Православный календарь
Рекомендуем посетить
Музыковский Покровский мужской монастырь Херсонской епархии
УПЦ

НОВАЯ ИНФОРМАЦИЯ

Расписание богослужений в Свято-Духовском кафедральном соборе на  ЯНВАРЬ 

 

В Херсонской епархии изданы акафисты:

РОЖДЕСТВУ ПРЕСВЯТОЙ БОГОРОДИЦЫ

 

Пресвятой Богородице в честь икон Ее "УМЯГЧЕНИЕ ЗЛЫХ СЕРДЕЦ" и "СЕМИСТРЕЛЬНАЯ" 

И

Пресвятой Богородице в честь иконы Ее "НЕРУШИМАЯ СТЕНА"

 

Акафист ЗА ЕДИНОУМЕРШЕГО

 

Тропарь, глас 8

Глубиною мудрости человеколюбно вся строяй и полезная всем подаваяй, Едине Содетелю, упокой, Господи, душу раба Твоего, на Тя бо упование возложи, Творца и Зиждителя и Бога нашего.

 

Кондак, глас 8

Со святыми упокой, Христе, душу раба Твоего, идеже несть болезнь, ни печаль, ни воздыхание, но жизнь безконечная.

 

Кондак 1

Избра́нный Хода́таю и Первосвященниче, о спасении мира душу Свою положи́вый, да́вый нам власть чадами Божиими быти и обита́ти в невече́рнем дни Царствия Твоего! Даруй прощение и вечную радость усопшему, о не́мже с мольбо́ю взываем Ти: Иисусе, Судие́ Всемилостивый, рая́ сладости сподоби усопшаго раба Твоего.

 

Икос 1

Ангеле Хранителю святый, прииди́ и помолися с нами о рабе, о не́мже мольбу́ приносим, егоже на всех путе́х жизни хранил и наставлял еси, принеси молитву нашу ко Спасу Всещедрому, внегда́ звати нам:

Иисусе, потреби́ рукописа́ние грехов раба Твоего ( имя ).

Иисусе, уврачуй его язвы душевныя.

Иисусе, да будет память о добродетелех его вы́ну в роде родо́в.

Иисусе, не помяни грехов и прегрешений его.

Иисусе, сопричти́ его овца́м избра́ннаго Твоего стада.

Иисусе, возвесели его милосердием Твоим.

Иисусе, Судие́ Всемилостивый, рая́ сладости сподоби усопшаго раба Твоего.

 

Кондак 2

Видяще, Господи, с высоты Божественнаго Твоего милосердия, душу его, аще и не усоверши́вшуюся в добродетелех, пощади и помилуй раба Твоего, скорбь бо обдержи́т его ныне о ко́емждо невозвра́тном дне, без добродетели прошедшем. Сего ради, Владыко, молим Тя: да вни́дет и он в покой Твой, взывая: Аллилуия.

 

Икос 2

Разум недоразумева́емый разумети и́щущи, яко Сын Божий взе́млет мира грех, да всех спасения и́щущих ко Отцу приведет, молим: не лиши милости Твоея богатыя и раба Твоего, внегда́ пети нам си́це:

Иисусе, жизни Подателю, живота вечнаго сподоби раба Твоего.

Иисусе, да будет он едино с Тобою, яко Ты со Отцем еси.

Иисусе, всех призывая в виноградник Твой, не лиши и его воздаяния Твоего праведнаго.

Иисусе, не лиши и его чертога Твоего украше́ннаго.

Иисусе, соделай душу его, яко Адама первозда́ннаго, благодатною, чистою.

Иисусе, да умножаются добродетели, насажде́нныя им на земли́.

Иисусе, Судие́ Всемилостивый, рая́ сладости сподоби усопшаго раба Твоего.

 

Кондак 3

Сила Вышняго осеняет и ныне дух раба Твоего, яко скорбети ему о грехопаде́ниих, бывших на земном пути тече́ния ко Твоей вечней правде и святости. Ныне же, егда душа его вознесе́ся превы́шше всего земнаго к Тебе, Всесвятому, да воспое́т и о́ный раб Твой песнь ра́дования: Аллилуия.  

 

 Икос 3

Иму́щи немощь, яко человек, верховный апостол в нощь, в ню́же предая́ше Тя, трижды отрече́ся от Тебе; Ты же, прише́дый грешныя спасти, обре́л еси заблу́ждшаго. Сего ради, яко Едине ве́дый человеческаго естества́ не́мощь, прости и рабу Твоему многоразли́чныя отпадения от воли Твоея святыя, молим Тя, Милосердне Господи:

Иисусе, всели его, иде́же несть скорби, но жизнь безконечная.

Иисусе, избави его от со́вестнаго мучения, милости ради Твоея богатыя.

Иисусе, да улучи́т и он прощение и утешение.

Иисусе Христе, оправдай раба Твоего, иже праведным Промышле́нием от жития тле́ннаго к нетле́нней жизни приве́л еси.

Иисусе, от тайных беззаконий очисти его.

Иисусе, осени милостивым взором Твоим его.

Иисусе, Судие́ Всемилостивый, рая́ сладости сподоби усопшаго раба Твоего.

 

Кондак 4

Бурю внутрь име́яй, егда на земли́ живя́ше, помышлений лукавых, якоже рече Давид: «Всяк человек ложь есть», - ныне же, егда течение живота в покаянии совершив, веру соблю́д, весть, яко ве́лия Твоя, Господи, любовь ко грешником кающимся, взывает Ти песнь: Аллилуия.

 

Икос 4

Слышаша людие, яко ве́лия милость Твоя, Господи, сего ради прибегаем к Тебе, Изба́вителю нашему, власть имущему спасти погибающее создание Твое. Ты же не отвержи моления нашего, но яко не́когда Си́мон Кирене́йский помога́ше нести́ Крест Тебе, Зижди́телю твари, тако и ныне благоволи и нас спасению ближняго послужити.

Иисусе, тяготы́ друг друга носити запове́давый, спаси усопшаго.

Иисусе, союзом любве́ апостолы Твоя связавый, не лиши милости раба Твоего.

Иисусе, да послужат ему подвиги земни́и во спасение вечное.

Иисусе, услыши его сердечныя воздыхания, возноси́мыя нашими устна́ми.

Иисусе, благоутро́бия бе́здна, преста́вльшагося упокой в нестаре́ющемся блаженстве.

Иисусе, нашим предста́тельством и слеза́ми помилуй раба Твоего.

Иисусе, Судие́ Всемилостивый, рая́ сладости сподоби усопшаго раба Твоего.

 

Кондак 5

Боготе́чную звезду узре́вше волсви́, возра́довашася радостию ве́лиею. Разбойник благоразумный в час, егда услыша глас: «Аминь глаголю тебе, днесь со Мною будеши в раи́», - а́бие возрадовася в раи́ сладости. Боже, радости вечныя сподоби и раба Твоего, и якоже мольбу́ разбойника пока́явшася услышал еси, тако и сего обетований Твоих не лиши, да вы́ну зовет Ти : Аллилуия.

 

Икос 5

Видеша уме́рый я́ве жизнь вечную, весть, яко Ты тле́нное же и ме́ртвенное восприи́м, в нетление обле́кл еси и к безконечному житию и блаженному вознесл еси; молим Тя: сподоби сего жребия и его, иде́же при́сная радость и наслаждение.

Иисусе, на земли́ пожи́вый, земноро́днаго упокой во дво́рех святых Твоих.

Иисусе, на Кресте пригвозди́выйся, преста́вленнаго от нас Небесных благ сподоби.

Иисусе, смертную державу низложи́вый, живота несконча́емаго благочестно отшедшаго сподоби.

Иисусе, щедротами Твоими преста́вльшагося упокой, согрешений подая́ оставление.

Иисусе, умерщвле́ния и тления человеки свободи́вый, душу преста́вленнаго во дво́рех святых упокой.

Иисусе Воскресший, вознеси ко Отцу во обители душу, ю́же искупил еси Честно́ю Твоею Кровию.

Иисусе, Судие́ Всемилостивый, рая́ сладости сподоби усопшаго раба Твоего.

 

Кондак 6

Проповедницы богоноснии безприкла́днаго милосердия явишася Собори святых Твоих, слышаша бо слово Твое: «Яды́й Мою Плоть и пия́й Мою Кровь и́мать живот вечный», - сподо́бишася о́наго. Сего ради и мы вопием: не лиши и усопшаго райскаго блаженства, да с лики святых вопиет у Престола Твоего: Аллилуия.

 

Икос 6

Возсия жизнь нескончаемая, в ню́же усопший устреми́ся, восклица́я со апостолом, яко у́не есть разрешитися и со Христом быти. Дру́зи же и зна́емии днесь се́тующе о таковом разлучении, радуются же, яко усопший преселися, иде́же несть печаль и воздыхание. Сего ради приими́ от нас моления таковая:

Иисусе, не удали его от Себе, но одесну́ю стоя́ния сподоби.

Иисусе, прости ему согрешения вольная же и невольная.

Иисусе, сердечная воздыхания о Небеснем отечестве его приими́.

Иисусе, грех юности и неве́дения не помяни.

Иисусе, сподоби скончавшагося Твоея неземны́я радости и покоя.

Иисусе, Едине Верный, Неизменный, не остави его.

Иисусе, Судие́ Всемилостивый, рая́ сладости сподоби усопшаго раба Твоего.

 

Кондак 7

Хотящу веровати, не́ции рекут: «Ка́ко востанут мертвии; ко́им же телом прии́дут?» Верующе же, яко тело во о́ный день будущаго века востанет новое, душа же процвете́т де́лы благи́ми, яже на земли́ в теле соде́ла, молим: Иже создавый человека от земли́ благоде́йственно, Иже от земли́ преставил еси вернаго, яко Благ, пищи райския сподоби, вся презирая, яже от него соде́янная, да зовет Ти благодарственно со святыми: Аллилуия.

 

Икос 7

Новую показа жизнь Воскресением Своим, Иже смерти и живота име́яй всякую власть, Иже верою усопшаго Твоего сия́ния улучи́ти благоволи́, пощади, яко Бог Человеколюби́в и Ми́лостив, создание Твое и упокой в селе́ниих святых Твоих.

Иисусе, в ризу спасения облецы́ отшедшаго к Тебе.

Иисусе, милостивным долготерпением Твоим спаси к вечности преста́вльшагося.

Иисусе, мольба́ми Церкви Твоея да омыются грехи его.

Иисусе, предста́тельством всех святых спаси ко спасению тща́щагося.

Иисусе, озари его светом лица Твоего.

Иисусе, егоже от нас преставил еси Божественною волею, со святыми вчини́.

Иисусе, Судие́ Всемилостивый, рая́ сладости сподоби усопшаго раба Твоего.

 

Кондак 8

Странное чудо является, яко ме́ртвенная в нетленная в День Судный претворяются; и Иже на спасение Своего создания, а не на осуждение Прише́дый, преста́вльшагося во свете со Ангельскими ликостоя́нии учини́ благоутро́бием Твоим, презирая беззакония, подая́ ему прощение, да зовет Ти: Аллилуия.

 

Икос 8

Весь бе в вышних не́когда, зритель таин Божиих святый апостол Иоанн Богослов, зряще у Престола Агнца Божия людей ве́лие множество, в белыя ризы облече́нных: сии приидо́ша от великия скорби, оба́че с радостию служаху Богу днем и нощию, яко Богу обита́ти посреде них присно. Молим Тя, Господи: да не ко́снется скорбь и мука и усопшаго раба Твоего.

Иисусе, сопричти́ ко святым, обле́кши в белыя ризы и раба Твоего.

Иисусе, Любы́ превыше всякаго разуме́ния, помилуй раба Твоего.

Иисусе, на земли́ печаль и скорбь претерпевшему даждь на Небесех отраду и утешение.

Иисусе, услади́ его от источника воды́ живыя.

Иисусе, отыми́ всяку слезу от очей его.

Иисусе, всели его, иде́же присеща́ет свет лица Твоего.

Иисусе, Судие́ Всемилостивый, рая́ сладости сподоби усопшаго раба Твоего.

 

Кондак 9

Всякое естество удивися, зряще, яко смертию истребляется земное страдание всякаго земноро́днаго; видя же гада́тельно, я́же око не ви́де, и ухо не слы́ша, и на сердце человека никогда́же взы́де, молим Тя, Владыко: сладкаго Твоего причастия получити сподоби и к Тебе преста́вльшагося, и подаждь ему вечную жизнь, да зовет Ти: Аллилуия.

 

Икос 9

Вети́я многовеща́нныя, яко рыбы безгла́сныя, недоумеем глаголати, како чу́дно Небеса возвещают славу Божию, и о премудром творении руку́ Его возвещает твердь, яко́в же живот вечный, угото́ванный всем возлю́бльшим Его; сего ради молим: иже тече́ние с верою совершившему даждь сподобитися во Граде Небеснем жити, со Ангелы веселя́щеся.

Иисусе Человеколюбче, избави раба Твоего гее́нны, огня же и мрачных селений ада.

Иисусе, управи отшедшаго душу в вечное место сладости Твоея.

Иисусе, да будет в сердце его радость Твоя неизреченная.

Иисусе, укрепи его дух мяту́щийся надеждою благ вечных.

Иисусе, страстоте́рпцев и мучеников ранами и язвами умоле́н бывая, душу усопшаго во святых селе́ниих вчини́.

Иисусе, Неизрече́нне, Великий и Чу́дный, явися ему Сам и в обитель Свою введи его.

Иисусе, Судие́ Всемилостивый, рая́ сладости сподоби усопшаго раба Твоего.

 

Кондак 10

Спасти хотя всех, Отче наш, скончавшагося в Царствие Твое приими́, иде́же несть греха и зла, но то́кмо воля Твоя святая, иде́же в сонмах святых и непорочных Ангелов святи́тся имя Твое и поется песнь победная: Аллилуия.

 

Икос 10

Стена еси, Господи, всем к Тебе прибегающим на сопроти́вника, присно воюющаго на нас, оба́че веруем, яко грядет час, в о́ньже день вси земноро́днии предстанут Судии, ду́хове злобы и грешнии человецы изгна́ни будут во тьму кроме́шную, праведницы же в жизнь нескончаемую вни́дут; воззри тогда милостиво на смиреннаго раба Твоего и рцы ему: «Прииди́ одесну́ю Мене».

Иисусе, яко власть име́яй оставляти грехи, прости ему, яже соде́ла на земли́ в ра́зуме и в неразу́мии.

Иисусе, прости его согрешения забы́тыя или стыдом утае́нныя.

Иисусе, молитвами стартоте́рпец Твоих, преложи́ на радость в вере усопшаго воздыхания сердечныя.

Иисусе, не покажи пови́нна на Суде раба Твоего, но упокой во све́тлости пети благоутро́бие Твое.

Иисусе, сопричти́ его благословенным Отца Твоего.

Иисусе, дай ему во веки нескончаемое блаженство.

Иисусе, Судие́ Всемилостивый, рая́ сладости сподоби усопшаго раба Твоего.

 

Кондак 11

Пение всякое благодарственное приносим Тебе, Владыко Всеблаги́й, за еже спасти нас пришел еси, приими́ ныне иже благочестно к Тебе преста́вленнаго, яко Един Благ, да отверзутся и ему врата райския, да сря́щут его с ликова́нии Соборы праведных и зна́емии его, да возрадуются о нем светоно́снии Ангели Твои, да у́зрит он и Присноблаже́нную Матерь Твою, поюще: Аллилуия.

 

Икос 11

Светода́вче Господи, вся содержа́й дла́нию Своею, любовию вся в Царство Свое призыва́яй, Ты из праха земнаго воскресил еси бре́нную плоть человеческую, нетленныя жизни сподобивый, озари́ и раба Твоего светом милостей Твоих, живота вечнаго сподобляя.

Иисусе, веселия истиннаго сподоби раба Твоего.

Иисусе, иде́же сияет свет Твой, во хра́мех избра́нных, иде́же пи́ща присносу́щная, учини́ верою преста́вленнаго.

Иисусе, помилуй творение руку́ Твоею молитвами Богородицы.

Иисусе Христе, оправда́й раба Твоего, со всеми же Твоими праведными ликовствова́ти сподоби, того́ презирая прегрешения.

Иисусе, держа́й за десну́ю ру́ку раба Твоего, настави его на па́жить безсмертную, на зрение добро́ты Твоея.

Иисусе, оправда́й его благодатию и излия́нием Твоея Крови, вожделе́нную блаженную славу Твою да́руя.

Иисусе, Судие́ Всемилостивый, рая́ сладости сподоби усопшаго раба Твоего.

 

Кондак 12

Благодать дати восхотев Христос Бог: Царство Небесное – нищим духом; землю - кротким; а́лчущим правды – напое́ние; милостивым – помилование; чистым сердцем – Тя узре́ти; миротворцам – сынами Твоими нарече́ние. Сподоби, Господи, и отшедшаго к Тебе, верою к добродетелем не́когда тща́вшагося, достойнаго мздовоздая́ния, да зовет Ти благодарственно: Аллилуия.

 

Икос 12

Поюще победу ю́же на ада, вернии вси, вооружи́вшеся всеору́жеством Христовым и обо́лкшеся во оружии веры, врага присно побеждаем, сего ради скончавшемуся яже о Тебе, Спасе, безсмертие и блаженное наследие улучити благоволи.

Иисусе, да вни́дет раб Твой в радость Твою ныне.

Иисусе, преста́вленнаго о наде́жди воскресения Царствие Твое улучи́ти сподоби.

Иисусе, обраща́ющееся оружие премину́ти благоволи, и Древа Живо́тнаго подо́бно причастие улучи́ти преста́вленнаго сподоби.

Иисусе, нереши́мый живот, красное ра́дование и непрестанное веселие подаждь уме́ршему, Многомилостиве.

Иисусе, на Древе пове́шен быв, рай отверзл еси, в вере убо преста́вленнаго в онь всели́.

Иисусе, с веселием и со дерзновением и светлостию благоволи, яко Бог, на о́блацех сре́сти Тя усопшему.

Иисусе, Судие́ Всемилостивый, рая́ сладости сподоби усопшаго раба Твоего.

 

Кондак 13

О Жизнодавче, власть имеяй спасти из ро́ва поги́бельнаго, егда словом Твоим предстанем неумы́тному Твоему Суди́щу, не посрами в Тя веровавших, Спасе, вси бо согрешихом, но Тебе не отступи́хом, и ныне же в селении праведных, егоже приял еси, упокой, да зовем Ти: Аллилуия.

(Этот кондак читается трижды, затем икос 1 и кондак 1)

 

Молитва

Помяни, Господи Боже наш, в вере и надежде живота вечнаго преставльшагося раба Твоего, брата нашего (имя), и яко Благ и Человеколюбец, отпущаяй грехи и потребляяй неправды, ослаби, остави и прости вся вольная его согрешения и невольная, избави его вечныя муки и огня геенскаго, и даруй ему причастие и наслаждение вечных Твоих благих, уготованных любящим Тя: аще бо и согреши, но не отступи от Тебе, и несумненно во Отца и Сына и Святаго Духа, Бога Тя, в Троице славимаго, верова, и Единицу в Троице и Троицу во Единстве православно даже до последняго своего издыхания исповеда. Темже милостив тому буди, и веру, яже в Тя, вместо дел вмени, и со святыми Твоими, яко Щедр, упокой: несть бо человек, иже поживет и не согрешит, но Ты Един еси кроме всякаго греха и правда Твоя правда во веки, и Ты еси Един Бог милости, и щедрот, и человеколюбия, и Тебе славу возсылаем, Отцу и Сыну и Святому Духу, ныне и присно и во веки веков. Аминь.

 

По благословению

митрополита Херсонского и Таврического Иоанна

 

Опубликована: 30.11.2023