День памяти:

20 декабря (н. ст.)

Тропарь, глас 4

Правило веры и образ кротос­ти, воздержания учителя яви тя стаду твоему Яже вещей Истина, сего ради стяжал еси смирением высокая, нищетою богатая, отче Амвросие, моли Христа Бога спас­тися душам нашим.

Кондак, глас 3

Божественными догматы облистая, помрачил еси Ариеву прелесть, священнотаинниче и пастырю Амвросие, чудодействуя же силою Духа, страсти различныя яве исцелил еси, отче преподобне, Христа Бога моли спастися душам нашим.

Кондак 1

Избраннаго чудотворца и светильника Церкве Медиоланския святаго Амвросия, приидите, вернии, почтим по достоянию усердною хвалою. Ты же, угодниче Божий милостивый, приими с любовию сие приношение наше, да зовем ти: Радуйся, Амвросие, святителю Христов и чудотворче.

Икос 1

Ангельских сил и всея твари Содетель, еще от младенческих пелен твоих предуказавый доброту души твоея, святе Амвросие, подаде тя, в возраст пришедша, ангела Церкви Медиоланстей, пастыря и учителя словесному стаду Своему, и сим научи нас звати тебе сице:

Радуйся, от колыбели младенческия на служение Церкви роем пчел предуказанный.

Радуйся, ко святительству чрез немотствующаго младенца Богом призванный.

Радуйся, богатство, славу и почести мира презревый.

Радуйся, Единому Господу служити восхотевый.

Радуйся, апостолов Христовых достойный преемниче.

Радуйся, архиереев святых преподобный сопрестольниче.

Радуйся, Амвросие, святителю Христов и чудотворче.

Кондак 2

Видя Небесное промышление, совершившееся в чуднем призвании твоем ко служению Церкви, премудре, посвятил еси прочее время жития твоего на угождение воли Божественней, и принесл еси всего себе и вся своя в жертву призвавшему тя Господу, поя Ему: Аллилуия.

Икос 2

Разумом богопросвещенным, напоенным же от слова Божия, уразумев, яко основание всех доб­родетелей и союз совершенства духовнаго любы к Богу и ближнему есть, благочестне потщался явити ю в себе не словом токмо, но делом и истиною. Темже бедствующим руку скорыя помощи простирал еси, имения своя вся убогим расточил еси, и тако наставил еси нас звати тебе сице:

Радуйся, яко путем нестяжания апостольскаго шествовати возлюбил еси.

Радуйся, яко все свое попечение на Промысл Божий возложил еси.

Радуйся, милосердия, яже во Христе, подражателю.

Радуйся, нищеты Его дольния добровольный последователю.

Радуйся, меньших братий Хрис­товых друже и благодетелю.

Радуйся, скорбящих и озлобленных скорый утешителю.

Радуйся, Амвросие, святителю Христов и чудотворче.

Кондак 3

Силою Вышняго укрепляем, преподобне, труды и скорби великаго служения святительскаго на пользу Церкве Медиоланския, во славу же Господа Иисуса, благодушно понесл еси, о всех же благословлял еси Бога, поя Ему: Аллилуия.

Икос 3

Имея жезл силы, крепость евангельскую, посланную ти от Сиона Небеснаго, святителю, господствовал еси посреде врагов твоих и не дал еси волком, ходящим во овчих кожах, в сердце же носящим яд пагубы, расхитити стадо твое. Темже похвальная восписуем ти сия:

Радуйся, слуго Спаса вернейший.

Радуйся, страже дому Божия бдительнейший.

Радуйся, пастырю Христов честнейший .

Радуйся, поборниче веры, во прениих с ересеучительми муд­рейший.

Радуйся, злочестия арианскаго потребителю.

Радуйся, правых догматов насадителю.

Радуйся, Амвросие, святителю Христов и чудотворче.

Кондак 4

Бурю крамолы, воздвигшуюся на Церковь Медиоланскую, зря, Амвросие, сладкоглаголивою беседою твоею, содействием же Божиим, утишил еси мятеж людский, и тако научил еси чад мира пети Богу: Аллилуия.

Икос 4

Слыша Феодосий царь прещение твое, имже возбраняшеся ему яко убийце внити в церковь Божию, во еже приобщитися Таин Святых, повиновася ти, яко грешник, смиренно кающийся и примирения с Господом жаждущий. Того ради по достоянию возглашаем ти:

Радуйся, Таин Божиих мудрый строителю.

Радуйся, постановлений отечес­ких верный хранителю.

Радуйся, Нафану и Предтечи соревнителю.

Радуйся, законопреступных нелицемерный обличителю.

Радуйся, наставниче покаяния и исправления.

Радуйся, Церкве Медиоланския неумирающая славо и украшение.

Радуйся, Амвросие, святителю Христов и чудотворче.

Кондак 5

Боготечная звезда на тверди церковней был еси, отче Амвросие, светлостию учения и жития твоего мглу ересей разгоняющая и мрак безбожия потребляющая, неверных от тьмы неверия к свету невечернему привлачающая и всех ко спасению путеводящая, поющим Богу: Аллилуия.

Икос 5

Видевше тя медиоланстии людие мудраго пестуна и любвеобильнаго отца пастве своей, святителю, притекаху к милосердию твоему во всех скорбех и нуждах своих. Ты же, милостиве, никогоже отринул еси, но всем всяк помощник был еси, достойный сицевых похвал:

Радуйся, сирых покровителю.

Радуйся, обидимых защитителю.

Радуйся, плененных от варвар избавителю.

Радуйся, от козней сатанинских свободителю.

Радуйся, яко достойно сладостное имя носил еси.

Радуйся, яко воистину сладостен наставник и пособитель всем был еси.

Радуйся, Амвросие, святителю Христов и чудотворче.

Кондак 6

Проповедник вещаемых ти от Ангел к уху глаголов Божиих был еси, святителю Амвросие, темже словеса уст твоих паче меда и сота услаждаху всех послушающих тебе и Богу вопиющих: Аллилуия.

Икос 6

Возсия, аки солнце, свет добродетельнаго жития твоего на земли, богомудре отче, в тебе бо зрим вся елика честна, елика праведна, елика пречиста. Сих ради славяще Святаго Духа, Виновника благих, от силы в силу священнотайне ведшаго тя, зовем:

Радуйся, добродетелей евангельских пребогатое сокровище.

Радуйся, всегдашних воздыханий и молитв, яже к Богу, пречестное святилище.

Радуйся, кротости и смирения боголепное жилище.

Радуйся, терпения твердое хранилище.

Радуйся, церквей Божиих украсителю и пречудный поборниче.

Радуйся, чистоты девственный учителю и неоскудный слез источниче.

Радуйся, Амвросие, святителю Христов и чудотворче.

Кондак 7

Хотя улучити спасение во мнозе совете, смиренномудре, имел еси друга души твоея пресвитера состаревшася и мудра, почитая его, яко отца, и с ним совещался о делех своих; вразуми и нас творити вся с советом богомудрых отцев, да окормлением их спасаеми, поем Богу: Аллилуия.

Икос 7

Знамение евангельския любве к ближнему явил еси, отче Амвросие, егда врагом своим благотворил еси и со грешники кающимися горько плакал еси. Темже ти, яко непамятозлобному пастырю и отцу, болезновавшу о спасении духовных чад твоих, вопием:

Радуйся, незлобия Христова подражателю.

Радуйся, кающимся грешником теплый сострадателю.

Радуйся, Иустине, враждовавшей ти, благотворивый.

Радуйся, злодею твоему руку усохшую исцеливый.

Радуйся, яко весь кротость и любовь был еси.

Радуйся, яко высоты совершенства достигл еси.

Радуйся, Амвросие, святителю Христов и чудотворче.

Кондак 8

Странныя и дивныя силы перст Божий сотвори в житии твоем, святителю, егда умерша отрока воскреси тобою, разслабленную исцели, арианина, почитания ради святых мощей хулившаго тя, бесу преда, безстудную жену сирмийску, уничижившую тя, карою порази. И кто от слышащих вся сия не прославит дивнаго в житии твоем Бога песнию: Аллилуия.

Икос 8

Весь исполнен быв ревности по Бозе, отче Амвросие, таковую власть над демоны стяжал еси, яко ниже к дверем дому твоего приблизитися можаху: огнь бо, исходяй оттуду, гнаше их, яко прах, егоже возметает ветр от лица земли. Толико страшный демоном, угодниче Божий, огради и нашу немощь предстательством твоим от губительных стрел их, да вопием ти сицевая:

Радуйся, от козней лютаго миродержца крепкий верных хранителю.

Радуйся, от злобных слуг его, зияющих пожрети ны, верный наш обличителю.

Радуйся, яко пламень, лица бесов попаляющий.

Радуйся, яко гром, кичение падшаго денницы поражающий.

Радуйся, всю силу его силою Крестною поправый.

Радуйся, нечистых духов от притекающих к тебе отгнавый.

Радуйся, Амвросие, святителю Христов и чудотворче.

Кондак 9

Все житие наше во юдоли земнаго странствования сего исполнено безчисленных искушений и бед, грехов и страстей, воюющих на ны; како убо избыти возможем вечных мук, окаяннии, егда постигнет нас смерть неумолимая, аще не ты, отче, с надеждою нашею — Богоматерию, предстательствовати за ны будеши, поя Богу: Аллилуия.

Икос 9

Ветия многовещанныя видим тобою посрамленныя, святителю: Ария бо хульных последователей препрел еси, Симмаха высокоумнаго низложил еси, мудрецы, иже от востока, глубиною богословия своего удивил еси, и вся верныя учением истинным просветил еси. Темже молим тя: осияй и нас светом богоразумия твоего, да отбегше скверн тлетворнаго духа времене и соблазнов борителя, вопием ти:

Радуйся, душ наших просветителю.

Радуйся, веры православныя поборниче.

Радуйся, велений Божиих учителю.

Радуйся, плевел вражиих, всеваемых в души спящих человек, искоренителю.

Радуйся, яко многих колеблемых неверием в правой вере укрепил еси.

Радуйся, яко догмат о единосущном и равночестном Отцу и Духови Божестве Сына уяснил еси.

Радуйся, Амвросие, святителю Христов и чудотворче.

Кондак 10

Спасение совершенное улучив от привременных бурь и бед, угодниче Божий Амвросие, не забуди нас, потопляемых напастей бурею, но в нихже сам искушен был еси, и нам искушаемым помози, да поем Богу: Аллилуия.

Икос 10

Стену тя твердую и известно утверждение граду твоему и всем чтущим память твою испове­дающе, святителю, дерзаем по достоянию воспети тебе хваление сие:

Радуйся, царей бранелюбивых умиротворителю.

Радуйся, благоденствия отечественнаго хранителю.

Радуйся, яко тобою царю Гра­тиану победа на готы даровася.

Радуйся, яко тобою многим мир от Феодосия исходатайствовася.

Радуйся, яко тобою прощение грехов улучаем.

Радуйся, яко тобою от бед спасаеми, мир с Богом обретаем.

Радуйся, Амвросие, святителю Христов и чудотворче.

Кондак 11

Песнь «Тебе, Бога, хвалим, Тебе Господа исповедуем», паче всякаго воздушнаго органа услаждающую верных, воспел еси в честь Божественней Троице, святителю, ныне же в Церкви Небесней поеши со Ангелы ину песнь Тойжде Троице: Аллилуия.

Икос 11

Светоподательна светильника, еще на земли просиявша невещес­твенным светом, ведуще тя, отче святый, кую достойную похвалу принесем ти, грешнии, коею песнию ублажим тя, недостойнии, о святителю Христов? Един токмо Сведый глубины сердечныя и Рекий: «Аз прославляющия Мя прославлю», — Един Он весть, како по достоянию прославити тя. Обаче ведый, яко человек, нашу немощь, не отрини, яко отец милостивый, и наша убогия, но от искренних сердец приносимыя ти хвалы сия:

Радуйся, Ангеле земный, еще на земли светом невещественным озаренный.

Радуйся, человече Небесный, еще во плоти лицезрением Сладчайшаго Иисуса почтенный.

Радуйся, светильниче Божественнаго света, учением своим мира концы озаривый.

Радуйся, луче мысленнаго Солнца, теплотою любве своея вертоград Его ожививый.

Радуйся, звездо, твердь церковную светло украшающая.

Радуйся, похвало, и доныне Медиолан осиявающая.

Радуйся, Амвросие, святителю Христов и чудотворче.

Кондак 12

Благодатию Небеснаго покрова твоего не лиши нас никогдаже, о милостиве отче, но присно молися о нас к Щедрому Господу, Емуже с лики святых немолчно поеши: Аллилуия.

Икос 12

Поюще чудеса и подвиги преподобнаго жития твоего, святителю, славим кончину твою, еюже мирно отшел еси на Небо, и ублажаем соцарствование ­твое тамо с Богом Вечным. Ты же, угодниче святый, призри с высоты онаго блаженнаго пристанища твоего на нас, плавающих в молве житейских попечений, и к тебе, невидимому окормителю нашему, из глубины души вопиющих:

Радуйся, плавание свое в житейском мори добре свершивый и безценное сокровище веры в безднах его не потопивый.

Радуйся, ко пристанищу райскому безбедно приплывый и венец нетленный от Христа улучивый.

Радуйся, яко тамо ликовствуя, и нас, долу сущих, любовию твоею досязаеши.

Радуйся, яко духом твоим нам выну спребываеши.

Радуйся, яко тобою гнева Божия избавляемся.

Радуйся, яко мольбами твоими к пристанищу горнему направляемся.

Радуйся, Амвросие, святителю Христов и чудотворче.

Кондак 13

О святый и милостивый угодниче Божий Амвросие! Приими с любовию приносимое сие малое, но от усердия приносимое тебе хваление наше, и потщися избавити нас от болезней душевных и телесных, от всех бед и зол, да тобою улучивше Царство Небесное, во веки поем Богу: Аллилуя.

(Этот кондак читается трижды, затем икос 1 и кондак 1)

Молитва

О преславный чудотворче, в скорбех скорый помощниче и усердный о мире к Богу молитвенниче, отче святый Амвросие! Вемы, яко велие ко Спасу имаши дерзновение, предстоя горнему Престолу Его, и сего ради смиренно припадаем ти: молися Ему, угодниче Божий, да подаст народу нашему благоденственное и мирное житие, да избавит от враг видимых и невидимых, от нашествия иноплеменных, от недуга и глада, от всякия скорби и смертоносныя язвы и от всякаго зла; нам же всем, верою празднующим святую память твою и усердно ходатайства твоего чающим, да низпослет вся благопотребная ко временному и вечному житию нашему, паче же оставление грехов, мир помыслов, тишину сердечную, здравие душам и телесем нашим. Ей, святителю Божий, пастырю Христов милостивейший, покровителю наш готовейший! Услыши нас, еще единаго от тебе просящих: буди теплый молитвенник и предстатель ко Господу о архипас­тырех, пастырех и духовных отцех наших, иже немощи наша носят и о нас болезнуют, дондеже вообразится в нас Христос, да сохранит Он, Всеблагий и вся могущий Владыка, дражайшия дни жития их в нерушимом мире и крепости сил духовных и телесных, да приведет нас, недостойных рабов Своих, их окормлением и молитвами, твоим же ходайтайством и заступлением ко пристанищу жизни нескончаемыя, идеже Херувими и Серафими, святии вси с Богородицею и с тобою, покровителем нашим, непрестанными гласы славят Отца и Сына и Святаго Духа, ныне и присно и во веки веков. Аминь. 

ЖИТИЕ
 

Святитель Амвросий, епископ Медиоланский, родился в 340 году в семье римского наместника Галлии. Еще в детстве святителя были явлены чудесные предзнаменования его великого будущего. Так, однажды пчелы покрыли лицо спящего младенца и улетели после того, как оставили на языке у него мед.

После смерти отца семья Амвросия переселилась в Рим, где будущий святитель и его брат Сатир получили блестящее по тем временам юридическое образование. Около 370 года, по окончании курса наук, Амвросий был назначен наместником областей (консульским префектом) Лигурии и Эмилии, но жил в Медиолане.

В 374 году умер епископ Медиолана Авксентий, и это повлекло за собой раздоры между православными и арианами, так как каждая сторона хотела поставить своего епископа. Амвросий, как первый градоначальник, отправился в церковь для поддержания порядка. Когда он обратился с речью к толпе, какой-то ребенок вдруг крикнул: «Амвросий — епископ!» Возглас был подхвачен народом. Амвросий, который в это время был еще в числе оглашенных, почитая себя недостойным, стал отказываться. Он пытался даже ложно опозорить себя, пробовал бежать из Медиолана. Дело дошло до императора Валентиниана Старшего (364-375), приказа которого Амвросий не посмел уже ослушаться. Он принял святое Крещение у православного священника и, пройдя за семь дней все ступени церковной иерархии, 7 декабря 374 года был рукоположен в сан епископа Медиоланского и сразу же роздал всю свою собственность, деньги и имение на украшение храмов, пропитание сирот и нищих, сам же обратился к строгой подвижнической жизни.

Суровое воздержание, долгие бдения и труды Амвросий сочетал с исполнением обязанностей пастыря. Святитель Амвросий, отстаивая единство Церкви, энергично противодействовал распространению ересей. Так, в 379 году ему удалось поставить православного епископа в Сирмии, а в 385-386 годах он отказался передать арианам базилику Медиолана.

Проповедь святого Амвросия в защиту Православия оказывала глубокое воздействие. Об этом свидетельствовал другой знаменитый отец западной Церкви, блаженный Августин, принявший в 387 году святое Крещение благодаря проповеди епископа Медиолана. Святитель принимал деятельное участие и в государственных делах. Так, Грациан (375-383), получив от него Изложение православной веры, убрал, по указанию святителя, из зала сената в Риме жертвенник Виктории, на котором принимались клятвы. Исполненный пастырского дерзновения, святитель наложил на Феодосия I (379-395) суровую епитимию за истребление невинных жителей города Солуни. Для него не было различия между царем и простолюдином: разрешив Феодосия от епитимии, святитель не допустил императора причащаться в алтаре, а заставил стоять вместе со всей паствой.

Слава о епископе Амвросии и его деяниях привлекла к нему многих последователей из других стран. Из далекой Персии приходили к нему ученые мудрецы, чтобы обрести Истину. Фритигильда, царица воинственного германского племени маркоманов, часто нападавшего на Медиолан, просила святителя наставить ее в христианской вере. Святой в письме к ней убедительно изложил догматы Церкви. Уверовавшая царица обратила в христианство своего мужа и убедила его заключить мирный договор с Римской империей.

Строгость сочеталась у святителя с необыкновенной добротой. Наделенный даром чудотворения, многих он исцелил от болезней. Однажды во Флоренции, пребывая в доме Децента, он воскресил умершего мальчика.

Кончина святителя Амвросия, преставившегося к Богу в ночь Святой Пасхи, сопровождалась многими чудесами, крещаемым же в ту ночь детям он явился в видении. Святитель был погребен в Амвросиевой базилике, в Медиолане, под жертвенником, между мучениками Протасием и Гервасием. Их святые мощи и доныне почивают там же, в базилике Сан-Амброджо в Милане.

Ревностный проповедник и мужественный защитник христианской веры, святой Амвросий получил особую известность и как замечательный церковный писатель. В догматических произведениях он отстаивал православное учение о Святой Троице, таинствах и покаянии. В сочинениях о христианской нравственности раскрывал превосходство христианского нравоучения пред нравоучением язычников. Известная работа святителя «Об обязанностях священнослужителей» свидетельствует о глубоком осознании им пастырского долга; в ней содержатся указания не только по ведению церковной службы, но и нравственные наставления служителям Церкви. Святитель Амвросий был также преобразователем церковного пения. Он ввел в Западной Церкви антифонное пение (по восточному, сирийскому образцу), известное как «амвросианский напев»; составил 12 гимнов, которые исполнялись при его жизни. Его благодарственный торжественный гимн «Тебе, Бога, хвалим», составленный в 386 году, вошел в Богослужение Православной Церкви.

По благословению

митрополита Херсонского и Таврического Иоанна