Акафист Пресвятой Богородице в честь иконы Ее ОСТРОБРАМСКОЙ 
Празднование:
8 января
27 апреля (н.ст)
Тропарь, глас 4
К Богородице прилежно ныне притеце́м, грешнии и смиреннии, и припаде́м, в покаянии зовуще из глубины́ души́: Владычице, помози, на ны милосердовавши, потщи́ся, погибаем от множества прегрешений, не отврати Твоя рабы́ тщи, Тя бо и едину надежду и́мамы.
Кондак, глас 6
Не имамы иныя помощи, не имамы иныя надежды, разве Тебе, Владычице, Ты нам помози, на Тебе надеемся и Тобою хвалимся, Твои бо есмы раби, да не постыдимся.
Кондак 1
Взбранной Воеводе и предивной Заступнице рода христианскаго, изливающей от святыя Своея иконы струи́ благодатных исцелений, похвальная восписуем Ти раби Твои, Богородице; Ты же, яко Блага́я Заступница чтущих Тя, от всяких нас бед свободи́, да зовем Ти: Радуйся, Владычице, иконою Твоею Остробрамскою благодать и милость нам являющая.
Икос 1
Ангел с Небесе по́слан бысть рещи́ Богородице: Радуйся! Мы же, земноро́днии, дивящеся воплощению от Тебе Сына Божия, дерзаем воспевати Тебе си́це:
Радуйся, Благодатная Богородице Дево.
Радуйся, Преблагословенная в жена́х.
Радуйся, яко Спаса родила еси душ наших.
Радуйся, яко Свободителя явила еси нам.
Радуйся, Небесе и земли́ Царице.
Радуйся, яко превы́шши еси всякаго создания.
Радуйся, Ангелы на Небеси чтимая.
Радуйся, человеки на земли́ прославляемая.
Радуйся, яко пришедши ко Елисавете, Сама прорекла́ еси: «Се бо отныне убла́жат Мя вси ро́ди».
Радуйся, яко воистину от всех доныне непрестанно ублажа́ема.
Радуйся, верно Тя величающим помощь скорую да́рующая.
Радуйся, чудотворными Своими иконами, яко солнцем светя́щая.
Радуйся, Владычице, иконою Твоею Остробрамскою благодать и милость нам являющая.
Кондак 2
Видящи, Всеблага́я Владычице, скорбь и тесноту жития нашего, восхотела еси явити милосердие Свое, чудотворным образом Твоим подаю́щи скорбящим утешение, болящим исцеление, бе́дствующим помощь, да, видяще таковую милость Твою к нам, благодарными усты воспеваем вси Богу: Аллилуия.
Икос 2
Разум богопросвеще́н иму́ще, святии пра́отцы и пророцы во о́бразех, виде́ниих и со́ниих чудное рождество от Тебе Сына Божия и тайну приснодевства Твоего, Владычице, изобрази́ша. Мы же, неизреченному таинству сему верующе, со благоговением и любовию воспеваем Тебе:
Радуйся, ле́ствице высокая, Иаковом древле ви́денная.
Радуйся, землю с Небом совоку́пльшая.
Радуйся, Бога, на земли́ я́вльшагося, во чреве Твоем носившая.
Радуйся, яко неопалимая купина нетленною пребывшая.
Радуйся, светоносный о́блаче, из негоже всех Владыка, яко дождь на руно́, на землю сни́де.
Радуйся, же́зле прозя́бший, цветами добродетелей верных украшающий.
Радуйся, Живоносный Источниче.
Радуйся, Мати Господа Вышняго.
Радуйся, алчущим и жаждущим вечныя правды Насыщение рождшая .
Радуйся, ду́ши наша Хлебом безсмертия насыщающая.
Радуйся, яко молящиися Тебе от всякаго зла сохраняются.
Радуйся, яко Твоя честны́я иконы чудесами прославляются.
Радуйся, Владычице, иконою Твоею Остробрамскою благодать и милость нам являющая.
Кондак 3
Сила Вышняго осеняет всякаго человека, с верою притекающаго к Твоей цельбоно́сней иконе, юже даровала еси людем на утешение. Сего ради, со умилением взирающе на святый Твой образ, яко живе́й Ти сущей с нами, из глубины́ се́рдца вопием: осени́ и нас, си́рых и безпомощных, да воспоем просла́вльшему Тя Господу: Аллилуия.
Икос 3
Имущи Тебе, Премилосердная Мати, Хода́таицу за род христианский пред возлюбленным Сыном Твоим и Богом нашим, радуемся вси, яко мо́лиши Его, да не погубит нас грехов наших ради, но наставит нас в доброде́тельном житии. Сего ради, припа́дающее пред образом Твоим, дерзаем вознести Тебе глас хвалы и благодарения, взывая си́це:
Радуйся, всех христиан Заступнице.
Радуйся, всего мира спасение.
Радуйся, творити волю Божию нам помогающая.
Радуйся, славити Господа нас наставляющая.
Радуйся, наше с Богом примирение.
Радуйся, в Царство Небесное возведе́ние.
Радуйся, ума нашего просвещение.
Радуйся, душ и телес наших исцеление.
Радуйся, долготерпению нас научающая.
Радуйся, благочестием сердца́ наша исполняющая.
Радуйся, веру в нас укрепляющая.
Радуйся, с кротостию нас вразумляющая.
Радуйся, Владычице, иконою Твоею Остробрамскою благодать и милость нам являющая.
Кондак 4
Бурю земна́го скорбнаго жития нашего в немощех и болезнех ви́дящи, Премилосердная Мати Божия благоволи́ явити образ Свой во утешение всем страждущим; темже с радостию неизреченною припа́даем к Тебе, Владычице, и из глубины́ души́ благодарим Тя, дивную Заступницу нашу, воспевающе о Тебе Богу: Аллилуия.
Икос 4
Слышавше ближнии и дальнии о дивных чудесех от святыя иконы Твоея, Пречистая, со усердием многим притекаху к цельбоно́сному Твоему образу, прие́мля от него да́ры неисче́тных Твоих благодеяний. Темже и мы, аще и недостойни суще, со благоговением и радостию покланяемся Тебе пред сим чу́дным образом и достодо́лжно Тя пе́сньми ублажаем:
Радуйся, милости сокровище многоценное.
Радуйся, отчаянных единая надеждо.
Радуйся, обуреваемых тихое пристанище.
Радуйся, изнемогающих Заступнице и укрепление.
Радуйся, в самых страданиих наших утешение нам подающая.
Радуйся, присно о нас, грешных, промышляющая.
Радуйся, Покровительнице всех притекающих к Тебе.
Радуйся, вся благопотре́бная да́рующая моля́щимся Тебе.
Радуйся, благим намерениям способствующая.
Радуйся, злая начинания разрушающая.
Радуйся, во дни земнаго странствия нашего добрая Путеводительнице.
Радуйся, к тихому пристанищу нас приводящая.
Радуйся, Владычице, иконою Твоею Остробрамскою благодать и милость нам являющая.
Кондак 5
Яко лучезарная звезда возсия́ нам чудотворная икона Твоя, Богородице Дево, озаря́ющи сиянием пресветлых чудес Твоих притекающих к Тебе с верою. Сего ради, прекло́ньше коле́на се́рдца, благодаряще о сем Подателя чудес Бога, вопием Ему: Аллилуия.
Икос 5
Видяще чудеса преславная, совершаемыя не то́кмо от иконы Твоея, Богомати, во граде Ви́льно явле́нныя, но и от по подо́бию сего образа спи́санных изображений зна́мения пречудная быва́емая, припа́даем к Тебе, Владычице, и, уповая на всесильную помощь Твою, смиренно вопием:
Радуйся, немощны́м здравие да́рующая.
Радуйся, болезни лютыя исцеляющая.
Радуйся, оставленных врачами под кров Свой приемлющая.
Радуйся, от одра смертнаго воставляющая.
Радуйся, печали наша утоля́ющая.
Радуйся, скорби наша в радость претворяющая.
Радуйся, безнадежным наде́яние.
Радуйся, упование наше непостыдное.
Радуйся, немощи душевныя врачующая.
Радуйся, заблуждших на путь правый наставляющая.
Радуйся, греховную отъемлющая скверну.
Радуйся, бане, омывающая совесть.
Радуйся, Владычице, иконою Твоею Остробрамскою благодать и милость нам являющая.
Кондак 6
Предстояще пред иконою Твоею, Пресвятая Дево, архиреев сосло́вие, священницы, мона́си и вси людие проповедуют неисче́тная Твоя благодеяния, яже обильно изливаеши на всех с верою притекающих к Тебе. Сего ради и мы, грешнии, моля́щеся пред чудотворным Твоим образом, веруем и уповаем, яко испро́сиши вся блага́я и полезная нам у Сына Твоего и Бога нашего, Емуже дерзновенно вопием: Аллилуия.
Икос 6
Возсия благодать от цельбоно́сныя Твоея иконы Остробрамския, пред не́юже и мы преклоняем коле́на и сердца́ наша и молимся: отжени от нас, Владычице, о́блак нашедших на ны бед и искушений, да вопием Ти радостно:
Радуйся, Ангелов веселие.
Радуйся, всех праведных славо.
Радуйся, Родительнице Вечнаго Царя.
Радуйся, ублажаемая на Небеси и на земли́.
Радуйся, любви Божественныя проявление.
Радуйся, чудес преславных совершение.
Радуйся, с Сыном Твоим вечно царствующая.
Радуйся, ма́тернее дерзновение к Нему иму́щая.
Радуйся, плач и сле́зы присно утоля́ющая.
Радуйся, спасения входы всем отверзающая.
Радуйся, ненаде́жных надеждо.
Радуйся, печальных отрадо.
Радуйся, Владычице, иконою Твоею Остробрамскою благодать и милость нам являющая.
Кондак 7
Хотяй явити ве́лию любовь Свою к людем, Человеколюбец Господь Тебе, Матерь Свою, дарова́ роду христианскому в помощь, покров и защиту, да будеши печальным утешение, скорбящим ра́дование, отчаянным наде́яние, вечныя муки Своим хода́тайством избавляющая и к Небесному веселию приводя́щая всех воспевающих непрестанно хвалебную песнь: Аллилуия.
Икос 7
Дивно являеши, Пресвятая Дево, милости всем верным, и святою иконою Твоею Остробрамскою преславная чудеса содева́еши: слепы́я просвещаеши, разслабленныя укрепляеши, недужныя врачуеши и всем притекающим к целебному образу Твоему скорую помощь Твою являеши, подвиза́ющи звати Тебе:
Радуйся, скорбящих и страждущих утешающая.
Радуйся, прибегающих под кров Твой милостивно приемлющая.
Радуйся, раны греховныя благоутро́бно врачующая.
Радуйся, скорбьми́ грехи наша очищающая.
Радуйся, терпеливых страдальцев дара́ми благодатными ущедря́ющая.
Радуйся, к покаянию нас призывающая.
Радуйся, молений наших не отвергающая.
Радуйся, желания богоугодная исполняющая.
Радуйся, радость скорую подающая.
Радуйся, на смиренныя призирающая.
Радуйся, врагов наших видимых и невидимых побеждающая.
Радуйся, лю́бящия и чтущия Тя от всяких бед избавляющая.
Радуйся, Владычице, иконою Твоею Остробрамскою благодать и милость нам являющая.
Кондак 8
Странствующе в юдоли сей земне́й и многоскорбней, где обря́щем отраду и утешение, аще не в Тебе, Пречистая? Сего ради, молимся: путево́дствуй нас, Владычице, по пути спасения, избавляющи от всяких зол и обстоя́ний, да благодарственно поем Богу: Аллилуия.
Икос 8
Весь мир преисполнен, яко звезда́ми богосветлыми, чудотворными иконами Твоими, Богородице Дево, в нихже, яко солнце лучезарное, име́ющи луну́ подно́жием и звезд зна́мениями окруженная, икона Твоя Остробрамская предивными чудесы благодатно сияет и согревает хла́дная сердца́ наша зна́меньми Твоего о нас милостиваго попечения. Сего ради почитаем пречистаго лика Твоего изображение и Тебе пред ним вопием:
Радуйся, благочестивых и́ноков и и́нокинь Блага́я Покровительнице.
Радуйся, иере́ев благоговейных похвало.
Радуйся, во дни скорбнаго жития нашего на земли́ скорая Помощнице.
Радуйся, во всех беда́х и напа́стех Всемощная Защитнице.
Радуйся, алчущих Кормительнице.
Радуйся, жаждущим жизни питие́ неисчерпа́емое.
Радуйся, сиро́т незримая Воспитательнице.
Радуйся, вдов заступление.
Радуйся, ле́ствице Небесная, еюже Бог к нам сни́де.
Радуйся, мо́сте, преводя́й суших от земли́ на Небо.
Радуйся, ключу́ Царствия Христова.
Радуйся, двери райския нам отверзающая.
Радуйся, Владычице, иконою Твоею Остробрамскою благодать и милость нам являющая.
Кондак 9
Всякаго естества́ Ангельскаго превы́шши еси, Богородице Дево, честнейшая Херувим и сла́внейшая без сравнения Серафим, предстоящи бо Сыну Твоему на Небеси, вы́ну мо́лишися Ему за род христианский. Не преста́ни хода́тайствовати и о нас, недостойных, у Престола Вседержителя, да с радостию вопием Господеви: Аллилуия.
Икос 9
Вети́и многовеща́ннии не возмогут по достоянию восхвалити предивная чудеса, от святыя Твоея иконы явля́емая, изумева́ет же ум всяк пети Тя, Богородице. Ты же, яко Блага́я су́щи, приими́ от нас похвалы сия:
Радуйся, за христиан Сыну Твоему усердно моля́щаяся.
Радуйся, страну нашу честны́м Твоим омофо́ром покрывающая.
Радуйся, ум наш к Богу возводя́щая.
Радуйся, злыя помыслы наша искореняющая.
Радуйся, сердца наша любовию к Богу воспламеняющая.
Радуйся, хотения наша ко благу направляющая.
Радуйся, гнев Божий, праведно на ны дви́жимый, скоро утоля́ющая.
Радуйся, ко́зни духо́в зло́бы разрушающая.
Радуйся, обидимых заступление.
Радуйся, обидящих вразумление.
Радуйся, падших скорое востание.
Радуйся, к Богу наше дерзновение.
Радуйся, Владычице, иконою Твоею Остробрамскою благодать и милость нам являющая.
Кондак 10
Спасения ищуще, к Тебе прибегаем, Милосердная Мати, и икону Твою святую ныне обстоя́ще, со благоговением и верою сию почитаем, ибо всем притекающим к Тебе скорое вспоможе́ние подае́ши и всех чтущих Тя прошения полезная исполняеши. Темже, воспоминая неисче́тная чудотворения Твоя, вопием Всемогущему Богу: Аллилуия.
Икос 10
Стена еси, ограждающая от всяких бед и болезней всех с верою призывающих Тя в помощь, Пресвятая Дево, Ты бо недугующим и зело́ страждущим исцеление да́руеши, скорбящих утешаеши и бедствующим на помощь ускоря́еши. Сего ради, прославляюще Твое ма́тернее милосердие, благодарными усты́ вопием Ти из глубины́ души́:
Радуйся, болезни лютыя исцеляющая.
Радуйся, вся полезная и блага́я подающая.
Радуйся, никого́же отрева́ющая.
Радуйся, призывающих Тя заступающая.
Радуйся, мир в семействах устроя́ющая.
Радуйся, ма́терей детородя́щих скоро и безболезненно разрешающая.
Радуйся, чад их благодатно охраняющая.
Радуйся, всем призывающим Тя помогающая.
Радуйся, от наве́тов вражиих нас спасающая.
Радуйся, от клеветы и досажде́ния ограждающая.
Радуйся, жили́ща наша защищающая.
Радуйся, Домострои́тельнице, житие наше добре устрояющая.
Радуйся, Владычице, иконою Твоею Остробрамскою благодать и милость нам являющая.
Кондак 11
Пение наше, аще было бы и тмочи́сленное, не довле́ет к достойному прославлению милостей Твоих, Всехвальная Владычице, яже непрестанно изливаеши роду человеческому. Но, да не неблагода́рни яви́мся пред Тобою, по силе нашей похвальная воспису́ем Ти с любовию, вопиюще Богу: Аллилуия.
Икос 11
Яко светоприе́мную свещу́ зрим Твою честну́ю икону, Пресвятая Дево, невеще́ственный в душа́х наших возжигающую огнь любви к Тебе, Всеблага́я. Ты же приими́ веру и усердие наше, направи на стези́ истины путь наш, умоли Господа и Сына Твоего, да спасет нас, и́миже весть судьба́ми, да не погибнем в нераска́янии о гресе́х наших, и услыши моление к Тебе взывающих:
Радуйся, чрез икону Твою нам благоде́ющая.
Радуйся, ма́терния щедроты Твоя на нас изливающая.
Радуйся, греховныя по́мыслы вла́стно отгоняющая.
Радуйся, маловерных вразумляющая.
Радуйся, неверных смы́слы просвещающая.
Радуйся, промышление Божие разумети нам помогающая.
Радуйся, страх Божий в сердца́ верных влагающая.
Радуйся, от сна лености нас воставляющая.
Радуйся, о храмах Божиих попечение иму́щих духовною радостию утешающая.
Радуйся, светом богопознания и благочестия омраче́нных озаряющая.
Радуйся, бла́га земна́я, су́етныя и скоропреходя́щия презирати нас научающая.
Радуйся, к Небесным и вечным сокровищам умы́ и сердца́ наша возводя́щая.
Радуйся, Владычице, иконою Твоею Остробрамскою благодать и милость нам являющая.
Кондак 12
Благодать дати восхотев, дарова нам Господь цельбоно́сную икону Твою, пред не́юже вознося́ще усердная моления, возводим ум наш к Первообра́зней — Тебе, Преблагословенная Богородице, прося́щи даровати нам блага́я и полезная во временней жизни сей, и в будущей - блаженство безконечное, да воспеваем со Ангелы и всеми святыми на Небеси: Аллилуия.
Икос 12
Поюще Твоя чудеса, яже обильно источа́еши нам от святыя иконы Своея, хвалим Тя, Пресвятая Владычице, и, предстояще пред пречистым Твоим образом со слезами, умиленною душею и сокрушенным сердцем взываем Ти:
Радуйся, Заступнице усердная рода христианскаго.
Радуйся, Мати Господа и наша Мати и Покровительнице.
Радуйся, источающая всем нам неоску́дныя милости.
Радуйся, избавляющая от всех бед и напа́стей благонра́вныя и богобоя́щияся рабы Своя.
Радуйся, телес наших здравие.
Радуйся, душ наших спасение.
Радуйся, яко за всех мо́лиши Сына Твоего и Бога нашего.
Радуйся, яко всем твори́ши спастися.
Радуйся, избавление всех зол.
Радуйся, полезная всем да́рующая.
Радуйся, яко Тя едину надежду и́мамы.
Радуйся, яко Ты еси Божественный покров рабом Твоим.
Радуйся, Владычице, иконою Твоею Остробрамскою благодать и милость нам являющая.
Кондак 13
О Всепетая Мати, рождшая всех святых Святейшее Слово, нынешнее приемши приношение, при́зри на ну́жды и скорби наша, умоли Сына Твоего низпослати нам милости и щедроты Своя, избави нас от временных бед и вечныя му́ки, да предстательством Твоим унасле́дуем Царствие Небесное и сподобимся со святыми пети Богу: Аллилуия.
(Этот кондак читается трижды, затем
икос 1 и кондак 1)
Молитва
О Пресвятая Дево, Мати Господа Вышних сил, Небесе и земли́ Царице, града и страны́ нашея всемощная Заступнице! Приими хвалебное пение сие от нас, недостойных раб Твоих, и вознеси молитвы наша ко Престолу Сына Твоего, да милостив будет нам, грешным, и проба́вит благость Свою чтущим Тя и с верою и любовию покланя́ющимся чудотворному образу Твоему. К кому бо прибе́гнем в го́рестях наших, аще не к Тебе, Царице Небесная? Кто плач наш и воздыхания наша прии́мет, аще не Ты, Пренепорочная, Надеждо христиан и прибежище нам, грешным? Кто па́че Тебе в напа́стех защити́т? Темже молим Тя усердно: покрый Твоим ходатайством наша прегрешения, защити нас от враг видимых и невидимых, умягчи сердца́ злых человек, востающих на нас. О Мати Господа нашего Творца! Ты еси корень девства и неувяда́емый цвет чистоты. Приими́ молитву нашу и соблюди нас в чистоте душевней, сохрани нас от наве́та злых человек и от внезапныя смерти и даруй нам прежде конца покаяние. Помилуй нас в дневны́х часе́х, и утренних, и вечерних, и во всякое время сохрани нас; стоя́щих, сидящих соблюди, и на всяком пути ходя́щих, и в нощны́х часех спя́щих снабди́, покрый и заступи. На всяком месте и на всякое время буди нам, Мати Преблага́я, стена необоримая и заступление крепкое. Ты Хранительница жизни всея́ нам явися, Пречистая; Ты нас избави от бесов в час смерти; Ты и по смерти упокоение обрести́ испроси у Сына Твоего и Бога нашего. Мы же, грешнии, со упованием моления Тебе возносим и умильно вопием: радуйся, Благодатная; радуйся, Обрадованная; радуйся, Преблагословенная, Господь с Тобою и Тобою с нами. К Тебе прибегаем, яко к несомне́нней и скорой Заступнице нашей, и Тебе, яко Всемогущей Помощнице, сами себе и друг друга и весь живот наш по Христе Бозе предае́м, Емуже подобает всякая слава, честь и поклонение со Безначальным Его Отцем, со Пресвятым и Благи́м и Животворящим Его Духом, ныне и присно и во веки веков. Аминь.
ОСТРОБРАМСКАЯ ИКОНА БОЖИЕЙ МАТЕРИ
Остробрамская икона Пресвятой Богородицы является главной святыней Вильнюса.
Сохранилось несколько преданий, повествующих об истории происхождения образа. Согласно одному из них, икона была принесена из Корсуни великим князем Ольгердом и подарена первой супруге Марии. Вторая супруга великого князя, Иулиания, передала икону в Троицкую церковь, откуда образ попал в часовню у Острых ворот.
Другое предание говорит о том, что икона была прислана Ольгерду греческим императором Иоанном Палеологом, когда тот узнал о принятии Ольгердом христианства.
По третьему источнику, чудотворная икона сама чудесно явилась на Острых воротах 14 апреля 1431 г. Несомненно одно – в 1431 году икона уже находилась в часовне близ Троицкой церкви.
В 1498 г. в Вильне в связи с возникшей опасностью нападения татар были заложены новые городские каменные стены, сооружены ворота с башней, над которой была устроена часовня. На эту часовню (снаружи) и была помещена икона, обращенная ликом ко входящим в город. Так как часовня была сооружена в «остром» конце города над воротами, то и икона стала именоваться Остробрамской (брама – ворота).
После страшного пожара Вильны в 1714 г. икона была перенесена в костел святой Терезы, но в 1744 г., когда часовня была вновь отстроена, снова помещена над воротами. Предание гласит, что Остробрамская икона сама чудесным образом переместилась на врата, явив чудо перед маловерными людьми.
В 1812 г. икона была немного повреждена французами, а в 1829 г. отреставрирована.
Остробрамская икона написана на дубовой доске, изображение поясное. Пречистая Дева на ней изображена в момент Благовещения.
По благословению
митрополита Херсонского и Таврического Иоанна