Празднование:

4 декабря (н. ст.)

Тропарь, глас 4

Днесь благоволения Божия предображение и человеков спасения проповедание: в храме Божии ясно Дева является и Христа всем предвозвещает; Той и мы велегласно возопиим: радуйся, смотрения Зиждителева исполнение.

Кондак, глас 4

Пречистый храм Спасов, многоценный чертог и Дева, священное сокровище славы Божия,  днесь  вводится в дом Господень, благодать совводящи, Яже в Дусе Божественном, Юже воспевают Ангели Божии: Сия есть селение Небесное.

Кондак 1

Избранней Предвечным Царем Богоотроковице Марии, Ангелов и человеков Царице, пришедшей в храм Господень, с любовию и умилением вопием: Радуйся, Богоизбранная Отроковице Марие, Владычице наша Всеблагая.

Икос 1

Ангели вхождение Твое, Пречистая Дево, во Святая Святых зряще, удивишася; мы же, земнороднии, радости исполнени, восхваляем Тя:

Радуйся, одушевленная скиние.

Радуйся, сокровище славы Божией.

Радуйся, пророками пронареченная.

Радуйся, Ангелами чтимая.

Радуйся, Богоизбранная Отроковице Марие, Владычице наша Всеблагая.

Кондак 2

Неизреченных Божественных таин зря в Тебе, благодать являемую, вопием смиренно Богу: Аллилуия.

Икос 2

Слыши, Дево, и приклони ухо Твое к песнопениям, с любовию Тебе приносимым:

Радуйся, Святая Святых большая.

Радуйся, кадильнице всезлатая.

Радуйся, свещнице, свет миру явившая.

Радуйся, Богоизбранная Отроковице Марие, Владычице наша Всеблагая.

Кондак 3

Сила Всевышняго укрепи Тя, егда праведнии родители Твои ­Иоаким и Анна приведоша Тя в храм Господень. Ты бо, младенствующая Юнице, взошла еси никимже держима до самаго входа; и мы, Тобою укрепляемии, вопием Богу: Аллилуия.

Икос 3

Имуще Тя, яко всесветлое солнце, радости исполняемся и вопием:

Радуйся, Предстательница наша пред Богом и Сыном Твоим.

Радуйся, благоуханный фимиаме.

Радуйся, печалей наших избавление.

Радуйся, душ наших увеселение.

Радуйся, Богоизбранная Отроковице Марие, Владычице наша Всеблагая.

Кондак 4

Благоприятная Богу Жертва приносится днесь, великий архиерей Захария руками своими приемлет Ю. Мы же Свещеносицу достойно ублажим, воспевая: Аллилуия.

Икос 4

Слышаша древнии людие девственнии лицы, псалмы и песньми Деву Отроковицу в храм Господень провождающих, благоговейно вопрошаху: «Что сие радостное происхождение? Кто сия Юница, аки заря солнечная сияющая?» Мы же, на сем пути стекшеся, велегласно вопием:

Радуйся, благодати источниче.

Радуйся, храме и палато Царя и Бога нашего.

Радуйся, входящая во храм, да Сама храмом соделаешися.

Радуйся, чудо всемирное.

Радуйся, Богоизбранная Отроковице Марие, Владычице наша Всеблагая.

Кондак 5

Боготечная звезда, нам путь во храм указующая! Ейже мы последствующе, поим Богу: Аллилуия.

Икос 5

Видяще Тя девы, сверстницы Твои, Дево, радостно во храм текущую, светильницы возжигающе, песньми провождаху Тя, глаголюще:

Радуйся, со Ангелы беседующая.

Радуйся, Голубице Чистая.

Радуйся, солнца светлейшая.

Радуйся, от всех родов предъизбранная.

Радуйся, Богоизбранная Отроковице Марие, Владычице наша Всеблагая.

Кондак 6

Проповедник Твоего вхождения, Дево, бысть святый Давид псалмопевец, рече бо: «Приведутся Царю девы вслед Ея, приведутся искреннии Тебе, приведутся во храм». Зряще сбытие пророчества сего, поем: Аллилуия.

Икос 6

Возсия днесь, празднолюбцы, светлейшее торжество, да, сошедшеся во святем празднице сем, играюще, вопием:

Радуйся, Дево Всепетая.

Радуйся, Ангелы дориносимая.

Радуйся, верными ублажаемая.

Радуйся, яко слава Твоя несказанная.

Радуйся, Богоизбранная Отроковице Марие, Владычице наша Всеблагая.

Кондак 7

Хотяще исполнити обещание свое, праотцы святии Иоаким и Анна рекоша к Преблагословенней: «Гряди, Чадо, в церковь Гос­подню, и буди плод благословенный Господу». Мы же, торжествуя смотрения Зиждителева исполнение, вопием Богу: Аллилуия.

Икос 7

Новую показа Господь благодать людем Своим, егда чертог славы Своея яви ясно в храме, Деву Богородицу, да, чудо видяще, вси вопием:

Радуйся, Божие к людем благоволение.

Радуйся, Ходатаице нашего спасения.

Радуйся, благочестия утверждение.

Радуйся, послужившая тайне воплощения.

Радуйся, Богоизбранная Отроковице Марие, Владычице наша Всеблагая.

Кондак 8

Странное зряще видение, устранимся суетнаго попечения и ум на Божественная возложим, вопия Богу: Аллилуия.

Икос 8

Вся горе устремлена бывшая и духом пламеневшая, нас не остави, Дево Всенепорочная; темже приими пение сие:

Радуйся, Ангелы питаемая.

Радуйся, светом Небесным облиставаемая.

Радуйся, благодатию Божиею снабдеваемая.

Радуйся, сиянием невечерним озаряемая.

Радуйся, Богоизбранная Отроковице Марие, Владычице наша Всеблагая.

Кондак 9

Всякое естество Ангельское удивися неизреченному Божественному смотрению, како Дева уготовляется служению спасения рода человеческаго; мы же вопием: Аллилуия.

Икос 9

Витии многовещаннии недоумеют, како по достоянию восхвалити всечестный праздник Твой, Дево Богородице, и, дивящеся, вопиют:

Радуйся, весно радостная, благодатно ум просвещающая.

Радуйся, в прообразех уразумеваемая.

Радуйся, в псалмех и гуслех певаемая.

Радуйся, луче светозарная.

Радуйся, Богоизбранная Отроковице Марие, Владычице наша Всеблагая.

Кондак 10

Спасти хотя мир, Промыслитель Господь устрои Тя, Пречистая, в храм Свой, Богородице, идеже и мы, спасение обретающе, вопием: Аллилуия.

Икос 10

Стена еси, Дево, всем  к Тебе притекающим:

Радуйся, Небес превысшая.

Радуйся, всех Радосте.

Радуйся, Небесное селение.

Радуйся, сердца умиление.

Радуйся, Богоизбранная Отроковице Марие, Владычице наша Всеблагая.

Кондак 11

Пение всякое не довлеет к восхвалению Тя, Дево Богородице, но, любовию побуждаеми, не умолчим пети: Аллилуия.

Икос 11

Светоносную палату, Солнцем Правды освещаемую, зрим Деву Всесвятую и вся приглашаем воспети:

Радуйся, доме благодати.

Радуйся, Мати Истинныя Жизни.

Радуйся, вся пророчества на Себе исполнившая.

Радуйся, родившая Предвечнорожденнаго.

Радуйся, Богоизбранная Отроковице Марие, Владычице наша Всеблагая.

Кондак 12

Благодать дати восхотев роду человеческому, избра Тя Господь, Деву Чистую, да будеши всем в радость вечную, вопиющим: Аллилуия.

Икос 12

Поюще радостно Твое вхождение в храм Божий, Богоизбранная Отроковице Марие, с веселием вопием:

Радуйся, нас защищающая.

Радуйся, любовию вся покрывающая.

Радуйся, верных охраняющая.

Радуйся, к Богу приводящая.

Радуйся, Богоизбранная Отроковице Марие, Владычице наша Всеблагая.

Кондак 13

О Всепетая Богоотроковице Марие, нынешнее наше приемши приношение, от всякия скорби и напас­ти нас избави, от враг видимых и невидимых нас защити и о прощении грехов наших Господа умоли, да, спасеннии Тобою, достойны будем введения во обители райския с мудрыми девами, с нимиже да воспоем о Тебе Богу: Аллилуия.

(Этот кондак читается трижды, затем икос 1 и кондак 1)

Молитва

О Пресвятая Дево, Царице Небесе и земли, Богоизбранная Отроковице! Ты оставила еси люди Твоя и дом отца Твоего, во еже принести Себе в жертву чистую и непорочную Богови. Даруй же и нам соблюдати себе в целомудрии и чистоте и в страхе Божием во вся дни живота нашего, да будем храмы Духа Святаго. Помози нам, Пресвятая Дево, отражати вся искушения вражеская, от плоти, мира и диавола находящия на ны от юности нашея, да, облекшися во всякое совершенство духовное, уготовает кийждо от нас помощию Твоею одеяние брачное души своея и елей доброделания, да не нази и неготови явимся в сретение Безсмертному Жениху, Сыну Твоему, Христу Спасителю и Богу нашему, но да приимет ны с мудрыми девами во обители райския, идеже со всеми святыми сподоби нас выну славити и прославляти Отца и Сына и Святаго Духа и Твое милостивое заступление, ныне и присно и во веки веков. Аминь.

По благословению

митрополита Херсонского и Таврического Иоанна