Празднование:

18 июля (н. ст.)

Тропарь, глас 4

Предстательство страшное и непостыдное, не презри, Благая, молитв наших, Всепетая Богородице, Милостивая верных Домостроительнице, утверди православных жительство, спаси страну нашу и всех православно живущих в ней защити, зане родила еси Бога, Едина Благословенная.

Кондак, глас 8

Взбранной Воеводе победительная, яко избавльшеся от злых, благодарственная восписуем Ти раби Твои, Богородице; но яко имущая державу непобедимую, от всяких нас бед свободи, да зовем Ти: радуйся, Невесто Неневестная.

Кондак 1

Избранней от всех родов Пресвятей Деве Богородице, Спасителя и Бога нашего Иисуса Христа плотию рождшей, яко Владычице Небесе и земли, похвальное приносим пение. Ты же, любвеобильная наша Мати, сохраняй и спасай нас от всех врагов видимых и невидимых, да со умилением зовем Ти: Радуйся, Благая Домостроительнице, житие наше добре устрояющая.

Икос 1

Ангелов лицы и вся Небесныя Силы Тебе, Царице Небесная, благоговейно служат и немолчными гласы Тя ублажают; мы же, земнороднии, Тебе, яко Всемилостивую Владычицу и Всеблагую Матерь нашу почитаем и с любовию вопием:

Радуйся, от всех родов Богом избранная.

Радуйся, девственною чистотою, яко диадимою, увенчанная.

Радуйся, благоволением Отца Небеснаго осененная.

Радуйся, Духа Святаго обитель священная.

Радуйся, Христа Бога нашего Мати Неискусобрачная.

Радуйся, от корене Давидова отрасле многоплодная.

Радуйся, скорая человеком Помощнице.

Радуйся, спасающимся в Царствие Божие Руководительнице.

Радуйся, Благая Домостроительнице, житие наше добре устрояющая.

Кондак 2

Видяще Тя на иконе Твоей с Богомладенцем Христом на престоле возседающую, пред нимже преподобнии Афанасий Афонский и Михаил Синадский с благоговением Сыну Твоему Божественному и Тебе, Пречистей Его Матери, покланяются, величаем Тя, яко Благую Попечительницу и Покровительницу иноков Святыя Горы Афонския, под Твоим пречестным омофором пребывающих и непрестанно Спасителю Богу о Тебе поющих: Аллилуиа.

Икос 2

Разум человеческий постигнути не может великаго Твоего милосердия к людем, ихже Сын Твой и Бог на Кресте Кровию Своею честною от грехов искупи, ниже исчислити множество благодеяний и чудотворений, Тобою нам низпосылаемых, но, покланяяся святей Твоей иконе, Пресвятая Дево, и со умилением ю лобызающе, из глубины сердца взываем Ти:

Радуйся, любве всесветлое жилище.

Радуйся, милостей Господних сокровище.

Радуйся, цвете Божественнаго прозябения.

Радуйся, радосте всемирнаго заступления.

Радуйся, Ангелов и святых ликование.

Радуйся, иноков и инокинь украшение.

Радуйся, с верою Тебе молящихся скорая Услышательнице.

Радуйся, душ и сердец наших надежная Успокоительнице.

Радуйся, Благая Домостроительнице, житие наше добре устрояющая.

Кондак 3

Силу Божественныя благодати милостивно даруеши, Преблагословенная Мати, всем во святем уделе Твоем — Горе Афонстей подвизающимся и иноческим житием Сыну Твоему и Спасителю нашему Иисусу Христу благоугождающим и вопиющим Ему непрестанно: Аллилуиа.

Икос 3

Имеют Тя воистину Благую Домостроительницу иноков чини, во святей Лавре преподобнаго Афанасия подвизающиися, имже Ты в залог благоволения Своего милостиво даровала еси чудотворную икону Твою, «Экономисса» именуемую; сего ради вопием Ти:

Радуйся, Святыя Горы Афонския неусыпная Хранительнице.

Радуйся, иноков афонских Благая Попечительнице.

Радуйся, Христовых подвижников Небесная славо.

Радуйся, пустынножителей Божественная отрадо.

Радуйся, духовнаго сада в жребии Твоем Насадительнице.

Радуйся, благочестиво живущих в райския обители Руководительнице.

Радуйся, монашествующих Верховная Игумение.

Радуйся, святых обителей окормление и радование.

Радуйся, Благая Домостроительнице, житие наше добре устрояющая.

Кондак 4

Бурю недоумений в себе превозмогая, преподобный Афанасий, оставивый обитель свою, и сретив Тя на пути, вопрошаше Тя, Пресвятая Дево: «Кто Ты еси? И како семо вошла еси? И почто Тебе ведати, камо гряду?» На егоже словеса, яко чрез глад оставил есть место святое сие, отвещавала еси ему, Мати Божия: «Аз помогу ти, обаче не оставляй Лавры своея, прославитися бо имать посреде обителей афонских, в нейже иноцы выну воспевати будут ангельскую песнь Богу: Аллилуиа».

Икос 4

Слышав от Тебе, Преблагая Владычице, яко Ты еси Матерь Господа Иисуса Христа, зело удивися преблаженный старец и, знамения от Тебе испросивши во уверение истинности обетования Твоего, со умилением сердечным возопи Ти сице:

Радуйся, в женах Преблагословенная.

Радуйся, Мати Господня и наша Всеславная.

Радуйся, Божественная радосте Ангелов и человеков.

Радуйся, прибежище кающихся грешников.

Радуйся, славити Бога нас научающая.

Радуйся, лествице, от земли на Небо приводящая.

Радуйся, иноков усердная Хранительнице.

Радуйся, милостивая наша Ходатаице и Заступнице.

Радуйся, Благая Домостроительнице, житие наше добре устрояющая.

Кондак 5

Боготечною звездою являешися, Царице Небесная, всем ищущим спасения и под кров Твой всемощный прибегающим, к Солнцу Правды сих приводиши, да во умилении сердечнем вопиют Богу: Аллилуиа.

Икос 5

Видяще преподобный Афанасий, яко по глаголу Матери Божия, от ударения посоха его вода из камене истече, со благоговением к ногам Ея пречистым припасти восхоте, обаче Дева Пресвятая в тойже час невидима бысть. Мы же пред велиим чудом сим благоговения исполняяся, воспеваем Преблагословенней тако:

Радуйся, душ наших верное спасение.

Радуйся, всех скорбящих утешение.

Радуйся, Святыя Горы Афонския Просветительнице.

Радуйся, всея вселенныя Попечительнице.

Радуйся, надежное прибежище всем кающимся.

Радуйся, тихое пристанище от бед страждущих.

Радуйся, всех притекающих к иконе Твоей покровом Твоим осеняющая.

Радуйся, гласу моления всех скорбящих внимающая.

Радуйся, Благая Домостроительнице, житие наше добре устрояющая.

Кондак 6

Проповедником чудес Твоих, Преблагая Владычице, явися преподобный Афанасий, егда по возвращении во святую обитель свою со изумлением велиим обрете кладовыя ея всем потребным преисполненныя. Сего ради, прославляя попечение Твое о всех на Тя уповающих, Мати Божия, со умилением вопием Богу: Аллилуиа.

Икос 6

Возсия неизреченный свет Твоея благости, Преблагословенная Дево, всем скорбящим, плачущим и во искушении сущим: слышащи бо наша слезныя молитвы, подаеши всем чудесное от бед избавление, восхваляющим Тя за милости Твоя тако:

Радуйся, Спасителя мира рождшая.

Радуйся, мир от потопа греховнаго спасшая.

Радуйся, знамение милости Божия Собою нам являющая.

Радуйся, явлением чудес от святыя иконы Твоея всех увеселяющая.

Радуйся, скорби и слезы наша в радость претворяющая.

Радуйся, страждущих и безпомощных невидимо укрепляющая.

Радуйся, всех праведных любящая.

Радуйся, кающихся грешников милующая.

Радуйся, Благая Домостроительнице, житие наше добре устрояющая.

Кондак 7

Хотя Всемилостивый Господь явити Свою Божественную любовь к созданию Своему, дарова нам Твою, Богомати, икону, «Экономисса» именуемую, да видяще чудеса, от нея бываемая, вси людие с верою и надеждою умиленно взывают Подателю благ: Аллилуиа.

Икос 7

Новое свидетельство невидимаго присутствия Твоего показала еси нам, Небесная Царице, егда в Лавре святаго Афанасия послушание эконома упразднила еси, Сама Экономиссою обители сея быти восхотевши и все попечение о ней Себе усвоивши. Темже смиренно молим Тя, Пречистая: не остави помощию Твоею и нас, вопиющих Ти сице:

Радуйся, бисер Божественный произведшая.

Радуйся, чистотою Своею тварь превозшедшая.

Радуйся, двери райския нам отверзающая.

Радуйся, святостию Своею Небеса украшающая.

Радуйся, благовестие Небеснаго отечества.

Радуйся, духовный крине православнаго монашества.

Радуйся, о роде человечестем усердная Молитвеннице.

Радуйся, во гресех погибающих нечаянная спасения радосте.

Радуйся, Благая Домостроительнице, житие наше добре устрояющая.

Кондак 8

Странники и пришельцы есмы на земли, обаче Ты, Владычице, облегчаеши многоскорбное житие наше, подающи помощь, утешение и радость духовную. Сего ради, покланяяся Тебе в чудотворных иконах Твоих, Богу, Тобою нам благодеющему, во умилении сердечнем вопием: Аллилуиа.

Икос 8

Всем во Святей Горе Афонстей жительствующим утешительно есть возносити моления своя на месте явления Пресвятыя Богородицы святому Афанасию и пред иконою, совершившееся зде чудо изображающей, воспевати Преблагословенней Деве хваления таковыя:

Радуйся, на Небеси благословляемая и на земли славимая.

Радуйся, всея твари честнейшая.

Радуйся, Божественный источниче сладчайшия сладости.

Радуйся, Дево Пречистая, преисполненная неизреченныя радости.

Радуйся, всего мира Божественное утешение.

Радуйся, рода человеческаго надеждо и упование.

Радуйся, от бед и напастей наша Охранительнице.

Радуйся, ко благочестию Всеблагая наша Наставнице.

Радуйся, Благая Домостроительнице, житие наше добре устрояющая.

Кондак 9

Все упование наше на Тя возлагаем, Мати Божия, вемы бо, яко милосердию Твоему несть конца: Ты бо и грешных милуеши, и погибающих взыскуеши, и печальных возвеселяеши, и недужных от одра болезненнаго возставляеши, и непрестанно о нас ходатайствуеши пред Сыном Твоим и Богом нашим, Емуже мы с любовию поем: Аллилуиа.

Икос 9

Ветии многовещаннии не могут исчести бездну щедрот Твоих, Всеблагая Мати, роду человеческому Тобою изливаемых. И мы, сладость утешения в нуждах и печалех наших познавше, с верою и любовию пред образом Твоим чудотворным моления возносим Ти сицевая:

Радуйся, всея вселенныя Державная Владычице.

Радуйся, спасения нашего присная Ходатаице.

Радуйся, Бога Отца Дщи возлюбленная.

Радуйся, Сына Божия Мати Пресвятая.

Радуйся, Бога Духа Святаго палато прекрасная.

Радуйся, Небеси и земли Царице Всепетая.

Радуйся, болящих Милосердная Целительнице.

Радуйся, вдов и сирот незримая Питательнице.

Радуйся, Благая Домостроительнице, житие наше добре устрояющая.

Кондак 10

Спасения залог от обдержащих нас скорбей и болезней даровася нам - изображение честныя иконы Твоея, Богородительнице Дево, да вси, видяще являемую Тобою милость, вопиют со умилением Богу: Аллилуиа.

Икос 10

Стена еси ликом иноческим, Богородице Дево, и всем усердно к Тебе прибегающим, ибо Небесе и земли Творец дарова мирови Тя, Матерь Свою, да будеши всем земнородным в помощь и спасение. Сего ради, предстояще пред образом Твоим святым, благоговейно воспеваем Тя пении сими:

Радуйся, всю вселенную любовию покрывающая.

Радуйся, от пагубных сетей верныя спасающая.

Радуйся, Ангельских умов удивление.

Радуйся, человеческаго рода украшение.

Радуйся, спасения нашего главизно.

Радуйся, радосте наша и в сей и в будущей жизни.

Радуйся, молитвам верных милостивно внемлющая.

Радуйся, любящим Тя любовию Твоею воздающая.

Радуйся, Благая Домостроительнице, житие наше добре устрояющая.

Кондак 11

Пение всеумиленное приносим Ти, Небесе и земли Царице, и благодаряще Сына Твоего и Бога нашего за вся Его благодеяния нам, недостойным, ходатайством Твоим подаваемыя, со благоговением вопием Ему: Аллилуиа.

Икос 11

Светоприимную свещу зрим Тя, Владычице наша Богородице,:образ бо Твой святый немерцающими лучами благодати Твоея мглу греховную прогоняет и на светлую стезю добродетелей наставляет с верою зовущих Ти сицевая:

Радуйся, Юже воспевают Небесная Воинства.

Радуйся, Юже превозносят сонмы святых.

Радуйся, радость велию всему роду человеческому даровавшая.

Радуйся, православным христианом путь спасения указующая.

Радуйся, радосте Божественнаго веселия.

Радуйся, мира всего покрове и спасение.

Радуйся, тихое пристанище странствующим.

Радуйся, блаженное покоище старости.

Радуйся, Благая Домостроительнице, житие наше добре устрояющая.

Кондак 12

Благодать Божественную подаждь нам, Пречистая Мати, да сею вспомоществуеми, по пути спасительному шествовати возможем и житием добродетельным Господу нашему угодити потщимся, Емуже непрестанно поем: Аллилуиа.

Икос 12

Поюще милости Твоя и величие Твое прославляя, Владычице наша Богородице, радуемся о Тебе, яко имамы таковую Всеблагую и Премилосердную Заступницу и Ходатаицу о нас пред Богом, и с любовию воспеваем Ти сице:

Радуйся, Купино Неопалимая.

Радуйся, Стено Нерушимая.

Радуйся, иноческих обителей покров и снабдение.

Радуйся, благочестивых домов и супружеств благословение.

Радуйся, скорбных утешающая.

Радуйся, недужных исцеляющая.

Радуйся, слабым и старым Помощнице.

Радуйся, алщущим и жаждущим Питательнице.

Радуйся, Благая Домостроительнице, житие наше добре устрояющая.

Кондак 13

О Всепетая Мати, Преславная Владычице Богородице! Приими сия моления наша, от всея души Тебе ныне нами возносимыя, и Сына Твоего и Бога нашего о нас умоли, Емуже покланяемся во Святей Троице и со умилением поем: Аллилуиа.

(Это кондак читается трижды, затем икос 1 и кондак 1)

Молитва

О Пречистая Дево Богородице, Премилостивая Владычице, вышшая Ангел и Архангел, Царице Небесе и земли, страны нашея православныя твердое ограждение, всякаго дома и семейства христианскаго Благоустроительнице, труждающихся во благочестии благословение, нуждающихся неистощимое богатство, сирых и вдовиц Кормительнице, девствующих чистото и славо, матерей тихое веселие, отроков мудросте и научение, наставников и детоводителей совершенный разуме. Веруем в державный Твой покров над православным отечеством нашим и над малейшим из нас, искупленным Божественною Кровию Сына Твоего. Веруем, яко в сей иконе Твоей, в благословение от Святыя Горы Афонския нам данней, Сама Ты низпосылаеши Твое матернее благословение градом и весем нашим и коемуждо дому, на Тя упование имущему. Темже со благоговейным трепетом и с благодарным сердцем преклоняемся пред сим новым знамением великия любве Твоея, Владычице, к нам, недостойным. Воспоминающе же Твое чудесное явление преподобному Афанасию Афонскому, некогда в нужде и скорби бывшему, и яко пребудеши присная Домостроительница его обители, от Тебе милостивное обещание приемшему, смиренно молимся Тебе: о Премилосердая Мати рода христианскаго, буди и нам, грешным и недостойным рабом Твоим, мудрая Домостроительница, житие наше добре устрояющая. Всякое сообщество, всякий дом и семейство во благочестии и Православии, единомыслии, послушании и довольстве соблюди, заблуждшия на путь правый настави, старость поддержи, младенцы воспитай, всех нас вразуми. Облегчи и возстави изнемогающия, сохрани люди Твоя от всякия нужды, болезни, глада, губительства, града, огня, от всякаго злаго обстояния и всякаго нестроения. Дому сему и всякой души христианстей и всей стране нашей исходатайствуй мир и велию милость ныне и присно и во веки веков. Аминь.

Икона Пресвятой Богородицы «Экономисса» (Домостроительница)

Икона Пресвятой Богородицы, именуемая «Экономисса» или «Домостроительница» находится на Афонской горе, в Лавре святого Афанасия.

В X веке великий Афонский подвижник старец Афанасий основал на Афоне Лавру. Однако вскоре из-за сильного голода всем инокам пришлось покинуть обитель в поисках другого пристанища. Остался один старец-игумен, но и сам он в скором времени вынужден был оставить Лавру.

С железным посохом отправился он в путь, но вдруг увидел идущую навстречу ему Жену под голубым воздушным покрывалом. Святой Афанасий удивился: откуда могла появиться здесь женщина, если вход им на Святую Гору строго воспрещен?

Однако Жена сама спросила его о том, куда он идет. В ответ святой Афанасий задал Ей вопросы: «Кто Ты и как сюда зашла? И зачем Тебе знать, куда я иду? Ты видишь, что я здешний инок».

Затем он рассказал все, что случилось с его Лаврой, на что Жена ответила: «Только это! И ради куска хлеба ты бросаешь свою обитель?! Вернись! Я помогу тебе, только не покидай своего уединения и не оставляй своей Лавры, которая прославится и займет первое место среди всех афонских обителей».

«Но кто же Ты?» – спросил изумленный Афанасий Незнакомку. «Я – Матерь Господа твоего. Я – Та, имени Которой ты посвящаешь свою обитель», – отвечала Жена.

Недоверчиво посмотрел святой Афанасий на Нее и ответил: «Боюсь поверить этому, бывает, что и враг принимает образ светлого Ангела. Чем Ты убедишь меня в истинности Твоих слов?».

«Видишь этот камень, – услышал старец, – ударь по нему своим посохом и тогда узнаешь, Кто с тобой говорит. Знай же, что с этого времени Я навсегда остаюсь Экономиссой (Домостроительницей) твоей Лавры».

Афанасий ударил посохом по камню, и из него хлынула вода. Пораженный этим чудом преподобный Афанасий обернулся, чтобы благоговейно припасть к ногам Пресвятой Богородицы, но Ее уже не было.

Тогда святой Афанасий возвратился в свою обитель и к великому изумлению нашел, что кладовые монастыря наполнены всем необходимым. Вскоре в обитель вернулись многие из братии.

По воле Царицы Небесной в Лавре святого Афанасия с той поры нет эконома, а только подэконом или помощник Экономиссы.

В память чудесного явления Богоматери святому Афанасию в Лавpe написана икона Пресвятой Богородицы «Домостроительницы».

На этой иконе Божия Матерь изображена сидящей на престоле с Богомладенцем на левой руке. С правой стороны престола в молитвенном положении изображен преподобный Михаил Синадский, а с левой – святой Афанасий, держащий в руках вид своей Лавры, символизируя этим особое попечение, покровительство и заботу, оказываемые обители Божией Матерью.

На месте явления Пресвятой Богородицы святому Афанасию была воздвигнута в честь Ее небольшая церковь во имя Живоносного Источника. В ней находится икона, изображающая совершившееся здесь чудо.

Источник же до сих пор обильно струится, утоляя жажду паломников и подавая исцеление верующим.

По благословению

митрополита Херсонского и Таврического Иоанна