День памяти:

28 июля (н. ст.)

Тропарь, глас 4

Уподобился еси купцу, ищущему добраго бисера, славнодержавный Владимире, на высоте стола сидя матере градов, богоспасаемаго Киева, испытуя же и посылая к Царскому граду уведети православную веру, обрел еси безценный бисер – Христа, избравшаго тя, яко втораго Павла, и оттрясшаго слепоту во святей купели, душевную вкупе и телесную. Темже празднуем твое успение, людие твои суще, моли спастися душам нашим.

Кондак, глас 8

Подобствовав великому апостолу Павлу, в сединах, всеславне Владимире, вся, яко младенческая мудрования, яже о идолех тщания, оставль, яко муж совершенный, украсился еси Божественнаго Крещения багряницею, и ныне, Спасу Христу в веселии предстоя, моли спастися душам нашим.

Кондак 1

Избранного светильника, тьму идолослужения в державе нашей разгнавшаго и светом Божественныя веры ю просветившаго, восхваляем тя, святый равноапостольный княже Владимире; ты же, яко выну со дерзновением предстояй Царю царствующих, не престай моляся о достоянии твоем и твоими молитвами сохраняй нас от всяких бед и зол, да со умилением благодарственно зовем ти: Радуйся, Владимире, державы нашея просветителю.

Икос 1

Ангелом и человеком Творец, времена и лета во Своей власти положивый и судьбы царств и народов устрояяй, егда благоизволи призвати род наш от тьмы идолослужения ко свету истины и правды вечныя, постави тя, благоверный княже, благовестителя и совершителя сея всеблагия воли Своея. Темже, благодаряще Творца и Спаса нашего, славословим тя, яко великаго избранника Божия нашего ради спасения, с веселием зовуще:

Радуйся, равноапостоле, ко просвещению народа нашего Премудрым Промыслом предъизбранный.

Радуйся, от Первозваннаго апостола на горах Киевских прореченный.

Радуйся, преславный сосуде Божественныя благодати, державе твоей дарованный.

Радуйся, пречудный кореню, из негоже на земли нашей произрасте велие древо правоверия.

Радуйся, яко тобою имя Господне во всех пределех страны твоея прославляется.

Радуйся, яко и твое преславное имя от всех родов с любовию воспевается.

Радуйся, Владимире, державы нашея просветителю.

Кондак 2

Видя суету бездушных идолов и прелесть диавола, еюже уловляет темныя люди в сети беззакония, купно же слыша святых первомученик киевских за Христа Феодора и юнаго Иоанна, глаголющих безбожным мучителем: «Бози ваши не суть бози, но древо, еже днесь пребывает – утро сгнило есть. Един же есть Бог Истинный, Иже сотвори Небо и землю»; тогда возгорелся еси сердцем, во еже взыскати и уведети Сего Единаго Истиннаго Бога, Емуже покланяется всяко колено Небесных, земных и преисподних, немолчно воспевая: Аллилуиа.

Икос 2

Разум всевышний приосени тя, егда предсташа ти проповедницы разновернии, и потщался еси, да не уловлен будеши в сети лжеучения, но да обрящеши веру истинную и спасительную. Темже ублажаем тя:

Радуйся, премудрый просветителю народа твоего.

Радуйся, разум богопросвещенный стяжавый.

Радуйся, яко ухищрения и суесловия лжеучителей посрамил еси.

Радуйся, яко глаголы жизни вечныя в словесех Мудреца Истиннаго мудре уразумел еси.

Радуйся, лучу Божественнаго света посреде тьмы лжеверия.

Радуйся, стено нерушимая посреде бури страстей языческих.

Радуйся, Владимире, державы нашея прocветитeлю.

Кондак 3

Силою свыше умудрен, послал еси мужи избранныя во страны иныя, да видят и испытают, како инии народи служат Богу и како веру свою от дел своих показуют; тии же вся добре испытавше, достигоша Царьграда, идеже видяще благолепное совершение Божественнаго священнодействия, мнеша себе не на земли, но на Небеси стояти, и со умилением сердца воздаша хвалу Господеви, зовуще: Аллилуиа.

Икос 3

Имуще в сердцах своих твердое уверение, яко вера греко-восточная воистинну есть православная и яко священнодействия ея паче всех иных велелепна, послании тобою мужие, возвратившеся во отечествие свое, исповедаша сия пред лицем твоим и пред старейшины твоими, рекоша же: «Никтоже вкусив сладкаго, восхощет горькаго; тако и мы не можем паки остати зде и служити кумиром». Яковое извещение прием, возгорелся еси ревностию по вере истинней. Сего ради величаем тя:

Радуйся, гласу Божественныя благодати прилежно внимавый.

Радуйся, водительству Святаго Духа ycеpдно последствовавый.

Радуйся, яко советники твоя умудрил еси.

Радуйся, яко вся люди твоя советы твоими ко истинней вере привел еси.

Радуйся, яко со тщанием поискал еси добраго бисера - Христа.

Радуйся, пчело трудолюбивая, мудре взыскавшая цветы, в нихже сладкий мед истины и спасения.

Радуйся, Владимире, державы нашея просветителю.

Кондак 4

Бурею сумнений и недоумений не поколебался еси, повнегда уведети тебе веру истинную, православную, но абие восхотел еси прияти святое Крещение со всею державою твоею, да купно с нею, яко отец со чады своими, достойно воспоеши Богу: Аллилуиа.

Икос 4

Слышавше боляре и старейшины яже о вере истинней, помянуша праматерь твою святую княгиню Ольгу, яже прият святое Крещение в Цареграде, и рекоша: «Аще не бы блага бысть вера сия, не бы прияла ю сия мудрейшая в женах». Темже и мы, присно поминающе премудрую Ольгу, благодарственно зовем ти:

Радуйся, яко соблюл еси Божественное семя, еже всея в сердце твое блаженная праматерь твоя.

Радуйся, яко святым заветам тоя последовал еси.

Радуйся, яко провидел еси в ней зарю спасения народа твоего.

Радуйся, солнце, возшедшее по заре той.

Радуйся, свете, старейшины твоя просветивый.

Радуйся, вся люди твоя ко Христу приведый.

Радуйся, Владимире, державы нашея просветителю.

Кондак 5

Боготканную одежду святаго Крещения восхотев получити, помыслил еси, откуду и како имети имаши толик сонм пастырей и учителей, да просветят вся люди твоя с тобою, и како пояти себе жену, в вере святей испытанну, дому твоему благую строительницу, чадом твоим матерь во Христе, советницу же всем во благочестии, и о сем всем поревновав, дух твой приведе тя ко стране Гречестей, идеже вернии от лет древних благочестно воспевают Богу: Аллилуиа.

Икос 5

Видевше царие гречестии всю страну твою во тьме идолослужения коснящу, небрегоша тя, яко кумиром служаща, обаче побеждени бывше от тебе и уведевше крепкое произволение твое прияти святое Крещение и вся люди твоя ко Христу привести, исполнишася радости и вдаша ти сестру свою Анну на брак, пастыри же и учители – народу твоему. Темже и мы, присно радующеся святому сему союзу твоему, воспеваем тя:

Радуйся, яко посетил есть тя Восток свыше.

Радуйся, яко звезда Всевышняго приведе тя к востоку, идеже Премудрость созда себе дом и утверди столпов седмь, седмь Соборов Вселенских, иже утвердиша веру Христову по вселенней.

Радуйся, яко сия есть вера апостольская, сия вера вселенную всю утверди.

Радуйся, яко от чистаго источника чистое учение Христово приял еси.

Радуйся, дому твоего и чад твоих добрый рачителю.

Радуйся, всего народа твоего премудрый наставниче.

Радуйся, Владимире, державы нашея просветителю.

Кондак 6

Пастырие и учители, ихже приял еси, прехвальне княже, от царей греческих, яко да напаяют всю страну твою ученьми Божественными, со тщанием течаху на делание свое, благодарственно поюще призвавшему народ твой ко спасению Господу Богу: Аллилуиа.

Икос 6

Возсия пречудне чувственный свет в помраченною недугом слепоты очию твоею, в душе твоей свету благодати возсиявшу, егда, просветився Божественным Крещением, изшел еси от святыя купели, еже ощутив, радостно воскликнул еси: «Ныне познах Бога Истиннаго». Темже ублажаем тя:

Радуйся, светильниче, огнем Божественныя благодати во тьме язычества возжженный.

Радуйся, благовестителю света Христова, омраченная очеса и сердца народа твоего отверзаяй.

Радуйся, яко умною очию твоею провидел еси Божие смотрение о державе твоей.

Радуйся, яко до конца потщался еси, да и вси людие твои просветятся в нем.

Радуйся, богосветлая главо князей киевских.

Радуйся, славнейшее украшение и похвало Церкве Христовы.

Радуйся, Владимире, державы нашея просветителю.

Кондак 7

Хотя просветити Божественным Крещением народ твой, первее повелел еси креститися сыновом и вельможам твоим, да вси людие, последующе стопам их, со благим произволением приступят ко святому Крещению, благочестно зовуще Богу: Аллилуиа.

Икос 7

Ново творение во Христе яви тя, по святем Крещении, образ жития твоего: ревнитель бо первее быв идолослужения, последи выну по вере Христовой ревновал еси: возлюбил же еси кротость и милосердие, воздержание и целомудрие и все житие по заповедем Господним. Чудящеся убо благому пременению сему, благочестно зовем ти:

Радуйся, яко росою Святаго Духа пламень страстей в себе угасил еси.

Радуйся, яко огнем Божественныя благодати вся помышления и вся чувствия твоя согрел еси.

Радуйся, селения Господня, церкви святыя, паче всех селений земных возлюбивый.

Радуйся, Божественныя службы и Христова учения паче всех деяний и учений взыскавый.

Радуйся, образ новаго жития всем людем твоим в себе показавый.

Радуйся, сирых и убогих благий кормителю и попечителю.

Радуйся, Владимире, державы нашея просветителю.

Кондак 8

Странное бе, купно же и радостотворное видение, егда тмочисленный сонм мужей и жен, юношей и дев, таже незлобивых младенец с радостию течаху к реце Днепру, якоже ко Иордану, идеже крещахуся во имя Отца и Сына и Святаго Духа, иереом на брезе возносящим тайнодейственныя молитвы и воспевающим Господу песнь: Аллилуиа.

Икос 8

Весь был еси объят неизреченною радостию, достоблаженне княже, зря крещаемыя люди твоя, и во умилении сердца, воздав хвалу Спасителю Богу, усердно молил еси Его, да призрит на новопросвещенныя люди Своя, да утвердит их в вере и благочестии и да прославит имя Свое в державе твоей. Воспоминающе убо преславное и прерадостное сих сбытие, приносим ти благодарственныя и похвальныя песни сия:

Радуйся, виновниче спасения безчисленных душ в земли нашей.

Радуйся, неоскудеваемый источниче благословений и милостей Божиих к народу твоему.

Радуйся, благий вертоградарю, сад Божественныя веры в державе твоей насадивый.

Радуйся, поточе сладости, напоивый водою благочестия люди твоя.

Радуйся, яко Божественную веру прославил еси, прелесть же идольскую посрамил еси.

Радуйся, яко Царь царей дарова тебе мудрость Соломонову, кротость Давидову, ревность Илиину, правоверие апостольское.

Радуйся, Владимире, державы нашея просветителю.

Кондак 9

Все естество Ангелов, хранителей рода человеческаго, прослави тя, благоверный княже, егда повелел еси отцем и матерем вдаяти дети своя в учение книжное, да разумеют, яже веруют, и да познают, како житие свое добре по вере провождати. Темже и ныне призри на учащияся Божественным Писанием, и на отцев и матерей их, пастырей же и учителей, споспешествующих им во учении, благослови, укрепи и настави я во трудех их, да возрастают в вере истинней и в добром житии, поюще Богу: Аллилуиа.

Икос 9

Ветии многовещанныя не могут достойно изобразити величие благодеяний, дарованных тобою, княже, земли твоей: водворив бо в ней Божественную веру, избавил еси ю от мрака языческаго и вечныя погибели, открыл еси ей путь ко истинному просвещению, ко спасению и земному благоденствию. Сего ради со благодарением благочестно зовем ти:

Радуйся, могущества и славы державы нашея основателю.

Радуйся, истиннаго просвещения и благочестия в ней насадителю.

Радуйся, в народе твоем языческих суеверий и злых обычаев искоренителю.

Радуйся, идольских требищ и кумиров потребителю.

Радуйся, святых храмов создателю.

Радуйся, равноапостольному царю Константину равночестный подобниче.

Радуйся, Владимире, державы нашея просветителю.

Кондак 10

Спасти хотя от вечныя погибели державу твою, в бездне идолослужения гибнувшую, подъял еси велия труды и попечения, обходя грады и веси земли твоея и посылая повсюду пастыри духовныя, во еже Божественною верою и святым Крещением люди твоя просветити и научити их Единому Истинному Богу пети: Аллилуиа.

Икос 10

Стена твердая был еси земли твоей во вся дни живота твоего противу врагов тоя и виновник благоденствия и славы ея; буди и ныне защитник необоримый от враг видимых и невидимых и помощник в нуждех и скорбех нам, с любовию вопиющим тебе:

Радуйся, благопопечительнейший пастырю народа твоего.

Радуйся, благосострадательнейший отче сирых и страждущих.

Радуйся, готовый споспешниче ищущих вечнаго спасения и истиннаго просвещения.

Радуйся, слава и радование страны нашея.

Радуйся, присный помощниче в многотруднем деле народоправления.

Радуйся, мощный споборниче в брани воинства нашего и вождей его.

Радуйся, Владимире, державы нашея просветителю.

Кондак 11

Пение умиленное приими от нас, угодниче Божий, сокруши твоими молитвами вся враги наша, насади православную веру среди язык страны нашея, неведущих Истиннаго Бога, искорени в ней вся ереси и расколы, да вси едиными усты и единым сердцем славят Бога, поюще Ему: Аллилуиа.

Икос 11

Светозарное светило, просвещающее сиянием своим страну нашу, ты еси, достохвальне княже Владимире, разгоняя мрак идолослужения и показуя путь к истинному просвещению и Небесному блаженству. Сего ради, прославляюще тя, глаголем:

Радуйся, звездо, просвещенная от незаходимаго Солнца Правды.

Радуйся, путеводителю, правую стезю к вечному спасению нам открывый.

Радуйся, мощный споспешниче и укрепление проповедников православныя веры.

Радуйся, присный покровителю благих наставников юношества и всех благотрудящихся на пользу общую.

Радуйся, скорый помощниче всем к помощи твоей прибегающим.

Радуйся, яко всем усердно тя чтущим благотворныя советы подаеши.

Радуйся, Владимире, державы нашея просветителю.

Кондак 12

Благодать Пресвятаго Духа испроси нам, преблагий пастырю наш, от Всещедраго Бога и Спаса нашего, вразумляющую и укрепляющую нас в деле спасения, да не безплодна будет в нас насажденная тобою святая вера, но да уклоняющеся от путей нечестия и заблуждений, ходим во свете заповедей Божиих и достигнем вечнаго блаженства, воспевающе Богу: Аллилуиа.

Икос 12

Поюще твоя премногая и преславная благодеяния, явленная державе нашей в просвещении тоя светом Божественныя веры, купно же велия твоя труды и подвиги, во благоустроение ея подъятыя, усердно благодарим и восхваляем тя, с любовию зовуще:

Радуйся, богоизбранне и богопрославленне княже земли нашея.

Радуйся, несокрушимое ограждение ея, покрове и защищение.

Радуйся, райское древо, произрастившее две пречудныя отрасли – святых страстотерпцев Бориса и Глеба.

Радуйся, первостоятелю святых Церкви нашея.

Радуйся, апостолов сопрестольниче и сликовствователю.

Радуйся, яко на землю нашу выну призираеши и благ временных и вечных ей у Бога ходатайствуеши.

Радуйся, Владимире, державы нашея просветителю.

Кондак 13

О прехвальный и предивный равноапостоле, великий княже Владимире! Приими милостивно от нас благодарение сие о всех, яже тобою воздаде Господь нам, отцем и праотцем нашим и всей державе нашей, начен от дне Крещения даже до сего часа, и моли Всеблагаго Бога пробавити милость Свою на ны и на роды родов наших, утвердити ны в правоверии и благочестии, хранити же от всех бед и зол, да сподобимся с тобою, якоже чада со отцем, во веки воспевати Богу: Аллилуиа.

(Этот кондак читается трижды, затем икос 1 и кондак 1)

Молитва

О великий угодниче Божий, богоизбранный и богопрославленный, равноапостольный княже Владимире! Ты отринул еси зловерие и нечестие языческое, уверовал еси во Единаго Истиннаго Триипостаснаго Бога и, восприяв святое Крещение, просветил еси светом Божественныя веры и благочестия всю страну нашу. Славяще убо и благодаряще Премилосердаго Творца и Спасителя нашего, славим, благодарим и тя, просветителю наш и отче, яко тобою познахом спасительную веру Христову и крестихомся во имя Пресвятыя и Пребожественныя Троицы. Сею убо верою избавихомся от праведнаго осуждения Божия, вечнаго рабства диаволя и адова мучительства, сею же верою восприяхом благодать всыновления Богу и надежду наследования Небеснаго блаженства. Ты еси первый вождь наш к Начальнику и Совершителю нашего вечнаго спасения Господу Иисусу Христу, ты еси теплый молитвенник и ходатай о стране нашей и о всех людех. Не может язык наш изобразити величие и высоту благодеяний, тобою излиянных на землю нашу, отцев и праотцев наших и на нас, недостойных. О всеблагий отче и просветителю наш! Призри на немощи наша и умоли Премилосердаго Царя Небеснаго, да не прогневается на ны зело и не погубит нас со беззаконьми нашими, но да помилует и спасет нас, по милости Своей; да всадит в сердца наша спасительный страх Свой, да просветит Своею благодатию ум наш, во еже разумети нам пути Господни, оставити стези нечестия и заблуждений, тщатися же во стезях спасения и истины, неуклоннаго исполнения заповедей Божиих и уставов Святыя Церкве. Моли, благосерде, Человеколюбца Господа, да пробавит нам великую милость Свою, да избавит нас от нашествия иноплеменных, от внутренних нестроений, мятежей и раздоров, от глада, смертоносных болезней и от всякаго зла, да подаст нам благорастворение воздуха и плодоносие земли, да даст пастырем ревность о спасении пасомых, всем же людем споспешение, о еже усердно службы своя исправляти, любовь между собою и единомыслие имети, на благо же отечества и Святыя Церкве верне подвизатися; да возсияет свет спасительныя веры в стране нашей во всех концех ея, да упразднятся вся ереси и расколы, да тако поживше в мире на земли, сподобимся с тобою вечнаго блаженства, хваляще и превозносяще Бога во веки веков. Аминь.

ЖИТИЕ

Святой равноапостольный князь Владимир был внуком святой Ольги, сыном Святослава и ключницы Малуши, предположительно дочери древлянского князя Мала, всегда бывшей при Ольге и принявшей вместе с ней Крещение в Царьграде. Выступая против связи Святослава с Малушей, Ольга сослала ее на свою родину – в Выбуты, – где и родился около 960 года будущий креститель Киевской Руси.

К 978 году возмужавший Владимир, тогда яростный язычник, выходит из межкняжеских смут, возникших после гибели Святослава, единоличным победителем – «единодержцем» Киевского государства. По Божию промыслу Владимир вскоре отходит от язычества. Мудрый правитель, он начинает осознавать, что только вера в одного Истинного Бога сможет объединить и укрепить Киевскую державу.

По приглашению князя в Киев приходили проповедники из разных стран: послы от болгар-мусульман, живших за Волгой, немцы-латиняне, иудеи и греки. Никто из них не произвел на князя столь сильного впечатления, как православный греческий проповедник, который в заключение своей беседы показал ему картину Страшного суда. Святой Владимир решает отправить в Константинополь своих людей, чтобы испытать на месте, чья вера лучше. Когда эти послы прибыли в Константинополь, то великолепие Софийского храма, стройное пение придворных певчих и торжественность патриаршей службы тронули их до глубины души. Не забыл Владимир и о том, что равноапостольная княгиня Ольга крестилась в Царьграде. В конечном итоге святой Владимир решает принять Крещение от греков.

Владимир решил креститься, но не хотел подчинять Русь Византии. Поэтому вскоре после возвращения послов Владимир пошел войной на греков и взял Херсонес (Корсунь). Отсюда он отправил послов в Константинополь к императорам Василию и Константину с требованием руки сестры их, царевны Анны. Те отвечали ему, что царевна может быть женой только христианина. Тогда Владимир объявил, что желает принять христианскую веру. Царевна прибыла в Херсонес (Корсунь), Владимир крестился (988 г.) и был наименован Василием. С царевной прибыл посвященный святым патриархом Николаем II Хризовергом на Киевскую кафедру митрополит Михаил со свитой, клиром, многими святыми мощами и другими святынями. В древнем Херсонесе (Корсуни) свершилось венчание святого равноапостольного Владимира и блаженной Анны.

В 988 году Киевская Русь стараниями князя Владимира приняла Православное Христианство. Всюду по Святой Руси, от древних городов до дальних погостов, повелел святой Владимир ниспровергнуть языческие требища, иссечь истуканов, а на месте их ставить по холмам церкви, освящать престолы для Безкровной Жертвы. Храмы Божии вырастали по лицу земли, на возвышенных местах, у излучин рек, на старинном пути «из варяг в греки» – словно путеводные знаки, светочи народной святости.

С первых веков христианства ведет начало обычай воздвигать храмы на развалинах языческих святилищ или на крови святых мучеников. Следуя этому правилу, святой Владимир построил храм святого Василия Великого на холме, где находился жертвенник Перуна, и заложил каменный храм Успения Пресвятой Богородицы (Десятинный) на месте мученической кончины святых варягов-мучеников Феодора и Иоанна.

Тогда же святым Владимиром была пожалована Церкви десятина, почему и храм, ставший центром  сбора церковной десятины, нарекли Десятинным.

Для утверждения веры в новопросвещенном народе нужны были ученые люди и школы для их подготовки. Поэтому святой Владимир со святым митрополитом Михаилом занялись обустройством училищ для обучения детей грамоте.

Средством христианской проповеди были и знаменитые пиры святого Владимира: по воскресеньям и большим церковным праздникам после Литургии выставлялись для киевлян обильные праздничные столы, звонили колокола, славословили хоры, пели былины и духовные стихи. Больным же и нищим доставлял по улицам великие кады и бочки меду, хлеб, мясо, рыбу, сыр, желая, чтобы все приходили и ели, славя Бога.

В 1007 году святой Владимир перенес в Десятинную церковь мощи святой равноапостольной Ольги. А четыре года спустя, в 1011 году, там же была погребена его супруга, сподвижница многих его начинаний, блаженная царица Анна.

Креститель Руси скончался в Спас-Берестове 15 июля 1015 года. Он правил в Киевской Руси тридцать семь лет (978–1015), из которых двадцать восемь лет прожил во святом Крещении. Мощи святого равноапостольного Владимира были положены в мраморной раке, поставленной в Климентовском приделе Десятинного Успенского храма рядом с такой же мраморной ракой царицы Анны.

Во время монголо-татарского нашествия честные останки святого князя Владимира были погребены под развалинами Десятинного храма. В 1635 году они были обретены, честная глава святого князя Владимира покоилась в Успенском соборе Киево-Печерской Лавры, малые частицы святых мощей – в разных местах.

По благословению

митрополита Херсонского и Таврического Иоанна