День памяти:

9 декабря (н. ст.)

Тропарь, глас 1

Терпения столп был еси, ревнова́вый пра́отцем, преподобне: Ио́ву во страсте́х, Ио́сифу во искушениях, и Безплотных жительству сый в телеси́, Али́пие отче наш, моли́ Христа Бога спасти́ся душа́м нашим.

Кондак, глас 8

Яко добродетелей вину́ и постников удобрение, Церковь славит тя днесь и воспевает, Али́пие; молитвами твоими пода́ждь чтущим любовию доблести твоя и боре́ния лю́тых прегрешений избавление, яко тезоимени́тый.

Кондак 1

Избра́нный угодниче Христов, преподобне отче наш Алипие, восхваляем подвиги и труды твоя. Ты же, яко име́яй дерзновение ко Господу, моли дарова́ти душа́м нашим мир и ве́лию милость, да с любовию зовем ти: Радуйся, Алипие, великий столпниче и преславный чудотворче.

Икос 1

Ангелов и человеков Творец избра́ тя еще от утробы ма́терния, богоно́сне отче Алипие, да прославиши пресвятое имя Его: Ангел бо явился еси на земли́, ангельское житие с плотию восприе́м. Мы же, ублажающе тя, глаго́лем си́це:

Радуйся, яко друга́го тя Самуи́ла из ма́терняго чрева Бог освяти́.

Радуйся, яко тебе ро́ждшуся, всю хра́мину света Божественнаго Гос­подь испо́лни.

Радуйся, измла́да жизнь свою Христу всецело преда́вый.

Радуйся, все упование твое на милосердие Божие возложи́вый.

Радуйся, яко Божественная дарования Духа Святаго цели́ти неду́ги и отгони́ти страсти прия́л еси.

Радуйся, яко Божия благодати исполнен, Ангелы возвеселил еси.

Радуйся, Алипие, великий столпниче и преславный чудотворче.

Кондак 2

Видя Господь душу твою, преподобне, праведностию и благочестием сияющую, яко светильник пресве́тел на све́щнице церковней тя утверди, да возмо́жеши светозарными доброде́тельми твоими всяку душу, к тебе приходящую, благочестному́дренно просвещати и научати хвалу воздавати Богу: Аллилуия.

Икос 2

Разумом Небесным просвещаем, блаженный святитель Феодор, провидя благодать Божию, на тебе почившую, свя́те Алипие, Божественному Писанию тя научи, да в вере, надежде, любви и милосердии непрестанно пребывая, Христу Богу угоден бу́деши. Сего ради, похваляя добродетели твоя, взываем тебе сия́:

Радуйся, светило светоза́рное, чудес сиянии всю подсо́лнечную просвеща́ющее.

Радуйся, сто́лпе непоколебимый, монахов в по́двизех многотрудных укрепля́яй.

Радуйся, постников неистоща́емое подкрепление.

Радуйся, колеблемым в вере незы́блемое утверждение.

Радуйся, яко зной и хлад мужественно претерпел еси.

Радуйся, яко недуги страждущих исцелял еси.

Радуйся, Алипие, великий столпниче и преславный чудотворче.

Кондак 3

Силою любве Божественныя свыше укрепляем, блаженне Алипие, сердце свое, яко ниву благопло́дну, во сто крат уплодоноси́л еси, в добродетелех христианских непрестанно возрастая и Владыце Твоему со умилением воспевая: Аллилуия.

Икос 3

Имея душу, страха Божия испо́лнену, еще от младых лет стяжал еси, Алипие, любовь у Бога и людей, мудростию же твоею не по возрасту своему преизбы́точествовал еси. Мы же, дивя́ся ангелоподо́бному житию твоему, воспеваем ти си́це:

Радуйся, истинною верою укрепленный.

Радуйся, Небесными дарова́нии испо́лненный.

Радуйся, яко сердце твое жилище Духа Святаго явил еси.

Радуйся, яко крепость разума твоего в ополчении на врага показал еси.

Радуйся, демонов полки́ мужественно победивый.

Радуйся, на противныя прилоги непреклонен бы́вый.

Радуйся, Алипие, великий столпниче и преславный чудотворче.

Кондак 4

Бури мирския суеты́ избега́я, уедине́нныя жизни пла́менне возжеле́л еси, угодниче Божий, да, в священном безмолвии усердное служение Единому Богу принося́ и в богомыслии пребывая, вы́ну воспевати Создателю твоему будеши: Аллилуия.

Икос 4

Слыша Господь моления твоя, богомудре Алипие, всели́ тя в пус­тынное место и укрепи́ на брань с легио́нами нечистых духо́в, на­учая побеждати их оружием Креста и стрелами молитв твоих. Мы же, восхваляя многия подвиги твоя, умильно вопие́м ти:

Радуйся, монахов сто́лпе непоколебимый.

Радуйся, благочестия защитниче непреодолимый.

Радуйся, яко иноческое житие зело́ возлюбил еси.

Радуйся, яко Божественныя заповеди ревностно хранил еси.

Радуйся, притекавших к тебе учением веры оглаша́вый.

Радуйся, ду́ши, зно́ем греха опаля́емыя, вода́ми веры ороша́вый.

Радуйся, Алипие, великий столпниче и преславный чудотворче.

Кондак 5

Боготе́чней звезде уподобился еси, преподобне отче: ты бо, в псалмопе́нии и молитвах упраждня́яся, от трисо́лнечнаго света Пресвятыя Троицы благодать приял еси утешати и наставляти приходящия к тебе, благодарно поя Богу: Аллилуия.

Икос 5

Видяще пресветлый лик святыя великомученицы Евфимии, яже в видении чу́дно тебе предста́ и твоею спутницею и помощницею, по произволению Божию, себе наименова́, храм во имя святыя девы сия воздвигнути потща́лся еси, богомудре отче. Мы же, радуяся сему́, взываем ти си́це:

Радуйся, иноческих обителей основателю.

Радуйся, монашеского жития устрои́телю.

Радуйся, святых мужей и жен усердный почитателю.

Радуйся, добродетелям и подвигам их подражателю.

Радуйся, благолепия церковнаго любителю.

Радуйся, о службе Божией ревнителю.

Радуйся, Алипие, великий столпниче и преславный чудотворче.

Кондак 6

Проповедницы подвигов твоих бы́ша приходящии от всех концев земли́ к столпу́, на не́мже ты, отче, подвизался еси, хлад и зной претерпевая и Подвигополо́жнику Христу прилежно поя: Аллилуия.

Икос 6

Возсиял еси яко светило богосве́тлое, блаженне отче, путь спасения верным озаряя и в вере во Христа их утверждая. Сего ради и мы, тобою наставляеми, ублажаем тя и воспеваем си́це:

Радуйся, уставов церковных хранителю.

Радуйся, молитвы непрестанныя совершителю.

Радуйся, постом и воздержанием страсти укроща́ти нас науча́яй.

Радуйся, всем взывающим к тебе предстателя пред Богом себе явля́яй.

Радуйся, в и́ночестем житии подвизающимся славный наставниче.

Радуйся, жаждущим истины сла́достный источниче.

Радуйся, Алипие, великий столпниче и преславный чудотворче.

Кондак 7

Хотя прославити место подвигов твоих, преподобне, повеле́ Человеколюбец Господь дво́ице мужей светоно́сных в виде́нии предстати тебе, каждение на основании церкви святыя Евфимии совершающе и «Осанна месту сему!» - восклицающих; ты же, благодаря Бога, вопиял еси: Аллилуия.

Икос 7

Новую благодать и силу дарова тебе Господь, егда́, подвиза́яся в посте и бде́нии, явился еси стра́шен и непристу́пен де́моном, яко столп непоколеби́м, молитвами твоими их уязвля́я и дале́че сих отгоня́я. Мы же, взирая на боре́ния твоя, с любовию глаголем ти си́це:

Радуйся, Царствия ради Небеснаго тесноту претерпе́вый.

Радуйся, жизни ради вечныя мирска́я вся презре́вый.

Радуйся, яко многое озлобление за Христа прия́л еси.

Радуйся, яко терпением твоим адама́нту уподобился еси.

Радуйся, блаженный небожи́телю.

Радуйся, лика преподобных совсе́льниче.

Радуйся, Алипие, великий столпниче и преславный чудотворче.

Кондак 8

Странен миру земному показался еси, преподобне, ты бо, отечествия го́рняго взыску́я, вся помышления твоя к Небесному Иерусалиму непрестанно возносил еси; ныне же, во славе безконечней пребывая, сла́дце со святыми вопие́ши: Аллилуия.

Икос 8

Весь в Бо́зе быв, прехвальне Алипие, дни и но́щи молитвенное бдение на столпе́ совершал еси и реки чудес приходящим к тебе источал еси. Сего ради, святую память твою празднующе, зовем ти:

Радуйся, яко на помощь тя призывающим помогаеши.

Радуйся, яко любити Бога и ближних нас научаеши.

Радуйся, доброде́тельнаго жития мудрый учителю.

Радуйся, болящих и страждущих целителю.

Радуйся, награду нетленную от Господа получи́вый.

Радуйся, угождением Богу на Небесех обитель себе сотвори́вый.

Радуйся, Алипие, великий столпниче и преславный чудотворче.

Кондак 9

Всякое естество удивляется, предивный отче, великому свыше тебе дарованию, ты бо на земли́ невеще́ственное житие показал еси и дар чудотворения от Господа приял еси; ныне же на Небесех у Престола Божия пребывая, и нас научаеши пети Христу: Аллилуия.

Икос 9

Вети́и многовеща́нныя не возмогут по достоянию воспети житие твое, богоно́се Алипие, подвигами и трудами преизоби́льно украшенное. Мы же от усердия нашего воспеваем ти похвалы сия:

Радуйся, сто́лпников преславный о́бразе.

Радуйся, подвизающихся незы́блемое укрепление.

Радуйся, добронра́вия благоговейный учителю.

Радуйся, чи́стаго жития ревностный предводителю.

Радуйся, всех ко спасению верный путеводителю.

Радуйся, в суете́ жи́тельствующих мудрый вразумителю.

Радуйся, Алипие, великий столпниче и преславный чудотворче.

Кондак 10

Спасти хотя многих, Премилосердный Господь яви тя основателя верна обителей иноческих, да просвещаеши всех своими учении и ангельскаго жития образом, научая пети: Аллилуия.

Икос 10

Стена тверда и крепкое ограждение был еси, всехвальне отче, во ангельстем образе подвизавшимся, преподавая им уставы жития иноческаго и повелевая тщательно блюсти́ся от козней бесовских. Они же благодарственно тебе возглаша́ху:

Радуйся, мудрый наш наставниче.

Радуйся, теплый о нас молитвенниче.

Радуйся, обидимых любвеоби́льный уте́шителю.

Радуйся, алчущих милостивый кормителю.

Радуйся, бед и скорбей прогонителю.

Радуйся, тяжкими недуги одержи́мых врачевателю.

Радуйся, Алипие, великий столпниче и преславный чудотворче.

Кондак 11

Пение всеумиле́нное приносим ти, достоблаже́нне отче, воспоминающе, яко ты пятдеся́т и три ле́та стоянием на столпе́, зело́ стражда́, вся тяготы́ усердно претерпевал еси, Троице Пресвятей воспевая: Аллилуия.

Икос 11

Светлым и радостным лицем Богу предстоял еси, отче Алипие, осиява́емый светом Небесным, над главою твоею, яко столп огненный, пребывающим и вся о́крест озаряющим. Темже и наша сердца́, мраком греха омраче́нная, просвети и к покаянию нас приведи, да зовем ти:

Радуйся, светильниче, Божественным огнем пламенеющий.

Радуйся, гро́ме, во зле живущих устрашающий.

Радуйся, мо́лние, во вся концы благочестием блиста́яй.

Радуйся, о́блаче, верныя от бед покрыва́яй.

Радуйся, яко житием твоим Небеса возвеселил еси.

Радуйся, яко чудесы́ твоими всю вселенную удивил еси.

Радуйся, Алипие, великий столпниче и преславный чудотворче.

Кондак 12

Благодати Божественныя испо́лненнный, до́блестный воине Хрис­тов, ди́вны подвиги показал еси и многая чудеса сотворил еси, болящих исцеляя, бесы изгоняя, будущая, яко настоящая, прорека́я; сам же четырена́десят лет лю́тою болезнию ног стра́ждущий, Иову Многострадальному подража́я, Бога за вся благодарил еси, вопия́ Ему: Аллилуия.

Икос 12

Поюще славное житие твое, подвиги, страдания и блаженное отшествие твое на Небеса, радуемся и ублажаем тя, пречудне отче, яко угодника Божия и предивнаго чудотворца. Ты же, предстоя́й пред Отцем нашим Небесным, поминай нас в святых твоих молитвах, зовущих ти си́це:

Радуйся, яко житие твое благочестиво скончал еси.

Радуйся, яко с радостию ко Господу отшел еси.

Радуйся, Горняго Иерусалима честны́й жителю.

Радуйся, Небесных обителей блаженный обитателю.

Радуйся, всех призывающих тя милостивый предстателю.

Радуйся, наш пред Богом неусыпный хода́таю.

Радуйся, Алипие, великий столпниче и преславный чудотворче.

Кондак 13

О преславный угодниче Христов, преподобне отче Алипие! Приими́ сие малое моление наше, от усердия нашего в похвалу тебе приносимое, и не остави нас, грешных, твоим заступлением, да твоими молитвами простит и помилует нас Господь, со умилением зовущих Ему: Аллилуия.

(Этот кондак читается трижды, затем икос 1 и кондак 1)

Молитва

О священная главо, преподобне отче Алипие! Подвигом добрым подвизався на земли́, на Небесех восприял еси венец правды от Христа Бога нашего. Темже на твой святый образ взирающе, о преславнем скончании жительства твоего радуемся и чтим святую память твою. Почитающе же твое ве́лие дерзновение пред Господем, со смирением молим тя, преподобне отче: воззри убо благосердым оком любве твоея на нас, недостойных, и потщися богоприятным твоим ходатайством испросити у Царя царствующих и Господа господствующих, да проба́вит великия и богатыя милости Своя на нас, грешных, да подаст нам дух правыя веры, дух любве, мира и радости о Дусе Святе, да избавит ны от всяких бед и напа́стей, да низпослет вся полезная ко спасению душ наших. Ей, свя́тче Божий, не посрами упования нашего, еже на тя по Бозе и Богородице возлагаем, но буди нам помощник и покровитель во спасение, да сподобимся скончати житие наше в покаянии, и восприимем вечная блага́я во Царствии Христа Бога нашего, и прославим человеколюбие Отца и Сына и Святого Духа и твое святое заступление, ныне и присно и во веки веков. Аминь.

Ж И Т И Е

Преподобный Алипий Столпник родился в 522 году, в городе Адрианополе в Пафлагонии. Мать его, благочестивая христианка, рано овдовела и, зная о Божественном призвании сына, поручила его воспитание блаженному Феодору, епископу Адрианопольскому, а сама, раздав имение нищим, стала подвизаться при церкви и была удостоена звания диаконисы. За богоугодную жизнь епископ посвятил юношу в сан диакона. С юных лет святой Алипий желал посвятить свою жизнь Богу и стремился к уединенной жизни, однако епископ Феодор не отпускал его от себя.

Однажды, когда преподобный Алипий сопровождал своего владыку в Константинополь, ему было видение святой великомученицы Евфимии, призывавшей преподобного Алипия вернуться в Адрианополь и основать церковь ее имени. На средства, пожертвованные верующими Адрианополя, святой Алипий построил церковь во имя святой великомученицы Евфимии на месте заброшенного языческого кладбища, осаждаемого легионами бесов.

Рядом с храмом, под открытым небом, на верху языческого надгробия святой соорудил себе столп. Пятьдесят три года преподобный Алипий подвизался на столпе, молясь Богу и поучая многих, приходивших к нему.

Бесы, наполнявшие языческое кладбище, нападали на подвижника. Преподобный Алипий, ни во что ставя усилия духов тьмы, разобрал даже тот легкий навес над столпом, который закрывал его от дождя и ветра. Побежденные стойкостью святого, бесы навсегда покинули это место, освященное подвигом добровольного мученичества. За этот подвиг избранник Божий удостоился благодатного дара пророчества, изгнания бесов, исцеления недугов.

Лишь за 14 лет до смерти святой Алипий не смог больше стоять и вынужден был из-за болезни ног лежать на боку, перенося тяжкие страдания со смиренным благодарением.

Около столпа преподобного постепенно возникли два монастыря: по одну сторону - мужской, по другую - женский. Преподобный Алипий ввел для обоих монастырей строгие уставы и до своей кончины управлял обителями.

Скончался преподобный в 640 году, в возрасте 118 лет. Тело почившего столпника было погребено в основанной им церкви в честь святой великомученицы Евфимии. Святые мощи угодника Божия исцеляли многих приходивших к ним с верой.

Ныне честная глава преподобного Алипия Столпника находится в монастыре Кутлумуш на Афоне.

По благословению

митрополита Херсонского и Таврического Иоанна