Православный календарь
Рекомендуем посетить
Музыковский Покровский мужской монастырь Херсонской епархии
УПЦ

НОВАЯ ИНФОРМАЦИЯ

Расписание богослужений в Свято-Духовском кафедральном соборе на ОКТЯБРЬ

 

Ночные литургии в ОКТЯБРЕ:

в ночь с 7 на 8 четверга на пятницу)

с 29 на 30 (заупокойная) пятницы на субботу)

 

До 16 октября в Свято-Духовском кафедральном соборе Херсона пребывает

ПОЧАЕВСКАЯ ИКОНА БОЖИЕЙ МАТЕРИ.

Ежедневно в 12.00 совершается молебен с акафистом   
 

Акафист апостолу ФИЛИППУ

 

День памяти:

27 ноября (н. ст.)

 

Тропарь, глас 3

Благоукрашается вселенная, Ефио́пия ликовству́ет, яко венцем красу́ема, тобою просветившися, светло торжествует память твою, богоглаго́ливе Филиппе, вся бо веровати Христу научил еси и течение совершил достойно Евангелия; тем дерзновенно вари́т Ефио́пская рука́ к Богу, Егоже моли даровати нам ве́лию милость.

 

Кондак, глас 8

Ученик и друг Твой и подражатель страсти Твоея, вселенней Бога Тя проповеда богоглаго́ливый Филипп; того молитвами от врагов пребеззаконных Церковь Твою и всяк град Твой Богородицею соблюди, Многомилостиве.

 

Кондак 1

Избра́нный Христом Богом, Спасителем мира, к апостольскому служению, преславный апос­толе Филиппе! Прославляюще призвавшаго тя Господа, похвальныя песни воспеваем ти. Ты же, верный учениче́ Христов, яко име́яй ве́лие дерзновение ко Господу, не преста́й поминати нас у Престола Вседержителя, да, восхваляюще труды, подвиги и страдания твоя, с любовию вопием ти: Радуйся, Филиппе, святый апос­толе Христов и молитвенниче о нас неусыпный.

 

Икос 1

Ангелов и горних воинств Владыка и Царь, смирив Себе и соше́д на землю на спасение наше, призва тя, святый Филиппе, вку́пе с Петром и Андреем от града Вифсаи́ды в звание апостольства. Ты же, услышав блаженный глас Христа: «Гряди по Мне», — всем сердцем последовал еси за Божественным Учителем твоим. Сего ради вопием ти си́це:

Радуйся, града Вифсаи́ды прозябе́ние сла́вное.

Радуйся, родителей благочестивых о́трасле пречестна́я.

Радуйся, из млада Священному Писанию и книжной премудрости науче́нный.

Радуйся, пропове́даннаго пророками Месси́ю, Спасителя мира, видети желавый.

Радуйся, призвавшаго тя Иисуса Христа всем сердцем возлюбивый.

Радуйся, яко за Божественным Учителем твоим последовал еси.

Радуйся, яко родителей, ближних и вся ради Него оставивый.

Радуйся, вечныя Небесныя бла́га от Христа Бога обреты́й.

Радуйся, Филиппе, святый апос­толе Христов и молитвенниче о нас неусыпный.

 

Кондак 2

Обогаща́яся обильно Божией благодатию от Христа Спасителя, возжелал еси, всехвальне апос­толе, да и ины́я будут причастницы сея́ благодати, сре́тил еси и́скренняго друга твоего Нафана́ила и с радостию возвестил ему: «Егоже писа́ Моисей в Законе и пророцы, обрето́хом Иисуса, сына Ио́сифова, иже от Назарета», — Емуже вся силы Небесныя велегласно поют: Аллилуия.

 

Икос 2

Препобеди́в неверие сумни́тельное, по глаголу твоему, святе Филиппе, тече́ Нафана́ил ко Иисусу, егоже ви́де Господь, рече: «Се истинно изра́ильтянин, в немже ­льсти несть», — и уве́дев, яко преж­де под смоко́вницею ви́ден был еси Христом, во изумле́нии воскликнул еси Ему: «Равви́! Ты еси Сын Божий, Ты еси Царь Израилев!» Испове́дуя и мы Хрис­та Сыном Божиим, тебе, святый апос­толе, воспису́ем таковая:

Радуйся, сокровище безценное — Христа Бога обреты́й.

Радуйся, обре́тением сим обра́дованный светло.

Радуйся, к Сокровищу сему и́скренняго друга твоего приведы́й.

Радуйся, яко чрез тебе призва́ Господь Нафана́ила в жребий апос­тольства.

Радуйся, сокровище учения Христова всему миру неоску́дно источа́яй.

Радуйся, благо́ю ве́стию о пришествии в мир Искупителя сердца́ наша возвеселя́яй.

Радуйся, маловерие и сомнения в вере из сердец наших изгоня́яй.

Радуйся, в твердом испове́дании имени Христова и крепком стоя­нии в вере истинней нас укреп­ля́яй.

Радуйся, Филиппе, святый апос­толе Христов и молитвенниче о нас неусыпный.

 

Кондак 3

Проповедуя Господь в пустыни пяти́ ты́сящам лю́дем, вопрошаше тя, апос­толе Филиппе: «Чим купим хле́бы, да ядя́т си́и?» — Сам ве́дая, что жела́ше сотворити. Ты же, святый апос­толе, человеколюбие показу́я, рекл еси с прочими ученики Ему: «Отпусти народы, да ше́дше во окре́стных се́лех и ве́сех, купят себе хле́бы». Егда же узрел еси ве́лие чудо насыщения толи́ких людей пятию́ хлеба́ми, познал еси Божественнаго Учителя твоего не то́кмо Человека соверше́нна, но и Бога Истинного, в нашу немощну́ю плоть обле́кшагося, и в радости воспел еси Ему: Аллилуия.

 

Икос 3

Посылая тя, святый апос­толе Филиппе, Господь с прочими ученики Своими по два во грады и ве́си с про́поведию Евангелия пред лицем Своим, даде и тебе власть бе́сы изгоняти, болящия исцеляти, прокаже́нныя очищати и мертвыя воскрешати. Ты же, возвратившись от проповеди с прочими сора́тники твоими, в радости вопиял еси Христу: «Гос­поди, и бе́си повинуются нам о имени Твоем!» Мы же, восхваляя труды твоя и пропове́дания, воспеваем тебе та́ко:

Радуйся, в сонм двана́десяти апостолов сопричте́нный.

Радуйся, силу Божию от Христа Бога получивый.

Радуйся, тою силою всякия болезни исцеляяй.

Радуйся, тою силою прокаженныя очищаяй.

Радуйся, тою силою мертвыя воставля́яй.

Радуйся, тою силою ду́хи темныя из людей изгоняяй.

Радуйся, яко и бе́си повинуются ти.

Радуйся, яко по слову Господа имя твое на Небеси написано есть.

Радуйся, Филиппе, святый апос­толе Христов и молитвенниче о нас неусыпный.

 

Кондак 4

Егда же прежде шести дней Пасхи Христос Бог восхождаше во Иеру­салим, на жребя́ти о́сли седя́й, тогда и ты, святе Филиппе, исполнился еси неизреченныя радости, видя Учителя и Господа твоего, грядущаго победити ад и смерть, и с прочими ученики и народы постилал ва́ия фи́ник и восклицал еси Ему: «Осанна! Благословен Грядый во имя Господне!» Научи и нас, славне проповедниче Евангелия, Царю веков, свободи́вшему нас от работы вражия, победно воспевати: Аллилуия.

 

Икос 4

Пришедше во Иерусалим от многих стран е́ллины, умоляху тя, святый апос­толе: «Господин, хо́щем Иисуса видети». Ты же возрадовался еси о сем, яко и язычницы возжела́ху прикоснутися свету истины, и вку́пе со апостолом Андреем возвестил еси Христу желание е́ллинов. Господь же рече: «Аще зе́рно пшени́чно пад на земли́ не у́мрет, то еди́но пребывает; а́ще же у́мрет, мног плод сотвори́т», – сими словесы́ веру язы́ков по Его славном страдании, смерти и воскресении прозна́менуя. Тебе же, святый апос­толе, много для распространения сия́ спасительныя веры потрудившемуся, глаголем си́це:

Радуйся, пророчество Христа о вере язы́ков един от первых приявый.

Радуйся, про́поведию твоею пророчеству сему сбытися посо́бствовавый.

Радуйся, про́поведию твоею о Христе, яко пресветлым свети́лом, язы́ком, в нощи́ идолобе́сия сидя́щим, свети́вый.

Радуйся, словесы́ и чудесы́ твоими путь им к вечной жизни указавый.

Радуйся, яко благо́ю ве́стию о Христе сердца́ многих людей возвеселивый.

Радуйся, яко дея́нии, путешествии и труды твоими крепкую любовь твою ко Христу Богу явивый.

Радуйся, яко про́поведию твоею имя Христово от многих язык прославляется.

Радуйся, яко житие твое, многих трудов на ниве Христовой испо́лненное, по всей Церкви восхва­ляется.

Радуйся, Филиппе, святый апос­толе Христов и молитвенниче о нас неусыпный.

 

Кондак 5

Прежде Своея страсти Христос Бог на Ве́чери умы́ ноги учеников Своих, образ нам смирения показу́я. Ты же, преславне Филиппе, видя ве́лию кротость и смирение Учителя и Господа твоего, сам великаго смирения исполнился еси и во умилении с прочими апостолы вопиял еси Ему: Аллилуия.

 

Икос 5

Напита́в Христос на Ве́чери ученики Своя Телом и Кровию Своею, глагола об исходе Своем ко Отцу. Ты же, святый апос­толе, един дерзнул еси вопросити Гос­пода о великой тайне Божества, глаголя: «Господи, покажи нам Отца, и довле́ет нам», — и слышиши кроткий глас Учителя твоего: «Толи́ко время с вами есмь, и не познал еси Мене, Филиппе? Ви́девый Мене, ви́де Отца; и ка́ко ты глаголеши: покажи нам Отца?» Мы же пред неизсле́димою тайною Пресвятыя Троицы благоговейным молчанием объя́ти бывше, тебе, святый апос­толе, вси тако рцем:

Радуйся, Христа Бога о ве́лией тайне Божества вопроси́вый.

Радуйся, вопроше́нием сим ве́лию пользу Церкви принесы́й.

Радуйся, познавати единосу́щие Лиц Святыя Троицы нас научивый.

Радуйся, уста еретико́в, отвергающих единосу́щие Сына со Отцем, загради́вый.

Радуйся, православно богосло́вствующих и проповедников Евангелия благи́й покровителю.

Радуйся, ересе́й и прочих суе­му́д­рий лукавых усердный искоренителю.

Радуйся, твердо стоящих за веру православную добрый укрепителю.

Радуйся, брань веду́щих во имя Христово с миром, плотию и диаволом славный спобори́телю.

Радуйся, Филиппе, святый апос­толе Христов и молитвенниче о нас неусыпный.

 

Кондак 6

Воскресе Христос, явися учеником Своим, две́рем затворе́нным, и глагола им: «Мир вам!» Ты же, святый апос­толе Филиппе, с прочими ученики узре́в Спасителя, из мертвых воста́вша, радости исполнился еси, твердо уверившись, яко Учитель Твой не человек сме́ртен, но Бог соверше́нен, имеяй власть жизни вечныя; и по́слежде проповедуя народом воскресение Христово, вся языки научил еси пети Победителю ада и смерти: Аллилуия.

 

Икос 6

По вознесении Христовом, в день Пятидесятницы, соше́дшу Духу Святому, ты, славне апос­толе, с прочими ученики и Материю Иису́совою исполнился еси благодати Уте́шителя, многая славная дарования от Него ­прии́м для пропове́дания Евангелия Христова, и получив жребий на проповедь во страны Аси́йския и Сири́йския, понесл еси слово Божие язы́ком, во мра́це неве́дения пребывающим. Сего ради благодарнии людие, от тьмы к свету тобою обратившеся, взывают тебе тако:

Радуйся, воскресением Христовым обрадованный светло.

Радуйся, радость воскресения Христова, якоже залог нашего воста́ния из мертвых, всему миру возвестивый.

Радуйся, вознесение Господа с прочими апостолы на горе Елео́нстей узревый.

Радуйся, обетованием Учителя твоего о пребывании с верными до скончания века уте́шенный.

Радуйся, яко сошедшаго во огни́ Святаго Духа в Сио́нстей го́рнице со всеми прия́вый.

Радуйся, яко многия дары от Утешителя Духа получивый.

Радуйся, яко дары сия достойно сохранивый и приумно́живый.

Радуйся, яко дарами си́ми много Церкви Христовой послуживый.

Радуйся, Филиппе, святый апос­толе Христов и молитвенниче о нас неусыпный.

 

Кондак 7

Проходя по странам и гра́дам с про́поведию Евангелия, святе Филиппе, многия претерпел еси гонения и бие́ния от иудей жес­токовы́йных и язы́ков, во окамене́нии сердечнем пребывающих и душевною слепотою объятых, не желаю­щих последовати пути Божию и во умилении се́рдца вку́пе с тобою пети Христу Богу: Аллилуия.

 

Икос 7

Егда же предстал еси суди́лищу архиере́ову, славне Филиппе, безбоязненно проповедал еси Христа Бога во услы́шание всех. Егда же восхоте́ беззаконный архиерей, с прочими, погубити тя, внеза́пу поражены бысть от Бога слепотою, тогда же и земля поколебася, людие же, ужасом объя́­ти бывше, познаша ве́лию силу Христову. Ты бо, человеколюби́ве апос­толе, молитвою ­твоею врагов твоих исцелил еси, но ослепле́нный злобою архиерей неиспра́влен пребы́сть, хулы́ на Христа Бога глаголя, и внезапу, якоже дре́вле Дафа́н и Авиро́н, земле́ю поже́рт бысть. Народ же, ви́дя сие́, Крещения от тебе прося, прослави пропове́дуемаго тобою Сына Божия, тебе же глаголаше тако:

Радуйся, многократно за проповедь Евангелия страдания приявый.

Радуйся, мно́гажды Христом Богом от смерти исхище́нный.

Радуйся, об окамене́нии сердечнем и слепоте душевней, в людех пребывающих, много скорбевый.

Радуйся, чудесы твоими, силою Божией совершенными, слово, тобою проповеданное, утвердивый.

Радуйся, чудесы твоими язы́ков из неверия в веру Христову обращаяй.

Радуйся, к незлобию и человеколюбию нас подвиза́яй.

Радуйся, прощению и сниз­хож­дению к обидящим и ненавидящим нас научаяй.

Радуйся, твердо стояти в вере православней нам помогаяй.

Радуйся, Филиппе, святый апос­толе Христов и молитвенниче о нас неусыпный.

 

Кондак 8

Странное и преславное зна́мение благоволения Божия видим на тебе, апостоле Филиппе, проповедуя бо Евангелие людем, неве́дущим истины, во утверждение правыя веры чудеса многия силою Христовою сотворил еси, да вси велегла́сно вопиют Творцу и Спасителю нашему: Аллилуия.

 

Икос 8

Весь светом Небесныя любве пламенел еси, Филиппе, словеса́ бо твоя быша, яко молния, нечестие попаля́ющая, ду́ши же ищущих истины светом веры и любве просвещающая. Даждь убо и нам, апостоле всехвальне, молитвами твоими стяжа́ти веру несумне́нну и любовь нелицеме́рну, зовущим таковая:

Радуйся, ревностный слова Божия благовестителю.

Радуйся, людей, просвещенных тобою, во имя Отца и Сына и Духа Святаго крестителю.

Радуйся, Божие слово почитающих покровителю.

Радуйся, Священных Писаний и Божественныя премудрости нам изъяснителю.

Радуйся, Священными Письмены́ сердца́ наша умудря́яй.

Радуйся, словесы́ твоими умы наша просвещаяй.

Радуйся, премудростию твоею суему́дрие века сего посрамляяй.

Радуйся, любовию твоею ду́ши наша согреваяй.

Радуйся, Филиппе, святый апос­толе Христов и молитвенниче о нас неусыпный.

 

Кондак 9

Проповедуя слово Божие, многия труды, многия путешествия подъял еси, апос­толе Филиппе. Плыву́щу ти в корабли, ве́лия буря в нощи́ пости́же тя, яко бы́вшии с тобою во отчаяние приидоша; ты же сотвори молитву, и а́бие яви ти Господь на небеси светлое зна́мение Креста Своего, нощь просвещающее, и внеза́пу море умири́ся, и во́лны умолко́ша; людие же, спасение тобою получивше, в благодарности воззваша Богу, тобою их спасшаго: Аллилуия.

 

Икос 9

Вити́и языческия умолкоша и изнемогоша пред словом твоим, апос­толе, егда в не́коем граде, проповедуя веру Христову, многия болящия исцелил еси, мертвеца, несо́маго на погребение единем словом воскресил еси. Людие же, видяще тобою совершаемая, обращахуся ко Христу от нечестия языческаго, и́долы своя разбиваху, Крещение от тебе прие́мля. Мы же во умилении глаголем тебе сицева́я:

Радуйся, стихи́ям морским словом Божиим повелева́яй.

Радуйся, утопающим в море житейстем руку помощи простира́яй.

Радуйся, молитвою твоею со дна отча́яния изыма́яй.

Радуйся, во унынии пребывающих надеждою на Господа возвеселя́яй.

Радуйся, от смерти духовныя ду́ши наша избавляяй.

Радуйся, от внезапныя погибели милосердием Божиим нас сохраняяй.

Радуйся, христианскую кончину, непостыдну, мирну и Святых Таин причастну, от Бога нам испроша́яй.

Радуйся, от мыта́рств горьких, бесо́в, воздушных князей ходатайством твоим нас избавляяй.

Радуйся, Филиппе, святый апо­с­толе Христов и молитвенниче о нас неусыпный.

 

Кондак 10

Путешествуя по странам из града во град, сре́тил еси, Филиппе, сора́тника твоего, апостола Варфоломея, и сестру твою Ма­риа́мну, ихже Господь посла тебе в помощь, а по́слежде и возлюб­леннаго ученика Христова Иоан­на Богослова, и проходя страны Лиди́йския и Мизи́йския, многия гонения, темницы и заточения, камнями побие́ния за проповедь Евангелия претерпевали есте́, но силою Божиею вы́ну сохраняеми бя́ху, служа́ делу спасения нашего. Сего ради благодаряще за вся Гос­пода, вопием Ему: Аллилуия.

 

Икос 10

Пришедше во град Иера́поль, славне апос­толе Филиппе, духом возмутился еси, видя его идолами преиспо́лненнаго. Ты же желая отвратити людей от идолонече́стия и обратити я ко Христу, многия чудесы и исцеления именем Хрис­товым сотворил еси, ехи́дну, юже почитаху яко бога, сугубою молитвою, со Иоанном, аки копие́м, умертвил еси. Мы же, благодаряще Бога за труды твоя, воспеваем ти таковая:

Радуйся, любве Христовы провозвестниче преизря́дный.

Радуйся, милосердия Божия к кающимся грешником возвестителю славный.

Радуйся, грехов, пороков и беззаконий человеческих обличителю нелицеприя́тный.

Радуйся, покаяния и Царствия Небеснаго, в силе пришедшаго, проповедниче неумолкаемый.

Радуйся, гнева и суда Божия на нераскаянныя грешники и во гресех упо́рствующия глаша́таю грозный.

Радуйся, различными недуги страждущих врачу безме́здный.

Радуйся, архангельское благоговение ко Христу, Божественному твоему Учителю, стяжавый.

Радуйся, все житие твое пропове́данию слова Божия и делу нашего спасения посвятивый.

Радуйся, Филиппе, святый апос­толе Христов и молитвенниче о нас неусыпный.

 

Кондак 11

Скончавая житие твое, славне апос­толе Филиппе, вку́пе со апостолом Варфоломеем рапятие крестное претерпел еси, веру и преданность Господу и Учителю твоему, за ны на древе Крестнем ру́це Свои распросте́ршему, показу́я. Научи и нас, святе Филиппе, в твердой вере воспевати Хрис­ту Богу: Аллилуия.

 

Икос 11

Яко светлый светильник, на све́щнице Христом возженный, просиял еси, апос­толе Филиппе, житием, труды и славною кончиною твоею. При распятии твоем яви Господь трус ве́лий, земля разве́рзеся и поглоти́ша грешники. Людие же зряще сие, ужасом объяти бывше, со слезами просиша тя со апостолом Варфоломеем умолити Христа Бога о прощении грех их. Егда же сня́ша тя со крес­та, узреша тя, дух твой Господу предавша, ибо бысть произволение Божие по трудех и подвизех твоих взяти тя от земли́ на Небо, а́може все житие твое стопы́ твоя обращал еси. Мы же, почитая страдания твоя и восхваляя кончину твою, глаголем тебе сицева́я:

Радуйся, крестною смертию твоею веру и преданность Христу Богу запечатле́вый.

Радуйся, подобно Учителю твое­му, о вразе́х твоих, распинающих тя, моление со креста возносивый.

Радуйся, чрез смерть твою веру в пропове́даннаго тобою Господа утвердивый.

Радуйся, крестом, а́ки мосто́м, от земли́ на Небо преше́дый.

Радуйся, дух любве и всепрощения нам от Бога испроша́яй.

Радуйся, дух милосердия и сострадания на нас от Престола Божия изливаяй.

Радуйся, духом кротости и смирения служению ближних нас научаяй.

Радуйся, духом премудрости и веры на путь правый стопы́ наша напрвляяй.

Радуйся, Филиппе, святый апос­толе Христов и молитвенниче о нас неусыпный.

 

Кондак 12

Святая душа твоя, Филиппе, ко Престолу Христа Бога вознесе́нна бысь, Егоже возлюбил еси, Егоже проповедал еси, Егоже ради смерть претерпел еси, и та́мо, прии́м венец за труды твоя, вку́пе с пра́отцы, пророки и прочими угодившими Спасителю нашему, победно возопи: Аллилуия.

 

Икос 12

Благодать дана бысть месту тому, идеже кровь твоя честна́я истече́, славне апос­толе: повеле бо Гос­подь земли́ в месте сем в три дни произрастити лозу виноградную, в дивное зна́мение святости жития твоего и блаженныя кончины ­твоея. Ныне же предстоя Святей Трои­це, поминай нас, недостойных, вопиющих ти таковая:

Радуйся, лозо винограда Хрис­това, мног плод сотворившая.

Радуйся, древо, при источниках вод насажде́нное, ли́ствием своим от зно́я греховнаго нас покрывающее.

Радуйся, светильниче пресветлый, светом Евангелия вся просвещаяй.

Радуйся, лучу́ преславный, Солнце Правды, Христа Бога, во тьме сидящим явля́яй.

Радуйся, источниче сла́достный, жаждущих правды Божия обильно напоя́яй.

Радуйся, хода́тайством твоим к Богу Царствие Небесное нам испроша́яй.

Радуйся, яко по слову Учителя твоего, имеяй возсе́сти на единем от двуна́десяти престолов, судя́ще двуна́десять колен Израилевых.

Радуйся, яко имя твое на еди́нем от оснований грядущаго града, Небеснаго Иерусалима, начертано есть.

Радуйся, Филиппе, святый апос­­­толе Христов и молитвенниче о нас неусыпный.

                                                                    

Кондак 13

О святый и преславный апос­толе Филиппе, верный учениче́ и проповедниче Христов! Прими сие малое моление наше и не отвратися от нас, грехами погружае­мых, но явив присное человеколюбие и милосердие твое, умоли о нас Христа Бога, да, помиловани Им, во Царствии Небеснем, в горнем Иерусалиме, воспоем Ему победную песнь: Аллилуия.

(Этот кондак читается трижды, затем икос 1 и кондак 1)

 

Молитва

О святый и всехвальный провозве́стниче Евангелия Христова, славный учениче́ Христов, апос­толе Филиппе! Ты, проповедуя слово Божие, многия труды, многия путешествия, многия страдания претерпел еси, последи́ же веру твою крестною смертию запечатлел еси. Ныне же, предстоя Престолу Учителя твоего и Господа Иисуса Христа, вознеси о нас моление к Нему, да не тща будет в нас искупи́тельная жертва Его, да обратит нас от тьмы греховныя к свету заповедей Своих и на путь правый наставит нас. Умоли Его, святый апос­толе, веру православную в нас до конца дней наших непоколебиму сохранити, Церковь Свою святую непреобориму от ересе́й и расколов до скончания века утвердити, болящия исцелити, от бе́сных бе́сы отгнати и всем нам на всяку потребу полезную милость Свою низпослати; да тако в верности Евангельскому учению пребудем, и сотворив вся повеле́нная нам, сподобимся непостыдныя, мирныя, Святых Таин прича́стныя христианския кончины, и во Царствии Небеснем с тобою и всеми святыми прославим Христа Бога, Емуже подобает честь и поклонение, вку́пе со Безначальным Его Отцем и Пресвятым и Благим и Животворящим Его Духом, ныне и присно и во веки веков. Аминь.

 

ЖИТИЕ

Святой апостол Филипп, уроженец города Вифсаиды (Галилея), был глубоким знатоком Священного Писания и, правильно разумея смысл ветхозаветных пророчеств, ожидал прихода Мессии. По призыву Спасителя, он пошел за Ним. Об апос­толе Филиппе несколько раз говорится в Святом Евангелии: он привел ко Христу апостола Нафанаила (Ин. 1, 46); его Господь спросил, сколько нужно денег для покупки хлеба 5-ти тысячам человек (Ин. 6, 7); он привел эллинов, желавших увидеть Христа (Ин. 12, 21–22); наконец, он во время Тайной Вечери спрашивал Христа о Боге Отце (Ин. 14, 8).

После вознесения Господа апос­тол Филипп проповедовал Слово Божие в Галилее, сопровождая проповедь чудесами. Так, он воскресил младенца, умершего на руках у матери. Из Галилеи он направился в Грецию и проповедовал среди переселившихся туда иудеев. Некоторые из них сообщили в Иерусалим о проповеди апостола, и тогда из Иерусалима в Элладу прибыли книжники, во главе с первосвященником, для обвинения апостола Филиппа. Апостол Филипп обличил ложь первосвященника, говорившего, что ученики Христовы похитили и скрыли тело Господа, рассказав, как фарисеи подкупили вои­нов стражи, распустивших этот слух. Когда же иудейский первосвященник и его спутники стали хулить Господа и набросились на апостола Филиппа, они внезапно ослепли. По молитве апостола все прозрели, и, видя это чудо, многие уверовали во Христа. Апостол Филипп поставил им епископа, именем Наркисс (причтен к лику 70 апостолов).

Из Эллады апостол Филипп отправился в Парфы, а затем в город Азот, где исцелил больные глаза дочери местного жителя Никоклида, принявшего его в свой дом и затем крестившегося со всем семейством. Из Азота апостол Филипп отправился в Иераполь Сирийский, где, подстрекаемые фарисеями, иудеи подожгли дом Ира, принявшего к себе апостола Филиппа, а апостола хотели убить. Но, видя чудеса, совершенные апостолом: исцеление высохшей руки начальника города Аристарха, хотевшего ударить апостола, а также воскрешение умершего отрока, — раскаялись и многие приняли святое Крещение. Поставив Ира епископом в Иераполь, апос­тол прошел Сирию, Малую Азию, Лидию, Мисию, всюду проповедуя Евангелие и перенося страдания. Его и сопутствовавшую ему сестру Мариамну побивали камнями, заточали в темницы, изгоняли из селений.

Затем апостол прибыл во Фригию, в город Иераполь Фригийский, где было много языческих храмов, в том числе храм, посвященный змеям, где обитала огромная ехидна. Апостол Филипп силой молитвы умертвил ехидну и исцелил многих укушенных змеями. В числе исцеленных была жена правителя города Анфипата, принявшая христианство. Узнав об этом, правитель Анфипат приказал схватить Филиппа, его сестру и пришедшего с ними апос­тола Варфоломея. По наущению жрецов храма ехидны Анфипат приказал распять святых апостолов Филиппа и Варфоломея. В это время началось землетрясение, и всех присутствовавших на судилище засыпало землей. Висящий на кресте у храма ехидны апостол Филипп молился о спасении распявших его от последствий землетрясения. Видя происходившее, народ уверовал во Христа и стал требовать снятия с креста апостолов. Апостол Варфоломей, снятый с креста, был еще жив и, получив освобождение, крестил всех уверовавших и поставил им епископа. Апостол Филипп, молитвами которого все, кроме Анфипата и жрецов, остались живы, скончался на кресте.

Сестра его Мариамна погребла его тело и вместе с апостолом Варфоломеем направилась с проповедью в Армению, где апостол Варфоломей был распят, Мариам­на же проповедовала до своей кончины в Ликаонии.

На месте казни апостола Филиппа был построен храм-мартириум, остатки которого сохранились до наших дней (ныне город Памуккале, Турция).

В 2011 году, во время раскопок, среди развалин древнего храма была обнаружена гробница апостола. В подтверждение того, что эта гробница действительно принадлежит апостолу Филиппу, говорит ее устройство и древние письмена, найденные на ней.

Мощи святого апостола Филиппа ныне почивают в базилике Двенадцати апостолов в Риме. Его честная глава находится в церкви монастыря Честного Креста в селении Омодос на Кипре.

 

По благословению

митрополита Херсонского и Таврического Иоанна

Опубликована: 28.01.2021