Тропарь, глас 8

Глубино́ю мудрости человеколю́бно вся стро́яй и полезная всем подава́яй, Едине Соде́телю, упокой, Господи, ду́ши раб Твоих, на Тя бо упование возложи́ша, Творца и Зижди́теля и Бога нашего.

Кондак, глас 8

Со святыми упокой, Христе, ду́ши раб Твоих, иде́же несть болезнь, ни печаль, ни воздыхание, но жизнь безконечная.

Кондак 1

Непостижимым Промыслом ко благу вечному мир уготовля́яй, человеком времена́ и образ кончины определи́вый, прости, Господи, согрешения от века уме́ршим, приими́ их во обители света и ра́дования, объя́тия О́тча отве́рзи им милостиво и услыши нас, память их совершающих и поющих: Отче наш, Любовь неизрече́нная, упокой усопшия рабы Твоя.

Икос 1

Адама па́дшаго и весь род наш от гибели вечныя спасая, послал еси, Боже, в мир Сына Твоего: Крестом бо и Воскресением Его возсия́ нам жизнь вечная. На безмерное Твое милосердие уповающе, ча́ем нетленнаго Царствия славы Твоея, просим в нем ча́сти усопшим и мо́лим Ти ся:

Отче наш, возвесели ду́ши, бурями житейскими изму́ченныя.

Отче наш, да забудут они вся скорби и воздыхания земная.

Отче наш, уте́ши их на ло́не Твоем, якоже матерь утешает чад своих.

Отче наш, скажи им: прощаются вам грехи ваша.

Отче наш, приими́ их в Твое блаженное тихое пристанище.

Отче наш, отве́рзи им черто́ги Ангелов и святых.

Отче наш, да возрадуются они о Божественней славе Твоей.

Отче наш, сподоби вечных Твоих благ усопших отец и братий наших.

Отче наш, Любовь неизрече́нная, упокой усопшия рабы Твоя.

Кондак 2

Озаре́нием Всевышняго просвещаем, преподобный Макарий глас от че́репа языческаго услы́ша: "Егда вы мо́литеся о страждущих во а́де, тогда и язычником бывает отра́да". О, дивная сила молитв христианских, и́миже и преиспо́дняя озаря́ется! С верными и невернии утешение прие́млют, егда мы о всем мире поем: Аллилуия.

Икос 2

Помяну́х слово Исаа́ка Си́рина, глаго́люща: "Сердце ми́лующее о людех, и о животных, и о всей твари ежеча́сно со слезами приносит молитвы, дабы сохранились и очистились". Сего ради и мы дерзнове́нно просим у Господа по́мощи всем от века уме́ршим, взывая:

Отче наш, низпосли́ нам дар пла́менныя молитвы за усопших.

Отче наш, милостивым долготерпением Твоим спаси к вечности преста́вльшихся.

Отче наш, помяни всех заповедавших нам, недостойным, молитися о них.

Отче наш, изгла́ди забы́тыя ими грехи.           

Отче наш, согрей сердца́ наша жа́лостию и ко врагом истины.

Отче наш, помилуй всех без молитвеннаго напу́тствования погребе́нных.

Отче наш, приими́ в Твоя селения внезапно уме́ршия от го́ря или радости.

Отче наш, низпосли́ преста́вльшимся мир и покой о Ду́се Свя́те.

Отче наш, Любовь неизрече́нная, упокой усопшия рабы Твоя.

Кондак 3

Пови́нны есмы́ в бе́дствиях мира, в страданиях безслове́сныя твари, в мучениях невинных детей, грехопадением бо людей блаженство и красота творения разруши́ся. Величайший из неви́нных страдальцев, Ты, Господи, Един власть и́маши простити всем. Прости, Боже, и возврати миру первозда́нное  благоденствие, да и мертвии и живи́и покой обря́щут, взывая: Аллилуия.

Икос 3

Свете Тихий, Искупителю вселенныя, слы́шахом Твой вопль со Креста о вразе́х: "Отче, прости им!" Во имя Твоего всепрощения и мы моли́тися Отцу Небесному о вечном покое Твоих и наших врагов дерза́ем:

Отче наш, прости пролива́вшия неповинную кровь.

Отче наш, прости осыпа́вшия те́рнием скорбей житейский путь наш.

Отче наш, прости благоденствие свое слезами ближних своих устроя́вшия.

Отче наш, не осуди гна́вшия нас клеветою и зло́бою.

Отче наш, возда́ждь милостию Твоею  всем оби́женным нами.

Отче наш, уте́ши вся нами по неве́дению оскорбле́нныя. 

Отче наш, да будет сия молитва о них таинством примирения.

Отче наш, истреби́ рукописа́ния грехов почивших отец и братий наших.

Отче наш, Любовь неизрече́нная, упокой усопшия рабы Твоя.

Кондак 4

Спаси, Господи, в тяжких мучениях скончавшихся, убиенныя, заживо погребенныя, поглоще́нныя волна́ми и огнем, расте́рзанныя зверьми́, уме́ршия от гла́да, мра́за или падения с высоты, и за скорбь кончины их даруй им вечную радость Твою, да благословя́т они время страданий своих, яко час искупления, воспевая: Аллилуия.

Икос 4

Всем, иже пое́млеми бы́ша от жития сего  во светлой юности, иже на земли́ терновый венец страданий прия́ша, иже радости земны́я не узре́ша, Ты, Господи, воздаждь им луча́ми Твоея  безконечныя любве́:

Отче наш, услади́ их сладостию даров Духа Твоего.

Отче наш, воздаяние подаждь уме́ршим под тяжким бре́менем трудов.

Отче наш, приими́ в чертоги рая́ усопшия отроки и девы.

Отче наш, сподоби их ликования на ве́чери Сына Твоего.

Отче наш, утиши́ скорбь родителей об утрате чад их.

Отче наш, упокой вся одино́кия, си́рыя и ни́щия, о ни́хже некому помолитися.

Отче наш, да исчезнут грехи их блиста́нием всепрощения Твоего.

Отче наш, даждь рабом Твоим, прежде скончавшимся отцем и братиям нашим, одежду белую, победную.

Отче наш, Любовь неизрече́нная, упокой усопшия рабы Твоя.

Кондак 5

Яко последнее ко вразумлению и покаянию зна́мение, смерть показал еси, Господи: при грозном блиста́нии ея́ суета́ земная обнажа́ется, страсти  плотски́я и страдания утиха́ют, непоко́рный разум смиряется, правда вечная открывается, закорене́лыя же в беззакониях грешницы на сме́ртнем одре́, вечное Твое бытие́ испове́дуя, к Твоему милосердию взывают: Аллилуия.

Икос 5

Отче всякаго утешения! Ты солнцем озаря́еши, плодами услажда́еши, красото́ю мира дру́ги и враги Твоя весели́ши. Веруем, яко и за гробом не истощава́ется в милости сердце Твое, милующее и отве́рженныя всеми грешники:

Отче наш, скорбим об ожесточе́нных и беззаконных хули́телях святыни Твоея.

Отче наш, да будет над ними спасительная воля Твоя.

Отче наш, умилосе́рдися над уя́звленными поги́бельным неверием.

Отче наш, не позна́вшия Тя на земли́, да возлю́бят Тя на Небеси.

Отче наш, прости скончавшихся без покаяния.

Отче наш, спаси погуби́вшия себе в омраче́нии ума.

Отче наш, да угаснет пламень нече́стия их в море бла́гости Твоея.

Отче наш, Победителю ада, избави от осуждения в гее́нне всех преста́вльшихся отец и братий наших.

Отче наш, Любовь неизрече́нная, упокой усопшия рабы Твоя.

Кондак 6

Страшен есть мрак души́, от Бога удале́нныя: со́вести терзания, скре́жет зубо́в, огнь неугаси́мый и червь неумира́ющий. Трепе́щу  таковыя участи и, якоже о саме́м себе, молюся и о страждущих во аде, да сни́дет к ним росою прохлажде́ния наша песнь: Аллилуия.

Икос 6

Где бы возсиял свет Твой, Христе Боже, аще не на сидя́щих во тьме и се́ни сме́ртней? В преиспо́дняя земли́ снизше́д, изведи, Господи, во отра́ду грехми́ с Тобою разлуче́нныя, но не отре́кшияся от Тебе:

Отче наш, чада Твоя лю́те стра́ждут, помилуй их.

Отче наш, согреши́ша они на Небо и пред Тобою.

Отче наш, тя́жки грехи их, но безме́рна милость Твоя.

Отче наш, Ты Сына Своего послал еси грешныя спасти.

Отче наш, посети горькую нищету душ, отдале́нных от Тебе.

Отче наш, помилуй гна́вшия истину по неве́дению.

Отче наш, да будет им любовь Твоя не огнем паля́щим, но прохладою райскою.

Отче наш, избави от пла́мени вечнаго отше́дших к Тебе отец и братий наших.

Отче наш, Любовь неизрече́нная, упокой усопшия рабы Твоя.

Кондак 7

Хотя уме́ршим руку помощи подати, благоволил еси им, Господи, в со́ниях и виде́ниях к живым являтися и на молитву тех вдохновля́ти, да, поминая с любовию отше́дшия, в память их добрая дела́ и подвиги творят, взывая со упованием: Аллилуия.

Икос 7

Церковь Христова по всей вселенней ежеча́сно молитвы за почи́вшия возносит, грехи бо мира Пречистою Кровию Божественнаго Агнца омываются, и от смерти к животу и от земли́ к Небеси восходят ду́ши усопших силою молитв о них пред олтари́ Господни:

Отче наш, да будет уме́ршим хода́тайство Церкви ле́ствицею к Небеси.

Отче наш, помилуй их предста́тельством Пресвятыя Богородицы и всех святых.

Отче наш, остави им согрешения верных Твоих ради, вопиющих к Тебе день и нощь.

Отче наш, незло́бивых ради младенцев прости их родителей.

Отче наш, слезами матерей искупи́ грехи чад их.

Отче наш, за молитвы невинных страдальцев, за кровь мучеников пощади грешников.

Отче наш, приими́ милостыни и молитвы наша в воспоминание их добродетелей.

Отче наш, да будет Кровь Сына Твоего источником жизни для ныне поминаемых отец и братий наших.

Отче наш, Любовь неизрече́нная, упокой усопшия рабы Твоя.

Кондак 8

Весь мир - общая священная могила есть, на всяком бо месте прах отец и  братий наших, сотворе́нных по образу Божию и по подо́бию. Единый неизме́нно возлюби́вый нас, Христе Боже, прости всех от начала и доныне уме́рших, да воспоют они любовию безмерною: Аллилуия.

Икос 8

Се день гряде́т, яко пещь горя́щая, день великий и страшный Суда последняго: тайны человеческия обнажа́тся и книги со́вести откры́ются. "Примири́теся с Богом! - вопиет Павел, - прежде о́наго страшнаго дне". Помози́ нам, Господи, и слезами живых воспо́лни недостаю́щее уме́ршим:

Отче наш, да будет им и нам звук трубы́ Архангельския благовестием спасения.

Отче наш, в час Суда сподоби их и нас всера́достнаго помилования.

Отче наш, увенчай славою страдания ближних наших.

Отче наш, покрый благостию Твоею согрешения немощны́х.

Отче наш, дай истину Твою очищенным грозою бед земных.

Отче наш, вся по имени ве́дый, помяни во и́ночестем чи́не спасавшихся.

Отче наш, приими́ пастырей благогове́йных с духовными чадами их.

Отче наш, да изы́дут во сре́тение Жениха Христа раби Твои со свети́льники горя́щими.

Отче наш, Любовь неизрече́нная, упокой усопшия рабы Твоя.

Кондак 9

Благословляйте скоротеку́щее время, каждый бо час, каждое мгновение к вечности приближает. Новая скорбь, новая седина́ - суть ве́стницы из мира грядущаго, свиде́телие тле́нности земны́я,  яко вся мимотече́т возвещают, и яко Царство вечное прибли́жися, иде́же несть ни слез, ни воздыхания, но отра́дная песнь: Аллилуия.

Икос 9

Яко древо по вре́мени ли́ствий своих лиша́ется, тако и дни́е наши по ле́тех оскудева́ют: увяда́ет юности пра́зднество, свети́льник ра́дования угаса́ет, близится старости отчужде́ние, дру́зи и сродницы умирают. Где вы, прежде ю́ныя, ра́достныя и лику́ющия? Безмо́лвны гробы их, но ду́ши их в десни́це Твоей, Господи:

Отче наш, взоры из мира загро́бнаго зовут нас к молитве.

Отче наш, Солнце Пресветлое, озари́ и согрей усопших селения.

Отче наш, да пре́йдет навеки горькаго разлучения время.

Отче наш, сподоби нас радостнаго сре́тения на Небесех.

Отче наш, сотвори, да вси едино будем с Тобою.

Отче наш, возврати отше́дшим детства чистоту и юности благоду́шие.

Отче наш, да будет им вечная жизнь праздником светлопасха́льным.

Отче наш, умягчи скорбь об уме́рших упованием сре́тения в Небеснем Сионе.

Отче наш, Любовь неизрече́нная, упокой усопшия рабы Твоя.

Кондак 10

Проливая тихие сле́зы на могилах сродников наших, молимся с надеждою, взываем с упованием: скажи нам, Господи, что простил еси их, скажи, что прие́млеши их во обители радости, даждь та́инственное откровение духу нашему, да воспеваем: Аллилуия.

Икос 10

Весь путь преше́дшаго жития своего ви́жду, озира́яся, коли́ко множество уже усопших, от перваго дне моего и доны́не послуживших мне во благо. О них молюся и, любовию своею до́лжная сим воздавая, вопию:

Отче наш, помилуй вся доброде́латели и благоде́тели моя.

Отче наш, сподоби славы Твоея родители и ближния моя.

Отче наш, славы Небесныя сподоби бо́дрствовавшия над младенческим ло́жем моим.

Отче наш, спаси благовести́вшия мне Слово Твое.

Отче наш, прослави пред Ангелы научи́вшия мя любити Тя.

Отче наш, даждь отра́ду наставлявшим мя святыми примерами жизни своея.

Отче наш, услади́ сокрове́нною ма́нною послужившия мне в тя́жкия дни.

Отче наш, Царствию Твоему не будет конца, да внидут усопшия в радость Твою.

Отче наш, Любовь неизрече́нная, упокой усопшия рабы Твоя.

Кондак 11

Где твое, сме́рте, жа́ло? Где твоя победа? Где твой прежний мрак и страх? Ты жела́нная отны́не, ты сочетаеши неразлучно с Богом, ты великий покой суббо́тства та́инственнаго. "Желание и́мам умре́ти и со Христом бы́ти", - взывает апостол. Темже и мы, взира́я на смерть, яко на стезю́ к жизни вечней, зовем: Аллилуия.

Икос 11

Воскре́снут мертвии, и воста́нут су́щии во гробе́х, и вси земноро́днии возрадуются, яко воста́нут  телеса́ духовныя, светло просла́вленныя, нетленныя. Кости сухи́я, слышите слово Господне: " Се Аз введу́ в вас дух живота, и дам на вас жи́лы, и возведу́ на вас плоть, и простру́ по вам кожу". Воста́ните из дре́вле прошедшаго вре́мене, иску́пленнии Кровию Сына Божия, оживле́ни смертию Его, возсия́ бо на ны свет Воскресения:

Отче наш, день от дне Ты открывал еси им  бла́гость Твою.

Отче наш, отве́рзи им и ныне всю бе́здну совершенств Твоих.

Отче наш, Ты веселил еси их теплотою и ароматом весны.

Отче наш, яви им и вечную весну нетления.

Отче наш, Ты сия́л еси им светом солнечным и тишиною луны.

Отче наш, да у́зрят они и славу лучеза́рных ликов Ангельских.

Отче наш, Ты услаждал еси их красотою восхода и заката солнечнаго, да у́зрят они и свет вечнаго Твоего Божества.

Отче наш, да просвети́тся всяка душа, яко звезда утренняя, ве́стница зари́.

Отче наш, Любовь неизрече́нная, упокой усопшия рабы Твоя.

Кондак 12

Плоть и кровь Царствия Божия не насле́дят; доко́ле во пло́ти живе́м, отлуче́ни есмы́ от Христа. Аще же и у́мрем, но оживе́м для вечности, подобает бо тле́нному телу нашему облещи́ся в нетление и ме́ртвенному сему просия́ти безсмертием, и тако во свете невече́рняго дне воспевати: Аллилуия.

Икос 12

Ча́ем радостнаго сре́тения с Господем, ча́ем я́сныя зари́ воскресения, ча́ем пробуждения из гробо́в сродников наших и зна́емых и оживле́ния в благоле́пней красоте жизни уме́рших. Торжествуем грядущее преображение всея твари и Возсозда́телю нашему вопием:

Отче наш, созда́вый мир к торжеству радости и добра.

Отче наш, возста́ви нас из глубины́ греха к святости.

Отче наш, даждь уме́ршим  посреде́ обновле́ннаго бытия́ царствовати.

Отче наш, да возсияют они яко светила на Небесех в день славы их.

Отче наш, да будет им Агнец Божественный светом невече́рним.

Отче наш, даждь и нам с ними Пасху нетления праздновати.

Отче наш, соедини уме́ршия и живы́я в несконча́емей радости.

Отче наш, да не разлучи́мся с рабами Твоими, зде нами помина́емыми.

Отче наш, Любовь неизрече́нная, упокой усопшия рабы Твоя.

Кондак 13

О Премилосе́рдный Отче Безнача́льный, всем хотя́й спастися, Сына к погибающим низпосла́вый и Духа Животворя́щаго излива́яй! Помилуй, прости и спаси родных и близких нам и всех от века скончавшихся, и предста́тельством их посети нас, да вку́пе с ними вопием Тебе, Спасителю Богу, победную песнь: Аллилуия.

(Этот кондак читается трижды, затем икос 1 и кондак 1)

 Молитва

Помяни, Господи Боже наш, в вере и надежде живота вечнаго усопших раб Твоих, и яко Благ и Человеколюбец, отпуща́яй грехи и потребля́яй неправды, осла́би, оста́ви и прости вся вольная их согрешения и невольная, возставля́я я во святое Второе Пришествие Твое в причастие вечных Твоих благ, ихже ради в Тя Единаго ве́роваша, Истиннаго Бога и Человеколюбца. Яко Ты еси воскресение, и живот, и покой усопших раб Твоих, Христе Боже наш, и Тебе славу возсылаем, со Безнача́льным Твоим Отцем, и с Пресвятым Духом, ныне и присно и во веки веков. Аминь.

По благословению 

митрополита Херсонского и Таврического Иоанна