Православный календарь
Рекомендуем посетить
Музыковский Покровский мужской монастырь Херсонской епархии
УПЦ

НОВАЯ ИНФОРМАЦИЯ

Расписание богослужений в Свято-Духовском кафедральном соборе на  ЯНВАРЬ 

 

 

 

 

 

Акафист ПРЕОБРАЖЕНИЮ ГОСПОДНЮ

 

Празднование:

19 августа (н. ст.)

 

Тропарь, глас 7

Преобразился еси на горе, Хрис­те Боже, показавый учеником Твоим славу Твою, якоже можаху, да возсияет и нам, грешным, Свет Твой присносущный молитвами Богородицы, Светодавче, слава Тебе.

 

Кондак, глас 7

На горе преобразился еси, и якоже вмещаху ученицы Твои, славу Твою, Христе Боже, видеша, да егда Тя узрят распинаема, страдание убо уразумеют вольное, мирови же проповедят, яко Ты еси воистину Отчее сияние.

 

Кондак 1

Возбранный Воеводо и Царю Славы, Тебе, Небеси и земли Создателя, зряще на горе Фаворстей преобразившася, вся тварь удивися, Небеса вострепеташа, и вси земнороднии возрадовашася, мы же, недостойнии, Твоему нас ради преображению благодарственное поклонение приносяще, сердцем сокрушенным вопием: Господи, во свете лица Твоего пойдем и о имени Твоем возрадуемся во веки!

 

Икос 1

Во всего человека облекшийся, Господи, просветил еси на горе Фаворстей естество наше и изменением вида Твоего богосоделал его; темже вопием:

Господи, очисти и наши души к Божественному восхождению на гору святую Твою.

Господи, просвети ум наш, да во свете Твоего лица узрим свет.

Господи, даждь быти и нам самовидцами славы Твоея.

Господи, измени и нас изменением лучшим.

Господи, во свете лица Твоего пойдем и о имени Твоем возрадуемся во веки!

 

Кондак 2

О Господе Спасителе нашем радующеся в день сей, поем песнь в веселии: Аллилуия.

 

Икос 2

Слово Божие, нас ради воплотившееся, просвещает земный состав наш, темже чертог славы будущия зряще, взыдем на гору Господню и к Нему воззовем:

Господи, осияй нас Божественным облистанием Твоим.

Господи, яви нам единый путь лица Твоего.

Господи, возвыси дух наш, да узр­им славу преображения Твоего.

Господи, во свете лица Твоего пойдем и о имени Твоем возрадуемся во веки!

 

Кондак 3

Лицы Ангельстии, сошедше на гору Фаворскую, трепетно зряще славу Господа, воспевают песнь: Аллилуия.

 

Икос 3

Апостоли, горы достигше, яко обители райския, радости исполнишася и возопиша: Господи, доб­ро нам зде быти! И мы, подражающе им, вопием:

Господи, добро нам зде быти с Тобою.

Господи, добро нам с Тобою тамо быти.

Господи, добро нам с Тобою в скорби быти.

Господи, добро нам с Тобою во славе быти.

Господи, добро нам с Тобою в смерти быти.

Господи, добро нам с Тобою и по смерти быти.

Господи, во свете лица Твоего пойдем и о имени Твоем возрадуемся во веки!

 

Кондак 4

Высоту Небеснаго жития и славы присносущныя, Божественное сияние даруй рабом Твоим, празднующим Твое преображение и поющим песнь: Аллилуия.

 

Икос 4

Уподобися гора Фаворская селению райскому, светлостию солнечною сияющая, и землю всю озаряющая, и всех вопити научающая:

Господи, сподоби со апостолами ныне Тебе поклонитися.

Господи, даждь нам молитвами просветитися.

Господи, даждь Твое светлое преображение верою узрети.

Господи, даждь силу его дивно воспети.

Господи, во свете лица Твоего пойдем и о имени Твоем возрадуемся во веки!

 

Кондак 5

Твоей, Христе, славе непостижимей апостоли дивляхуся и радостно пояху песнь: Аллилуия.

 

Икос 5

Видеша на Фаворе Моисей и Илия от Девы Бога, воплощеннаго человеком на избавление, с удивлением и радостию взываша:

Господи, Ты еси камень в пустыни разверзший.

Господи, Ты еси море Чермное посекший.

Господи, Ты еси враном в пустыни люди питати велевший.

Господи, Ты еси Бог, к человеком снизшедший.

Господи, во свете лица Твоего пойдем и о имени Твоем возрадуемся во веки!

 

Кондак 6

Отеческаго существа сияние вечное, Сыне Божий возлюбленный, доброты благолепие учеником Своим милосердно явил еси, его­же не можаху вмещати, воспеша радостно: Аллилуия.

 

Икос 6

Юже во двою существу, во Ипостаси Единей, Бог Слово всему Божеству соедини человечество, наше спасение устрояя, обильно невещественный свет показал еси, егоже со страхом и радостию видевше, вернии возопиша:

Господи, во свете Твоем пути наша направи.

Господи, сиянием его на стезю правды и истины настави.

Господи, светом Твоим души наша просвети.

Господи, имже естество наше чудне преобрази.

Господи, во свете лица Твоего пойдем и о имени Твоем возрадуемся во веки!

 

Кондак 7

Иже купину прикоснувшуюся огню сохранивый неврежденно, Господи, ныне и Богосиянную плоть Твою показал еси нам, поющим радостно: Аллилуия.

 

Икос 7

Илию и Моисея неизреченно осиял еси, стоя посреде апостолов Твоих, Господи, да Твое покажеши яве неизреченное Второе пришествие; темже Ти взываем:

Господи, и нам Отеческий глас внуши.

Господи, и нашу волю в Твое послушание приими.

Господи, и нам Божественное житие приложи.

Господи, и нам Твое милосердие покажи.

Господи, во свете лица Твоего пойдем и о имени Твоем возрадуемся во веки!

 

Кондак 8

Света от Света, Бога Истинна от Бога Истинна, светом наставляющаго тварь, величаем и поем: Аллилуия.

 

Икос 8

Узревше мысленно Божество Отца и Духа в Сыне Единородном, станем вси во граде Бога Живаго и воззовем:

Господи, и нас любовию Своею привлецы.

Господи, Божественным желанием нас премени.

Господи, облаком светлым нас осени.

Господи, ризы души убели.

Господи, во свете лица Твоего пойдем и о имени Твоем возрадуемся во веки!

 

Кондак 9

Сый прежде век, светом, яко ризою, одеяйся, паче солнца на Фаворе, просиял еси, Господи, Емуже велегласно поем: Аллилуия.

 

Икос 9

Естество человеческое восприял еси, Господи, Божеством Своим просветил еси его; сего ради благодарственне вопием:

Господи, светоносную благодать нам вдохни.

Господи, помыслы мудрыми нас осени.

Господи, любовию Своею нас посети.

Господи, благодатию Твоею нас освяти.

Господи, во свете лица Твоего пойдем и о имени Твоем возрадуемся во веки!

 

Кондак 10

Хотя явити славу Твою, на горе преобразился еси, Христе, да уразумеем страдания Твоя вольная и воспоем Ти песнь: Аллилуия.

 

Икос 10

Разумом Божественным наставляя, сиянием просвещая, света жилище боголепно явил проповедником Твоим, Господи, да егда Тя узрим распинаема, мужественно воззовем:

Господи, от грехов свободи.

Господи, от клятвы искупи.

Господи, от вечныя смерти спаси.

Господи, во Царствии Твоем помяни.

Господи, во свете лица Твоего пойдем и о имени Твоем возрадуемся во веки!

 

Кондак 11

Исхода Твоего, Господи, ужасахуся пророцы и апостоли и в трепете воспеша: Аллилуия.

 

Икос 11

Согласно славяще преображе­ние Твое, Господи, от бури отчаяния спасаемся вси. Надежду славы чад Божиих, яко основание души, тако взывающим сохрани:

Господи, во веки благословенный.

Господи, над всеми превознесенный.

Господи, Ангелы радостно певаˆемый.

Господи, на земли человеками благодарне славимый.

Господи, во свете лица Твоего пойдем и о имени Твоем возрадуемся во веки!

 

Кондак 12

Троичное явление на Фаворстей горе апостоли видевше, радостно возопиша: Аллилуия.

 

Икос 12

Единороднаго от Отца славу зряще, духом совозвышающеся, благочестне радостно воспоим:

Господи, на высоту добродетелей вознеси.

Господи, просвещение Твое источи.

Господи, мое естество светлос­тию Божества Твоего просвети.

Господи, во свете лица Твоего пойдем и о имени Твоем возрадуемся во веки!

 

Кондак 13

О Иисусе Христе, на Фаворе ради нас преобразивыйся, Божес­твенныя Твоея славы причастники и нас сотвори, да и мы во свете лица Твоего пойдем и непрестанно верою воспоим: Аллилуия.

(Этот кондак читается трижды, затем икос 1 и кондак 1)

 

Молитва

Господи Иисусе Христе, Боже наш, во Свете живый неприступнем, Сияние сый Славы Отчия и Образ Ипостаси Его! Егда прииде исполнение времен, Ты за милосердие неизреченное к падшему роду человеческому Себе умалил еси, зрак раба приял еси, смирил еси Себе, послушлив бысть даже до смерти. Обаче прежде Креста и вольныя страсти Твоея на горе Фаворстей преобразился еси в Божественней славе Своей пред святыми Твоими ученики и апостолы, мало скрыв плоти восприятие, да егда Тя узрят распинаема и смерти предаваема, уразумеют убо страдание Твое вольное и Божество. Даруй же и нам всем, пречистыя плоти Твоея преображение празднующим, чистым сердцем и нескверными умы взыти на святую гору Твою, в селения святыя славы Твоея, идеже глас чист празднующих, глас несказаннаго радования, да тамо купно с ними лицем к лицу узрим славу Твою в невечернем дни Царствия Твоего, и со всеми святыми, от века Тебе благоугодившими, прославим всесвятое имя Твое, со Безначальным Твоим Отцем и Пресвятым и Благим и Животворящим Твоим Духом, ныне и присно и во веки веков. Аминь.

 

По благословению

митрополита Херсонского и Таврического Иоанна

Опубликована: 04.04.2024