Православный календарь
Рекомендуем посетить
Музыковский Покровский мужской монастырь Херсонской епархии
УПЦ

НОВАЯ ИНФОРМАЦИЯ

Расписание богослужений в Свято-Духовском кафедральном соборе на ЯНВАРЬ 

 

Ночные Литургии в Свято-Духовском кафедральном соборе в ЯНВАРЕ: 

в ночь с 6 на 7 (со среды на четверг) и с 29 на 30 (с пятницы на субботу)

Начало в 23.00

 

В Херсонской епархии изданы акафисты:

Божией Матери пред иконой Ее ЖИРОВИЦКОЙ  и 

святителю АМВРОСИЮ Медиоланскому

 

Акафист апостолу ИАКОВУ ЗЕВЕДЕЕВУ

 

День памяти:

13 мая (н. ст.)

 

Тропарь, глас 3

Апостол Хрис­тов был еси избра́нный и Богослову возлюбленному брат единоро́дный, всехвальне Иакове, поющим Тя грехов оставление испроси и душа́м нашим ве́лию милость.

 

Кондак, глас 2

Глас Божественный слышав, призывающ тя, любовь отца презрел еси и прите́кл еси Христу, Иакове, с сродником твоим, славне, с нимже сподобился еси видети Господне Божественное преображение.

 

Кондак 1

Избра́нный Господем за тихость нескверныя души́ твоея от мрежей ры́барских на проповедь Евангелия, от ло́вли рыб на уловле́ние человеков, великий апостоле, учениче́ Хрис­тов, сыне гро́мов, моли Единаго Истиннаго Человеколюбца, Егоже ты приискренне возлюбил еси, да помилует нас, ищущих твоего к Нему предстательства и зовущих ти: Радуйся, Иакове апостоле, Хрис­тов и молитвенниче о душа́х наших.

 

Икос 1

Ангельских Сил и всякия твари Творца, Владыку и Господа, восприе́мшаго плоть нашу и я́вльшагося на земли́ спасения нашего ради, узре́в ходя́ща при мо́ри Галилейстем и взывающа тя с братом твоим, Иакове блаженне, в звание апостольства, оста́вль мрежи ры́барския и отца твоего в корабли́, неуклонно отто́ле последовал еси стопа́м Спаси́телевым. Сего ради вопием ти си́це:

Радуйся, любве ради ко Христу отца по плоти оставивый.

Радуйся, Христом Небеснаго Отца обреты́й.

Радуйся, мир и вся его пре́лести презревый.

Радуйся, Небесная блага́я в воздаяние получивый.

Радуйся, плоть духу совершенно порабо́тивый.

Радуйся, дух твой Сладчайшему твоему Учителю Иисусу покори́вый.

Радуйся, Иакове, апостоле Хрис­тов и молитвенниче о душа́х наших.

 

Кондак 2

Всего себе, учениче́ богозра́чне, манове́нию отда́в Влады́чню, твою мысль по всему просве́щшаго и показавшего тя, преблаженне, апостола и честна богогла́сника непостижи́мого Божества, разже́гся еси ревностью о славе Божией, сего ради «сын гро́мов» от Господа наречен был еси, поя Тому: Аллилуия.

 

Икос 2

Якоже Илия́ ревностию разжигаем, попалити восхотел еси непоко́ршияся пропове́данию Хрис­тову, но возбрани́ тебе Хотя́щий милосердия, научая кротости благодатней, да зовем ти:

Радуйся, незлобия рачи́телю.

Радуйся, славы Божия ревнителю.

Радуйся, словом изощре́нная избра́нная стрело́.

Радуйся, премудре, ду́ши сопротивных о камень веры сокруша́яй.

Радуйся, таи́нниче, пленя́яй сих коры́сти.

Радуйся, служителю присносу́щныя жизни. 

Радуйся, Иакове, апостоле Хрис­тов и молитвенниче о душа́х наших.

 

Кондак 3

Хрис­това Божества силу, сокрытую под о́блаком немощна́го человеческаго естества́, познал еси явно, егда дщерь Иаи́рову Господь воскреси́, наипаче же сподоби тя со апостолы Петром и Иоанном сотаи́нника быти многих и преславных чудес. Уве́дев же, яко Христос есть Бог И́стинный, из глубины се́рдца твоего воззвал еси Ему: Аллилуия.

 

Икос 3

Разумом истиннаго богопознания озаряя твою душу, шествовал еси восле́д Блага́го Учителя твоего, поучаяся из уст Его исходящей премудрости, и совершеннаго ради твоего незлобия возлюблен был еси Христом Господом твоим. Услыши убо ны, воспевающия ти си́це:

Радуйся, Истиннаго Бога служителю.

Радуйся, бесо́в прогонителю.

Радуйся, мертвецы силою Хрис­товою оживля́яй.

Радуйся, то́ю жизнь и здравие людем возвращаяй.

Радуйся, помраченныя умом к Свету Истины призываяй.

Радуйся, правыя веры просвещением к добродетели настав­ляяй. 

Радуйся, Иакове, апостоле Хрис­тов и молитвенниче о душа́х наших.

 

Кондак 4

Заря́ми свыше наполнився и светлостию Божественною просветився, на Фаво́рстей горе преобразу́ющагося Зижди́теля и Господа видел еси и глас с Небесе услышати сподо́бился еси; темже самови́дец быв и свидетель таин Божиих, вопиял еси Ему: Алли­луия.

 

Икос 4

Све́тел тя о́блак Слова на Фаво́рстей горе осени́, облиста́юща славою обоже́нна, блаженне Иако­ве, и глас слышати Отеческий сподобился еси, известву́яй Того Сыновство́; сего ради зовем ти:

Радуйся, познанием Су́щаго и Иже бе и Грядущаго превозше́дый естество́ человеческое.

Радуйся, вместилище таинств, невместимых человеческим умом, бы́вый.

Радуйся, неизрече́нныя Божия откровения узре́вый.

Радуйся, сия́ верным препода́вый.

Радуйся, радости святых еще в жизни сей познавый.

Радуйся, о́ными ныне в преизбы́точествии наслажда́яйся. 

Радуйся, Иакове, апостоле Хрис­тов и молитвенниче о душа́х наших.

 

Кондак 5

Егда нас ради Владыка восприя́ти восхоте́ умервщле́ние, яко вину́ истиннаго мертвых воскресения, в нощь, в ню́же предая́шеся, со апостолы Петром и Иоанном взят тя соде́тельника, блаженне, яко мудра таи́нника, взывающа: Аллилуия.

 

Икос 5

Имея ве́лие дерзновение к возлюбившему тя Христу, Сыну Божию, сподобился еси обетования пити чашу Хрис­тову и Его крещением креститися. Сего ради вопием ти:

Радуйся, ближний Хрис­тов учениче́.

Радуйся, при́сный Его дру́же.

Радуйся, дерзновение ко Спасителю имевый.

Радуйся, чаши и крещения Его причастниче.

Радуйся, словеса́ Господня, якоже сокровище многоценное, в сердце своем слага́вый.

Радуйся, от честна́го ли́ка двана́десятих ученик пе́рвее убиенный. 

Радуйся, Иакове, апостоле Хрис­тов и молитвенниче о душа́х наших.

 

Кондак 6

Буря ярости иудейския пригвозди́ ко Кресту Христа Бога, волею пострадати за вся люди изво́лившаго, но не поколеба́ веры и упования твоего, Иакове блаженне, яко Той есть Спаситель мира — Христос, дре́вле прорече́нный пророки во искупление па́дшаго человечества. Удивляяся же крайнему милосердию и долготерпению Божию, взывал еси к Нему: Аллилуия.

 

Икос 6

Слышав Божественный глас Христа Жизнодавца, тридне́вно воскресшаго от мертвых и две́рем затворе́нным вшедшаго ко учеником Своим и «Мир вам!» — ре́кшаго, Иакове богоносне, зело́ возрадовался еси и Тому яко Богу благоговейно поклонился еси, всем возвещая немо́лчно непрело́жную истину Его воскресения. О сем и мы хвалебно тебе зовем:

Радуйся, мир Хрис­тов в непорочный сосуд души́ твоея достойно прие́мый.

Радуйся, миром тем мира концы благодатно умиротвори́вый.

Радуйся, дре́вния вражды идолослужи́тельныя потребителю.

Радуйся, истины воскресения Хрис­това очеви́дный и громогла́сный свидетелю.

Радуйся, две́рем затворе́нным дивно прошедшаго Христа созерцателю.

Радуйся, пребожественнаго и радостотво́рнаго гласа Его слышателю. 

Радуйся, Иакове, апостоле Хрис­тов и молитвенниче о душа́х наших.

 

Кондак 7

Боготечное на Небо вознесение Хрис­тово видев и Духа Святаго, от Него ниспо́сланнаго во о́гненных язы́цех, сопричастник быв, Иакове прехвальне, духоно́сец божественный соделался еси и, облече́нный силою свыше, поте́кл еси на проповедь Евангельскую, возвещая людем, во мра́це неверия бывшим, Христа Бога спасительный свет и веру в Него правую, да зовут Ему: Аллилуия.

 

Икос 7

Духовное сия́ние в виде о́гненне сни́де на тя и Божественное прия́телище тя соде́ла, крепко безбожия тьму отгоня́юща и мир просвеща́юща све́тлостию премудрых словес твоих; сего ради зовем ти:

Радуйся, яко зарею Боговиде́ния ду́ши осиява́еши.

Радуйся, яко блиста́нии пропове́дания спя́щия во тьме неве́дения просвещаеши.

Радуйся, яко из глубины́ су́етства человеки извлекаеши.

Радуйся, яко тех верою ко Хрис­ту обращаеши.

Радуйся, яко овец Хрис­товых во двор Отчий приво́диши.

Радуйся, яко тамо на па́житях ту́чных их питаеши. 

Радуйся, Иакове, апостоле Хрис­тов и молитвенниче о душа́х наших.

 

Кондак 8

Житие че́стно и пречу́дно пожи́л еси, Иакове, сего ради Владыка Своего бога́тнаго и честна́го дая́ния обрет тя сосуд, вместя́щ оби́лие дарований, имиже просвещаеши ду́ши, любовию приступающия и вопиющия Богу, вся во благо́е устроя́ющему: Аллилуия.

 

Икос 8

Весь исполнен быв любве Божественныя, явился еси вмести́лище даро́в Святаго Духа, недужныя исцеляя, прокаже́нныя очищая, мертвыя воскрешая, покаяние, вводящее в жизнь вечную, проповедуя; сего ради приими убо от нас, грешных, похвалы сицевы́я:

Радуйся, благодати Божия вмес­тилище.

Радуйся, Духа Святаго обита́лище.

Радуйся, чудото́чная реко́ цельбоно́сныя в боле́знех си́лы.

Радуйся, источниче наставлений, приводящий к познанию правыя веры.

Радуйся, кова́рства лукаваго сатаны обличаяй.

Радуйся, верныя от ко́зней его защищаяй. 

Радуйся, Иакове, апостоле Хрис­тов и молитвенниче о душа́х наших.

 

Кондак 9

Свыше разже́гшее дыха́ние ну́жд­ное Уте́­ши­те­ля я́ве по­ка­за́ тя му́д­ра бо­го­гла́с­ни­ка, ви­ти́й­ству­ю­ща величия вопло́щшагося Слова, Егоже и самови́дец был еси, вы́ну вопия: Аллилуия.

 

Икос 9

Вити́йство мудрости человечес­кия и прельще́ние неверных обличил еси и многия от них к вере Хрис­тове привел еси; ти́и же, от греха ко спасению обратившеся, немо́лчно взываху:

Радуйся, служителю присносу́щныя жизни.

Радуйся, трубо́, возвестившая миру Предвечнаго и Безнача́льнаго Бога.

Радуйся, человечество и Божество Хрис­тово нам изьясня́яй.

Радуйся, дивная словеса́ и наставления Господня нам возве­щаяй.

Радуйся, любви де́лом и истиною нас науча́яй.

Радуйся, пребывающим в любви пребывание в них Бога обещава́яй. 

Радуйся, Иакове, апостоле Хрис­тов и молитвенниче о душа́х наших.

 

Кондак 10

Крепчайше грома явися твое пропове́дание, Христа бо возгреме́л еси вселенней всей Бога, Соде́теля и Избавителя; волхва́ Гермо́гена с учеником его Фили́том вразумил еси, да позна́ют Единаго Триипоста́снаго Бога, вопиюще Ему: Аллилуия.

 

Икос 10

Новая чудеса показал еси, Иако­ве, егда окле­ве­та́в­ший тя Иоси́я во Христа уверовал еси и, умерщв­ля́­ем за имя Хрис­тово, мученичес­ким венцем укра­си́л­ся еси, взывающе тебе:

Радуйся, смирению и кротости нас научаяй.

Радуйся, сатанинския ду́хи от человек изгоняяй.

Радуйся, чудесы́ твоими неверую­щия обращаяй.

Радуйся, учением твоим верныя во истинней вере утверждаяй.

Радуйся, Небесными ту́чами душевныя бразды́ напая́яй.

Радуйся, плодоносны сердца́ Христу содева́яй. 

Радуйся, Иакове, апостоле Хрис­тов и молитвенниче о душа́х наших.

 

Кондак 11

Видети тя злодеи и убийцы, якоже твоего Владыку прежде, не терпя́ше, убивают тя мечем, подражателя Христу, распятому плотию за человеки: тех бо дея́ния укоряя, твоего жития предложе́нием обличил еси; темже, богоблаженне, чашу испи́л еси, якоже обещался еси Владыце, и крещением Сего крестился еси, Емуже ныне усердно зовеши, радуяся: Аллилуия.

 

Икос 11

Егда злочести́вый Ирод воздви́же гонение на христианы, тогда и тя, яко усерднаго исповедника имене Хрис­това, на смерть преда­де́; светоза́рная же душа твоя, достигши в меру возраста совершеннаго, познала есть приближение вре́мене, егда подобает тле́нному насле́дити обеща́нное нетление и смертному обеща́нное безсмертие. Сего ради смиренно приял еси Божие о тебе изволе́ние и му́ченическою кончиною земнаго твоего жития злове́рие И́родово обличил еси. Мы же, ревности твоей о славе Божией дивя́щеся, воспеваем тебе тако:

Радуйся, яко страсти и смерти Учителя твоего поревновал еси.

Радуйся, яко Егоже и славы причастник соделался еси.

Радуйся, по обетованию Того возсе́дый на еди́нем от двана́десяти престолов.

Радуйся, творя́й на том суд и правду посреде людей Божиих Израиля.

Радуйся, наслажда́яйся лицезре́нием Сладчайшаго Иисуса, к Немуже всею душею стремился еси.

Радуйся, от Его милосердия хода́тайствуяй нам вся блага́я. 

Радуйся, Иакове, апостоле Хрис­тов и молитвенниче о душа́х наших.

 

Кондак 12

Поюще труды твоя во апостольстве и чудеса и исцеления, яже источа́л еси и источа́еши благодатию Духа Святаго, в тебе обитающаго, восхваляем Бога, даровавшаго нам такова́го путеводителя, наставляющаго нас на путь спасения и милосе́рдующаго о не́мощех наших, и вопием тобою Ему: Аллилуия.

 

Икос 12

Свято прешед твое житие, святых селе́ния достигл еси, иде́же, радуяся, зриши зарю́ трисия́нную, еяже наслажда́яся, премудре, певцы твоя, предстоящия у святых мощей твоих, испо́лнены веселия и радости покажи́, поющия ти:

Радуйся, благове́стниче веры Хрис­товы усерднейший.

Радуйся, учителю Церкве Хрис­товы изря́днейший.

Радуйся, Божественных тайн возвестителю.

Радуйся, святителей образе и мучеников правило.

Радуйся, преподобных помоще и праведных ве́нче.

Радуйся, всех верных, ко твоему заступлению прибегающих, скорый помощниче и покровителю. 

Радуйся, Иакове, апостоле Хрис­тов и молитвенниче о душа́х наших.

 

Кондак 13

О преславный и всехвальный апостоле Хрис­тов Иакове, твоим всесильным ходатайством ко Всеблагому твоему Учителю и нашему Владыце и Господу испроси нам вся блага́я временная и вечная и христианскую кончину жития, да с тобою и со Ангельскими ли́ки в селении праведных воспоем Три­ипоста́сному Богу: Аллилуия.

(Этот кондак читается трижды, затем икос 1 и кондак 1)

 

Молитва

О великий и возлюбленный апос­толе Хрис­тов Иакове! Приими нас, грешных, под твое сильное заступление прибегающих.  Испроси у Всещедраго Человеколюбца Христа Бога нашего, да не помяне́т беззаконий наших, но да помилует нас и сотворит с нами по милос­ти Своей: да дарует нам здравие душевное и телесное, всякое благоденствие и изоби́лие, наставляя нас обращати о́ная во славу Его, Творца, Спасителя и Бога нашего; по кончине же временныя жизни нашея от немилосердных истяза́телей на возду́шных мыта́рствах да избавит нас, и тако да достигнем, тобою води́мии и покрыва́емии, Горняго о́наго Иерусалима. О великий Иако­ве! Сохрани вся грады и страны́ христианския от глада, губительства, тру́са и потопа, огня и меча, нашествия иноплеме́нных и междоусо́бныя брани; избави нас от всякия беды́ и напа́сти и молитвами твоими отврати от нас праведный гнев Божий и Его милосердие нам испроси,  да вку́пе с тобою сподобимся прославляти в невечернем дни пресвятое имя Отца и Сына и Святаго Духа, во веки веков. Аминь.

 

ЖИТИЕ

Святой апостол Иаков Зеведеев, один из 12 апостолов, был призван Господом Иисусом Христом к апостольскому служению вместе со своим братом апостолом Иоанном Богословом. Им и апостолу Петру Иисус Христос преимущественно перед другими апостолами открывал Свои Божественные Тайны: при воскрешении дочери Иаира, на Фаворской горе и в Гефсиманском саду.

Святой Иаков, по сошествии Святого Духа, проповедовал в Испании и других странах, а потом возвратился в Иерусалим. Он открыто и смело учил об Иисусе Христе как Спасителе мира, словами Священного Писания обличал фарисеев и книжников, укоряя их в жестокосердии и неверии. ­Иудеи были не в состоянии противостать апостольскому слову и за деньги наняли философа-волхва Гермогена, чтобы он вступил в диспут с апостолом и опроверг его доводы о Христе как о пришедшем на землю обетованном Мессии. Волхв послал к святому апостолу своего ученика Филита, но он уверовал в Господа Иисуса Христа. Затем и сам Гермоген убедился в силе Божией, сжег свои волшебные книги, принял святое Крещение и сделался истинным последователем Хрис­товым.

Неверующие иудеи убедили Ирода Агриппу схватить апостола Иакова и осудить его на смерть. Святой Иаков спокойно выслушал смертный приговор и продолжал свидетельствовать о Христе. Один из доносчиков на апостола по имени Иосия был поражен мужеством святого Иакова. Он уверовал в истину слов о пришествии Христа-Мессии. Когда апостола повели на казнь, Иосия пал к его ногам, покаялся в своем грехе и молил о прощении. Апостол обнял, поцеловал его и сказал: «Мир тебе и прощение». Тогда Иосия исповедал всенародно веру во Христа и был обезглавлен вмес­те со святым Иаковом в 44 году в Иерусалиме.

Мощи святого апостола Иакова Зеведеева ныне почивают в кафед­ральном соборе города Сантьяго-де-Компостела в Испании.

 

По благословению

митрополита Херсонского и Таврического Иоанна

Опубликована: 25.12.2020