Празднование:

7 января (н. ст.)

Тропарь, глас 4

Рождество Твое, Христе Боже наш, возсия мирови свет разума, в нем бо звездам служащии звездою учахуся Тебе кланятися, Солнцу Правды, и Тебе ведети с высоты Востока, Господи, слава Тебе.

Кондак, глас 3

Дева днесь Пресущественнаго раждает, и земля вертеп Неприступному приносит, Ангели с пастырьми славословят, волсви же со звездою путешествуют, нас бо ради родися Отроча Младо, Превечный Бог.

Кондак 1

Рождейся от Девы, пение Небесное приявый, приими из сокровищ духовных мною возносимое Тебе песнопение: Иисусе Бого­младенче, спаси нас!

Икос 1

От Ангелов благовестие приемше, во град Вифлеем духовно вшедше и Младенца в яслех узревше, радостно воспоим Ему:

Иисусе, Ангелов ликование.

Иисусе, сердца моего взыграние.

Иисусе, всего мира ожидание.

Иисусе, Небесное сияние.

Иисусе Богомладенче, спаси нас!

Кондак 2

Живущим верою путь пастырие указуют; темже с ними и мы, ликовствуя, поем Рождшемуся: Аллилуия!

Икос 2

Дети Божии радостно Младенцу, лежащему в яслех, поют:

Иисусе, нас ради родивыйся.

Иисусе, на земли явивыйся.

Иисусе, со Отцем не разлучивыйся.

Иисусе, пеленами повивыйся.

Иисусе Богомладенче, спаси нас!

Кондак 3

Еже видети радость вселенныя, устранимся мира суетнаго и умом своим вертеп и ясли обымем, непрестанно взывая Богу: Аллилуия!

Икос 3

«Слава в вышних Богу!» — Ангели поют на Небеси, и мы с ними вопием:

Иисусе, славо Ангелов.

Иисусе, похвало пастырей.

Иисусе, Сокровище мое.

Иисусе, безсмертие мое.

Иисусе Богомладенче, спаси нас!

Кондак 4

Трепетно вся тварь ныне радуется, Небеса веселятся, купно с ними и я воспою, спасаемый: Аллилуия!

Икос 4

Волсви, звезду узревше, во Вифлеем потекоша и, обретше Сокровище Нетленное, возопиша с верою:

Иисусе, мудросте вечная.

Иисусе, истино совершенная.

Иисусе, Бога откровение.

Иисусе, радости явление.

Иисусе Богомладенче, спаси нас!

Кондак 5

Облако легкое, росу благодатнаго явления нам дарующую, зрим Невесту Неневестную, Сына Младенца охраняющую, Емуже вси поем: Аллилуия!

Икос 5

Храмина, убежище безсловесных, явишася палатою Царя всех, да и мы не убоимся, ниже смутимся убожества души своея, но со дерзновением приступим, вопиюще:

Иисусе, вниди в дом убогия души моея.

Иисусе, возлежи в яслех сердца моего.

Иисусе, соделай мя достойным быти храмом Твоим.

Иисусе, покрый мя милосердием Своим.

Иисусе Богомладенче, спаси нас!

Кондак 6

Разгнавый тьму неведения, озари ум светом истиннаго Богопознания, да, ликуя, воспою: Аллилуия!

Икос 6

«И на земли мир», — возгласиша Ангели. Познав сие, радостно поем Примирителю:

Иисусе, совести успокоение.

Иисусе, ума просвещение.

Иисусе, от уз греховных разрешение.

Иисусе, с Богом примирение.

Иисусе Богомладенче, спаси нас!

Кондак 7

Слеˆзы блаженнаго умиления точаще, огласим пещеру Вифлеема сугубым пением: Аллилуия!

Икос 7

Тако возлюби Бог мир! Радостно сию любовь восхвалим, вопиюще:

Иисусе, любовь предвечная.

Иисусе, милосте безконечная.

Иисусе, сладосте сердечная.

Иисусе, радосте Небесная.

Иисусе Богомладенче, спаси нас!

Кондак 8

От древа жизни отшедшее, во глубину зол падшее, ныне создание Божие Спасителем возставляется, Емуже поем: Аллилуия!

Икос 8

Велия благочестия тайна: Бог явися во плоти, Емуже взываем:

Иисусе, Троицы откровение.

Иисусе, Небесныя любви проявление.

Иисусе, нераздельное с человеком соединение.

Иисусе, вечное о нас промышление.

Иисусе Богомладенче, спаси нас!

Кондак 9

Обуреваемый житейским попечением, с кораблем, потопляе­мым грехми, к тихому моему пристанищу притеку — Вифлеему в сия дни и радостно воспою: Аллилуия!

Икос 9

Дары Рождшемуся Иисусу приносят вси; и аз, недоумением и радостию объятый, в скудости ума своего, принесу песнь сию:

Иисусе, сердце мое обнови.

Иисусе, душу мою спаси.

Иисусе, для вечности сохрани.

Иисусе, пение приими.

Иисусе Богомладенче, спаси нас!

Кондак 10

Ум мой настави и сердце очисти, да со Ангелы чисто воспою Тебе: Аллилуия!

Икос 10

Христос — мой Спаситель! Сего ради ликует состав мой о рождении Его:

Иисусе, радосте моя.

Иисусе, крепосте моя.

Иисусе, спасение мое.

Иисусе, достояние мое.

Иисусе Богомладенче, спаси нас!

Кондак 11

О Тебе радуется душа моя, о Тебе веселится язык мой, и жизнь моя пребывает в святом уповании, егда пою Тебе песнь: Аллилуия!

Икос 11

Множество щедрот Твоих и любви к роду человеческому; сего ради вопием:

Иисусе, вечное Милосердие.

Иисусе, благодатное озарение.

Иисусе, земли Посетителю.

Иисусе, тайны спасения Совершителю.

Иисусе Богомладенче, спаси нас!

Кондак 12

Пение приносим Тебе, Безначальному, с горними и дольними: Аллилуия!

Икос 12

Одеяйся светом, яко ризою, пеленами ныне повивается, да нас одеждами светлыми украсит, воспевающих:

Иисусе, чертог светлый нам уготовляющий.

Иисусе, одеждами брачными украшающий.

Иисусе, нетлением венчающий.

Иисусе, красотою духовною нас облекающий.

Иисусе Богомладенче, спаси нас!

Кондак 13

Юнеет и обновляется всяка душа христианская в светлом празднике Твоего Рождения, Духом Святым оживляется, Тройческим единством просвещается и непрестанно поет песнь: Аллилуия!

(Этот кондак читается трижды, затем икос 1 и кондак 1)

Молитва

Пребезначальное Начало, Боже Святый и Вечный, и всея твари Содетелю! Киими словесы возблагодарим и киими песньми возвеличим Твое нас ради человек неизреченное снизхождение, волею Божества Своего не отступльше, и недр Отчих не разлучаяся, Бог сый, яко человек, в вертепе безсловеснем ныне положился еси, Христе Боже наш! Кто исповесть неизглаголаннаго сего таинства величие и преславнаго сбытия таинство: Сын Божий Сын Девы является, да свободит мир от клятвы законныя, и сыны греха и беззакония чадами Божиими, наследниками вечных благ соделает, Себе же, яко жертву непорочную и всесвятую, в залог спасения падшаго человека да принесет. Иисусе Сладчайший, Владыко Всемилос­тивый! Твоим Пребожественным снизхождением юдоль земная в храм Божественныя славы Твоея освятися, и вси живущии на ней Небесным веселием исполнишася. Сподоби убо и нас в день преславнаго Рождества Твоего чис­тым сердцем и отверстою душею исповедати Тя Истиннаго Агнца Божия, услаждающаго и укрепляющаго нас надеждою грядущих благ в немеркнующем Свете Трисиятельнаго Божества, Имже вся живет и движется, Имже обновление нашего первообразнаго бытия да усовершится. Ей, Господи, всякаго благодеяния богатый Дателю и Подателю Благий, за еже тако возлюбил еси мир, яко вся скорби и болезни наша на Себе понес­ти изволил еси, не остави нас, дондеже суета земная скорбьми и напастьми не изсушила души наша, и не погибе путь спасения под ногама нашима, да не посмеются о нас врази наши, но даруй нам в свете Твоего Божественнаго Откровения познати путь мира, добра и истины, и воззови ненасытною жаждою по Тебе, Спасителе нашем, во еже творити волю Твою преблагую во страсе Твоем, и в похвалу неизреченному снизхождению Твоему, яко кадило благовонное, приносити Тебе житие нескверное и любовь нелицемерную, да в делех наших и во уповании веры нашея непрестанно совершается воля Твоя святая, и во веки не умолкнет под Небесем слава Твоя, слава, яко Единороднаго от Отца, исполнь благодати и истины. Яко о Тебе, ныне плотию от Безневестныя и Пречистыя Девы Марии рождшемся, вся колена Небесная и земная, радости исполняющеся, велегласно исповедуют: с нами Бог! Емуже честь и поклонение подобает, Отцу и Сыну и Святому Духу, во веки веков. Аминь.

По благословению

митрополита Херсонского и Таврического Иоанна