваемое сокровище.

Радуйся, православным людем крепкое прибежище.

Радуйся, прошений наших скорая услышательнице.

Радуйся, душеполезных знаний щедрая подательнице.

Радуйся, светом боговедения умы наша просвещающая.

Радуйся, заблуждших на путь истины наставляющая.

Радуйся, святая Валерие, жен христианских похвало и украшение.

 

Кондак 13

О святая мученице Валерие, приими малое хвалебное пение сие, от любящих сердец наших тебе возносимое, и молися за ны ко Господу, да укрепит нас в вере православней и в соблюдении заповедей Его, да простит нам вся согрешения наша и милостию Своею сподобит нас наследники Царствия Небеснаго быти и со всеми святыми воспевати Ему: Аллилуиа.

 

Молитва

О многострадальная и премудрая мученице Христова Валерие! Ныне, почитающе святую память твою, к тебе мы, грешнии и недостойнии, усердно прибегаем и во умилении сердец наших молимся. Ты паче всех благ земных Сладчайшаго Господа Иисуса Христа возлюбила еси и Тому чрез все житие верно последовала еси, Божественною благодатию душу свою питающи. Испроси убо и нам благодать, просвещающую нас, да ею осеняеми, в вере и благочестии, в подвизех целомудрия и любви преуспевати будем и Христу в ближних наших служити неленостно потщимся. Моли убо Спаса нашего, да сподобит нас странствие наше земное непреткновенно совершити и в мире и покаянии житие наше скончати, да тако на земли поживше, вечныя и блаженныя жизни на Небесех сподобимся, и тамо с тобою и со всеми святыми вкупе восхвалим Троицу Единосущную и Нераздельную и воспоем Едино Божество, Отца и Сына и Святаго Духа, во веки веков. Аминь.

 

Ж И Т И Е

Святая мученица Валерия жила в конце I – начале II века. Она была женой состоятельного гражданина города Медиолана (ныне – город Милан в Италии) святого мученика Виталия (память 28 апреля /11 мая) и матерью святых мучеников Гервасия и Протасия (память 14/27 октября).

Мученик Виталий, будучи солдатом, сопровождал судью Паолино в путешествии из Медиолана в Равенну. В Равенне судья подверг пыткам и смерти через усечение главы лигурийского доктора Урсицина, который исповедал себя христианином. Виталий приблизился к доктору и помог ему встретить смерть, убеждая быть твердым в перенесении мучений. Открыто исповедовавший себя христианином, Виталий был подвергнут пыткам, после чего был похоронен заживо (засыпан камнями). Над его могилой в Равенне была построена прекрасная базилика его имени, сохранившаяся до наших дней.

Святая Валерия, узнав о смерти своего мужа, тотчас отправилась в Равенну, чтобы забрать его тело и предать погребению в своем доме. Но равеннские христиане воспрепятствовали ей, упросив оставить святые мощи в их городе, чтобы святой Виталий был для них заступником.

Не получив желаемого, Валерия возвращалась в Медиолан и на пути в одном селении попала на богомерзкий праздник язычников, приносивших жертвы своему скверному богу Сильвану.

Идолопоклонники, угощая, по своему обыкновению, странников идоложертвенным мясом, пригласили и Валерию вкусить от этого мяса. Но она возгнушалась такою скверною, и, не желая вкушать от бесовской жертвы, исповедала себя христианкою. Нечестивые, придя в ярость, били Валерию беспощадно палками, так что спутники мученицы довели ее в Медиолан едва живою.

Придя в свой дом и дав наставление в истинной вере сыновьям своим Гервасию и Протасию, она предала на третий день свою душу в руки Божии.

Оставшись сиротами, Гервасий и Протасий продали дом и все свое имущество, освободили рабов и в течение десяти лет жили уединенно в хижине как отшельники. Идольские жрецы потребовали у правителя Анулина заставить их принести жертву богам, считая, что боги перестали давать им ответы на их вопросы из-за того, что братья презирают их. Гервасий и Протасий были заключены в тюрьму, и через некоторое время Гервасий был забит насмерть оловянными прутьями, а Протасий, после избиения, обезглавлен.

Мощи святой Валерии находятся в саркофаге, вместе с мощами святых Матерна, Набора и Феликса, справа от крипты в базилике Сант-Амброджо в Милане. В этой же базилике в крипте почивают и мощи ее сыновей – святых мучеников Гервасия и Протасия. Часть мощей мученицы Валерии также находятся в Венеции в церкви Джезуати или Санта-Мария дель Розарио.

 

По благословению

митрополита Херсонского и Таврического Иоанна

 

Опубликована: 08.10.2019