Агница Твоя, Иисусе, Зинаида зовет велиим гласом: Тебе, Женише мой, люблю, и, Тебе ищущи, страдальчествую, и сраспинаюся и спогребаюся крещению Твоему, и стражду Тебе ради, яко да царствую в Тебе, и умираю за Тя, да и живу с Тобою, но яко жертву непорочную приими мя, с любовию пожершуюся Тебе. Тоя молитвами, яко Милостив, спаси души наша.

Храм твой всечестный, яко цельбу душевную обретше, вси вернии велегласно вопием ти: дево мученице Зинаидо великоименитая, Христа Бога моли непрестанно о всех нас.

Кондак 1

Избранней невесте Христовой Зинаиде от любве сердечныя приносим сие пение, яко много могущей своими к Богу молитвами споспешествовати нашему спасению и от всяких бед избавити к ней притекающих. Сего ради согласно зовем вси: Радуйся, святая мученице Зинаидо, молитвеннице о почитающих тя.

Ангелообразно в мире поживши, всеблаженная страстотерпице Зинаидо, Ангельский лик на небеси восполнила еси. Но воспевая ныне со Ангелы и священных дев мучениц ликом песнь Триединому Богу, не забуди и нас, земнородных сродник твоих, в день страсти твоея воспевающих сице:

Радуйся, избранная угоднице Божия.

Радуйся, верная раба Господа Твоего.

Радуйся, агнице, Агнцу Христу последовавшая.

Радуйся, невесто Христова прекрасная.

Радуйся, чистотою девства просиявшая.

Радуйся, мучений кровьми украсившаяся.

Радуйся, святая мученице Зинаидо, молитвеннице о почитающих тя.

Видяще, святая Зинаидо, с сестрою твоею Филониллою житие и труды сродника твоего пресветлаго Павла, прежде Церковь Божию гонившаго, последи же попремногу великими апостольскими подвиги ю разширившаго и украсившаго — и сами восхотесте всею душею Христу работати; темже от идол бездушных отвращеннии и вере Христовой святым Павлом наученнии возопиша Богу: Аллилуиа.

Разум богопросвещен приявши, премудрая Зинаидо, уразумела еси суету мира сего и избрала еси едино души твоей потребно — еже благоугодити Богу; темже с Филониллою, сродницей по плоти и духу тебе, стяжаний матере своея отвергшися и апостолом подражающе, Христа проповедовала еси. Обращеннии же тобою к вере истинней возопиша к тебе таковая:

Радуйся, мудрая дево, мира отвергшаяся, да Христа приобрящеши.

Радуйся, родительницу оставльшая, да к Богу Отцу Небесному приближишися.

Радуйся, великаго Павла ученица пресветлая.

Радуйся, духом Евангелия от языков апостола упоенная.

Радуйся, от Тарса изшедшая и апостольский путь прошедшая.

Радуйся, Царство Небесное людем благовестившая.

Радуйся, святая мученице Зинаидо, молитвеннице о почитающих тя.

Силою благодати Христовы одеявшися, преславная Зинаидо, навыкла еси силе и художеству врачебному, и Самому Господу, яко верная Его ученица, подобящися, проходила еси вся грады, проповедающи Евангелие и безсребренно врачующи всякий недуг и всяку язю в людех. Исцели убо и наша недуги душевныя и телесныя, святая дево, данною тебе благодатию, да выну вопием о тебе Богу: Аллилуиа.

Имущи в сердце и помышлении своем словеса Давида пророка: «Се что добро, или что красно, но еже жити братии вкупе», во град Деметриадский святии сестры Зинаида и Филонилла достигоша и, в вертеп некий вшедше, тамо житие равноангельное провождаху, не престающи ова недуги людей врачевати, ова же в подвизех и чудесех сияти; обоя вкупе Господа в душах и телесех прославляти и проповедати. Таковому убо дивному житию вашему чудящеся, зовем:

Радуйся, Зинаидо, безсребреннице предивная.

Радуйся, многия и лютыя болезни человеком отгнавшая.

Радуйся, с Филониллою долгому бдению и пощению себе вдавшая.

Радуйся, чудна знамения совершившая.

Радуйтеся, вкупе Давидски добро и красно течение скончавшии.

Радуйтеся, сестры по плоти, сестрами по духу себе явившии.

Радуйся, святая мученице Зинаидо, молитвеннице о почитающих тя.

Бурею злобы и зависти бесовския дышуще на вас, блаженныя сестры, окрест живущия языцы, яко умалися вами суетное их идолом, паче же бесом поклонение, ради проповеди вашея, чудес и знамений, неистовством воспылаша на вас, убити от отца лжи вас поучашеся во мраце скверны своея, не ведуще пети Богу: Аллилуиа.

Слышавше премногую твою добродетель, блаженная Зинаидо, люди благоразумныя отовсюду устремляхуся к тебе, с верою во врачующую благодать, в тебе сущую, и приемлюще скорая исцеления, прославляху Бога, и тебе, целительницу и угодницу Его, величаху пении сими:

Радуйся, помазанная миром благодати.

Радуйся, Божественных даров приятелище.

Радуйся, милостей Господних источниче.

Радуйся, скорая помощнице страждущих.

Радуйся, наставнице заблуждающихся.

Радуйся, озлобляемых твердая стено.

Радуйся, святая мученице Зинаидо, молитвеннице о почитающих тя.

Боготечней звезде была еси подобна, прехвальная, во граде Деметриаде, страны светом дел твоих освещающая, слово благовестия знаменьми утверждающи, и всех научающая Истинному Солнцу Правды Христу Богу пети: Аллилуиа.

Видевше твое великое к болящим телом и душею людем сострадание, к тебе притекаем, светлейшая Зинаидо: озари убо от горних высот светом твоего врачевания и наша недугующая телеса и грехом потемненныя души, да воставше и исправившеся тобою, радостно вопием ти:

Радуйся, мироварнице, на вся недуги врачевания источающая.

Радуйся, врачебнице быстрая и милосердная.

Радуйся, сострадательнейшая человеком благодетельнице.

Радуйся, язв телесных и скорбей душевных наших посетительнице.

Радуйся, требующих заступления твоего не отвращающаяся.

Радуйся, выну о нас пред Богом ходатайствующая.

Радуйся, святая мученице Зинаидо, молитвеннице о почитающих тя.

Проповедником апостолом истинно сравнилася еси, всехвальная дево, и к тебе бо словеса Владычня преложишася, егда рече Своим учеником: «Шедше, проповедуйте, яко приближися Царствие Божие; болящия исцеляйте, прокаженныя очищайте; туне приясте, туне дадите», вся люди научающе верно Богу пети: Аллилуиа.

Возсия миру свет истины Евангельския, и ожесточися в безсилии своем прогоняемая им тьма прелести бесовския: не терпя бо своего поражения, лукавый змий тела мучеников яростно сокрушает, но тем паче душам их ко Христу скорее прейти возмогает. И зде убо, духом злобы наученнии языцы безумнии приведше нощию, яко сынове тьмы сущии, в вертеп святых дев Зинаиды и Филониллы, телеса их камением до успения смертнаго побиша, ихже души в селения райския среташе, чини Ангельстии возопиша сицевая:

Радуйтеся, святии мученицы, добре страдальчествовавшии и ныне венчающиеся.

Радуйтеся, лики безплотных и мученик число предопределенное восполняющии.

Радуйтеся, Стефану первострадальцу образом кончины подобныя.

Радуйтеся, Фекле, мучениц начальнице, нравом жития равныя.

Радуйтеся, телесы убиеннии, души же ваша — в руце Божии, и не прикоснется к ним мука.

Радуйтеся, сынами тьмы во тьме нощней посечении, но светло и ясно память ваша на земли славится.

Радуйся, святая мученице Зинаидо, молитвеннице о почитающих тя.

Хотяще Господу благоугодити, оставила еси дом родительский и в вертеп вселилася еси, в вертепе ради Рожденнаго, и тамо заповеди Его сотворивши и иных научивши, даже до смерти мученическия верна была еси Ему с другинею твоею, страдалице Зинаидо. Темже за сие венец правды ныне приявши, поеши Тому вечно на небеси: Аллилуиа.

«Новую заповедь даю вам, да любите друг друга, — рече Господь ко избранным Его, — больши бо сея любви никтоже имать, да кто душу свою положит за други своя». Сея заповеди верную исполнительницу видим тя, богоизбранная мученице Зинаидо, любовь велию к Богу и ближнему своему в житии явившую и душу свою за други, паче же за Христа, яко Друга и Жениха своего, положившую. Сего ради и мы с любовию днесь вопием ти:

Радуйся, любвеобильная страдалице, милосердием к человеком преисполненная.

Радуйся, дивная страстотерпице, ближняго своего, яко сама себе возлюбившая.

Радуйся, верная ученице Христова, заповеди Его соблюдшая.

Радуйся, за Христа и добрая дела твоя от злодеев каменьми побиенная.

Радуйся, сими каменьми, ко краеугольному камню — Христу любовию приобщившаяся.

Радуйся, яко голубица чистая, душею к Чистейшему скоро воспарившая.

Радуйся, святая мученице Зинаидо, молитвеннице о почитающих тя.

Странное и преславное чудо видим на тебе, добрая мученице Зинаидо, тебе бо от любве Божией, якоже и сродника твоего Павла, ничтоже разлучити возмогло есть: ни скорбь, ни теснота, ни гонение, ни глад, ни нагота, ни беда, ни меч, ни кая тварь, ни живот, ни смерть. Ты же, душею к Богу в райския селения возлетевши, паче с Ним соединилася еси, но и от человек, по смерти, не разлучалася еси, приклоняющи милостиво ухо ко всем тебе верою призывающим и помогающи всем чтущим память твою, Богу же вопиющим: Аллилуиа.

«Весь еси делание и желаний краю, весь еси сладость моя, Сладчайший Иисусе», — тако взывала еси, мученице Зинаидо, в молитвах своих ко Господу, всею душею и сердцем к Тому горевшая, егда нечестивии человецы камением метаху на тя, и горькое убиение свое сим весьма усладивши и к Богу возшедши. Услади и наша скорби, блаженная дево, да сладостно зовем ти:

Радуйся, святая, Сладчайшаго возлюбившая.

Радуйся, славная, во Иисусову сладость горесть земную обратившая.

Радуйся, язвы Господа твоего на теле твоем понесшая.

Радуйся, ангельски Тому послужившая.

Радуйся, злобы неверных не устрашившаяся.

Радуйся, верных сердца возвеселившая.

Радуйся, святая мученице Зинаидо, молитвеннице о почитающих тя.

Всякое естество удивися, Зинаидо, сиянию в тебе благодати и богатству добродетелей: ангелоподобной чистоте твоей, мужеству в скорбех и страданиях, в немощнем женском телеси проявленным, крепкой любви ко Христу и многому состраданию к людем, в нихже творила еси преславная, во еже пети: Аллилуиа.

Ветии многовещаннии не возмогут по достоянию восписати подвиги твоя, добропобедная мученице, како непобедимою Божиею благодатию, юная дева сущи, победила еси древняго исконнаго врага и посрамила еси идольскую прелесть, множество душ ко Христу приведши. Мы же удивления исполненнии, в немощи витийства нашего смиренно взываем ти:

Радуйся, Ангелов радостное зрелище и человеков благоговейное удивление.

Радуйся, демонов горькое рыдание и служителей их безсильное ожесточение.

Радуйся, кровь за Христа пролиявшая.

Радуйся, тело за Него мученической кончине предавшая.

Радуйся, с великим Павлом течение совершившая и веру соблюдшая.

Радуйся, во дворех перворожденных на небеси вселившаяся.

Радуйся, святая мученице Зинаидо, молитвеннице о почитающих тя.

Спаситель и Господь, многажды утешая други Своя, вещаше Сам пречестными усты Своими: «Поминайте слово, еже Аз рех вам: несть раб болий Господа своего: аще Мене изгнаша, и вас изженут; аще слово Мое соблюдоша, и ваше соблюдут». Сия вся сбывшаяся видим на тебе, святая Зинаидо, тебе бо, верную рабу Господню, аще и погнаша мнози невернии, во образ Господа твоего, но кольми паче мнози от человек твое слово соблюдоша! С нимиже и мы о тебе вопием Спасу: Аллилуиа.

Царю и Богу своему яко жертва благоприятная принеслася еси, богомудрая страстотерпице, темже со Христом в небесней сени пребывающи, и нас пред Престолом Его не забуди, зовущих ти сице:

Радуйся, с радостью понесшая за Христа поругание.

Радуйся, праведное приявшая по трудех своих от Него воздаяние.

Радуйся, агнице кроткая, от лютых воинов телом растерзанная.

Радуйся, ластовице быстрая, от духов злобы поднебесных на мытарствах душею не удержанная.

Радуйся, в радость Господа твоего скоро вшедшая.

Радуйся, и наша прошения к Нему возносящая.

Радуйся, святая мученице Зинаидо, молитвеннице о почитающих тя.

Пение сие, вемы, яко много не довлеет ко истинному похвалению твоих добродетелей, святая мученице, обаче может помощи твоя праведная молитва нам, недостойным, и за сия малыя песнопения, аще токмо от чистаго сердца тыя вознесем и с любовию о тебе возопиим Богу: Аллилуиа.

Светозарнаго дне всеобщаго мертвых воскресения и Страшнаго Суда Божия чающе, ужасаемся лютых наших деяний и безмерных грехов, имиже ежечасно прогневляем Создателя и Спаса нашего. Но имеюще тебе, блаженная предстательнице за нас пред Господем, яко мудрую евангельскую деву, Жениха в полунощи светло сретившую, уповаем, яко и нам дверь чертога небеснаго не затворится твоими молитвами, зовущим ти таковая:

Радуйся, дево премудрая, со светильником горящим, полным елея добрых дел, ко Христу изшедшая.

Радуйся, на брак Агнчий со избранными радостно и победоносно во светлой одежде вшедшая.

Радуйся, пред Престолом Агнца закланнаго с душами убиенных за Слово Его песнь возносящая.

Радуйся, на Престоле Славы судити Хотящаго о мире умоляющая.

Радуйся, наипаче о множестве тезоименитых твоих, на земли живущих, спасения пред Богом споручнице.

Радуйся, и в вере усопших тезоименитых своих — грехов прощения и райских дверей отверзения молебнице.

Радуйся, святая мученице Зинаидо, молитвеннице о почитающих тя.

Благодать от Бога дата ти бысть еще в жизни временней, преблаженная, врачевати душевныя и телесныя болезни к тебе притекающих. Веруем убо, яко в жизни вечней и блаженней у Бога, прославльшаго тя и к Себе приблизившаго, наипаче сих дарований преисполнена еси, и можеши помощи всякому человеку во всяцей скорби и болезни с верою к тебе прибегающему и Богу православно в теплоте сердца вопиющему: Аллилуиа.

Поюще твоя апостолом равныя труды, подвижническое житие и страдальческую кончину, приснославная Зинаидо, молим тя: простри твою с небеси помощь на нас, живущих во тьме страстей и искушений, и твоим пред Богом дерзновением скоро воздвигни от одра немощи души и телеса вопиющих ти:

Радуйся, с равноапостольными Мариею, Еленою, Ниною, Ольгою и иными, яко их подвигом уподобившаяся, славимая.

Радуйся, с мученицами Феклою, Варварою, Екатериною, Анастасиею и сестрою Филониллою и прочими во светлом лике торжествующая.

Радуйся, с преподобными девами Пелагиею, Феврониею, Мариею и иными, яко отшельница ликовствующая.

Радуйся, с Космою, Дамианом и Пантелеимоном и всеми целители, яко безсребреница прославляемая.

Радуйся, со Ангелы и всеми святыми в торжестве Церкви Небесней пребывающая.

Радуйся, и нас, грешных, от единства Церкви земныя не отпадающих, не забывающая.

Радуйся, святая мученице Зинаидо, молитвеннице о почитающих тя.

О преславная страстотерпице Христова Зинаидо, кроткая Его угоднице и всегдашняя о нас к Нему молебнице, с верою, надеждою и любовию ко твоему предстательству пред Богом притекающих нас приими и от всяких болезней, бед и напрасныя смерти избави, да с тобою взываем Богу: Аллилуиа.

О прехвальная мученице Христова Зинаидо, благонадежная наша пред Господем предстательнице! Тебе припадаем и молимся: даждь нам быти причастниками любве твоея к Богу и ближнему, еюже при жизни святая твоя душа преисполнена бысть. Озари нас истиною, просвети ум и сердце светом Божественнаго учения, научи нас тебе подражати верно, Бога и ближнего нашего любити и заповеди Господа совершати непогрешительно, да чада света явимся воистину. Призри благоутробно на всякую душу верных твоих почитателей, милости и помощи твоея ищущих. Буди всем нам в болезнех целительница, в скорбех утешительница, в печалех посетительница, в бедах и нуждах помощница, в час же смертный милостивая покровительница и защитительница, и всем вся прошения ко благу исполни. Даждь нам молитвами твоими спасение вечное получити и Царствие Христово унаследовати, славяще дивнаго во святых Своих Бога Отца и Сына и Святаго Духа во веки веков. Аминь.

Святые сёстры Зинаида и Филонилла родились в городе Тарсе Киликийской области Малой Азии (ныне Турция).

Согласно преданию они приходились родственницами апостола Павла.

Видя большие перемены в жизни своего дяди апостола Павла, ранее бывшего большим противником христиан и гонителем Церкви Божией, носившего имя Савл, но после обратившегося ко Христу и ставшего проповедником веры Христовой, юные девы задумались о суете мира сего и наученые святым Павлом, всей душой восхотели Христу единому работати.

Избрав единое на потребу души своей, Зинаида и Филонилла наученые и утверждённые в вере Христовой, пошли по городам и сёлам, проповедуя Еванглие и безсребно врачуя всякий недуг и язву в людях. Оставив свою мать и отказавшиь от своего имущества, девы совершали истинно апостольское дело.

Имея в сердце своем словеса Давида пророка «се что добро, или что красно, но еже жити братии вкупе», Зинаида с сестрою своей решили поселиться в вертепе около города Деметриады на севере от Тарса. Там девы проводили равноангельское житие, предаваясь долгому бдению и пощениям. Но Богу угодно было, чтобы эти жемчужины не были скрыты от людей, нуждавшихся в их помощи и служении. Ища исцеления, всё больше и больше людей приходило к пещере святых дев. Исцеляя безмездно болезни телесные, святые сёстры лечили и душевные язвы в людях, наставляя их в христианской вере. Видя столь великую благодать в девах, христиане укреплялись, а многие язычники обретали веру в Христа и крестились.

Не известно, как долго святые Зинаида и Филонилла так подвизались в Деметриаде. Но окрест живущие язычники озлобились, так как, в результате проповеди и чудес совершаемых девами, их идольские капища опустевали и бесам поклонение умалялось. Уговоры и угрозы язычников не имели никакого влияния на святых дев, и тогда, освирепев, они ночью "вошли в вертеп и тела их каменьями до успения смертного побиша". Так приняли мученическую смерть святые девы Зинаида и Филонилла.

Святым мученицам Зинаиде и Филонилле молятся об исцелении всякой немощи душевной и телесной.

По благословению