Празднование:

19 января (н. ст.)

Тропарь, глас 4

Во Иордане крещающуся Тебе, Господи, Тройческое явися поклонение: Родителев бо глас свидетельствоваше Тебе, Возлюбленнаго Тя Сына именуя, и Дух в виде голубине извествоваше словесе утверждение. Явлейся, Христе Боже, и мир просвещей, слава Тебе.

Кондак, глас 4

Явился еси днесь вселенней, и свет Твой, Господи, знаменася на нас, в разуме поющих Тя: пришел еси и явился еси, Свет Неприступный.

Кондак 1

Избавителя нашего, во Иордане крещающагося, зряще, ужасашеся вся тварь. Глас же с Небесе принесеся от Отца: «Сей есть Сын Мой Возлюбленный, о Немже благоволих». Сего ради, радуяся, вопием: Человеколюбче, слава Тебе!

Икос 1

Иорданския струи Источника жизни трепетно прияша. Трепеща душею, вси вопием:

Иисусе, Единый и Верный.

Иисусе Нетленный.

Иисусе Милосердный.

Иисусе, Светильниче Вселенныя.

Человеколюбче, слава Тебе!

Кондак 2

Спасти хотя заблудшаго человека, в рабий зрак облеклся еси, Христе Боже, Тебе бо, крещшуся плотию, Избавителю нашему поем: Аллилуия.

Икос 2

Видя Предтеча креститися пришедша Иисуса, радуется душею и, трепеща, глаголет:

Иисусе Безгрешный.

Иисусе Предвечный.

Иисусе Превознесенный.

Иисусе Преблагословенный.

Человеколюбче, слава Тебе!

Кондак 3

Ко гласу вопиющаго в пустыни притецем, приготовим путь Господу и радостно воспоем: Аллилуия.

Икос 3

По земли ходит певаемый от Серафим, Сей Бог наш! Вемы Его Бога Предвечнаго, сего ради зовем:

Иисусе Непостижимый.

Иисусе, Свете Незаходимый.

Иисусе Неизреченный.

Иисусе Благословенный.

Человеколюбче, слава Тебе!

Кондак 4

Утру явльшуся человеком светоносну, Солнце Правды к водам Иорданским приходит, мрак грехов разгоняя от вопиющих: Аллилуия.

Икос 4

Неплодная древле, днесь веселится Христова Церковь: водою бо и Духом чада Богу родишася, верою взывающе:

Иисусе Пресветлый.

Иисусе Пречудный.

Иисусе Преславный.

Иисусе Прекрасный.

Человеколюбче, слава Тебе!

Кондак 5

Истлевшаго человека обновляет Христос струями Иорданскими, иже поет ныне песнь: Аллилуия.

Икос 5

Сошедшимся без числа людем от Иоанна креститися, Сам Господь посреде ста, Емуже возгласим:

Иисусе, миру предстояй.

Иисусе, рукою вся содержай.

Иисусе, скверну нашу очищаяй.

Иисусе, помышление омраченное отгоняяй.

Человеколюбче, слава Тебе!

Кондак 6

Якоже на Небеси, с трепетом пред чудом предстоим, Троицу зря Единосущную, Ейже вси поем: Аллилуия.

Икос 6

Облак древле и море божественное проображаху Крещение, в нихже древнии крестишася, исходяще, людие, море бе образ воды и облак — Духа; мы же, созерцающе, зовем:

Иисусе, воды освятивый.

Иисусе, Таинство установивый.

Иисусе, Духом укрепивый.

Иисусе, люди Отцу Небесному усыновивый.

Человеколюбче, слава Тебе!

Кондак 7

Убелим земное естество от падения, на Небо возводими, с пением: Аллилуия.

Икос 7

Первее всепагубный потоп в тление привел, ныне же потопше, Христе, грех, ради человеческаго спасения; Ему, Премудрому Человеколюбцу, зовем:

Иисусе, человеком спасение.

Иисусе, пути Божия уяснение.

Иисусе, нечестия погубление.

Иисусе, великое милосердие.

Человеколюбче, слава Тебе!

Кондак 8

Свет от Света возсия мирови - Христос Спас наш, Бог явлейся, Сему воспоем: Аллилуия.

Икос 8

Како Тя, Христе, достойно почтим, яко в водах всех нас обновил еси. Великое Таинство Твоего явления, обаче приими недостойное пение:

Иисусе, душам очищение.

Иисусе, наше освящение.

Иисусе, всего мира просвещение.

Иисусе, человеков спасение.

Человеколюбче, слава Тебе!

Кондак 9

Одеяйся светом, яко ризою, Иорданскими струями одеялся еси, Спасе, да спасеши вопиющих: Аллилуия.

Икос 9

Явися Свет Неприступный сущим во тьме и сени смертней сидящим; сего ради радостно глаголем:

Иисусе, Свете истинный.

Иисусе, Свете невечерний.

Иисусе, Свете присносущный.

Иисусе, Свете, превысший всех светлостей.

Человеколюбче, слава Тебе!

Кондак 10

Да речет убо дом Господень: «Яко благ, яко в век милость Его!» Да рекут боящиися Господа: Аллилуия.

Икос 10

Приклони, Христе, ухо ко мне, да во дни моя призову:

Иисусе, слава моя.

Иисусе, правда моя.

Иисусе, жизнь моя.

Иисусе, крепосте моя.

Человеколюбче, слава Тебе!

Кондак 11

Раздельшуся Иордану, древле по суху преходят людие. Стезю ныне в водах написует Господь нетленную и полезную, еюже проходим земное поприще, поя: Аллилуия.

Икос 11

Приидите ныне, Крещением просвещеннии, приступите к Богу с верою, глаголя:

Иисусе, очистивый мя в купели Крещения.

Иисусе, избавивый мя осуждения.

Иисусе, пославый ми освящение.

Иисусе, даровавый благословение.

Человеколюбче, слава Тебе!

Кондак 12

Егда явлением Твоим просветил еси всяческая, тогда море от Тебе побеже, Иордан, доле текий, возвратися, к Небеси возводя поющих: Аллилуия.

Икос 12

От Девы Солнце, от неплодныя светильник, во Иордане Тройческое явление увидевше, возвестим всему миру хвалу Божию, глаголюще:

Иисусе, новую жизнь являющий.

Иисусе, смиреннаго человека прославляющий.

Иисусе, любовь и милость открывающий.

Иисусе, спасение наше устрояющий.

Человеколюбче, слава Тебе!

Кондак 13

О благословенный всеми родами и племенами земными, Небесными Силами воспеваемый, вся содержащий, преклонивый Небеса, облекшийся плотию и вся совершивый для спасения человеков, Иисусе Христе! Славим, хвалим, поем и благодарим Тя, нашего Искупителя и Спасителя, и непрестанно глаголем: Аллилуия.

(Этот кондак читается трижды, затем икос 1 и кондак 1)

Молитва

Господи Иисусе Христе, Сыне Божий Единородный, от Отца прежде всех век рожденный, Свете от Света, просвещаяй всяческая, в последняя же лета от Пресвятыя Девы Марии нетленно воплощенный и в мир сей на спасение наше пришедый! Ты бо не потерпел еси видети от диавола мучима рода человеча, и сего ради в пресветлый день Богоявления Твоего пришел еси на Иордан креститися от Иоанна, безгрешен сый, да исполниши всякую правду и да возмеши в водах Иорданских грехи всего мира. Сего ради вся Силы Небесныя радуются и вся тварь веселится, чающе свобождение свое от работы истления. Сего Божественнаго таинства воспоминание празднующе, усердно молимся Тебе, Человеколюбче Господи: сподоби нам, жаждущим, по гласу Твоему приити к Тебе, Источнику присноживотныя воды, да почерпнем воду благодати Твоея; да, отвергшеся нечестия и мирских похотей, праведно и благочестно поживем в нынешнем веце, ждуще блаженнаго упования и явления славы Твоея, Великаго Бога и Спаса нашего, да не от дел наших спасеши нас, но по Твоей милости и по обновлению Святаго Духа Твоего банею пакибытия, Егоже обильно излиял еси, да, оправдившеся благодатию Его, наследницы будем вечныя жизни во Царствии Твоем, идеже со всеми святыми сподоби нам прославити всесвятое имя Твое, со Безначальным Твоим Отцем и со Пресвятым и Благим и Животворящим Твоим Духом, ныне и присно и во веки веков. Аминь.

По благословению

митрополита Херсонского и Таврического Иоанна