Празднования:

иконы «Умягчение злых сердец»:

 3 / 16 февраля  и  в Неделю Всех святых

иконы «Семистрельная»:

13 / 26 августа 

Тропарь, глас 5

Умягчи́ наша злая сердца́, Богородице, и напа́сти ненавидящих нас угаси́, и всякую тесноту́ души́ нашея разреши́, на Твой бо святый образ взирающе, Твоим состраданием и милосердием о нас умиляемся и раны Твоя лобыза́ем, стрел же наших, Тя терза́ющих, ужаса́емся. Не даждь нам, Мати Благосердая, в жестокосердии нашем и от жестокосердия ближних погибнути, Ты бо еси воистину злых сердец умягчение.

Кондак, глас 6

Око сердца моего смущают, и злый совет разоряет мя, сих сокруши, Дево Чистая, и не презри мое воздыхание, и супостаты на нас умягчи, Преблагословенная Владычице.

Кондак 1

Избра́нней Деве Марии, превы́шшей всех дще́рей земли́, Матери Сына Божия, Еюже Спаситель в мир прии́де, со умилением взываем: воззри́ на многоско́рбное житие наше, воспомяни́ скорби и болезни, яже претерпела еси, и сотвори с нами по милосердию Твоему, да зовем Ти: Радуйся, многоскорбная Мати Божия, печаль нашу в радость претворяющая.

Икос 1

Ангел возвести́ па́стырем Вифлее́мским о рождестве Спасителя мира, и с ним множество во́ев Небесных восхвали́ша Бога, пою́ще: «Слава в вышних Богу, и на земли́ мир, в челове́цех благоволение!» Ты же, о Мати Божия, не име́вши где главы́ приклонити, зане́ не бе ме́ста во оби́телех, родила́ еси Сына Своего Пе́рвенца в верте́пе, пови́ла еси пелена́ми и положила  Его́ во я́слех. Темже, радость неизрече́нную се́рдца Твоего ве́дуще, вопием Ти:

Радуйся, от младе́нства грядущему Мессии послужити возжеле́вшая.

Радуйся, чистоту паче всех человек возлю́бльшая.

Радуйся, пречу́дное благове́стие Архангелом прии́мшая.

Радуйся, Спасителя мира ро́ждшая.

Радуйся, воплоти́вшагося Бога слове́сный сосу́де.

Радуйся, Царя царствующих престоле.

Радуйся, вертеп в Небеса прело́жшая.

Радуйся, в рождестве и по рождестве Дева пребывшая.

Радуйся, многоскорбная Мати Божия, печаль нашу в радость претворяющая.

Кондак 2

Ви́дяще Превечнаго Младенца пови́та, лежа́ща во я́слех, пришедше, поклони́шася Ему па́стырие Вифлее́мстии и глаголаша реченное им Ангелы о Отроча́ти. Мариа́м же соблюдаше вся глаголы сия, слага́ющи в сердце Своем. По прошествии же осми́ дней обре́зан бе Иисус по закону Моисе́ову яко Человек. Воспевающе смирение и терпение Твое́ в попече́ниих о Богомладенце Иисусе, Пресвятая Богородице, поем Всеблаго́му Богу: Аллилуия.

Икос 2

Разум иму́ща, в Бозе утвержде́нный, и соблюдающа заповеди Божия, в четыредеся́тый день, егда испо́лнишася дни́е очищения, вознесо́ста Иисуса во Иерусалим родители Его, еже поставити Его пред Господем и дати за Него жертву, по рече́нному в Законе Господни. Мы же, со благоговением о сем воспоминающе, возглашаем Богородице си́це:

Радуйся, прежде рождества в Матерь Спасу предъизбра́нная.

Радуйся, благодати преиспо́лненная.

Радуйся, Превечнаго Младенца пелена́ми пови́вшая.

Радуйся, Творца вселенныя млеко́м питавшая.

Радуйся, Создателя во храм Иерусалимский принесшая.

Радуйся, та́мо старцем Симеоном радостно сре́тенная.

Радуйся, вся глаголы Божия в сердце Своем слага́вшая.

Радуйся, го́рькому пророчеству о Страданиях Сына Твоего кро́тко вне́млющая.

Радуйся, многоскорбная Мати Божия, печаль нашу в радость претворяющая.

Кондак 3

Силою свыше укрепляема была еси, Мати Божия, слы́шащи словеса́ праведнаго Симеона: «Се, лежи́т Сей на паде́ние и на воста́ние многим во Изра́или и в зна́мение пререка́емо, и Тебе же Самой ду́шу про́йдет ору́жие, яко да откры́ются от многих сердец помышления». Скорбь ве́лия уязви́ сердце Пресвятыя Богородицы, оба́че благодатию Божественною осеня́ема, возопи́ Богу: Аллилуия.

Икос 3

Имея зло́бу лю́тую в сердце своем, тща́ся Ирод погубити Отроча́, и посла́ избити вся младенцы, су́щия в Вифлее́ме и преде́лех его, от двою́ ле́ту и нижа́йше. Оба́че веле́нием Божиим, Ангелом во сне возвеще́нным, поя́т Иосиф Отроча́ и Матерь Его но́щию и бежа́ во Египет, и пребы́сть та́мо до смерти Иродовы. Сия многотру́дная стра́нствия, ради Богомладенца подъя́тая, воспоминающе, со умилением воспое́м Ти, Пресвятая Богородице:

Радуйся, тяготы́ путешествия да́льняго терпели́вно поне́сшая.

Радуйся, и́долы, сокруши́вшияся силою Сына Твоего зре́вшая.

Радуйся, посреде нечестивых язы́чник жити не убоявшаяся.

Радуйся, веле́нием Божиим в Назарет с Сыном и Обручником возвратившаяся.

Радуйся, в нищете и труде́х, благодаря́щи Бога, пребывавшая.

Радуйся, Пресла́дкаго Богомладенца во объя́тиях носившая.

Радуйся, предивная дела́ Божественнаго Сына вы́ну созерцавшая.

Радуйся, та́инственным глаголом Его прилежно внимавшая.

Радуйся, многоскорбная Мати Божия, печаль нашу в радость претворяющая.

Кондак 4

Буря скорби одержа́ Пречистую Матерь со Обручником, егда на пути от Иерусалима не обрето́ста во дружи́не Отрока Иисуса. Возврати́вшеся же во Иерусалим, по трие́х днех обрето́ста Его в церкви, сидя́ща посреде́ учи́телей, послу́шающа и вопроша́юща их. И рече к Нему Мати Его: «Ча́до, что сотвори́ на́ма та́ко? Се отец Твой и Аз, боля́ща, иска́хом Тебе». И рече к ним Иисус: «Что яко иска́ста Мене́? Не ве́ста ли, яко в тех, яже Отца Моего, досто́ит бы́ти Ми?» Ты же, Пречистая, дивя́щися глаголом Сына Своего, соблюда́ше сия в сердце Своем, вопиющи Богу: Аллилуия.

Икос 4

Cлышаша людие, яко Господь Иисус проходит страну Галилейскую, уча́ на со́нмищих, проповедуя Евангелие Царствия и исцеляя всяк неду́г и всяку я́зю в людех. Сего ради приведоша к Нему вся болящия различными неду́ги и бе́сы одержи́мыя, и исцели их. Ты же, Мати Божия, Симео́ново прорече́ние воспомина́ющи, разумела еси, яко скоро прии́дет час, егда Сын Твой Себе в Жертву за грехи мира принесет. Темже ублажаем Тя си́це:

Радуйся, Царице Небесе и земли́.

Радуйся, та́инственная духовная ски́ние.

Радуйся, Себе в чистую жертву Богу принесшая.

Радуйся, Херувим честне́йшая и Серафим сла́внейшая.

Радуйся, мир от потопа греховнаго спасшая.

Радуйся, главу древняго зми́я сте́ршая.

Радуйся, Едина Чистая и Благословенная в жена́х.

Радуйся, благодати Духа Святаго избра́нный сосу́де.

Радуйся, многоскорбная Мати Божия, печаль нашу в радость претворяющая.

Кондак 5

Бог Сый и́стинен и Человек соверше́н, облича́ше Иисус гордость фарисе́ев, мне́вших себе праведники быти. Ти́и же, слышаще при́тчи Его, разумеша, яко о них глаголет, и иска́ша я́ти Его, оба́че боя́шася народа, поне́же яко пророка Его име́яху. Сию зло́бу богоуби́йственную ве́дущи, боле́зноваше Богородица о Сыне Своем возлю́бленнем, да не ка́ко лю́тии врази́ убию́т Его. Оба́че Богу, таинство спасения нашего содева́ющему, с наде́ждею взываше: Аллилуия.

Икос 5

Видевше воскрешение Ла́зарево, идо́ша не́цыи от иуде́й к фарисе́ем и пове́даша, яже сотвори Иисус. Рече же Каиа́фа, архиере́й сый ле́ту тому́, в фарисе́йстем со́нмищи: «У́не есть нам, да един Человек у́мрет за люди, а не весь язык погибнет». И от сего дне совеща́ша, да убиют Его. Иуда же Искарио́тский, един от обоюна́десяте, и́де ко архиере́ом, предати хотя Учителя своего; они же, слышавше, возра́довашася и обеща́ша ему сребреники дати. Сему беззаконному совету ужаса́ющеся, вопием Пречистей, Сыну Своему спострада́вшей:

Радуйся, крест скорбе́й ве́лиих понесшая.

Радуйся, воли Божия николи́же преслу́шавшая.

Радуйся, смирения Божественнаго чу́дный образе.

Радуйся, терпения премудрая Наста́внице.

Радуйся, земныя сладости и веселия не возлю́бльшая.

Радуйся, Небеснаго блаженства паче Ангел и человек испо́лненная.

Радуйся, в молитве помощь вы́ну обретавшая.

Радуйся, вся ны взывати к Богу в скорби научившая.

Радуйся, многоскорбная Мати Божия, печаль нашу в радость претворяющая.

Кондак 6

Проповедником Слова, божественным учеником на Тайней Ве́чери умы́ Учитель ноги, образ спасительнаго смирения показу́я; явля́я же любовь Свою к роду человеческому, благословив и преломи́в хлеб, даде́ им, рек: «Приими́те, яди́те: сие есть Тело Мое»; и прие́м чашу и хвалу воздав, даде́ им, глаголя: «Сия есть Кровь Моя Новаго Завета, яже за многия излива́емая во оставление грехов». Благодаряще милостиваго Бога за милосердие Его к нам неизрече́нное, в та́инстве Божественныя Евхари́стии являемое, поем Ему: Аллилуия.

Икос 6

Возсия́ благодать и истина учеником, егда возвести́ им Христос: «Ныне прославися Сын Человеческий, и Бог прославися о Нем». Вне́млюще сим словесе́м Божественным и домострои́тельству спасения нашего дивя́щеся, Тебе, Пречистей Матери Спасителя нашего, возглашаем:

Радуйся, Отца Небеснаго Дщи благословенная.

Радуйся, черто́же Слова всесвяты́й.

Радуйся, Духа Святаго вмести́лище.

Радуйся, Святыя Троицы оби́теле.

Радуйся, Би́сер Божественный произве́дшая.

Радуйся, рождеством Твоим райския двери отве́рзшая.

Радуйся, зна́мения милости Божия Собою являющая.

Радуйся, от ти́ны греховныя нас спасающая.

Радуйся, многоскорбная Мати Божия, печаль нашу в радость претворяющая.

Кондак 7

«Желанием возжеле́х сию пасху я́сти с вами, прежде даже не прииму́ мук», - глаго́ла Христос учеником. Утверждая же их заповеди Его хранити, обеща́ послати ина́го Уте́шителя, Духа истины, Иже от Отца исходит, да наставит их на всяку истину. Егда же в день Пятидеся́тницы испо́лни Дух Святый Пречистую Богородицу и апостолы, откры́шася им вся глаго́ланная от Господа, и возгласи́ша ти́и: Аллилуия.

Икос 7

Новую заповедь даде́ Спаситель учеником Своим: «Да лю́бите друг друга; якоже возлюби́х вы, да и вы лю́бите себе́. О сем разуме́ют вси, яко Мои ученицы́ есте́, аще любовь и́мате между собою». Ты же, о Мати Господня, паче всех человек глаголом Сына Твоего внимавшая и с любовию ты́я хранившая, милосердие неисчерпа́емое к роду человеческому и́маши, вы́ну о нас пред Господем хода́тайствуеши, друг друга любити повелева́еши и сердца́ наша злая умягчаеши. Сего ради поем Ти:

Радуйся, братолюбия Наставнице.

Радуйся, враждующих умирение.

Радуйся, безчи́нных Обличительнице.

Радуйся, обидимых Уте́шительнице.

Радуйся, гонимых защищение.

Радуйся, всех скорбящих Радосте.

Радуйся, утоле́ние всех печалей.

Радуйся, непрестанно за ны моля́щаяся.

Радуйся, многоскорбная Мати Божия, печаль нашу в радость претворяющая.

Кондак 8

Стра́нствия Влады́чня и безсмертныя Трапе́зы причасти́вшиися, изыдо́ша ученицы́ со Учителем на го́ру Елео́нскую. Прии́де же та́мо Иуда со спи́рою и слуги́ архиере́йскими, лобза́нием предая́ Сына Человеческаго. Ти́и я́ша Иисуса и связа́ша Его, и ведо́ша ко Анне пе́рвее, посе́м же к Каиа́фе архиере́ови и в прето́р к Пилату, глаголюще Его злоде́я быти. Мати же Божия, сме́ртнаго сове́та на Сына Своего возлю́бленнаго ожидающи, оба́че со смирением вся сия прие́млющи, вопияше Богу: Аллилуия.

Икос 8

Весь бе ранами уя́звен, Слове Божий, егда во́ини руга́хуся Тебе, уже́ страшное бичева́ние претерпевшему, и спле́тше венец от те́рния, возложиша на главу Твою, и в ризу багря́ну обле́кше Тя, глаголаху: «Радуйся, Царю Иудейский», - и бия́ху Тя по лани́тома. Иудеи, яко зве́рие ди́вии, вопияху Пилату: «Распни́ Его́!» Мы же Матери Божией, бие́ния и поноше́ния Сына Своего видевшей и го́рце страдавшей, уми́льно взываем:

Радуйся, Сына Своего возлю́бленнаго на суди́ще преда́ннаго зре́вшая.

Радуйся, беззаконный суд злочестивых суде́й слышавшая.

Радуйся, всем болезнем возлю́бленнаго Чада спострадавшая.

Радуйся, зрение нестерпимое Страсте́й Его претерпевшая.

Радуйся, близ Сына и Бога стра́ждущаго вы́ну пребывавшая.

Радуйся, раны, багряни́цу и венец терно́вен Нося́щаго видевшая.

Радуйся, ро́пота ника́коже допустившая.

Радуйся, Искупле́ния человеков совершение уразумевавшая.

Радуйся, многоскорбная Мати Божия, печаль нашу в радость претворяющая.

Кондак 9

Вси ро́ди блажа́т Тя, честнейшую Херувим и сла́внейшую без сравнения Серафим, Владычицу и Матерь Изба́вителя нашего, рождеством бо Твоим радость всему миру принесла́ еси, последи́ же скорбь ве́лию имела еси, видящи Сына Своего возлю́бленнаго на поругание, бие́ние и смерть преда́ннаго. Мы же умиленное пение приносим Ти, Пречистая, вопиюще Всемогущему Богу: Аллилуия.

Икос 9

Вети́и многовеща́ннии таинства спасительнаго Кре́стнаго разумети не могут. Крест бо нося́, взы́де Господь на Голгофу, идеже во́ини пропя́ша Его. Богомати же, видевши Сына Своего безсла́вна, на́га на Дре́ве, возопи́: «Увы́ Мне, Чадо Мое, увы́ Мне, Свете Мой, ду́шу про́йде Мне ору́жие, по рече́нию праведнаго Симеона». Иисус же, видев Матерь и ученика, егоже любля́ше, глагола Матери Своей: «Же́но! Се, сын Твой»; потом глагола ученику: «Се, Мати твоя!» Сего ради взываем Ти, человеки вся о Господе в сыновство́ прия́вшей:

Радуйся, при Кресте Распя́таго неотступно предстоя́вшая.

Радуйся, оста́вленнаго всеми Сына и Господа не оста́вльшая.

Радуйся, го́рце сердцем боле́зновавшая.

Радуйся, стена́ния и сле́зы теплыя источавшая.

Радуйся, Агнца, за человеки закла́ннаго, Мати.

Радуйся, Страданий Спасителя Соприча́стнице.

Радуйся, всякою я́звою с Ним уязвля́вшаяся.

Радуйся, в муках го́рьких на Бога уповавшая.

Радуйся, многоскорбная Мати Божия, печаль нашу в радость претворяющая.

Кондак 10

Спасти хотя род человеческий, возше́л еси на Крест, Иисусе Спасе наш. Чистая же Дева, пла́чущи, глаго́лаше: «Сы́не Мой и Боже Предвечный, Творче всех тварей, Господи! Ка́ко терпи́ши на Кресте Страсть? О страшнем Твоем рождестве и стра́ннем, Сыне Мой, паче всех ма́терей возвели́чена бых Аз, но увы́ Мне, ныне Тя ви́дящи на Древе, распала́юся утро́бою». Прославляюще милосердие Отца Небеснаго, Иже тако возлюби́ мир, яко Сына Своего Единоро́днаго отдаде́ на крестную смерть, да иску́пит ны от вечныя смерти, вопием Ему: Аллилуия.

Икос 10

Стена и ограждение буди нам, Владычице, изнемога́ющим в ско́рбех и болезнех, Ты бо люте́йшую паче всех болезнь претерпела еси, Сына Своего на Кресте уме́рша зря́щи и стеня́щи: «Се, Свет Мой сладкий, Надежда и Живот Мой благи́й, Бог Мой угасе́ на Кресте, - Дева, стенящи, глаголаше, - потщи́ся, Иосифе, к Пилату приступити и проси его сняти с Древа Учителя твоего». Мы же, со благоговением величию терпения Твоего вне́млюще, состра́ждем Ти и вопием:

Радуйся, Света Своего сладкаго на́га и уя́звена мертвеца́ зре́вшая.

Радуйся, ме́ртва и бездыха́нна Преблага́го Господа видевшая.

Радуйся, Тело Сына Твоего возлю́бленнаго лобыза́вшая.

Радуйся, плащаницею Обви́таго рыда́вшая.

Радуйся, Сына Своего гробу преда́вшая.

Радуйся, вся яже на земли́ скорбная претерпевшая.

Радуйся, страждущих благода́тная Уте́шительнице.

Радуйся, тайну кре́стнаго пути́ нам открывающая.

Радуйся, многоскорбная Мати Божия, печаль нашу в радость претворяющая.

Кондак 11

Пение всеумиленное Тебе, Спасителю мира, приносим, на Кресте дух испусти́вшему и согрешений наших рукописа́ние растерза́вшему. Пречистей же Матери в тайне Ты провеща́л еси: «О, ка́ко утаи́лася Тебе есть бе́здна щедрот? Тварь бо Мою хотя́ спасти, изво́лих умре́ти. Но и воскре́сну, и Тебе возвели́чу, яко Бог Небесе и земли́». Богородица же рече: «Воспою милосердие Твое, Человеколюбче, покланя́юся богатству милости Твоея, Владыко. Создание бо Твое хотя́ спасти, смерть подъя́л еси, но Воскресением Твоим, Спасе, помилуй всех нас, вопию́щих Тебе: Аллилуия».

Икос 11

Светоносный Архангел «радуйся»  паки возвести Тебе, Дево: «Твой Сын воскресе тридне́вен от гроба, и мертвыя воздви́гнувый!» И печаль Твоя в радость ве́лию преложи́ся. Ныне же икона Твоя, страдания Твоя изображающая, возвещает нам таинство Креста, в немже благодатная радость сокрове́на есть, и имже вси ка́ющиися Воскресение срета́ют и на Небеса восхо́дят, Тебе, Пречистая, зовуще:

Радуйся, Живоноснаго Гроба отлучитися не восхотевшая.

Радуйся, прежде всех Воскресшаго сре́тившая.

Радуйся, радости неизреченныя исполнившаяся.

Радуйся, мно́гажды Яви́вшагося видети сподобившаяся.

Радуйся, во блаженстве неизрече́ннем с Сыном Твоим и Богом пребывающая.

Радуйся, погибающих грешников спасающая.

Радуйся, кающихся милосердная Предста́тельнице.

Радуйся, сиро́т Небесная Мати.

Радуйся, многоскорбная Мати Божия, печаль нашу в радость претворя́ющая.

Кондак 12

Благодать подаждь нам, Пресвятая Владычице, почитающим честну́ю икону Твою, на нейже зрим седмию́ стрела́ми сердце Твое уязвля́емое, защити нас от всех врагов наших, разоря́ющи кова́рства их и советы лукавыя, да изба́вльшеся от бед, скорбе́й и напа́стей, воспоем Богу, милующему и спасающему нас Тобою: Аллилуия.

Икос 12

Поюще Твоя чудеса, яже оби́льно источа́еши нам от святыя иконы Твоея, хвалим Тя, Пресвятая Дево, и, предстоя́ще пред пречистым Твоим образом, веруем, яко ско́рбныя гласы наша прие́млеши и вся благопотре́бная нам подае́ши. Сего ради благодарне вопием:

Радуйся, пречу́дными иконами в мире чудотворя́щая.

Радуйся, всем прося́щим благодать изоби́льно изливающая.

Радуйся, вдов неоскудева́ющая Питательнице.

Радуйся, благодеяний живоносный источниче.

Радуйся, врачами оста́вленных Целительнице.

Радуйся, пра́вящих и царствующих Всецарице.

Радуйся, монашествующих Пречистая Наставнице.

Радуйся, се́рдцу сокруше́нному отра́ду подающая.

Радуйся, многоскорбная Мати Божия, печаль нашу в радость претворяющая.

Кондак 13

О Всепетая Мати, скорбь и болезнь неизрече́нную у Креста Сына Твоего и Бога претерпевшая и в радости неизглаго́ланней Воскре́сшаго сре́тившая! Внемли́ воздыханием и слеза́м нашим, умягчи́ сердца́ востаю́щих на нас, избави от скорбе́й, болезней и вечныя смерти всех уповающих на неизрече́нное Твое милосердие и вопиющих Богу: Аллилуия.

(Этот кондак читается трижды, затем икос 1 и кондак 1)

Молитва

О многоскорбная Мати Божия, превы́шшая всех дще́рей земли́ по чистоте Твоей и по множеству страданий, Тобо́ю на земли́ пренесе́нных! Приими́ многоболе́зненная воздыхания наша и сохрани нас под кровом Твоея милости, ина́го бо прибежища и теплаго предстательства, разве Тебе, не ве́мы, но, яко дерзновение иму́щи ко Иже от Тебе Рожде́нному, помози и спаси ны моли́твами Твои́ми, да непреткнове́нно достигнем Царствия Небеснаго, иде́же со всеми святыми будем воспевати хвалу в Троице славимому Богу, всегда, ныне и присно и во веки веков. Аминь.

Иконы Божией Матери «Умягчение злых сердец»  и  «Семистрельная»

Икону «Умягчение злых сердец» называют еще «Симеоново проречение». Как повествует святой евангелист Лука, праведному старцу Симеону Богоприимцу было предсказано Духом Святым, что он не умрет, пока не увидит Мессию. И вот когда родители на сороковой день после рождения Младенца принесли Его в храм, пришел туда «по вдохновению» и Симеон, взял Младенца на руки (откуда и прозвание Богоприимец) и произнес знаменитые слова, которыми с тех пор завершается каждая служба вечерни и известные как Молитва святого Симеона Богоприимца: «Ныне отпущаеши раба Твоего, Владыко, по глаголу Твоему, с миром...» После же он благословил святого Иосифа и Пречистую Матерь Спасителя и обратился к Марии с тем самым «Симеоновым проречением»: «Се, лежит Сей на падение и на восстание многих в Израиле и в предмет пререканий, – и Тебе Самой оружие пройдет душу, – да откроются помышления многих сердец». Подобно тому, как Христа пронзят гвоздями и копием, так и душу Пречистой Девы поразит некое «оружие» печали и сердечной боли, когда узрит Она страдания Сына; после же откроются скрытые доселе помышления (о Мессии) людей, которым предстоит сделать выбор: с Христом они или против Него. Такое толкование Симеонова пророчества и стало предметом нескольких «символических» икон Богородицы.

Богородица на иконе «Умягчение злых сердец» пишется с вонзенными в Ее сердце мечами – по три справа и слева, один снизу. Число «семь» в Священном Писании обычно означает полноту, избыточность чего-либо, а в данном случае – полноту и бескрайность того горя, печали и «болезни сердечной», которые испытала Богородица во время Ее земной жизни. Иногда на коленях Пречистой Девы пишется еще и Предвечный Младенец.

Очень близок к «Умягчению злых сердец» и другой чудотворный образ — икона Божией Матери «Семистрельная». Разница между ними лишь в том, что на «Семистрельной» мечи пишутся иначе — три с правой стороны Пречистой и четыре с левой. Празднование этой иконе совершается 13/26 августа, в то время, как празднование иконе «Умягчение злых сердец» приходится на 3/16 февраля и в Неделю Всех святых. 

Все верующие, прибегающие к этим чудотворным иконам с верой и молитвой чувствуют, что при умягчении се́рдца облегчаются душевные и телесные страдания. Многие свидетельствуют, что когда молятся перед этими образами за своих врагов, тогда исчезают их враждебные чувства, уступая место доброте и милосердию.

По благословению

митрополита Херсонского и Таврического Иоанна