Православный календарь
Рекомендуем посетить
Музыковский Покровский мужской монастырь Херсонской епархии
УПЦ

НОВАЯ ИНФОРМАЦИЯ

Расписание богослужений в Свято-Духовском кафедральном соборе на  ЯНВАРЬ 

 

 

 

 

 

Акафист ВОЗНЕСЕНИЮ ГОСПОДНЮ

 

Празднование:

40-й день после Пасхи

 

Тропарь, глас 4

Вознеслся еси во славе, Христе Боже наш, радость сотворивый учеником, обетованием Святаго Духа, извещенным им бывшим благословением, яко Ты еси Сын Божий, Избавитель мира.

 

Кондак, глас 6

Еже о нас исполнив смотрение, и яже на земли соединив Небесным, вознеслся еси во славе, Христе Боже наш, никакоже отлучаяся, но пребывая неотступный, и вопия любящим Тя: Аз есмь с вами, и никтоже на вы.

 

Кондак 1

Возшедый на Небеса и нас не разлучивыйся, по множеству Твоих щедрот услыши нас, вопиющих радостно: Пойте Богу нашему, пойте, пойте Цареви нашему, пойте!

 

Икос 1

Ангели ужасошася, егда пришел еси на гору Елеонскую, Господи, ученицы же предсташа Ти и трепетно возгласиша:

Пойте людие, Сына ко Отцу восходящаго.

Пойте Его, человечество в Небо возводящаго.

Пойте Его, радость мирови принесшаго.

Пойте Пастыря, заблудшее овча нашедшаго.

Пойте Богу нашему, пойте, пойте Цареви нашему, пойте!

 

Кондак 2

Видя, яко земля ныне ликует и Небесная веселия исполняются о вознесении Господа, победную песнь Ему поим: Яко прославися!

 

Икос 2

Разумом дивимся, смотряще Тя, Христе, носяща бо тело земное и возшедша на облак к Небесным восходяща, и вопием:

Пойте, Христа, крест претерпевшаго.

Пойте Его, из мертвых воскресшаго.

Пойте Его, наше естество вознесшаго.

Пойте Его, в дар Отцу нас принесшаго.

Пойте Богу нашему, пойте, пойте Цареви нашему, пойте!

 

Кондак 3

Силою Божественною возродивый апостолы, воззвал еси их на гору Масличную, и тии, узрев со славою Твое Вознесение, веселием возопиша: Яко прославися!

 

Икос 3

Священное торжество приносит вся тварь вознесению Твоему, Иису­се Спасе наш, и светло вопиет:

Пойте, на облацех, яко на Херувимех, Сидящаго.

Пойте Его, яко солнце славою светящаго.

Пойте Его, смерть умертвившаго.

Пойте Его, нас освятившаго.

Пойте Богу нашему, пойте, пойте Цареви нашему, пойте!

 

Кондак 4

Мир учеником Твоим даровавый, той и нам богато низпосли, Иисусе, яко да согласно поем песнь: Яко прославися!

 

Икос 4

Свет от Света сущий, облак светел подъят Тя, ученицы же, зряще Тя со славою возносящагося, радостно восхвалиша Тя:

Пойте Господа, Небеса прошедшаго.

Пойте Его, к нам человеколюбно снизшедшаго.

Пойте Его, утешение пославшаго.

Пойте Его, от гроба воставшаго.

Пойте Богу нашему, пойте, пойте Цареви нашему, пойте!

 

Кондак 5

Всяк язык да вопиет днесь в воскликновении: Христос взыде на Небеса, отнюдуже и сошел еси: Яко прославися!

 

Икос 5

Всяческая ныне славою исполняются, яко Господь седе одесную Отца; сего ради неизменно поем:

Пойте Иисуса, Пастыря чуднаго.

Пойте Его, Премудраго.

Пойте Его, мир обновившаго.

Пойте Его, Божество и человечество в Ипостаси Своей соединившаго.

Пойте Богу нашему, пойте, пойте Цареви нашему, пойте!

 

Кондак 6

Мир весь видимый и невидимый, Ангели и человецы непрестанно славят вознесение Твое с песнию: Яко прославися!

 

Икос 6

Апостоли взыграшася, зряще на высоту Спасителя вземлема, и скорбь оставиша, со страхом и веселием взываху:

Пойте Господа, с плотию восходящаго.

Пойте поклонение приявшаго.

Пойте от скорби нас избавившаго.

Пойте в вере нас наставившаго.

Пойте Богу нашему, пойте, пойте Цареви нашему, пойте!

 

Кондак 7

Согласно возшумим песнь Христу Богу, яко взыде Ходатаем за нас от земли на Небо. Ангели, Архангели, возопийте с нами: Яко прославися!

 

Икос 7

Ангельски в мире торжествуем, яко солнцу Иисусу восходящу, светло воспоем:

Пойте Его, светом невечерним сияющаго.

Пойте Его, душу озаряющаго.

Пойте Его, скорбь в радость претворяющаго.

Пойте Его, в обители райския нас вселяющаго.

Пойте Богу нашему, пойте, пойте Цареви нашему, пойте!

 

Кондак 8

Да каплет свыше облако веселие вечное и напояет жаждущую душу водами благочестия с верою взывающих: Яко прославися!

 

Икос 8

Услышавше, яко рай отверзеся нам чрез вознесение Твое, вопием:

Пойте Господа, нас искавшаго.

Пойте Его, нас всех спасшаго.

Пойте Его, нас в други Себе принявшаго.

Пойте Его, безсмертие даровавшаго.

Пойте Богу нашему, пойте, пойте Цареви нашему, пойте!

 

Кондак 9

Горния Силы естество наше зряще на Небеси, дивящеся страннаго образа восходу, видяще же своего Владыку и Господа, возопиша: Яко прославися!

 

Икос 9

Ходатая нашего с плотию в вышних видяще, согласно вопием:

Пойте Его снизхождение.

Пойте Его долготерпение.

Пойте Его воскресение.

Пойте Его вознесение.

Пойте Богу нашему, пойте, пойте Цареви нашему, пойте!

 

Кондак 10

Воспоим, вси людие, со славою Вознесшагося Господа и одесную Отца нас спосадившаго, победною песнию: Яко прославися!

 

Икос 10

Видя своего Владыку и Господа на облацех носима, апостоли возо­пиша: не остави нас сирых, Гос­по­ди! Но Божия Сына познавше и обещание Духа Святаго приявше, возгласиша:

Пойте Господа, Отцу Единосущна.

Пойте Его, присно Суща.

Пойте Его, Бога неизменнаго.

Пойте Его, Человека совершеннаго.

Пойте Богу нашему, пойте, пойте Цареви нашему, пойте!

 

Кондак 11

Зряще Твое вознесение, Христе, воспеваем Твой светообразный лица зрак и, славяще Тя, песнь победную вопием: Яко прославися!

 

Икос 11

Почто червлены ризы Твоя, Гос­поди? — безплотнии Силы трепетно вопрошаху; дело же милосердия Божия познавающе, радостно взываху: Возмите врата, прииде бо Христос, тело земное нося, Страстию Своею тварь на земли спасе; темже и человеков звати приглашаху:

Пойте Господа, до смерти нас возлюбившаго.

Пойте Его, от мучения вечнаго исхитившаго.

Пойте Его, за грехи мира не погубившаго.

Пойте Его, Небесных и земных воедино соединившаго.

Пойте Богу нашему, пойте, пойте Цареви нашему, пойте!

 

Кондак 12

Предсташа Ангели апостолом, зрящим вознесение Иисуса, рекоста: Что стоите, зряще на Небо? Имже образом видите Христа восходяща с плотию, паки приидет судити мир: Яко прославися!

 

Икос 12

Приидите, воспрянем, вси, и в горняя очи и мысли возведем, на Елеонскую гору востечем, тамо бо Господь, апостолы утешая, рече: Не разлучаюся с вами, но всегда пребываю; Аз есмь с вами и никтоже на вы. Они же воспеша:

Пойте смерти Победителя.

Пойте нашего Искупителя.

Пойте возлюбленнаго Учителя.

Пойте всех человеков Спасителя.

Пойте Богу нашему, пойте, пойте Цареви нашему, пойте!

 

Кондак 13

О, великая тайна, о, чудо пре­славное! Всеми владычествуяй Гос­подь сил и Учитель наш, от земли к Небесным отходя, Духа Святаго послати учеником обеща, и тии с радостию возвратишася во Иеру­салим, пребывая выну в храме и радостно поя песнь победную: Яко прославися!

(Этот кондак читается трижды, затем икос 1 и кондак 1)

 

Молитва

Господи Иисусе Христе, Боже наш, сошедый с Небесных высот спасения нашего ради и напитавый нас духовною радостию во святыя и пресветлыя дни Воскресения Твоего, и паки по совершении земнаго служения Твоего вознесыйся от нас на Небо со славою и возседый одесную Бога и Отца! В сей ясный и всесветлый день Божественнаго на Небеса восхождения Твоего земля празднует и ликует, радуется и Небо вознесением днесь Творца твари, человецы славословят непрестанно, зряще заблуждшее и падшее естество свое на рамо Твое, Спасе, вземлемое и на Небеса вознесенное, Ангели же веселятся, глаголюще: Кто Сей, пришедый во славе, силен во брани? Сей воистину Царь Славы! Сподоби и нам, немощным, земная еще мудрствующим и плотоугодия творити не престающим, восход Твой на Небо страшный помышляюще и празднующе, плотская и житейская отложити попечения и со апостолы Твоими на Небо ныне взирати всем сердцем своим и всеми помышленьми своими, поминающе, яко тамо на Небеси горе жительство наше есть, зде же на земли мы точию странники и пришельцы есмы, отшедшия из дома Отча в страну далече греха. Сего ради усердно просим Тя: преславным вознесением Твоим, Господи, оживи нашу совесть, еяже нужнейши ничтоже есть в мире, возведи нас из плена сего греховнаго плоти и мира и сотвори нас горняя мудрствовати, а не земная, яко да не ктому себе угождати будем и жити, но Тебе, Господу и Богу нашему служити будем и поработаем, дондеже отрешившеся от уз плоти и прошедши невозбранно воздушныя мытарства, достигнем Небесных обителей Твоих, идеже, ставше одесную величествия Твоего, со Архангелы и Ангелы и всеми святыми прославляти будем всесвятое имя Твое, со Безначальным Твоим Отцем и Пресвятым и Единосущным и Животворящим Твоим Духом, ныне и присно и во веки веков. Аминь.

 

По благословению 

митрополита Херсонского и Таврического Иоанна

 

 

Опубликована: 04.04.2024