НА ВЕЛИЦЕЙ ВЕЧЕРНИ

На Господи, воззвах:

Стихиры праздника, и святым, глас 8:

Лик праведных твоих, Господи, / на Небесех украсися / прославлением собора Херсонских святых, / ихже и на земли Церковь воспевает, / тех убо молитвы о нас приими, Человеколюбче, / яко имеяй велию милость.

Все отложивше житейское попечение / и сладость текущую презревше, / святии земли Херсонския, / крест взясте, яко иго божественное, / и Христу последовасте, / в Небесный покой чудно вселистеся, / приидите к нам, яко скории помощницы, / сподобляюще даров невещественных / и молящеся о нас усердно, / праздник ваш совершающих святолепно.

Неувядаемыми венцы венчалися есте / от руки Вседержителя Бога, / святителие, мученицы, преподобнии / и праведнии Херсонския земли. / Сего ради и мы имамы ходатаев Небесных, / ихже усердно молим: / помозите нам подвигом добрым подвизатися / и веру православную соблюсти.

Небеснии граждане, / святии земли Херсонския, / не забудите земное отечество ваше, / яко на вас упование / по Бозе и Богородице возложихом.

Слава, глас тойже:

Радуйся, Церковь Херсонская, / во святых своих дивно возвеличившаяся: / тии бо, благодать изобильну от Господа стяжавши, / постничеством и мученичеством, / проповедию слова Божия / и хранением истины Православия  воистину прославишася; / сего ради, ныне светло праздник тех совершающе, / молим Отца и Сына и Святаго Духа / помиловати души наша.

И ныне, праздника или Богородичен,

глас тойже:

Царь Небесный за человеколюбие на земли явися / и с человеки поживе, / от Девы бо Чистыя плоть приемый / и из Нея прошедый с восприятием, / Един есть Сын, сугуб естеством, / но не Ипостасию. / Темже, совершенна Того Бога/ и совершенна Человека воистину проповедающе, / исповедуем Христа Бога нашего, / Егоже моли, Мати Безневестная,/ помиловатися душам нашим.

Вход. Прокимен дня. Чтения 3.

Пророчества Исаиина чтение (глава 43):

Тако глаголет Господь: вси языцы собрашася вкупе, и соберутся князи от них, кто возвестит сия в них? Или яже от начала, кто слышана сотворит вам? Да приведут свидетели своя и оправдятся, и да услышат, и да рекут истину. Будите Ми свидетели, и Аз Свидетель, -  глаголет Господь Бог, -  и отрок, егоже избрах, да познаете и веруете Ми, и разумеете, яко Аз есмь; прежде Мене не бысть ин бог и по Мне не будет. Аз есмь Бог, и несть, разве Мене, спасаяй. Аз возвестих и спасох, уничижих, и не бе в вас чуждий. Вы Мне свидетели, и Аз Господь Бог. И еще от начала Аз есмь, и несть от рук Моих избавляяй; сотворю, и кто отвратит то? Сице глаголет Господь Бог, избавляяй вас, Святый Израилев.

Премудрости Соломоновы чтение (глава 3):

Праведных души в руце Божией, и не прикоснется их мука. Непщевани быша во очесех безумных умрети, и вменися озлобление исход их. И еже от нас шествие - сокрушение; они же суть в мире. Ибо пред лицем человеческим аще и муку приимут, упование их безсмертия исполнено. И вмале наказани бывше, великими благодетельствовани будут, яко Бог искуси я и обрете их достойны Себе. Яко злато в горниле, искуси их и, яко всеплодие жертвенное, прият я. И во время посещения их возсияют и, яко искры по стеблию потекут. Судят языком и обладают людьми, и воцарится Господь в них во веки. Надеющиися Нань разумеют истину, и вернии в любви пребудут Ему; яко благодать и милость в преподобных Его и посещение во избранных Его.

Премудрости Соломоновы чтение (главы 5 и 6):

Праведницы во веки живут, и в Господе мзда их, и попечение их у Вышняго. Сего ради приимут Царствие благолепия и венец доброты от руки Господни, зане десницею покрыет я и мышцею защитит их. Приимет всеоружие - рвение Свое и вооружит тварь в месть врагом. Облечется в броня правды и возложит шлем - суд нелицемерен. Приимет щит непобедимый преподобие - поострит же напрасный гнев во оружие, споборет же с ним мир на безумныя. Пойдут праволучныя стрелы молниины и, яко от благокругла лука облаков, на намерение полетят. И, от каменометныя ярости исполнь, падут грады; вознегодует на них вода морская, реки же потопят я нагло; сопротив станет им дух силы и, яко вихор, развеет их. И опустошит всю землю беззаконие, и злодейство превратит престолы сильных. Слышите убо, царие, и разумейте, навыкните, судии концев земли. Внушите, держащии множества и гордящиися о народех языков, яко дана есть от Господа держава вам и сила от Вышняго.

На литии стихиры святым, глас 4:

Украсися, доме церковный, / прииде день торжества святаго - / память мужей и жен богомудрых, / положивших в житии своем основание - / Христа Жизнодавца.

Вернии раби и мудрии Господа своего, / Иже поставив вас над имением / и, призрев в нощныя стражи жизни сея / и обрет неусыпно бдящих, / введе в Чертог радости Своея; / темже молим вы: / не престайте подающе нам пищу благодати Божия / во время свое ходатайствы вашими / и молящеся Господеви помиловати души наша.

Слава, святым, глас 8:

Мужайся, Церковь Христова, / и державствуй над всуе борющими! / Христови бо друзи о тебе пекутся, / и предстояще, и обстояще, / ихже общий праздник ныне / совершаеши светло.

И ныне, праздника или Богородичен, глас тойже:

Безневестная Дево, / Яже Бога неизреченно заченши плотию, / Мати Бога Вышняго, / Твоих рабов мольбы приими, Всенепорочная, / всем подающи очищение прегрешений, / ныне наша моления приемлющи, / моли спастися всем нам.

На стиховне стихиры праздника или святым, глас 4:

Ваше, вси святии в земли Херсонстей прославльшиися, / верою, любовию, духом, / чистотою и смирением, / благочестным житием, доброделанием и молением / Богу угодившии и святостию украсившиися, / днесь совершаем светлое торжество / и, возносяще молитвы к прославльшему вы Христу Богу нашему, / молимся прилежно, / да вашим ходатайством / дарует Господь душам нашим мир и велию милость.

Стих: Дивен Бог во святых Своих, / Бог Израилев.

Наста днесь великое торжество в крае нашем, / прославляем бо всех Херсонских святых, / многими воистину делы и словесы Богу послуживших, / ныне же прославльшему их Христу предстоящих / и молящихся о нас прилежно, / любовию совершающих святую память их.

Стих: Святым, иже суть на земли Его, / удиви Господь вся хотения Своя в них.

Днесь, вернии, похвальными венцы / венчаем вся святыя Церкви Херсонския, / Престолу Божию предстоящия / и милостивно нас посещающия, / страны нашея хранители, / веры истинныя в ней утверждение, /православных поборники, / ихже молитвами / возношение врагов наших Христос Бог низложи, / имеяй велию милость.

Слава, глас 8:

Память святых Херсонския земли совершающе, / Церковь Божия духовно радуется / и молится ко Спасу Христу: / ихже молитвами спаси люди Твоя / и благослови достояние Твое.

И ныне, праздника или Богородичен, глас тойже:

Небеса ныне радуются / и земля с человеки веселится, / днесь бо Святая Херсонская Церковь / совершает духовное торжество, / прославляющи всех святых в ней просиявших, / ихже молитвами и Богородицы / Церковь и страну нашу в мире сохрани, / Многомилостиве.

Тропарь святым, глас 4:

Церкве Христовы светильницы, / истиннии хранителие апостольских преданий, / святии вси земли Херсонския, / приснии наши молитвенницы и заступницы, / молите Владыку Христа Бога нашего / мир и благоденствие отечеству нашему даровати / и душам нашим велию милость.

НА УТРЕНИ

По 1-м стихословии седален, глас 2

Солнце Правды, Христос, вас посла, якоже лучи, просвещающия землю Херсонскую, угодницы Божии, от рода нашего просиявшия. Темже молите Его, святии, облежащий нас ныне облак неверия разгнати и даровати нам мир и велию милость.

Слава, и ныне, праздника или Богородичен:

Под кров Твой, Пречистая Дево, прибегающих мольбу принеси о нас Человеколюбцу Христу Богу, во еже спастися рабом Твоим.

По 2-м стихословии седален, глас 4:

Яко солнца светлая, во тьме греха показастеся концем, святии чудотворцы Херсонстии, просвещающе бо верныя, согреваете тех к Божественней любви и, яко котвы крепкия, во время треволнения утверждаете колеблющаяся в вере сердца.

Слава, и ныне, праздника или Богородичен:

Красоте девства Твоего и пресветлой чистоте Твоей Гавриил удивися, вопияше Ти, Богородице: кую Ти похвалу принесу достойную? Что же возъименую Тя? Недоумеваю и ужасаюся! Темже, яко повелен бых, вопию Ти: радуйся, Благодатная.

Величание:

Величаем вас, / преславнии чудотворцы земли Херсонския, / града нашего Небеснии заступницы, / и о душах наших / усерднии молитвенницы.

Псалом избранный:

Благо есть исповедатися Господеви и пети имени Твоему, Вышний, возвещати заутра милость Твою и истину Твою на всяку нощь.

Велий Господь и хвален зело, во граде Бога нашего, в горе святей Его.

Род и род восхвалят дела Твоя и силу Твою возвестят.

Великолепие славы святыни Твоея возглаголют и чудеса Твоя поведят.

Память множества благости Твоея отрыгнут и правдою Твоею возрадуются.

По полиелеи седален святым, глас 5:

Светло совершающе настоящее торжество, восхвалим угодники Божия, землю Херсонскую благочестием озарившия, и веру православную в ней утвердившия, и ко Отечеству Небесному путь нам указующия.

Слава, и ныне, праздника или Богородичен:

Пречистая Богородице Дево, помилуй нас, прибегающих к Тебе с верою и просящих теплаго Твоего заступления, можеши бо, яко Благая, всех спасти матерними Твоими молитвами.

Прокимен, глас 4: Радуйтеся, праведнии о Господе, / правым подобает похвала.

Стих: Буди, Господи, милость Твоя на нас, якоже уповахом на Тя.

Евангелие от Матфея, зачало 10.

По 50-м псалме стихира, глас 6:

Ныне лик всех святых / в земли Херсонстей просиявших радуется, / Небесное Царство наследовавше / и Христа славяще, / яко раби Его бывше, / всельшиися в жизнь вечную, / за еже на земли свято поживше; / ихже молитвами, Христе Боже, / помилуй и спаси нас.

Канон праздника и святым.

КАНОН святым, глас 8

Песнь 1

Ирмос: Воду прошед, яко сушу, / и египетскаго зла избежав, / израильтянин вопияше: / Избавителю и Богу нашему поим.

Припев: Вси святии земли Херсонския, молите Бога о нас.

Воспоим согласно вси в песнех духовных во благочестии просиявшия божественныя отцы и матери наша, освятившия землю Херсонскую, яже Церковь Православная воспита.

Празднующе ныне память всех святых в земли Херсонстей просиявших, верою, любовию и благочестием благоугодивших Господеви, молитвеннаго их ходатайства о нас пред Богом усердно просим.

Духовный лик составльше, вернии, славныя отцы и матери Церкве Херсонския песньми постим, озаряющия сердца верою и любовию совершающих память их.

Богородичен: Пресвятая Владычице Богородице, помолися за ны Богу со всем собором Херсонских святых, да спасет Господь души наша.

Песнь 3

Ирмос: Ты еси утверждение притекающих к Тебе, Господи, / Ты еси Свет омраченных, / и поет Тя дух мой.

Светло совершаем торжество ваше и достойно почитаем вы, угодницы земли Херсонския, Богу угодившии и на Небесех со всеми святыми прославленнии.

Благодарим языцы, тобою просвещшиися и от земли на Небеса тобою, Апостоле Христов Андрее, возведеннии, служения бо вражия отступльше, быхом сопричастницы святых Ангел, Господния же славы общницы.

Радуяся, вшел еси, священномучениче Капитоне, в пещь, пребыл же еси неопалим, якоже отроцы трие, неверныя изымая огня будущаго, веровавшия Божественным твоим чудесем.

Богородичен: Иконы Твоея Касперовския явление, Богородице Пренепорочная, славословим днесь и Твое заступление празднуем, яко бо Мати сущи Живота, молиши о нас Сына Твоего и Бога нашего, на Тя упование и надежду возложивших.

Кондак и икос праздника.

Седален, глас 2:

Яко солнце светлое, возсия честная память святых земли Херсонския, освещающи и согревающи сердца наша, паче же призывающи подражати житию их и ревности о вере.

Слава, и ныне, праздника или Богородичен:

Царицу и Владычицу Тя именуем, Дево, под кров Твой прибегающе и помощи у Тебе просяще: во умилением поющих Ти молебный глас услыши, Заступнице наша усердная.

Песнь 4

Ирмос: Услышах, Господи, / смотрения Твоего таинство, / разумех дела Твоя / и прославих Твое Божество.

Ангели земнии и человецы Небеснии, звезды всесветлыя неба церковнаго, похвалы наша приимите и во Православии утвердите чада ваша духовныя.

Проповедниче Бога Слова изрядный явился еси, отче, сердца верных просвещающи спасительными смыслы, темже и нас к познанию истины настави и сердца наша светом веры просвети, святителю Иннокентие преславне, земли нашея новый Златоусте. 

Совесть имел еси благу и око сердечное, взирающее к Богу, темже внят молитве твоей, премудре отче Феодосие, и с преподобными сочета тя.

Богородичен: Ты Едина Богу, всяческая мудростию создавшему, Мати позналася еси Неискусобрачная, Дево Пречистая, темже Тя Ангели и человецы песньми величают.

Песнь 5

Ирмос: Утренююще, вопием Ти: / Господи, спаси ны, / Ты бо еси Бог наш, / разве Тебе, иного не вемы.

Ничтоже возлюбивше на земли паче Зиждителя, святии, прияли есте труды и подвиги любве ради Христовы, темже сподобилися есте наследия праведных; молите Христа о нас, почитающих память вашу. 

Мученическими венча тя честьми воистину, и постническими труды, преподобне отче Парфение, Трудоположник Един Бог наш, на убийцы укрепивый тя.

Помянем, братие, како Божиею благодатию благоверный Феодор во граде Херсонстем душу свою за ближних своих полагает, и от смертоносныя болезни многих спасает, и любовь злым и благим делами являет.

Богородичен: Надеждо и Предстательство Тебе поющих, яко Владычица Чистая, Пречистая Богородице Дево, Едина Всепетая, моли во еже спастися нам.

Песнь 6

Ирмос: Молитву пролию ко Господу / и Тому возвещу печали моя, / яко зол душа моя исполнися / и живот мой аду приближися, / и молюся, яко Иона: / от тли, Боже, возведи мя.

Страстей прилози и многия печали и беды обуревают нас; утешение нам подайте, святии, к Богу вашими молитвами.

Наставниче и молитвениче наш, священномучениче Прокопие, со иереем Иоанном, сподвижником твоим, и новомученики прииди, стани с нами: днесь бо празднуем честную память вашу. 

Ангели воспеша страдания твоя, и демонския полки вострепеташа, егда ко Господу шествовал еси, яко знамение победы Крест носяще, священномучениче преславный Анатолие.

Богородичен: Души наша, зноем греховным истаявшия, напой водами животочными, Дево, яко да класы плодоносны возрастим, Чистая, Божественнаго умиления.

Кондак святым, глас 5

Святии чудотворцы Херсонския земли, / иже ангельским житием просиявше, / Божественных сподобистеся даров, / Спасу служаще со Ангелы непрестанно, / молите избавитися нам от всякаго прегрешения / и душам нашим даровати велию милость.

Икос

Приидите, постническое сословие, приидите, чистоты рачителие, приидите, празднолюбцы и всяк возраст, песньми духовными похвалим наших молитвенников, в них имуще постников похвалу, печальных утешителей, болящих посетителей и сущим в бедах скоропослушных помощников, точащих всем исцеления обильно, обретоша бо благодать чудес Божиим велением и молятся душам нашим даровати велию милость.

Песнь 7

Ирмос: От Иудеи дошедше, отроцы / в Вавилоне иногда / верою Троическою пламень пещный попраша, поюще: / отцев Боже, благословен еси.

Милосердия бездну прострите нам, блаженнии, призывающим вас на помощь, вы бо у Милосердаго Бога дерзновение велие стяжали есте. 

Радуется ныне земля Херсонская, ликуют православных соборы, почитающе подвиги святителей Христовых Павлина, Парфения, Онуфрия и Антония, мужественно нечестия силу победивших и венцы мученическия от Господа восприимших.

Милостиви будите к нам, немощным, вернии свидетелие Евангелия Христова Александре, Матфее и Димитрие, и малодушия нашего не возгнушайтеся, но прощения нам от Господа испросите, страданьми своими Его славно прославившии.

Богородичен: Едину в женах Благословенную Богородицу, яко Божие селение преблаголепно, вси радостию прославим.

Песнь 8

Ирмос: Царя Небеснаго, / Егоже поют вои Ангельстии, / хвалите и превозносите во вся веки.

Исцеления источаете, Божии угодницы, всем к вам притекающим любовию и вопиющим: превозносимый отцев Боже, благословен еси.

Вас, преславнии исповедницы: святителю Антоние, преподобне Геннадие и пресвитере Философе, в тяжкую годину испытаний Господь показа светильники Своя, просвещающия души верных светом боговедения.

Вслед Христа последовал еси, радуюяся, носящи крест свой на раме, исповедниче прехвальне Варсонофие, мучителей бо не убоявся, силою Креста укрепляемь.

Богородичен: Пречестную Твою икону Феодоровскую, Всепетая, неизреченными чудесы и благодатьми украсивши, в Херсонстей земли прославила еси; сего ради покланяющеся ей, песнь благодарения Тебе приносим.

Песнь 9

Ирмос: Воистинну Богородицу / Тя исповедуем, / спасеннии Тобою, Дево Чистая, / с Безплотными лики Тя величающе. 

Страдания твоя и смерть мученическая, блаженне Стефане, свидетельствоваху любовь твою ко Христу, Сыну Божию; темже ныне жизни вечныя наслаждаяся, молися о нас, любовию тя прославляющих.

Светлое ваше праздненство, светом Духа Божия сияющее, озаряет души наша, верою чтущих вас, Евтропие преподобная и Домнико блаженная.

О велицыи сродницы наши, земли Херсонския заступницы, именованнии и непоименованнии, явленнии и неявленнии, Небеснаго Сиона достигшии и славу многу от Бога приимшии, утешение нам, в скорби сущим, испросите, веру нашу немощную укрепите и люди расточенныя соберите, от нас, яко дар, песнь благодарения приемлюще.

Богородичен: О Дево Благодатная, грады и веси наша честнаго лика Твоего изображении, яко благоволения знаменьми, обогатившая, благодарение наше приими и от бед лютых отечество наше избави, вси бо Тя яко покров всемощный страны нашея величаем.

Светилен:

В песнех восхвалим светила земли Херсонския, таинники Христа, Божественнаго Слова, Иже сих просветившаго и возлюбившаго и помощники нам ко спасению даровавшаго.

 Слава, и ныне, праздника или Богородичен:

Пречистыя руце Твоя, Дево Мати, простерши, покрый уповающия на Тя и Сыну Твоему зовущия: всем подаждь, Христе, милости Твоя.

На хвалитех стихиры праздника, и святым, глас 8:

Прехвальнии Херсонстии чудотворцы, / вас ни земля наша потаила есть, / но Небо прият вы, / и отверзошася вам райския двери, / и, внутрь рая бывше, / древа жизни наслаждаетеся, / Христу молитеся / даровати отечеству вашему мир/ и велию милость.

Приидите, празднолюбцы вси, / воспоим святых земли Херсонския, / сии бо явишася в последняя лета / слава и утверждение православныя веры, / теплии предстателие наши, / немощствующих врачеве, / скорбящих утешение, / и молятся, о еже спастися нам.

Святии сродницы наши, / цвети духовнии земли Херсонския, / похвало наша и утверждение / и благоутишное пристанище, / вами Церковь наша хвалится, / стяжавши вас яко неистощимое сокровище, / жития же ваша и многая чудеса / прославляют прославльшаго вас Господа, / Егоже прилежно молите / даровати душам нашим велию милость.

Днесь град Херсон вашу память празднует, / сему бо явистеся столпи, / и Божественная забрала, / и утверждение, / пастырие, и учителие, / и молитвенницы, богоблаженнии.

Слава, глас 6:

Вси святии Херсонския земли, / святителие, мученицы, преподобнии и праведнии, / ныне прославляемии, / многая ваша имена, ведомая нам и неведомая, / на тверди церковней возсиявшая, / мир просвещаете / и от бед молитвами вашими нас сохраняете. / Мы же, сошедшеся днесь, / песненно восхваляем вас: / радуйтеся, святии вси в земли Херсонстей просиявшии; / радуйтеся, славо и похвало страны сия; / радуйтеся, столпи непоколебимии Святыя Церкви Христовы; / радуйтеся, веры утверждение, и мира умирение, / и теплии молитвенницы о душах наших.

И ныне, праздника или Богородичен, глас тойже:

Богородице, Ты еси Лоза истинная, / возрастившая нам Плод живота, / Тебе молимся: / молися, Владычице, со всеми святыми земли Херсонския / помиловати души наша.

НА ЛИТУРГИИ

Прокимен, глас 4: Святым, иже суть на земли Его, / удиви Господь вся хотения Своя в них.

Стих: Сохрани мя, Господи, яко на Тя уповах.

Апостол ко Евреем, зачало 330.

Аллилуиа, глас 4: Боже, ушима нашима услышахом, и отцы наши возвестиша нам.

Стих: Спасл еси нас от стужающих нам и ненавидящих нас посрамил еси.

Евангелие от Матфея, зачало 11.

Причастен праздника и святым: Благоволит Господь в людех Своих / и вознесет кроткия во спасение.

Молитва

О предивнии чудотворцы и велицыи угодницы Божии, вси святии в земли Херсонстей славно просиявшии! Предстояще Престолу Пресвятыя Троицы, призрите милостивно на ны и на вся люди, к заступлению вашему притекающия. Услышите нас, молящихся вам и чтущих всечестную память вашу. Прострите руце свои ко Владыце Небесе и земли, да соблюдет в мире и благоденствии страну нашу, Церковь да сохранит от гонений, ересей и расколов; умолите Милостиваго Бога нашего, да сохранит вся грады и веси земли нашея и люди, в них живущия, от града и глада, от труса и потопа, от зноя и мраза, от огня и меча, от нахождения иноплеменных и междоусобныя брани, от смертоносныя язвы и от всякаго зла. Ей, святии Божии, потщитеся благоприятным вашим ходатайством умолити Господа, да низпослет нам тихое и богоугодное житие, уврачует Своею благодатию недуги наша душевныя и телесныя и дарует вся, яже в жизни временней потребная и к вечному спасению полезная. Егда же приидет час кончины нашея, да утвердит Господь мир Свой в душах наших, да и мы в истиннем покаянии и чистым сведением совести нашея предстанем пред лицем Его, и сподобимся деснаго стояния, и со всеми святыми воспоем славу Отцу и Сыну и Святому Духу во веки веков. Аминь.

По благословению

митрополита Херсонского и Таврического Иоанна